رواية قلبان علي حافتي الحلم الفصل التاسع 9 بقلم شذى عبد المكرم
التعارف حصل وانا مكسورة وماف زول اخد رأيي شاهيناز انتي موافقة؟ وحتى عمران ما اتصل لي و هو كنت زعلانة منو اكتر واحد لانو لاخر لحظة كنا سوا كنا بنتكلم مكالمات وبنواصلها واتس لدرجة كنت حافظة دوامو وعرفت نص الحاجات البحبها مثلا بحب انو يشرب الشاي سكرها خفيف اما القهوة لو مزاجو رايق بشربها مسيخة ولو زهجان بشربها بسكر ولمن يكون مبسوط بلبس قميص ابيض بقول دلالة على صفاء البال كنت بحب الفلسفة حقتو دي فبقيت لمن اعمل حاجة ويسألني بتفلسف ليهو ولمن بحكي لي بتفاصيلو مع علا الاتزوجت ومشت خلاص كنت بحس بتغيير في نبرة صوتو بقول ليهو كبير وعوير كدا يجهزو ليك ملابسك هو يضحك ونشتبك تاني بحاول اني الهيهو عشان ينسى ولمن يكون عاوز يستفزني ويرفع ضغطي بلعب بلحيتو وهو مبتسم نص ابتسامة يعني بعد التفاصيل دي كلها يسمع انو التعارف حقي بكرة ما يجي يسألني الحاصل شنو ودا منو وكيف حصل كدا؟ وهو عارف انو ما حأتزوج زواج بالطريقة دي الا لسبب لاني كنت بقول ليهو انا حأتزوج الفارس ابو حصان ابيض كان بضحك فيني ياااخ على الاقل كان يبارك لي مدام كان حاضر التعارف حقي بس للاسف شكلها علاقتنا كانت مجرد تقضية زمن ما اكتر
أما ناس البيت كنت ما بتكلم مع زول ولا حتى أكل معاهم في صفرة وحدة ما بأكل برجع من الشغل وبنوم اسبوع بالحالة دي لحدي ما ابوي كلم امي انو عاوزني مشيت ليهو
__ الحاصل شنو
_ ماف حاجة
__ انتي قايلاني ما شايف ولا شنو . ما رديت كنت بضغط في اصابعي بتوتر
__ انا يوم حصل جبرتكم على حاجة ما عاوزينها؟ . هزيت ليهو رأسي بمعنى لالا
__ خلاص مالك؟ . ما رديت وكنت متوترة شديد
__ ما عاوزة تتزوجي توفيق؟ . هزيت رأسي بمعنى ايي
__ خلاص مالك ما اعترضتي لمن كلمتك؟
_ لانك كنت مبسوط انو الشراكة بينك وبين عمو علي حتزيد
__ هو انتي بضاعة عشان اساوم فيكي؟ انا كنت مفكر انك موافقة لانك ما اعترضتي بس من تصرفاتك باين موقفك . ما رديت
__ دايما كنتي بتواجهيني هسي الحصل شنو؟ هسي بسببك حأصغر نفسي قدام صحبي لو كان رفضتي من البداية ما كان وصلنا للنقطة دي . هنا بكيت ومسكت ايدو
_ بابا انا كنت ما مستوعبة
__ وهسي استوعبتي؟ امشي غرفتك وانا حأتكلم مع علي . كان مكسور مني
_ لالا خلاص ما تقول ليهو حاجة انا موافقة
__ واضح جدا انك موافقة امشي غرفتك . وقام من جنبي قومت ووقفت قدامو وانا ببكي
_ بابا انت زعلان مني؟
__ ايي زعلان شديد
_ ما تزعل مني
__ انا يوم رفضت ليكي حاجة؟ . هزيت رأسي شديد بمعنى لالا
__ قريتي في احسن الجامعات جيتي قولتي لي بابا دايرة اسافر المانيا للماجستير رفضت ليكي؟ بابا دايرة اغير عربيتي حصل قولت ليكي لالا؟ هسي الجد شنو كان تجي تقولي لي بابا انا ما عاوزة اتزوج يوم جبرتك على حاجة؟ . هزيت رأسي بمعنى لالا
__ خلاص مالك المرة دي
_ والله ما رفضت عشان كنت شايفاك مبسوط
__ اذا صينية وحدة ما كنتي بتأكلي معاي دا اعتبرها شنو انا ربيتك كدا؟ . هنا بكيت شديد
_ والله ما قاصدة
__ امشي غرفتك
_ لالا
__ ما داير اتكلم معاكي هسي امشي غرفتك
_ والله اي حاجة ولا زعلك . زحيت منو وقعدت في الكرسي وانا ببكي لمن بتنهد طبعا بابا نحنا بالنسبة ليهو روحو ونفسو ما برضى فينا فما قدر على زعلنا جاني راجع
__ خلاص ما تبكي
_ بس انت زعلان مني
__ زعلان لانو ما واجهتيني
_ والله عشان ما ازعلك بس
__ انتي مجنونة انتي الحتعيشي معاهو ما انا . بابا كان فاهم شديد قومت حضنتو شديد واعتذرت ليهو تاني ورضى عني ورجعت غرفتي وبكيت تاني بعدها غسلت وشي ومشيت غرفة صوفيا وقعت في سريرها وانا مغمضة
صوفيا: العروس
شاهيناز: همممم
صوفيا: يعني خلاص رضيتي؟
شاهيناز: يوما ما حأتزوج يعني يوما ما حأكون عروس
صوفيا: ما قادرة افهمك
شاهيناز: انا حتى روحي ما قادرة افهمها
صوفيا: يا سجم انتي اتكلمي عديل
شاهيناز: اتكلمت مع بابا قبل شوية وخلاص موضوع توفيق انتهى
صوفيا: احلفي؟
شاهيناز: والله . كانت فرحانة شديد
صوفيا: وااااي دا احلى خبر لازم نحتفل
شاهيناز: ورح نأكل ايسكريم
صوفيا: على حسابك
شاهيناز: مادية حقيرة بس تمام . قامت تضحك كنت لسع بعاين في السقف فجأة وقفت
شاهيناز: اول حاجة لازم اتكلم مع ماما بعدها نطلع
صوفيا: حلو . طلعت منها ومشيت لماما
__ ماما
_ نعم
__ اتكلمت مع بابا قبل شوية
_ عملتي الفي رأسك في النهاية
__ ماما انتي المفروض تكوني الوحيدة البتفهميني
_ هسي عيبي لي توفيق
__ ما فيهو عيب والله بس ما حأكون مبسوطة معاهو والله يا ماما انا ما عاوزة حياة رفاهية لانو بابا ما قصر معانا انا عاوزة زول يفهمني ويحبني ذي ما انا وافهمو
_ انتي ما اتعاملتي معاهو عشان تعرفيهو
__ ما مرتاحة للعلاقة دي وانتي ما عاوزة راحتي؟
_والله مدام ما فيها راحتك خلاص
__ ماما ما تزعلي والله ما بهون علي زعلك
_ والله انا عاوزة سعادتك بس ومدام سعادتك ما معاهو خلاص . سلمت عليها في رأسها وطلعت غرفتي لبست ومشيت لصوفيا وطلعنا بعربيتي لفينا واكلنا ايسكريم
_ شيذو وعمران حتعملي معاهو شنو
__ هو ذاتو حيآخد حقو
_ كيف
__ حأتكلم معاهو بنبرة حادة عشان اعرف موقفو من الحصل دا
_ والله حاساهو مكسور انتي ما شوفتي يوم التعارف كان قاعد كيف . سكتا ما رديت قضينا يومنا بمزاج ورجعنا متأخرين وجيت انوم اتذكرت عمران دخلت الواتس رسلتو ليهو بدون مقدمات
__ انت علاقتنا بالنسبة ليك كانت حدها صحن بوش بس صح؟ . الرسالة عملت خطين وقلبي عمل شح معاها لمن الخطين قلبو ازرق اداني جاري الكتابة بقيت منتظرة اتأخر شديد قولت عمران بكتب في شنو ذي دا اتأخر شديد في النهاية الرسالة نزلت
_ كيف يعني؟ . هنا عصبت شديد يعني من قبيل يكتب في النهاية تكون الكلمتين ديل حاولت اهدي نفسي وكتبت
__ واضحة لاننا قبل التعارف حقي كنت حتى زمن نومي عارفو بس من جاك الخبر تاني ما سألتني حتى من اخباري هل انا كويسة ولالا موقفي شنو من الحصل دا
_ لاني ما كنت مستوعب
__ عمران اسبوع كامل ما مستوعب؟
_ والله العظيم للان ما مستوعب . وقفت كتابة مسافة لانو حلف واخدت نفس طويل وطلعتو
__ ليه ما جيت سألتني شاهيناز انتي موافقة؟ شاهيناز توفيق دا منو؟ . وقف مسافة
_ يعني انتي ما موافقة؟
__ جاي تسألني بعد الوقت دا؟ هسي جوابي بفيد بشنو؟ بيفرق معاك؟
_ جاوبي على سؤالي انتي ما موافقة؟
__ ما حأجاوب وما عندك دخل بي تاني نهائي فاهم؟ ولو موتا ما تجي جنازتي . ما رد لي اخد زمن شكلو بستوعب في كلامي دا فجأة جاني اتصل كان منو هو اتخلعت ما رديت فصلت الخط تاني اتصل فصلت وطيرت التلفون ذي ما كان عمل لمن اتشاكلنا وزعل مني ومشيت نومت
الصباح قومت زهجانة شديد ومشيت الصيدلية وبديت الدوام فجأة انا في نص الدوام جا داخل توفيق استغربت وللحظة جاتني خوفة كدا سلم علي وعلى اسراء
توفيق: ممكن نتكلم شوية؟ . عرفت انو ابوي بكون اتكلم مع ابوهو وهو جاي يفهم الحاصل
شاهيناز: ممكن
توفيق: خلينا نمش الكافي الجنبكم دا نتكلم براحتنا . كنت عاوزة ارفض بس قولت ما ظريفة واحسن نحل الموضوع دا وانتهي من فصل اسمو توفيق
شاهيناز: اوكي . طلعت من ورا الطاولة وشيلت تلفوني بس وكنا طالعين من الصيدلية كدا بس لقيت عمران في وشي اتخلعت الصراحة
عمران: السلام عليكم
ردينا: وعليكم السلام
عمران: شكلكم طالعين
توفيق: ماشيين الكافي القريب من هنا . عمران عاين لي مسافة
عمران: ايواااا تمام كنت ماري من هنا وقولت ادخل اسلم على شاهيناز . ما رديت لاني كنت مصدومة وهسي حيفهم انو انا وتوفيق متفاهمين وعلاقتنا حلوة يعني يا شاهيناز عندك حظ جدك ما كان عندو ما عرفت اتصرف كيف
شاهيناز: ما بتقصر
عمران: العفو يا بت العم يلا سلام . وطلع ركب عربيتو وانا وتوفيق مشينا الكافي وانا ما مركزة وبالي مع عمران الجا عشاني ولقى معاي توفيق شكلو كان جاي يحل مشكلة امس
__ داير اعرف سبب رفضك لي . ابتسمت خفيف
_ توفيق انا ما بعرفك فما بقدر اوافق عليك دا عمر كامل
__ بس انتي ما اديتينا فرصة عشان نتعرف
_ اممممم ما شايفة نفسي في العلاقة دي والله
__ عندك زول في حياتك؟
_ دي حاسة بتخصني وبحتفظ بالاجابة لنفسي
__ شاهيناز اديني فرصة خلينا نتعرف احتمال نتفق
_ ما بقدر والله يا توفيق
__ ليه بس
_ ما عارفة وبتمنى تفهمني
__ انا ما بعتبرها رفض حاليا وبخليكي على راحتك حاليا وانتي حاولي فكري عليك الله . ما رديت عليهو
__ السكوت علامة الرضا بعتبرها اجابة خلاص انك حتفكري فيها . ما رديت حسيتو انبسط شوية
__ ما اطول عليكي يلا خلينا نرجع . احسن حاجة انها جات منو رجعني الصيدلية ومشى
اسراء: دا منو
شاهيناز: دا توفيق ود صاحب ابوي
اسراء: أصحابك ديل مالهم كتار كدا . عاينت ليها مسافة
شاهيناز: هو ما صحبي
اسراء: ما صحبك؟
شاهيناز: ايي ما صحبي دا الاتقدم لي واصحابي كتار لقيتيهم وين؟ . كنت متحسسة من جملتها دي
اسراء: ما قصدي كدا
شاهيناز: على كلا ما عندك دخل بحياتي فاهمة؟ . سكتت وواصلت شغلها وانا واصلت شغلي ما اتكلمنا طول اليوم لحدي ما رجعت البيت ............
______________
مر اسبوع على تعارف شاهيناز وانا ما فاهم حاجة حسيت سنين من عمري ضاعت بقيت ما مركز مع اي حاجة لا الشغل ولا ناس البيت وامي بتتكلم معاي كدا ما بتلقى مني جواب بكتفي بأنو انا كويس بس لحدي في يوم اخر الليل نزلت لي رسالة في تلفوني ومن رنة الرسالة عرفتها انها شاهيناز لاني مخصص رنة معينة ليها لانها كانت مميزة في حياتي لازم اي حاجة بتخصها تكون مميزة رسالتها فجأتني شديد بقيت ارد وامسح في النهاية سألتها قاصدة شنو واتناقشنا وكانت جافية شديد وخلتني اعيد حساباتي لانها ما قالت حاجة خطأ المفروض حسب قوة علاقتنا المفروض كان اسألها توفيق دا منو وهل هي موافقة ولالا بس انا كنت في حالة ما بتخليني افكر في اي حاجة ختمت النقاش بأنو تقول لي "" لو موتا ما تجي جنازتي "" هنا سكتا لدقيقتين وانا بقرأ في جملتها دي لانها كانت ذي الخنجر في صدري طوالي اتصلت ليها رفضت فيني تاني حاولت برضو رفضت في الاخير قفلت تلفونها ما عرفت اتصرف كيف ما عارف كيف ومتين نومت وصحيت الصباح مشيت الدوام بس ما فهمت حاجة طوالي طلعت على الصيدلية مع دخلتي لقيتها طالعة مع توفيق حسيت الزمن وقف في اللحظة ديك وزكريات الالم رجعت لي كلها سلمت عليهم وكانو طابعين على كافيه يعني علاقتهم حلوة وانا الكان جاي بذرة امل انو تكون ما موافقة من كلامها الامس قالتو لي بس طلع انا المفسر خطأ اتحججت اني كنت ماري وجيت اسلم وطلعت طوالي رجعت المكتب قولت خلاص هي اختارت طريقها المفروض انساها واركز في شغلي خلصت اليوم بصعوبة ورجعت البيت
امي: يا ولدي انت نهائي ما طبيعي احكي لي مالك
عمران: ماف حاجة امي تعب الشغل بس
امي: يا ولدي انا ولدتك وبعرفك ذي جوع بطني دي
عمران: امي ماف حاجة اقولا ليكي غير ادعي لي ربنا يبرد قلبي بس
امي: قلبك مالو احكي لي ؟
عمران: ادعي لي بس انتي
امي: ربنا يبرد قلبك وما تشوف وجع ان شاءلله ويديك بت الحلال البتصونو ليك ان شاءلله يا رب . هي بكلامها دا ما عارفة انها فتحت علي جروحي الما اتقفلت لانو قلبي غيرها ما داير نهائي
عمران: آمين يا رب . ومشيت غرفتي نومت عشان ما افكر كتير بالليل لقيت رسالة من رقم غريب مكتوب السلام عليكم ما رديت شوية كدا رسل تاني
_ عمران؟
__ اتفضل
_ معاك اسراء صحبت شاهيناز في الصيدلية . استغربت ليه مرسلة لي
__ اهلين اسراء . وسلمت علي وبتسألني من اخباري احترت فيها كنت بختصر فيها اخر حاجة قالت لي
_ قبيل شايفاك جيت الصيدلية ليه ما دخلت سلمت علي؟ . مسحت وشي بأخر نفس وكتبت ليها
__ كنت مستعجل
_و لا عشان لقيت شاهيناز طالعة مع خطيبها؟ . استغربت قولت ليه بتتكلم بكل الجراءة دي
__ لا ما عشان كدا
_ طبعا يومي قاعد يجيها وبطلعو مع بعض وهي طايرة من الفرحة . الرسالة بقيت أشوفها خمسة خمسة قومت حظرتها وجدعت التلفون وطلعت الحوش الجو كان بارد لاننا داخلين على الشتا بقيت قاعد في البرد لاني حاسي نفسي مسخن شديد وبقيت انفض في شعري بقلة حيلة بقيت افكر ليه شاهيناز علقتني بيها وفي النهاية مشت لزول تاني ليه من البداية مدام آمالها مع زول تاني ليه عشمتني ليه ما قادر انساها حتى بعد ما اختارت شخص تاني ليه قلبي واجعني كدا ليه حبيتها للدرجة دي بس ليه كانت بتشاركني تفاصيلي وهي عارفة انها حتمشي لزول تاني وتخليني حسيت دموعي حيخزلني عصرت عيوني شديد بس خزلني ونزل مسحتو سريع ما انا الببكي عشان بت بس لكن هي ما اي بت وبقيت في صراع بين عقلي وقلبي والاسئلة ديك بتدور في رأسي
المشكلة عقلي كان بصور لي الاسئلة دي وهي ما عندها ذنب لاني ما اعترفت ليها وهل لو اعترفت ليها هل حتقبل بي؟ حتقبل بزول ما نفس مستواها؟ قعدت ذي نص ساعة حتى دخلت ورقدت حاولت انوم ما قدرت تاني طلعت برا قعدت نص ساعة تانية وانا ما حاسي بالبرد اصلا ودخلت الغرفة والساعة داخلة على اتنين صباحا رقدت اتقلبت كدا ما قدرت روحي كانت واجعاني شديد مسكت تلفوني اتصلت على شاهيناز .........
"أكبر خطأ ارتكبناه بحق أنفسنا حين توقعنا أن يضعنا الآخرون في نفس المكانة التي وضعناهم بها، وأن يبادلونا اللهفة والود كما نعطيهم، توقعاتنا المبالغ بها هي من جعلتنا نتجرع مرارة الخيبات."💔💔. الفصل العاشر من هنا