رواية في ذمة الغريب الفصل الخامس عشر 15 بقلم كنوز

رواية في ذمة الغريب الفصل الخامس عشر 15 بقلم كنوز

عاينت صدك حتى وجهي أحسنه صار حلو بيه نور يمكن من ايد ابوي جي عنده عمامة... جراح واكفلي بالباب يدك هورن ثبرني لبست عباتي واخذت جنطتي وصلت باب الحوش و رجعت اركض

:: هاا بوية نسيتي شي

هزيت راسي لا كضيت جف ايده مسحت بيه وجهي و ع راسي

:: ايدك عافية هلبت الله و ينفتح دماغي عين اليه يومين شما اقرا يطب منا يطلع منا

ابتسم اللي ايد ورا راسي گرب وجهي حباني من گصتي و طلع فلوس حط بيدي

جراح :: لو متأخرة بعد دقيقة اعوفج و امشي

عنبر :: موش اجازة وين تريد تمشي

ما رد عليه انتبهت عليه باله موش يمي اصلاً عيونه اتابع عون من دخل بيتهم بوجه ما يتفسر اخذ سلاح و طلع ع دراجة

و علي ركض لبيتهم هم اخذ سلاح و صعد ورا و راحوا

:: نزلي بساع خل ابوي يوصلج

:: شني ابوي يـ...

:: عنبررررر نززززلي

نتر بيه بصوت عالي و عيونه ع طريق الراحوا منه نزلت بساع وانا ادردم

:: تهدالي اذا ما گلت لأبوي عليك

ما سمعني اصلا بساع شخط السيارة وبس العجاجة ورا

رفعت أيدي اعاين الساعة بـ ثمانية وعشرة عود اوصل و احصل رزالة من المديرة

رجعت كطفت جنطتي من ورا الباب ع حوش.. تذكرت ابوي موجود

:: بوية الحك عون و علي خذوا تفگ ومدري وين راحوا

:: اكيد لخواله راح

گالها وبيده القرآن مسحه غلافه حباه و خلى ع گصته و رجعه بكل تقدير لمجانه ع رف اخذ محفظته و طلع وراهم

وانا ركضت لبيت عمي حاكم دفعت الباب بكل حيلي و طبيت عليهم فضيلة گاعدة بالحوش تندف گطن تريد تسوي مخدة فزت ذيج الفزة ما درت الها بال

دورت ع البنات بعيوني لجحت سجدة گاعدة حدر شجرة السدر تطرز جفية بيضة

عنبر :: ولج سجدة لحكي عون و علي خذوا سلاح و مشوا

هبت فضيلة من مجانها و سجدة جرت عبايتها و طلعت للبستان

عنبر :: وين تلحكين بيهم مشوا يمشون مية والف و جراح مشه وراهم حتى ابوي راح

اتصلت ع غفار تنطي خبر كعدنه وحدة صافنة بوجه الآخرة و فضيلة مثل المحرم بينه ما نگدر نحجي يمها شي

ربع ساعة واجه غفار حضر توثية جبير و كعد جدام الباب ينتظر علي و يتوعد اله جي محذره ما يكض سلاح

غفار :: اذا ما كسرتهن لرجلية اليوم و خليتهن كلايد بركبته انا معتب

بيده نقاله يخابر عليهم يريد واحد يريد حتى يعرف وين راحوا شوية و رد عليه جراح ومثل ما توقع ابوي طلع صدك ماشي لخواله اخذ سلاح وراح وراهم

طكت فضيلة ايد بالثانية بحسرة

فضيلة ::عرفته والله و كتلهم ما دام السالفة بيها عون يعني لخواله بسد محد صدگتي

عون جزعت روحه يتوسل بخواله حتى يدلونه مجان امه وين وما يرضون بحجة زلمتها ما يقبل احد يوصلهم هل مشه الهم بالسلاح هل مرة ،،، فضيلة طلعت بنص البيت وكفت و ذبت شيلتها و رافعة راسها للسما

فضيلة :: اريدنك يا عون يا ابن كون تحير الأطباء بيك منين تروفك

موش محبة بـ علي بس هي تبغض عون هل تتصيد الفرص حتى تدعي عليه لو تحرض الوادم عليه

ويا حاجيتها طلع جدي من الديوانية بيده عباته طاويها و مخليها ع جتفه ،،سمع كلامها شلون تدعي ع عزيز گلبه شال عوجيته و دگ ع ايدها و ظهرها حيل صكت ع سنونها بوجع تكتم آلمها و جدي رفع اصبعه جدام وجهة بتحذير

هاشم :: هل النوبة تجرأتي و رفعتي ايدج و دعيتي عليه نوبة الآخرة ما اخلي الج لا ايد و لا لسان تدعين بيهن اخذي حذرج مني فضيلة الكون كله بجفة و عون لوحده بجفة

سكتت فضيلة زامة شفايفها مغتاظة و تمرغ بذراعها بوجع يمه فد ارتاحيت من طكها جدي دوم اشوفنها تطك سجدة و براءة و تذب حجي يسمم الگلب حتى ترفة و رحمة ما سلمن من شرها

هوسة و ناس تروح و ناس ترد اجه جراح دخل لحجرة علي انشده شكو ما يرضه يحجي يمي سجدة دفعتها حتى تروح ورا

عنبر :: بروح أبوج گلبي راح يطك اذا ما عرفت شصار امشي بساع گبل لا يمشي فوتي نشدي

:: ميلي عني عنبر اخوج لو يبقى اخر واحد بالدنيا ما انشدنه

كوه خليتها تفوت ورا للحجرة و شو هذا اخوي طبگ الباب عليهم عزا شراح يسوي طمغت اذاني ع باب حتى اسمع

ماكو لا حس ولا نفس ركضت درت ورا البيت تصميم بيت عمي حاكم شبابيج الغرف كلها ع ترك و الحديقة ركضت اعاين الهم من الشباج

بيده هوية علي خلاها ع مكتبة ابتسم و مشه خطوات محسوبة صوبها عگدت سجدة جبينها متعصبة

:: شكو سديت الباب افتحه

مسح ع شواربة و ع ثغرة ابتسامة خبث وهي عصرت ثوبها بجفوفها حيل من كال

:: حتى ناخذ راحتنا

عكدت مابين حواجبها تغير الموضوع وبصوت حاد نشدته

:: شكو شصاير ليش اخذت هوية علي

:: اكلج بس بشرط

دارت وجهة تريد تطلع كضاها من ايدها ومنين ما تريد تطلع يسد الدرب عليها اشر ع طرف إصبعه

:: شرط صغيرون هلكدوته بس

:: لا

جان الرفض سابگ كلشي عدها حتى گبل لا تسمع كلامه ترفض

:: ما تردين تعرفين ابن اخوج اللي مربيته ع ايدج و يسميج  يمه شماله و شجراله

;: لا اول وتالي يردون و اعرف

:: احتمال ما يرد الليلة

:: ليش

:: نفذي شرطي و اكولن الج ليش

سكتت وهو زاح طرف شالها شوية وبعدها وكع ع جتافها عيوني نزلت ع اديها شلون ترتجف وتعصر بثوبها حيل

رفع ايده ع شعرها الگصير كلش گرب وجه منها كلش وهي حشرت نفسها بين الحايط و المكتبة

نزل وجه ع رگبتها جر نفس قوي وهمس بصوت هيمان

:: ااخ يا عطرج چن مسچ بهدومج مطبگ

بلعت ريگها بتوتر دفعته رافعة إصبعها بتحذير بوجه

:: احترم نفسك جراح واعرف نفسك انت وين لا تتمادى

رفع حاحبه الها چن يكول الها ما يهمني رجع تگرب وگبل لا يطخها طگته راشدي.. رفعت ايدي اغطي حلگي شاهگة

:: گتلك لا تتكرب اللي ليش ما تفهم ليش كلكم تردون تجبروني ع شي ما اريدنه

:: شنهي سالفتج سجدة كلما اجيسج وجسمج كله يرجف وحتى النفس كوه تجرينه بعد

:: شتريد يعني اقدملك نفسي قبل العرس لهدرجة رخيصة عندك انا

:: لا انت رخيصة ولا انا حيوان حتى اسويها وياج بس انتِ ما منتبه ع نفسج ايدج ما تخليني اجيسها حتى من احجي وياج الخوف ماخذج

:: هاي انا هيج وهذا طبعي ما تريدني طلگ و روح شوف دربك

تكرب الها نقر ب إصبعه ع صدغها

:: طلاگ ما اطلگ فتل و طلعي من اذنج ما يفرگ بينه غير الموت سجدة فهمتي

اخذ هوية علي و طلع وهي لطمت ع وجهه حيل و انهارت طايح ع كاع تبجي ركضت درت الها ربعت جدامها حايرة شلون اروفها گمت ابجي وياها

:: سجدة شمالج لا تبجين عليج الله والله گلبي ينمرد من اشوفنج تبجين

مسحت دموعها بطارف اردانها

:: مابيه شي

:: والله بس يجي ابوي اگله عليه شوفي شيسوي بيه هسه

:: لا لا تگولين لاحد مشاكل تصير بين كل اثنين

ما قبلت اگولن لأبوي ظلينه ننتظر و ساعة تجر ساعة للمغرب و صارت هوسة بره و ندكت الباب حيل حتى الحديد ملتها كام يهتز عبالك تريد توكع انخبصت ماعرفت شحط ع راسي ولا انطوني مجال ادخل اجيبن شي نشت هالقاسمة الله من الحبل خليته ع راسي

و ركضت گبل لا افتح الباب ما اشوفم اله علي فوك راسي طفر الباب ردت افتح الباب جراني من ايدي

علي :: لااا لاا ديربالج تفتحينها

عنبر :: ليش

يلهث بانفاسه وايده ع صدره ينهج يجر النفس كوه ويهز راسه لا،،، بس ما خايف بالعكس يضحك مستمتع فزيت ع الباب من نركعت و صوت غفار صاااح

غفار :: افتح الباب لا اكسرها ع راسك علي

علي :: عمي بس اهدا وخل نتفاهم

غفار :: ولك انا تخليني اتوسل بيهم حتى يتنازلون عنك اليوم اصلخ جلدك عن عظمك

شفت علي شفته صارت زرگة يضرب بقضبة ايده ع صدره حتى يتنفس طلعت سجدة تركض لابسة جادر الصلاة

سجدة :: شنهي هذا الدك حتى صلاة ماعرفت اصلي ولا دريت بروحي شحجيت

طاح علي ع ركبه گلب عيونه و شخطة تطلع من صدره قوية ويا كل جرة نفس و سجدة قطعت كلامها اجته تركض

سجدة :: علي يمه شمالك انتفس اخذ نفس ولج ركضي جيبي البخاااخ

انشدهت ماعرفت بعد شسوي و غفار من سمع طفر من فوك الباب ورا جراح و عون محد فتح الباب و دخلوا لا كلهم طفروا

ركضت لحجرة علي ادور بين غراضة فتحت كل الفاتيات ماكو صوت غفار وهو يصيح زاد ارتباكي

عنبر :: ولج براءة تعاليلي وين البخاخ حاطي

اجتني براءة تركض فتحت جنطة سجدة طلعت منها واحد وركضت الهم واني وراها طايرة راس علي بحجر غفار رأيحة روحه

لكيت عون منطي البخاخ مالته... أكثر من مرة ياله بده الدم يرجع لوجه اعاين لـ غفار وجه مخطوف و يمسح ع صدره

كلها ع اعصابها متجنشة بس من رجع علي يتنفس طبيعي صار هدوء جريت نفس براحة كلبي يدك من الركض

كومه غفار سانده بروحه موش بيده يموت ولا يصير لعلي شي... دخلوا جوه جبت الهم ماي و عون گاعد ومخلي راسه بين اديه كأن ثگل الدنيا كلها طايح ع جتافه

علي صار زين بس سوا نفسه بعده تعبان ومريض حتى لا يحصل گتله و غفار يتكرضم وكل شوية صايح

غفار :: ولك لو مصوبينك لو جاية جيلة بگلبك شكول انا لابوك بيا وجه اوكف جدام گبره وانا ما صاين أمانته

رفع راسه عون يحجي وياه حتى يهدا بس صار العكس ذب نفط فوگ النار

عون :: انا جنت واكف جدامه

ندار عليه غفار و عيونه نطت من الغضب زمخ بيه

غفار :: و انت يا المثقف يا الما تجيس السلاح صانعينك من حديد ما تفويت بيك الجيلة وانا ما ادري

جراح :: ثنين هادين ع سلف كامل بس اريدن اعرف شايلن عقل براسكم لو تنك

علي :: تنك

خزره غفار سوه نفس يكح و رجع مدد بحضن سجدة ويصيح راح اموتن عمة

اجه جدي گايد جدة مخلي جف بجفها و يمشي ع ممشاها مدري شهمس يم اذنها ابتسمت من دخل الديوانية تبدلت ملامحة كلها قسوة و رهبة كال بصوت مغتاض يعاتب عون

هاشم :: انت شعندك مشيت الهم موش گتلك الم كبار السلف  و نحول ع شيخهم حتى يجبرهم ينطونك العنوان

عون : :وينك حاير بين الكاع و بين طلايب كزار

هاشم :: تصبر لحد ما انا احلها هاي أخر نوبة تصرف من كيفك عون

انتفض عون يصيح محروك گلبه

عون :: شوكت اشوفنها ما تكلي مو راح اموت وانا ما شايف امي لك حتى صورة الها ما عندي الها اشوفنها بدرب  ما اعرفها

نزلت دمعته گام اله غفار بساع لمه لحضنه و جراح أشر نطلع گبل لا اطلع عاين الي مقلص عيونه اجه بساع فاتح عيونه ع وسعهن راجعت كل يومي ما مسوية غلط شبي هذا

اجيت اشرد كضاني من ايدي احس اصابعة طكت بالعظم كد ما ضاغط

جراح :: ولج طركاعة هاي شمخلية ع راسج اليوم اجنزج وعلي من الصبح انا متحلف الج

كضيت طرف الهدمة اللي مخليتها ع راسي قماش احمر لماع دفعني بره الديوانية و طبك الباب بوجهي يهز راسه بتوعد انا الج

جريت الهدمة طلعت اتك فضيلة عزززا صخام  شمرته بساع ع حبل خليته حدر الدشداشة و خذت شال لبسته حرمة ارملة شعندج تلبسين احمر و النوب لماع

تذكرت عون شلون بجه نزلت دمعتي عليه ما اتحمل اشوفن زلمة يبجي

عنبر :: جلاب والله لوعوا گلبه ليش ما ينطونه عنوانها و يفضونها

براءة : هسه جدي و غفار يضغطون عليهم و يحلونها

:: تمنيت يوم واحد اصيرن زلمة بيناتنا العباس ابو فاضل اخلي الدم لرجاب و اجيبن اله عنوانها

:: لصمي حلكج لا يسمعج جراح و يخلي دمج لرجاب

عبست و كمت خليت اذنب ع باب حتى اسمع ما افرزن الكلام نداريت ع براءة گاعدة تلگط خضرة

عنبر :: كسر صف من ضلوعي من نزلت دمعته ولج هاي امه براءة تعرفين شنهي ما شايف امه ابد من بطنها لايد جدة حتى حليبها ما ضاگة

:: اعرف والله شبيدي عليه موش جدام عينج جدي ما خلى شي ما سوا وكل مرة يطلعون بحجة اله نوبة زلمتها ما يقبل ابنها يروح الهم نوبة طلعوا للخارج وكله جذب

قطع كلامنه من طلعوا من الديوانية عون هادئ و غفار محاوط جتفه و يحجي وياه يوعده يساعده حتى خواله ينطونه عنوان امه

انتبهت ع جراح عيونه بالنقال و ضحك

جراح :: يگلك مطلعين مالك من الدورة العسكرية بالقندرة

عون :: اي سمعت فاصلينه خلة بالشرف

عكد جدي جبينه و تلقائياً راحت عيونه ع غفار لمعت عيونه بفخر

هاشم :: جا موش گلت ما اتكرب الها هل ايام

غفار :: صارت رگابهم بيدي لو اسحگ ع راس جبيرهم ما يفكون حلوكهم بحرف

طلع جراح ورقة من جيبه يشوفها الهم وكال

جراح :: صدك اجاني بلاغ لازم اروحن انطي إفادة ع جريمة گتل رحاب وانتم اجاكم شي

عون :: اي انا هم لگيت المبلغ حاط ورقة التبليغ الي بالباب

طلع جايهم كلهم بلاغ حتى يرحون ينطون إفادة

رحمة :: الحمد لله من كعدت منتهي كلشي و هدوء وأخيرا  يوم طبيعي ريحة الاكل من المطبخ تفوح و العصافير ملتمة بالشجرة من جلجل الليل

نسمات هوى حلوة تهب احاول اتناسى كلشي ووامحي كل صورة بيها دم من ذاكرتي

الباب مفتوح لمحته بيده صوندة يسحب نفط من البرميل يملي جليكانات و يردد ع لسانه

_ تلكيني انا يمج ابوس ايدج و اكلمج 

_ اوفي وياج الوعود اوفي وياج الوعود 

_ ما مات اليكفلج ولا عاش اليزعلج 

_ راسي برمحه موجود راسي برمحه موجود

ابتعد صار بعيد عن ناظري مشيت اتقرب للباب شفته مگبص يم الساگية غسل اديه و توضه وضوء كامل و رجع بساع ختلت ورا الباب سمعته يخابر

:: هلا جبران شلونك شفتك ما تتصل كلت اخابر انا انشد ع أحوالك

سكت يستمع لطرف الثاني واني اباوع اله من شگ الباب ضحك ضحكة ماكرة اول مرة المحها ع ثغرة

غفار :: اگولن جبران موجود انت بالبستان....... سكت شوية ينتظر و گال... جا خوش انا جاي احرك كيعانكم حتى لا باجر تطلع حجي اجه ومامش زلمة موجود لو تگول اخذتني غفل انا حركات الغدر موش بقاموسي

سد الاتصال وهسه فهمت ع شنو ترس الجلكانات نفط حطهن البدي وشغل السيارة

:: شجاي تسوين ولج

كمزت من مكاني من عنبر مدت اديها عود تخوفني بالشقة وهو اني صايرة من ظلي اخاف

رحمة :: ولج هو اني باقي بين وبين الجنون شعرة و راح تنگطع ع ايدج

:: لا تخافين اذا تسودنتي اخلي ابوي يقرا ع راسج

غسلت وجهي و شربت مي وهي باوعت من الباب ع بستان

:: جا وين غفار ودوني اصيحن الكم ع عشه

:: سمعته يكول لهذا جبران الجلب راح احرك بستانك

:: جذاااابة

:: والله شبيج

ركضت بساع جابت عباية خلتها ع راسها و الثانية بيدها 

شمرتها عليه تستعجلي

عنبر :: بساع بساع لبسي هم ياله نلحگ

:: وين تردين ما اطلع اني بعد التوبة

:: عليج الله رحمة اريدن سبق صحفي الي

:: سبق شنوووو

ما انطتني مجال اخذت العباية بيدها خلتها ع راسي و سحولتني وياها بستان جبران مسافة بعيدة عنهم وصلنه لمحت سيارته واكفة وهو صاعد عن نخلة فوك خلى جلگان النفط بالبلة ونزل

عنبر راق الها الوضع طلعت موبايلها تصور وهو رجع لسيارته طلع رشاشة شكلها حلوة رفعها صوب ع جلكان انفجر و النار نزلت ع البستان گام ياخذ شوية شوية

نزل سلاحه و مشه وين حاطين كاميرات نزع لثامة يشوفهم نفسه واحه ارتجى ع مقدمة السيارة اجوا 

جبران و حفيدة يركضون

غفار :: هاي حتى تصوير صار عندك وانا احرگ البستان واذا انت زلمة سلمه لشرطة

راد يهجم عليه حفيده لزمه جبران مانعة مبين لازم عليهم لزمة ولهذا السبب سكتوا

جرتني عنبر تمشي تهف وياه ما وصلنه طشت الخبر هي فرحانة هذة المرة هي نالت شرف نقل الخبر

براءة :: ورا العشه غفار گالي ارتب الديوانية واسوي جاي  طبيت نظفتها رغم هي نظيفة و شعلت بخور هم النوبة خدرت الجاي و حضرت ضيافة كاملة

اجوا اهل رحمة وهي ما تدري صاحت الها سجدة اخذتها الديوانية من شافت ابوها خطية فحطت بجي شابگته ما تهده

واحنه نعاين الهم من الشباج حضنت اخوانها وشالت اخوها الصغير تبوس بيه وتشمه

رحمة :: لعد رانيا وين ليش ما اجت وياكم

أخذها ابوها من ايدها گعدها يمه عيونه ما ترمش عنها الاشتياق و اللهفة حتى بكلامه واضح الها

ابراهيم :: طلعت حاسبه غلط مخلصة شهرها وما تدري و البارحة دخلوها عملية طارئة

رحمة :: صدك ولدت شلونها و الطفلة زينة

طلع اخوها اللي بعمر علي نقال يراويها صورة الطفلة تباوع الها و تبجي وانا دموعي نزلت الله لا يحرم بت من ابوها

رحت للمطبخ صبيت جاي و طلعت اريد انطيها لغفار لگيته گاعد بره هو و اخوها يعاتبه ليش ما گال اله الحقيقة

عگدت جبيني اي حقيقة يقصد وبعدها نشده

غفار :: وهسه شصار من رحتوا الهم

عروة :: رحنه الهم مرتين حتى نگلة شيوخ من غير عشاير اخذنه الهم قافلين و اول البارحة انطونه مهلة لو نسلمها لو يهدرون دمها

غفار :: يخسون يلوحنها و دم المظلوم اليوصل لهنا اطكه صواب اخلي دمه بطوله

عروة :: اعرفك صاحب نخوة وما تقصر من هيج محد اجه أبالي وگتها غيرك

غفار :: ان شاء الله تنحل لا تشيل هم وانتم اذا ظلوا يضايقونكم بالتفتيش جيب اهلك وتعال هاي بيوتنه جثيرة واكعدوا

عروة :: ماعدنه شي احنه اهم شي هي تبقى ب امان

دكدك غفار ع جتفه بدعم لصاحبه اللي گال محروگ دمه

عروة :: اني ما غاثني الا اهله لنزار جانوا متبرين منه وحتى هي المرحومة ما رايدها چنة الهم من ماتت صاروا يدرون حقوق الها

عگدت حبيني بعدم فهم... يسلموها لشرطة... والا يهدرون دمها... نفضت راسي ابعد كل هل تفكيرات عني طبعي ما انشد ع شي مضموم الا صاحبه يحجي بيه ولا ادور ورا احد

شافني غفار اجه اخذ مني الضيافة

گعدت الصبح ترفة لهذا الليل بطوله ما غفت الها عين تتگلب و مبتسمة كل نوبة تسهر قهر و عيونها تصب دمع

هل نوبة سهرانة من گد الفرح تترقب الصبح چن مؤمن تبوأ قصر بالجنة وكل ساعة ينادي ربه... ربي اقم الساعة

هذا حالها وهي كل شوية تشيل البردة تشوف طر الصبح لو بعده

وياه ما لاح الخط الأبيض بالسما ركضت للحمام غسلت و طلعت مشطت شعرها وجدة سوت الها گصيبة گعدت يم الكنتور نبشت علاكتها مال ملابس و عبست

ترفة :: ماعندي ثوب حلو اتلگاه بيه

براءة :: ليش موش غفار كلما يجيب النه ثياب يحسب حسابج ويانه

ترفة :: عمار هذاك اليوم لماهن كلهن و حرگهن

وكفت حايرة هي ناعمة كلش قياسها موش گريب قياسنه شافت سجدة حزنها

سجدة :: خل شوية يفتح ااسوگ واخلي غفار ياخذنه نشتري الج

ترفة :: مغتاظ مني غفار من امس ما ياخذني

سجدة :: خل يسمعج حتى يجي يطكج بعد

سكتت فرحانة تلوب ما تعرف تركد بمجان حتى ريوكها اكلته هي واكفة وكل شوية تگول لسجدة يله تأخرنا

و صدم اخذهن غفار ما تأخروا ساعة ونص واجوا بيدها كومة علاليك فردشتهن وتشيل ثوب ثوب ترفعه جدامنه

ترفة :: هاا ياهو احلى البسه

اخذت سجدة ثوب ابيض و نقشته ورگ صغار بـ لون كحلي  فتحة الصدر جاية مربع و الحافة دانتيل و الردن هم بـ لون كحلي و ع معصم كشكش

سجدة :: هذا احلى واحد و شوفي البنات شيكولن

رحمة :: اني هم اختار هذا حتى لاگ عليج عبالك مصمم الج

إصالة :: والله عمة انتِ شتلبسين يلوگ الج

دارت بوجه اللي أشرت الها اي ركضت لبسته و اختارينه الها شال كحلي سادة كملت كل شوية تفتح الباب تعاين

صار الظهر وماكو گعدت بيأس و الدمعة بطارف عينها

ترفة :: عرفته غفار يجذب عليَّه حتى ابقى كاعدة هنا وما اروحن لـ اهلي

سجدة :: لا والله ما يجذب عليج حتى انا اعرف و وصيت  محامية وياي تمشي باوراقة جي م كدرت اروحن هل الايام

رجفت شفتها بقهر ما ترضه تصدك طلعت اعاين وياه ما فتحته البار صار هو بوجهي

وانا ابتسمت موش اله فرحت لترفة وهي 

مسحت عيونها تعاين اله بدون ما تتگرب كل ظنها صورته تتراوه الها

التفتن منا منا تعاين اللي تريدني أأكد الها الجاي تشوفه عيونها صدك هزيت راسي الها اي وهو مشه الها شبگها

حاوطته بثنين اديها و تبجي تنشده تريد تسمع صوته تريد الجواب منه

ترفة :: هذا انت فطرس

ضماها لصدره أكثر يريد يضمها بين ضلوعه ورفع وجه حباها من راسها

::  اي انا يا روح فطرس

نزلت دموعي  عليهم والبنات كلهن يعاينن الهم من الشباج وهي كعدت بعد رجليها ما تشيلها و تعتابه

ترفة ::شلون انطاك گلبك تعوفني هيج ظليت ضايعة بلايك حسيت روحي يتيمه بنيه وبلا ابوها

فطرس :: اخر مرة ما تنعاد ولا ابتعد عنج بعد

::  متت وراك والله و الوگت ما يمشي الثانية تمر بدهر بقيت  عايشة ع طيوفك كلما اغمض عيني تجيلي

رفع راسه ليفوك يمنع دموعه تنزل يسحب نفس قوي

ترفة :: يا حنين اهلي شلون انطاگ گلبه تعوفني بينهم هيج اذوني كلهم بغيابك اذوني

:: اشش محد يگدر ياذيج بعد و داعت عيونج راح ابجيهم دم واخليهم يحبون اديج يدورن رضاج

اجه غفار من شافهم ابتسم بس من التفت اله فطرس غضب بوجه

غفار :هاي اختك صاغي سليم استلمتها يله أخذها و روايني عرض جتافك

ضحك اله فطرس گام يريد يسلم عليه غفار فتح ذرعانه اله شبگة

فطرس :: تطلبني وحدة

طگه غفار ع جتفه حيل

غفار :: انجب ما بينه هل سوالف ترفة أخيتي

خذها لبيتهم و يا فرحتها ذيج الما تنوصف شوية و رجعت طلعت بره طلع وراها مستغرب وهي تبجي

فطرس :: ترفة شو عاينلي ليش تبجين اذا ع تراب انا اعاونح انظفه وياج

:: لا موش ع تراب بالعكس فرحانة

:: جا ليش طلعتي 

:: احسن البيت بعد ما يلمني من كد فرحتي احس صارلي جناح يطخ بالسما

جر نفس مرتاح عباله بيها شي نظفوا البيت و علياء و ازل وياهم

ثاني يوم راحوا الولد للمركز ينطون إفادة وجدي راح لفاتحة صارله يومين يروح لأهل الفاتحة والبنات مشن لدوام حتى سجدة رجعت لشغلها حضرت روحي اريد اروح لجامعة

انفتح الباب و دخل قسيم بغضب

براءة :: شكو قسيم شو راجع من وگت هل مرة خير 

ما جاوبني عيونه تفتر بالبيت مدري عليمن يدور وگال

قسيم :: وينها هاي

رحمة :: طلعت ملابسي من الغسالة خليتهن بسلة و طلعت  اريد أشرهن

اجاني قسيم بوجه ما يتفسر وگف كدامي أيدي وحدها ترتجف لزمتها بأيدي الثانية اخفي توتري منه

قسيم :: بشنو متورطة ولج

سؤاله بنبرة اتهام وحدي واگفه گدامه بلعت ريكي بغصة ماعرف شحجي وشگول احجي الحقيقة لو اكذب عليه وهو اصلا من سؤاله مبين عرف كلشي

فزيت من زمخ بيَّ

قسيم ::  مو احجي وياج ما تردين لو صرتي خرسة هسه

وكفت براءة بيني وبينه

براءة :: شكو قسيم شبيك موش عيب تحجي ويا البت هيج

قسيم :: اش ولا كلمه لا تدخلين انتِ

دفعها عني و صد عليَّه

قسيم :: ما تحجين بشني متورطة وجايه لافية هنا

رحمة :: غفار يعرف كلشي

هز راسه أكثر من مرة بسخرية ضحك تك خد بستهزاء

قسيم :: و يعرف گاتلة حرمة وعليج القاء قبض و شاردة من القانون

رحمة :: ما گتلتها والله هي تعبانة واني بس ساعدتها

لزمني من زندي احس اصابعه طبگت العظم

قسيم :: ع منو تضحكين ولج اليوم اذا ما خليتج تزوعين شكو عندج انا موش قس

             الفصل السادس عشر من هنا 

لقراءة باقي الفصول اضغط هنا