بعد جاء عمو علي من الشغل قمت جهزت الغداء وختيتو وشلت اكلي ودخلت الغرفة جات خالتو نسيبة شاكلتني ليه تاكلي براك ي بتي انتي ليه مصرة تعملي حاجز قالت ليها ياخالتي نحن من كنا في الملجأ معودننا ناكل برانا والمربيات براهم عشان كدا ماقادرة اتأقلم
قالت لي دا هناك بس انتي هنا بتنا التانية وماف اي سبب يخليك تاكلي براك وتاني والله لو عملتي كدا بزعل منك قلت ليها خلاص بس المرة دي وبكرة ان شاءالله باكل معاكم قالت لي طيب وطلعت
انا بعد اكلت شلت صحني وطلعت لقيتهم خلصو شلت الصينية ودخلت غسلت العدة وجيت رتبت المكان اريج قالت لي حياة انتي مستواك كيف في الانجليزي انا عندي مشكلة فيه لو بتقدري تراجعي معاي قلت ليها والله ماشي حالي فيه يازولة مامشكلة نراجع سوا وان شاء الله مايكون عندك فيه عوجة
وفعلا بديت ارجع معاها شوية شوية حسيتها فهمت مني كويس الحمدلله قالت لي تتخيلي انا من الاستاذ مافهمت كدا يازولة تاني مابخليك كل يوم تشتغلي معاي قلت ليها من عيوني لي اختي الصغيرة قالت لي والله طول عمري نفسي يكون عندي اخت انا براي لا اخ لا اخت قلت ليها نحن اخوات ولو محتاجة اي شي انا قاعدة قالت لي تسلمي لي يارب ما اتحرم منك
طلعت مشيت غرفتي المغرب اذن وانا طول عمري ما صليت جات خالتو نسيبة قالت لي يابتي ارح الصلاة قلت ليها وين قالت لي عمك علي متعود يصلي بينا المغرب والعشاء يوميا قلت ليها طيب
المهم قمت اتوضيت ولبست عباية وجيت وقفت معاهم كنت بتابع خالتو نسيبة البتعملو بعملو . بعد خلصنا قلت لي خالتو نسيبة عايزاك في موضوع ممكن قالت لي اتفضلي طوالي وريتها اني دي اول مرة اصلي وماكنت مركزة في الصلاة متابعاك اي حاجة بتعمليها بعملها قالت لي مامشكلة بعلمك شوية شوية براك بتعرفي تصلي قلت ليها ايوا بس صلاة الجماعة دي اول مرة اصليها قالت لي كويس وبدت تعلمني في صلاة الجماعة اعمل شنو والحمدالله اتعلمت
شوية والعشاء اذن وقمنا صلينا اول مرة احس بي راحة كدا
ليه في الملجأ ماكانو بصرو علينا نصلي ليه حارمننا من إحساس الراحة والامان دا
جيت راجعة غرفتي ونمت نومة طويلة لما صحاني المنبه قمت جري اتوضيت وصليت وجيت اعمل الشاي لقيت خالتو نسيبة عملتو قلت ليها ليه عملتيه كان تخليني اعملو قالت لي عمك علي متعود من يصحى للصبح طوالي يلقى الشاي جاهز
المهم شربت معاهم الشاي ودي كانت اول مرة اشرب شاي مع اسرة والله اجمل احساس عشتو في اللحظات دي وبقينا نتونس لمن حسيت الزمن راح عديل جريت جري جهزت وجيت طالعة لقيت عمو علي منتظرني وصلني الجامعة وكالعادة اداني مصاريف
وانا نازلة من العربية شفت استاذ حيدر واقف في باب الجامعة نزلت وجيت قلت ليه السلام عليكم استاذ قال لي وعليكم السلام انتي مش معانا في اقتصاد قلت ليه ايوا قال لي امس القاعة ملانة مابتذكر الاسماء اسمك منو قلت ليه حياة قالت ماشاء الله اسم جميل قلت ليه شكرا استاذ استأذنك قال لي اتفضلي
دخلت الجامعة ومشيت القسم حقنا طوالي ودخلت القاعة دقايق وكان الدكتور داخل القاعة والمحاضرة كانت طويلة لمن كلنا حسينا بالملل ولا الدكتور هو الممل ماعارفة المهم بعد روحنا اتسلت حتى خلص وطلع انا كنت جيعانة جوع جري مشيت الكافتريا طلبت فطور وبيبسي وقعدت براي كالعادة شوية وجات علا سلمت علي وقعدت واتونسنا سألتني انتي ساكنة وين في الاول اترددت تاني وريتها قالت لي ماشاء الله شكلكم مرطبين الحي دا ما اي زول بسكن فيه ضحكت وسألتها انتي ساكنة وين ورتني قالت لي ممكن نكون اصحاب
سكت ماعارفت ارد ليها اصحاب معناها علاقتنا حتتطور وحتكون عايزة تعرف عني اي حاجة وتجي بيتنا وانا ماعايزة عشان مايتكشف المستور الحمد لله قبل ارد عليها جاء استاذ حيدر وقال لينا السلام عليكم ردينا السلام قال لينا مالكم براكم شايف كل المعاكم قاعدين شلة شلة
قلت ليه انا عن نفسي مابحب نظلم الشلليات دا وعلا دي اول وحدة اتعرف عليها واصلا ما اتعرفت على غيرها
قال لي حياة الجامعة مختلفة عن كل المراحل القبلها قلت ليه الانسان الواعي هو البحدد يعيش حياتو كيف ماضروري الناس عاملين حاجة يبقى هم الصح وانا لازم اتابعهم
قال لي عين العقل شكلك زولة مخك كبير قلت ليه الحياة بتعلم الواحد
عاينت للساعة لقيت المحاضرة خلاص فضل ليها خمسة دقايق قلت لي علا يلا واستأذنا من استاذ حيدر ومشيتا ولقينا اصلا المحاضرة معاه هو سبحان الله كانت محاضرة خفيفة وهو طريقة تأديته للمادة كانت بي سلاسة
خلصت المحاضرة وكان بعدها محاضرة تالتة اها بدت وخلصت وانا طلعت طوالي كالعادة على المواصلات ركبت الحافلة والمرة دي ركب قدامي استاذ حيدر ولما الكمساري طقطق دفع لي في الاول رفضت بس هو اصر ودفع وانا كنت متحرجة شديد
شوية ونزل وانا بعد كم شارع منو نزلت طلع ساكن في نفس الحي حقنا
قلت ياربي دا هو الدفع لي امس ولا انا بتهيأ لي لكن انا اصلا امس ماشفتو ولا حتى لما نزل ما شفتو لكن كان الله حيانا بكرة بسألو
وصلت البيت وسلمت على خالتو نسيبة واريج قالو لي الليلة اتأخرتي قلت ليهم الليلة كانو ثلاثة محاضرات ما زي امس
دخلت وغيرت ملابسي وجيت نضفت البيت وكان العصر جاء خلاص اتوضيت صليت ودخلت غرفتي اخدت لي نومة صغيرة كدا جات خالتو نسيبة صحتني قالت لي يلا الغداء قمت مخلوعة مشيت اعملو لقيتها هي اصلا ختتو وقاعدين مستنيني سلمت على عمو علي وقعدت وبقيت اكل وانا خجلانة
اريج قالت لي مالك بتاكلي حتة حتة كدا. اكلي عديل قلت ليها باكل الحمدلله عمو علي قال لي ماتكوني خجلانة مننا ماشايفة اريج دي شغالة كيف ضحكنا وشوية شوية حاجز الخجل اتكسر وبقيت اكل عادي الفصل الثالث من هنا