رواية في ذمة الغريب الفصل الثامن عشر 18 بقلم كنوز

رواية في ذمة الغريب الفصل الثامن عشر 18 بقلم كنوز

يِلوموُني ؟

وَ أحِسك تُكبَر بِروُحي وَيلوموُني 

وَاناَ بَلا شُوفتَك شِينفعَن عِيوني .

━━━━━━━━━ ⚖ ━━━━━━━━━

براءة :: جان الجرف عبارة عن مصيدة من طين وزلگ

وهو دفعني صرت ع حافة كلش غرست رجليه بالگاع حيل و ندارت اله

::  فطرس شبيك راح اطيحن بالماي 

​ما  جواب بس ابتسامة جنون شگت حلكه بوسط بالظلمة و بصوت اجش عميق عبالك صوت طالع من وسط بير.. گال 

:: هو انا اريدن اوكعنج 

وبلمحة بصر دفعني بقوة أكبر من القبلها فقدت توازني وطحت شهگت من برودة الماي و برمشة عين 

​غصت كلي بوسط سواد ماله قرار رغم اعرف اسبح بس الماي بليل يرهب النفس 

الظلام دامس لدرجة ما ميزت عيوني مفتوحة لو مسدودة، عبالك طحت بـ بير أظلم، كمت اهمش بـ إديه بالفراغ والهلع سيطر على كل ذرة بكياني 

فكرة إنا بوسط النهر بليل خلتني أرفس بكل قوتي لحد ما دفعت نفسي ليفوك 

​شهگت اجر النفس چن أول مرة أتنفس صوت المي بـ أذني  مرعب، وشيش يرهب النفس 

مسحت المي عن عيوني وهو جان مكرفص على طرف الجرف عبالك ينتظرني

يعاينلي عليّه ببرود وكلما اتگرب اريدن اطلع يدفعني الماي صحت بيه وسنوني يطگن واحد بالاخر من البرد 

:: شمالك تسودنت والله اذا ما خليتني اطلع هسه اصيحن والم الوادم عليك 

:: شعندج طالعة بهل ليل ما تخافين ابن حرام يسويلج شي 

:: بستان اهلي وكلها گرايب وعرف ياهو يسويلي شي 

عض باطن خده وميل راسه صوبي يهمس بصوت خافت يتلاعب بحباله الصوتية بطريقة تخلي صوته يرهب 

:: ولان گرايب و عرف لازم تخافين الغريب ما يعرفج ويأذيج 

::تقصد نفسك اكيد 

جكجك حلگه بنفي مد ايده دفعني ع ماي وگال 

:: تؤ اقصد حيدر 

رغم البرد من كتر عليَّه من برودة الجو و الماي و الخوف كلامه نساني كلشي وخلاني اركز وياه 

:: حيدر ابن عمتي انعام؟! 

هز راسه وانا نفيت شكوكه بثقة و يقين بعمتي و تربيتها لاولادها سواء حيدر او امين 

:: مستحيل حيدر اخو خيته ما تجي منه العيلة لو الشينة و. 

قاطع كلامي عيوني مفتوحة ع وسعها جراني من ياخة ثوبي گربني عليه خوفي منا تعدى خوفي من كلشي بهذيج الساعة 

:: اسمه لا تلفضينة ع لسانج بعد لا اجرنه من نص بلعومج واگطمه الج 

هزيت راسي اي وكاضة ايده اريده يهدني 

:: وبيت انعام ما توصلينه ابد هم 

:: اي 

هدني دفعني بغمج الماي ونهض ينفض بهدومة و بلل ايده يعدل شعره اريدن اطلع رجلي تشنجت من برودة الماي 

:: هاا ما تكدرين تطلعين اي خليج هنا حتى اتوبين و تحرمين طلعة الليل 

عافني ومشه دموعي نزلت بخوف السما ظلمة تعكس ع الماي من خوفي صرت احس واحد يجر برجلي من حدر الماي 

:: فطرس... لا تعوفني اخاااف والله 

مشه بطريقه بيده سبحة يفرها و يدندن ثگلن رجليّه هينوب وكامن يسحبنه أكثر اهمش بطين الجرف من حلاة روحي يجي بيدي 

:: فطرررررس راح اغرگ والله لا تعوفني 

بعد ما شفته راح اختفى بالظلام بين الشجر ادور براسي منا ومنا اصيحن وصوتي يتردد صدى بالسكون راح اموتن هنا لوحدي 

:: علوية 

صديت براسي بساع و لهفة من شفته رجع وگف بعد خطوات عني... نظراته شكله... نبرة صوته كلها تغيرت و رد طبيعي 

اجه صوبي يركض زلگت رجله بالطين كض بجذع النخلة ومد ايده الآخرة الي 

جراني طلعني جسمي يتخاضف برد نزع قنصلته ذباها عليه صفن ثواني و يدور بالگاع شال حجارة جبيرة و طگ راسه بيها حيل.. نوبة... وثنين و تلاثة مستمر يطگ 

نفضت المقصلة عني زحفت اله كضيت ايده اخذ الحجارة عنه 

:: فطرس كافي والله عگلي راح يطير كاااافي 

:: اذيتج انا مو.. هاي انا دفعتج بالماي؟ 

ينشد عبالك ما يدري بروحه هذيج اللحظة ولا واعي لتصرفة 

طگ بيده ع راسه طفار الدم صار عليَّه و جوهي و ثوبي نگاط 

:: موش انا والله.. انا ما اذيج علوية هذا واحد يصيح براسي يريدني اذيكم 

زحفت ليورا ونهضت بخوف اريدن ابتعد عنه اتعثر بثوبي و اطيحن سمعت دبدبت خطواته وراي وكض طرف ثوبي 

:: علوية والله موش انا هذا هنا واحد گاعد براسي و يصيح 

:: اي اي بس عوفني امشي حباب 

هد ثوبي و عيونه فارغة من الحياة هز راسه بلا معنى و مشه صوب النهر وانا ما عولت هميت امشي سمعت صوت الماي اعاين اختفى 

شمر روحه بالماي وبعد ما طلع بين اشرد بين ارجع اله... يمكن صدك ممسوس وهل تصرفات موش منه 

ركضت اله ثوبي جي تبلل صار طويل يعيق حركتي طحت ع ركبي بالطين ع جؤق 

:: فطرس اطلع وينك... ما اذيتني هاي هي بس اطلع 

اعاين ع ماي روجات تتحرك وهو ماله أثر نبك راسه من غير مجان 

:: سامحتيني علوية 

:: اي والله اي سامحتك بس اطلع 

سبح يتگرب وصل الجرف مديت اله غصن جلب بيه و سحبته جي الجرف زلگ ما يسيطر 

طلع يرجف من البرد رجع خصلات شعره الطويل ليورا و گال 

:: اعتذر علوية والله موش بيدي حتى ع ترفة اخافن من روحي لا ااذيها 

هزيت راسي اي بدا الخيط الأبيض يلوح بالسما گرب يطلع ردت امشي وكفني

:: بعد لا تطلعين بليل انا موش واعي لنفسي اخافن أأذيج 

:: اي 

انتهيت ع راسه جرح يخوف ع صدغة و الدم يجري ع خده ملطخ رگبته دم ردت امشي وهو بقى بمجانه 

:: سامحتك والله روح للبيت خل ترفة تضمد جرحك 

:: لا ما اروحن للبيت ترفة تخاف من الدم 

:: روحي للحديقة مالتي انتظرني ابدل ثوبي واجيك 

هز راسه اي و مشه للحديقة وانا رجعت للبيت فتحت الباب ع كيف اعاين بالحوش لا أحد گاعد و يشوفني 

طبيت امشي ع أطراف اصابعي فزيت من نفتح باب المطبخ و طلعت سجدة بيدها عبايتها تريد تلبسها من شافتني ذبتها ع قنفة زاجتني 

:: وين جنتي گلبت البيت عليج ا.. 

بترت كلامها من شافت حالي اجتني بخطوات متلفهة تنشد بقلق 

:: شمالج ليش ثوبج مبربع ماي وين جنتي 

:: ظلمة ما اشوفن و طحت بالساگية 

:: و شعندج طالعة بليل براءة لا تخلبيني عليج عمار لا عبالج فطرس طرده تره يجي نوبات  مدري يسويلج شي مدري يعتدي عليج براءة لا تخبلينيييي عليج 

تحجي و تطگ بيه بيدها ع ظهري حرگة گلب و جرتني  للحجرة ما فگبت حلگي بحرف عبن اعرف تصرفها نابع من خوفها عليَّه لا ينعاد ماضيها بحاضري 

طلعت ثوب ثخين من الكنتور شمرته عليَّه بدلت و جابت منشفة تنشف بشعري و عصبيتها مبينة بحركتها شعلت شعري و تدردم عليَّه 

شعلت الصوبة و جابتها حذاي 

:: كعدي هنا ولا تطلعين بعد 

هزيت راسي اي ومديت اديَّه ع صوية اتدفى تگرب أكثر جن جوابي ما عجبها 

:: براءة ما اشاقة وياج وعلي اذا طلعتي بعد لوحدج اكولن لغفار عليج اخلي يتصرف وياج 

:: ما اطلع سجدة شبيج 

عافتني نغتاظة و راحت الديوانية لجدي جريت بطانية تلفلف تذكرت فطرس عفته بالحديقة گمت بساع اخذت تعقيم و گطن و طلعت اتختل لگيته 

صدك ينتظرني بقيت واگفة بالباب اجول بعيوني عليه اتأكد بعده طبيعي من تأكدت 

:: تعال اكعد هنا خل انظف الجرح الك گبل لا يجي احد 

گعد ع مجموعة سنادين فارغة مخليتهن وحدة ابطن الآخرة بللت الگطن بالتعقيم نظفت الجرح من الدم المتجلط عليه و حطيت اله لزگة 

:: الجرح غميج يمكن يحتاج خياط شوف عون اذا موجود روح اله 

:: موش هنا اليوم خفر بالمستشفى 

همهمت اله و لململت الغراض بساع من التوتر اشلين شي يكع شي مني اخذ العلاگة حطاهن كلهن سوه ومدها الي 

:: انتِ طلعي وانا بعدج اطلع اخافن يشوفنه احد و يطلع حجي عليج 

هزيت راسي اي و طلعت بساع و اتلفت منا ومنا و اعاين ع بيبان لحد طالع رجعت للبيت بساع ركضت للحجرة 

عنبر :: الليل كله اتگلب رهمت انامن يم البنات دفرت الغطه وگمت من اذن صليت و طبيت للمطبخ سرفنت رداناتي بحماس وخذت السجينة اريدن اگشر بتيتة زعم 

:: هاا بويه ع شني ناوية 

:: اسويلكم ريوك من ايدي 

تگرب يمي اخذ البتيتة و السجينة مني ينزل ردان ثوبي مبتسم 

:: لا حبيبتي ما اريدن اتعبج انتِ كعدي وانا اسوي 

:: كول ما تحب طبخي و اكلي ما ينكال ووفصها 

ابتسم تكري حاوطني بيده يحب رتسي 

:: لا بوية السم من ايدج عسل ع گلبي بس انا ما اريدنج تتعبين اهتمي بدراستج وبس 

:: امممم راح اسوي نفسي صدك رغم انا اعرف طبخي حتى للخرفان انطيته ما كلنه 

ضحك يحاول يقنعني ما اطبخ بعد بدون ما يخدش مشاعري بدا يسوي الريوك هو 

:: شوفي اخوج وين خله يجي يعاوني 

وكفت صافنة بكلامه اتخيل نفسي كاعدة وحاطه رجل ع رجل وهمه يطبخون اللي صفكت اديَّه بحماس 

:: هسه اصيحنه الك وانا احطن كرسي واكعد هنا عود أميرة مدللة 

:: موش عود بوية انتِ صدك اميرتي و بنتي المدللة 

احسن روحي صرت ريشة اريدن اطير بالسما من كد ما كلامه دغدغ گلبي من جوه.. 

طلعت اركض ادور جراح باب الحوش مفتوح وضوه خفيف اكو تگربت لگيته گاعد ع دجة يراسل وانا فوك راسه خنست حتى صوت انفاسي كتمته 

انتبهت من وكفت الضوه انحجب هسه اكيد أكو احد موجود ميلت جذعي ورا الباب و مديت بس راسي شوية 

يراسل سجدة كاتب الها 

"" مو گلتي اخذ حگي منك و ادعمنك نزلي موش زلمة اذا ما وكفت جدامج "" 

صارت علامة قراءة قرت وما ردت عليه رد هو كتب الها يستفزها حتى تجاوب 

" تكولين جلمتي وحدة ما تصير ثنين طلعتي بوخة بس حجي" 

تقرا وما ترد عدل كعدته يسحب اخر نفس من الجكارة و ذب الگطف سحكة بحذائه يطفي وكتب الها 

" السلف كله يحجي بيج بنت حاكم الجبيرة ماتعوف حگها ابد طلعتي ما تستاهلين الصيت ولا تستاهلين يكولون عنج بنت سيد حاكم عمي الله يرحمه جان يدك الحديد وهو حار "" 

دقايق و صد راسه صوب بيت عمي حاكم من سمع الباب نفتح ابتسم ضم نقاله بجيب ونهض من شافها طلعت راح تسرسح الها صاروا بعدين ما اشوفهم ركضت لسياج گلب السطل وصعدت اعاين همزين گريبين اسمع صوت و صورة 

جراح ::صايرة خطابة و تجمعين راسين بالحلال جا ما الله يهديج عليَّه نسوي العرس و تجمعين راسي ويا راسج ع فرد مخدة

يحجي و يتگرب الها لحد ما طحت بالسيارة جاوبته بنبرة گوية 

سجدة :: احطن جيلة براسي ولا احطنه يمك ع نفس المخدة 

ضحك مستمتع عبالك تغزلت بيه اعرفنه اخوي يحب الگوية يمكن لو سجدة تغزلت بيه يزعل

:: هم صدك شنسوي المخده انومنج ع أيدي 

تخربطت احوالها دفعتها عنها رادت ترد البيت صاح وراها

:: هاا شنهي ما تاخذين بثارج بلور 

:: اذا انت زلمة ظل واكف مجانك 

هز راسه اي شمر عليها مفتاح السيارة من بعيد لكفته وگال الها بتحدي 

:: واذا انت مره و من ظهر زلمة سويها 

هزت راسها بتوعد صعدت السيارة وهو عدل وكفته  مبتسم يظن ما تسويها 

وانا تحمست وكفت ع أطراف اصابيعي ومديت راسي أكثر اعاين شغلت السيارة و حركت وهو ما تهزهز من مجانه 

شهگت من دعمته طلعت الهم اركض جراح طايح ع بالگاع كاض جتفه وهي نازلة وجاية يمه تبجي 

عنبر :: يا يمه راح اخوي تكسرت اعظامة ا

اشرلي بيده بمعنى اش و ابتسم الها كاتم وجعه 

جراح :: سويتها صدك بلور 

سجدة :: انت جبرتني.. شو كوم خل اخذنك للمستشفى خطية عنبر راح يوگف گلبها 

:: تكتلين الكتيل و تمشين بجنازته 

:: وانت موش دعمتني و جبتني للبيت حتى للمستشفى ما اخذتني ع اقل انا راح اخذنك اداويك 

كض جف ايدها حباه وهي مثل الي نتلت بكهرباء بساع انتفضت ساحبة ايدها منه فزينه كلنه من طلع غفار عاگد ما بين حواجبه من شاف جراح اامد ع تراب 

غفار :: شكو شصاير هناه 

سجدة :: طلعت بالسيارة وطلمة ما شفته دعمته 

هز راسه ما مقتنع عاف جراح ع تراب يحقق وياها 

غفار :: و شسوين طالعة بالسيارة من غبشة 

سجدة :: ردت اجيبن الكم صمون حار لريوك 

رفع حاجبة الها مد ايده لـ جراح ساعده ينهض نفض عنه تراب و دگدگ ع جتفه وظهره حيل 

غفار :: وانت شمالك سنحت گومي كلشي مابيك 

صاح اخوي بوجع و غفار رد يريد يطكه وكفت جدامه مشرعة اديني وعيوني مغورگة بالدمع م

عنبر :: شبيك غفار جتفه يوجع والله تره انا احبنكم بس هذا اخوي تره لا تأذونه 

جراني جراح من جدامه مبتسم الي

جراح :: روحي للبيت مابيه شي 

عاندت بقيت حذاه تگرب اله غفار هل مرة جاسه هل نوبة ع كيف 

غفار :: شنهي عود صدك تأذيت من سيارة ؟

جراح :: لا يا خوي تأذيت شني عن الحلال و الحرام يمكن انا دعمتها موش هي 

:: ديله امشي اخذنك للمستشفى هسه يشكلون الك مغذي تصحى ولو انا اشوفنك مابيك شي 

جراه من ياخته لسيارة وجراح غمز لسجدة يطمنها عليه عود تحركت هي تريد تصعد گالها غفار يحجي من بين سنونه 

غفار :: ووووين  

سجدة ::و الصمون 

غفار : سجدددة

ابتعدت عنهم بساع راحت صوب البيت تدردم 

:: طبيت طبيت لا تصيح 

شغل السيارة و راحوا وگفت سجدة تعاين اثرهم صدت الي 

:: تعاي فوتي مابيه شي هسه ساعة زمان و يجون 

مشيت اريدن ادخل بيتهم تذكرت ابوي 

:: لا ابوي سوالي ريوك اكل ويا واجيكم 

عفتها و ركضت رديت لبيتنه ما گتله الصار عبن موش شي جبير و جراح زين هم 

رحمة :: صحيت الصبح ع صوت العصافير بالشجرة

رفعت أيدي گدام وجهي اباوع للخاتم المس الحجر  

رغم ماعندي اهتمام بالاحجار بس هذا من أول يوم شفته بـ اصبع غفار جذب نظري و البارحة سجدة من شافتني أطيل النظر اله رضت فضولي وگالت الي اسمه در النجف 

گمت لميت فراشي البيت هدوء الشبابيك مفتوحة و ادخلة الشمس مدفية المكان 

غسلت وجهي ريحة هيل معبية البيت القوري مخلي ع جهة ع صوبة حتى يبقى حار صبيت كوب و كعدت ع كرويتة الخشب بره 

اشرب ؤمر ع بالي شريط الصار وياي بهذة اليومين سبحانك ربي كلما اگول هذة نهايتي  يمد الي حبل النجاة

متمثل بـ إنسان... غفار يصلح ما يفسده غيره و يرجع الاطمئنان لگلبي 

انتبهت لروحي اني ليش مبتسمة ضربت خدودي امحي ابتسامتي وگمت فتحت الباب هوى حلو  طلعت اتمشى 

خرير المي وهو يجري و ريحة التراب عليه المي 

احسن حتى عقلي صفى سمعت صوت صياح و عركة ما اجه أبالي الا قسيم جاب الشرطة عليَّه ما لحگت اوصل للبيت حتى ختلت بصريقة الحيوانات 

 اسمع صوت يصيح بس ما افرزن كلامه شنو ظليت خانسة بالركن الشمس صارت بعيوني لان الصريفة بيها فتحات كبار و الخوف گتلني  اجت نعجة صغيرة صفنت بوجهي و صاحت مييع 

:: اشش مو امج اني هذيج امج روحي لها 

حجيت أأشر الها ع طلية جبيرة ظلت صافنة عليَّه تقربت الي حيل ثنت رجليها و خلت راسها بينهن و نامت شلت طرف عباتي ذبيته عليها خطيه يمكن بردانه 

:: رحمة 

  انفتح الباب و صوته ينده بـ اسمي وبس شفته دخل نزاح شكو خوف جان جاثم ع صدري اخذت نفس مرتاحة 

رفع حاجبه مستفهم من شافني گاعدة هنا عصرت طرف رداني بيدي متفشلة 

:: سمعت هوسة... عبالي قسيم جاب عليَّه الشرطة

تقرب يمي بهدوء، لحد ما وكف گبالي

طوله غطى ع طولي، وظله انسدل عليَّه حاجب الشمس ، حسيت روحي أصغر كلش گدامه

.

رفع إيده ببطء، ولمس وجهي بـ إبهامه يمشيه ع طول حاجبي مثل كهرباء سرت بجسمي 

:: ياهو هذا اليگدر يخوفج ويزعزع أمانج وانا موجود

نبرة صوته نزلت بگلبي طمأنينة غصب.

باوعتله ساكتة وكلما ياخذ خطوة بتجاهي أحس نبضي يتخربط 

مال عليَّه وبلا وعي غمضت عيوني مرتبكة حسيت من طبع بوسه ع جفن عيني ولحيته دغدغت وجهي ونغزتني وگال  

:: الله ع يا زينة جازاني ورزقني إنتِ

ارتبكت من كلامه أكثر گلبي صرت اسمع دگاته ونزلت عيني بسرعة للگاع بس فضولي غلبني ورفعتها أباعله مرة ثاني

ابتسم إلي بهدوء و نبرة صوته خشنة و هادئة بنفس الوقت 

:: لا تعاينينلي هيچ... هو آني ضايع

ضحك بخفوت، ومد إيده إلي شابك أصابعه ويا أصابعي بثقة

طلعنا سوه ومشيت وياه بخطوات مترددة أحاول أرتب دگات گلبي وهو ضحك 

::  الله شحلات الحلال

حرارة وجهي زادت أكثر احس روحي اريد اختفي خطفت نظرة اله معبسة بوجه وهو گال 

:: لا تعاينلي هيچ... والله من جنت أتوضه من أشتاگلج حتى بتفكيري ما لوثت صورتج

هد أيده من ايدي خلاها بظهري و بخفة ايده قدمني امشي گدامه خطوة ويحجي وياي 

:: بعد لا تعدينها و تختلين ما اريدنهم يگولون حرمة غفار تخاف احد.. امشي ع طولج وانا وراج والبي زود خل يوصلج عود

أشرت براسي اي صوت رسالة لموبايل قراها و جعد جبينة مستغرب 

اجوا الولد بتجاهنه وصلني للبيت وكعدوا كلهم بالباب  و مبينين من فتحة سياج السعف هذة الفتحة مسويتها عنبر من تريد تعاين 

جراح :: هسه غير تفتهم شدزلك 

غفار :: كاتب اذا اموتن حتى خوات ماعندي يصيحن  وراي

جراح :: هو موش خلص دوامه هسه شو لسه ما اجه وين ولى 

غفار :: اذا طلع رايح لخواله الا اجتفه لشباج هل نوبة 

فطرس جان گاعد و بيده عودة يابسة يخط ع تراب بيها رفع راسه وگال يضحك 

فطرس ::  هسه خله يموت و عود انا انطي ترفة دين تصيح ورا حتى اخليها تمد راسها من الجامة وتصيح من بغداد لحد النجف شريد بعد و بلاش هم

جراح ::  وانا عندي بدلة امس جبتها من الخياط قماش من هذا الغالي صارت عليه بذيج الحسبة خله يموت و ارعطها من الطول لطول عليه يرخصله القماش و الخياط

خزرهم غفار سكتوا ثنينهم صارت عينه بعيني من الفتحة اجه بساع سدها و راح هو وجراح يدورون ع عون صاحب الرسالة 

براءة :: هل اليومين ما دوامت كلها الطلاب كعدت حتى ندرس گبل امتحانات نص السنة ولحد هسه كلشي ما قريت امي كلما تشوفني وصاحت ما طولج كاعدة سوي هاي و ردي هاي 

اخر شي خلتني اغسل الزولية الجو بارد ثلج احس رجلي صارن كصب خليتا توشل مايها 

و ركضت يم الصوبة ادفى شميت عطر العود عرفت امي اريد اطلع 

لبست عبايتها الزينة و تعصبت فوگ شيلتها هم وترست روحها من عطر العود 

فضيلة :: هذا العجين اختمر عود خبزي 

گالت كلامها و اخذت جنطتها حدر ابطها و طلعت تخابر بخالي من عقد غفار وهي ما تحجي وياه شلون ما أخذ بنت خالي 

كعدت شنگت و طلعت اريدن اخبز التنور صاير ورا الساگية ومدري ياهو شايل العبرة دنگت ع كاع نزلت صينية العجين 

::  اعبرنج علوية 

گالها فطرس وهو جاي صوب خفگ گلبي بين ضلوعي مثل جنح اليمامة لسه الخوفة بيه منه شفته تگرب مني جثير بيني وبينه خطوتين بس صحت بيه 

::  قليل ادب والله اكولن لجدي عليك اخلي  يودي جلدك لدباغ لو عرف بسوالفك وياي 

بلعت ريگي بخوف من ضحك بجنون نفس هذيج ضحكته يم النهر 

اديه عرگت و الصينية اريد تزلگ مني گوه كاضتها انمحت بتسامته و تگرب بساع گبل لا اصرخ اخذ الصينية مني وگال 

:: شمالج ترجفين حتى الصينية راح تگع منج شنهي تمرضتي من الماي البارد 

:: لا و روح مناه ما اريدن اشوفنك 

:: هسه اعبرنج لو لا 

::  لا 

::  شنهي تستحين مني نسيتي شلون جنت اشيلنج بصغرج و اعبرنج هيج هيج 

ضم اديه لصدره يمثل شلون جان يشبگني و يشينلي وع ثغرة ابتسامة  وكمل يشرح صوت و صورة 

:: هيج احطنج ع فادي جنت و اضب اديه عليج لا تطيحين و اعبرنج 

:: كافي ما تستحي سالفة قديمة و جنت طفلة وكتها ووو

كمت امتمت من الفشلة ما اعرف شحجي حرارة صارت بوجهي أحسنه صار نار 

:: وشنهي هسه عودن كبرتي ؟ 

::  و تكول انا خوش زلمة طلعت هاي حقيقتك واحد سافل ماعندك مستحى ولا غيرة 

:: هسه قابل شكلت غير جاي اذكرنج عبالي ناسية يله عذرينة علوية بعد ما تنعاد النوبة اكض لساني من احجي وياج 

راح يمشي شوية واجه بيده الشلمانة خلاها كدامي ع ساكية 

::  تفضلي علوية جسر لطيبن انا 

عبرت جزيته و فتت اسمع صوته يدندن و يمشي وراي 

:: شعندك جاي وراي 

:: اشعلج التنور اخافن عليج لا تتحركين 

:: وشنهي شايفني جاهلة ما اعرف اشعل النتنور 

طردته حجيت عبالك احجي وياه نفسي جاب حطب كسره و ذبه بالتنور وشعله بقى واكف لحد ما خفتت النار وبدأ يجمر ياله مشه 

عكدت جبني من راح صوب ورشة غفار 

:: وين رايح غفار ما يقبل احد يدخل الورشة 

ندار الي براسه مخلي ايده ع گصته من الشمس و يسولف 

:: اريدن سجينة حادة العندي  كلهن عميات انا راح اخذ وانتِ گليله عن الحلال و الحرام 

عافني وراح بديت اخبز وعيني ع ورشة طلع بيده سجينة جبيرة كاضه و يمشيها ع خطوط ايده عبالك يشوف حدتها تجرح او لا 

وگف مقلص عيونه من شاف عمتي انعام طلعت بيدها صينية اكل مغطيتها و راحت تمشي صوب بيت عون فتحت الباب 

و دخلت ابتسم بجنون و راح وراها بقيت اراقب الوضع ما اشةف اله الصينية نشمرت هي و زادها من ورا السياج

و طلع عمتي انعام سحل من عباتها طردها عدل ياخة قميصة يصيح وراها يحذرها ما تدخل بيت عون واجه صوبي اخذ گرصة خبز وراح 

علياء :: رتبت البيت انا و ترفة و طلعنه لسوگ جبنه النواقص هم 

گعدت فرحانة بحجرتها الجديدة بعد ما فطرس جاب الها غرفة اخشاب كاملة صفنت ع كنتور وگالت 

ترفة :: علياء هذا الكنتور جبير وانا حوايجي گليلة شلون اترسنه 

:: كلما تنزلين لسوگ اشتريلج ثوب سنة زمان ينترس و بعد ماكو مجان تحطين بين 

ركضت جابت السلة مال ملابسها علكت ثيابها بيه ساعة تحطنها منا وساعة تردهن منا تمسح و ترتب أشرت ع ميز 

:: هذا الميز راح اسوي مكتب ادرس عليه اخلي فطرس يسويلي رف خشب احطن كتبي و اجيبن حاسبة هم 

شاركتها حماسها و فرحتها اقترح عليها اشياء ترتب الحجرة أشرت ع طبلة فارغة بصف الجرباية 

:: و نجيب مزهرية هنا و نخلي بيها ورد من بستان فطرس حتى تصير حياة بالحجارة 

:: و اجيبن دبدوب جبير ابيض بنفسي واحد من زمان واشبكنه وانلمن 

:: جا ما گلتي من احنه بالسوك جا تشترينه واجد 

:: لا صار هواي صرفت و خطية فطرس توه طالع بعد ما مشتغل 

:: انا اجيبنه الج هدية للحجرة الجديدة تردينه ابيض مو 

هزت راسها اي فرحانة.. اجت كضتني ازل من ثوبي تجر بيه حتى انتبه الها وگالت 

ازل :: ماما انا هم اريدن مكتب احطن عليه كتبي 

:: اي ماما هسه فطرس يسوي الج واحد و لاختج واحد 

اجه فطرس بيده خبزة حارة ياكل وكف اباب الحجرة يبتسم لترفة 

فطرس :: هاا شلونها صارت هسه حلوة.. عجبتج 

ترفة :: كلشي منك حلو يعجيني اموتن عليك انا 

فطرس :: اليوم رحت للمدرسة حجيت وياه المديرة انتِ ممتحنه شهر واحد مو

هزت راسها اي بلهفة  تتكرب يمه حاوطها بيده يحب شعرها 

فطرس :: گتلها مرت ابوي ماتت هي مربيتها ملخت نفسها عليها وصارت بيها حالة نفسيه ما كدرت تداوم وونقهرت عليج گالت للمدرسات يحسبن الج مال شهر شهرين منا وغاد درسي لنص السنة 

ترفة :: جا اريدن منك شغلة وحدة بس حتى ادرس زين 

:: گولي بعد اخوج انتِ بس اشري وانا اجيبنه الج 

:: اريدن رف خشب احطن يم هذا الميز احطن عليه كتبي 

اختفت ابتسامتها رجفت شفتها بقهر گوه تنطق الكلمة خانگتها العبرة 

ترفة :: بيمن اقرا عمار شكك كل كتبي 

فطرس :: مالج غرض انتِ انا اجيبن الج كتب وكلشي 

سكت شوية مضيق عيونه يفكر و نشدها 

فطرس :: اخت جراح وياج بنفس الصف مو 

هزت راسها اي وهو ابتسم صب جاي ياكل وياه الخبزة و ازل گابلته تغمس وياه وتاكل 

فطرس :: وهسه اريدنج تحجين عليه بالزين جدام العلوية 

:: يا علوية منهن 

:: وياه اصيجن الها علوية غيرها 

صفنت ترفة بوجه ترمش بعيوها وهو صافن بوجهه عبالك يحجون بالنظرات وصفكت بأديها 

:: ااااي عرفتها براءة  

:: اي تكولين اخوي طلع من السجن شخص ثاني ما يفوت فرض كاض السبحة أربعة وعشرين ساعة حتى وهو نايم يستغفر 

:: وين موش صلاة الصبح اليوم انده بيك ما ترضه تكعد 

:: تررفة خوية انت وياي لو عليه 

:: وياك بي شني تريدني اجذب عليها 

:: لا تجذبين امس جنت تعبان وما كعدت منا وغاد اكعد اول وحدة وحتى هاي الحجرة البره راح اطگن الحايط و اسوي باب ع شارع اسويها مصلى و اذن هم الا اخلي السادة كلها تصلي وراي 

:: والله صوتك يخبل اذا تأذن اكومن ابجي 

:: شنهي جاي اقرا الج موال حتى تبجين 

غندبت مبرطمة بزعل و صدت وجهه عنه ضحك و جراها من ايدها كعدها حذاه خلخل اصابعه بين خصلات شعرها يمسح بحنان عگد جبينه من شاف ترجيتها معوجة عدلها وگال 

:: ترفة خوية اريدنج تلمعين صورتي جدامها الج وما تصبغين كون هاشم ما يلحگ صيتي بعد 

صفگت اديها بحماس اخذت شالها من بالگاع تلبسه 

:: هسه البس عباتي و اعر الها اكولن الها شني سويت الي و شني جبتلي و شلون خايف عليَّه عبن الزلمة لو زين وياه اخته البت تأمن اله 

كامت ازل ع ركبها حتى توصل لوجه وكضته منا ومنا حتى يصد الها و ينتبه 

أزل :: وانا فطرس وانا اريدن مكتب اقرا عليه تسويلي 

ابتسمت حباها من راسها واشر ع عيونه الاثنين 

:: من هاي گبل هاي جم ازولة عندي 

ضحكت بحماس وهو تبدلت ملامحه لغضب من سمعت صوت ابن عمته انعام حفز من مجانه ينشد يريد يتأكد 

:: هذا صوت حيدر مو 

خطف السجينة من بالگاع و ركض حافي ترفة ركضت ورا تصيح 

ترفة :: فطرس عليك الله اوكف حبوبي لا تضيع روحك و تضيعني 

ما اعرف شبي وليش يكره  انعام وابنها حيدر لهل درجة لبست عباتي و طلعت وراهم 

لكيته كاض حيدر مغطط راسه بالساگية يريد يغرگه و الولد مثل طير و گاصين راسه يرفس حدر ايده و يتخبط و ترفة تجر بيه عنه دموعها تصب و تتوسل 

ترفة :: فطرس اروحلك فدوة هده والله بعد ما شبعت منك تريد ترد لسجن ردود 

كلما حيدر يرفع راسه شوية يضغط أكثر يغططه بالماي و زمخ لترفة 

:: شطلعج انتِ ردي للبيت 

:: ما اردن اذا ما تعوفه... كضت وجه بثنين اديها منا ومنا تصد الها تتوسل... عاينلي فطرس عاينلي ابوي يذبحني بس تدخل السجن والله

سحب راس حيدر من الساگية شهگ يجر نفس و يكح خشمه طگ دك كضه من شعره و لطخه بالبحافة 

فطرس :: كلهن اطلعهن اليوم من خشمك وحدة وحدة اذا ما خليتك تحب رجلي حتى اعفي عنك انا موش فطرس 

عنبر اجت تركض لترفة تكومها وانا غطيت عيون أزل بعباتي حتى لا تعاين اليصير 

طلعت انعام حافية تركض وتلبس بعبابتها وتصيح بصوت عالي تفزع الوادم

انعام :: لحكونا يا ناس يا عالم راح يگتل ابني يبووو بويه الحگني وينك 

طلع اللهم جراح  أشر لعنبر ترجع للبيت جرت وياها ترفة اللي أمنت بجية جراح و مشت وياها و خطوة و الثانية تندار ع اخوها بقلق 

جراح :: انت ما تجوز من سوالفك هاي

فطرس :: من نعنانة اتوب ذيج الساعة انا اجوز 

جره بساع عن حيدر و دفعه ليغاد زمخ بيه 

جراح :: ولك زمال ما الك اسبوع من طلعت ترد ترجع مرة لخ حلى بعينك السجن 

فطرس :: اي والله حلى جثير بعيني و لوزم كل سنة اطوف عليه 

انعام ربعت جدام حيدر ادكك ع ظهره حتى يجر نفس و تمسح الماي عنه بعبايتها و تنحب 

انعام :: انت تفرعن هينوب و صرت تشوف الوادم كلها حدر رجلك خل يجي ابوي  واخلي يشوف صرفك وياك اليوم لو انا بالسلف لو انت 

ضحك يراقص حواجبه و تگرب الها گرفص جدامها و شبگها حيل خانكها 

:: ويهون عليج فراگي نعنانة گلبي 

:: ميلي عني ميلي خنكتني 

ابتعد عنها جر ايدها حباها و رجع جر راسها حباه و ثبت وجهه مگابل وجه لسان ينطق كلام عكس أفعاله يحجي تهديد و وجه مبتسم 

:: نعنانة حبيبتي تدرين اذا فتحتي لسانج بحرف شسوي بيج 

كض حيدر ايده دافعه عن امه وصار حاجوز بينهم ميل فطرس راسه يعاين الها 

:: حرف واحد يطلع منج موش لسانج و روحها لرحاب المامش اغز منها عندي راسج اگصنه واعلگه وبالنخلة انت وابنج هذا الهتر واخلي الغربان تاكل بالجثث

ضربه جراح ع راسه و دفعه للبيت و حيدر اخذ امه و دروا لبيتهم ياله فضت 

براءة :: امي يم خوالي صار العصر وما ردت البيت كله مرتاح... مديت راسي من الباب ادور غفار اخذ الملزمة گالي ااشر الج المهمات بس ومدري وين اختفى طلعت اشوفنه وين 

لجحت رحمة جاية من صوب الورشة تكض العباية منا تفلت منها منا موش متعودة عليها تگربت عليها 

البت غادية طماطة حمرة خطفت من يمي وراحت للبيت بساع 

مشيت للورشة الباب مفتوح و غفار واگفة و شايل العمامة بين اديه و رفعها لوجه شماها مغمض عيونه ثواني و ابتسامة تسلطت ع ثغره من حس بوجودي  محاها بساع وگالي

::  براءة 

:: هاا 

رجع العمامة بعناية لمجانها ويمسح عليها شماله اخوي النوب كلما يعاين الها وجه يتبسم لوحدة من شافني صافنة عليه مسح ع شعره وكال 

:: اكولن بس هاي العمامة بعد لا تفلينها ولا تغسلينها لا تتكربين الها ابد 

:: ياا جا اخليها بلاية غسل 

::  لا هو انا بعد موش هسه البس العمامة انتِ بس لا تتگربين الها ولا تخلين احد يتكرب صوبها ابد 

هزيت راسي اله بـ اي اعاين العمامة ما ملفوفة عدل طياتها عوجة بس چنها عاجبته كلش كلش

:: خو ما رايدة شي 

:: الملزمة اشرتها الي اريدن اقرا 

:: اي هذيج ع الميز أخذيها 

اخذتها و طلعت لحديقتي ما رديت بيتنه اخافن امي تشوفني و تخليني احرث گاع خوالي 

طبيت حديقتي لوحدها ابتسامة شكت وجهي من اشوفن ورداتي شلت المرش زگيتهن و گلبت التربة حتى يتنفس الجذر 

عگدت جبيني من شفت علبة ع سندانة بصف الورد حطيت ملزمتي ع كاع و تكربت شلتها ويا ما فتحتها 

كفختني ريحة مسگ طيبة كلش جنها ريحة الحضرة كتاب غلافه قماش أخضر فاتح 

لون يزهي يشرح النفس  فتحته قران مكتوب بخط اليد خط واضح حلو 

عاينت منا منا ماكو احد  ما أكدر اتركه بمجانه ولا انا اعرف ياهو خاله هنا واردنه اله 

كعدت اقرا و عين لوحدها تصد ع قرآن حبيته كلش عكدت متعجبة لون الغلاف نفس الون الاحبنه هذا ياهو يعرفني هيج 

وكلما ارجع ادرس ارد افكر بيه سمعت صوت الولد بره كاعدين ملتمين عون ضايج خلگه 

جراح :: شوف انا روحي بخشمي صايرة من وجع جتفي لو تحجي شنهي مكدر خلك لو تكوم من يمي ما اريدن اشوف واحد عاقج وجه يمي 

عون :: مشتاگ لأمي 

غفار :: هو انت وين شايفها ولك حتى تشتاگ الها 

عبس عون بوجه نهض زعلان و غفار كضاه بس يضحك ويه اجاهم فطرس بيده گرصة خبز و طماطية يعض منها وياكل وراها من الخبزة 

فطرس :: امس بليل انا فكرت 

جراح :: الله اليستر منك ومن أفكارك والله عمي جنه مرتاحين منك وانت بالسجن يا زمال دفع فلوس و طلعك 

ضحك فطرس يعاين لجهة غفار فز جراح بساع رافع ايده ع راسه 

جراح :: تاج راسي والله عاشت ايدك ع سويته لو ما دافعله انت الفلوس جا انا بعت كاعي و طلعته 

ضحكوا كلهم عليه و فطرس بلع لگمته وكال 

فطرس :: المهم هسه انا اگرب منكم لـ عون

انتفض غفار كلشي ولحد يتگرب لعون 

غفار :: و شلون بله هاي جايبه ابوك و رحاب وما ندري 

فطرس ::  انتوا شتصيرون منه اولاد عمه مو صح 

جراح ::   اي

گام فطرس بعد ما خلص اكله شرب ماي من الحب اللي عنبر كتبت عليه مشكولة ذمتك كزار اذا تشرب... ضحك من قرأ الجملة و صد الهم نافخ صدره 

فطرس :: انتم اولاد عمه بس انا ابن عمه و اخوه بالرضاعة هم 

عون ::  اهووو راح يعيرني بالحليبة تره طلعت زقوم وعلي أحسنها لسه واكفتلي بالبلعوم 

فطرس ::  انجب لو ما حليبة امي جا هسه انت صاير بيه جفاف و ميت 

غفار :: اذا انت حليبة انا منطي واحد من عضاي لو امك ترضعه للعشرين ما تجي لسعر الكلية 

فطرس :: والله محد طكك ع ايدك جانت كليتي مطابقة هم بس تذكر شلون عنفصت لوياخذ كليتي لو يموت 

غفار ::  اي وهسه شتريد 

فطرس ::  يگربلي أكثر منك 

غفار ::  دكوم يله من باجر اجيبلك كارتون حليب المدش و سد حلكك 

عون ::  احسكم جاي تعيرون بيه لو متوهم انا 

جراح :: والله يا يا خوية انت عايش بالقدرة لو ما هذا و حليبة امه ولما هذا و كليته هسه انت شابع مي ورد من صدك 

نهض عون مغتاظ يريد يطلع 

عون :; و العباس بعد ما اكعد يمكم 

جروا كعدوا يمهم وانا طلعت من ورا الحديقة لبيتنا لگيت عنبر گالبة البيت و فحطانة بجي جنطتها مال مدرسة مختفية 

عنبر :: والله بليل نمت حضرت الجدول جي ما عندي دورس و حطيتها يم راسي و ين راحت شالها الجن 

براءة :: تذكري زين عنبر اخافن شليتها وتاهت بيها ايدج 

عنبر :: شني مخبلة و انسى وين اخذتها اكلج حتى دراسة ما عندي حضرت الجدول حتى بالاحد بس اشيلنها وانحر 

:: جا وين راحت 

عافتني و طلعت تنحب بصوت عالي حاجتها عزيزة طلعت وراها لا يصير شي بيها حتى الولد كلهم اجوا ع صوت بجيها جراح حاير شلون يسكتها حتى يعرف شمالها 

اجت ترفة صوبنه بيدها نفس الجنطة 

براءة :: ولج موش هاي جنطتج 

فزت بساع مبتعدة عن حضن جراح تمسح عيونها من الدمع حتى تعاين زين وصاحت 

:: اي هي شوداها لهناك والله خليتيها يم راسي 

گبل لا تنطيها ترفة الها خذاها فطرس بساع ضامها وراها ضهره 

ترفة :: شمالك فطرس جنطة عنبر هاي لويش جايبها للبيت 

فطرس :: حتى تدرسين موش گلتي انتِ وياها نفس الصف 

جراح :: جيبها لا اكسرنك وعلي هسه 

تعاركوا و فطرس عاند ما ينطيها الها و عنبر فحطت ملخت نفسها و ترفة تتوسل بيه يرجعها وهو معاند 

غفار :: كافي سكتي انا اشتريلج كتب جديدة 

جراح :: شني كتب جديدة هسه يرجعها لا افلش بيته ع راسه 

اشرله غفار براسه ع ترفة خطية تبجي 

غفار :: عنبر حسبيها انتِ مطيتهن هدية الها جي ردت المدرسة وانا اجيبن الج غيرهن والله باجر الصبح تلگيهن يمج 

مسحت عنبر خشمها يصب وياه دموعها هزت راسها اي مقتنعة بتردد 

:: بس خل ينطيني الدفاتر انا خططتهن وخليت بيهن طمغات احبنهن 

:: هو جي بيهن طمغات اخذتهن حتى يصير لترفة واهس تقرا 

رجفت شفتها تعاين لجنطة بقهر دفعه جراح 

جراح :: لا تقهرها زمال يله امشي ولي منا 

راح فطرس يضحك ولا مهتم و ترفة شبگت عنبر تعتذر منها تگلها 

ترفة :: هسه انا اجيبنها الج والله لاتبجين 

غفار :: لا اخذيهن الكتب الج عنبر باجر انا اجيبن الها 

هزت عنبر راسها اي و ترفة حبتها من خدها و مشت ورا اخوها وجراح اغتاظ من غفار 

جراح :: شني انت تنطيها اله وتگله عادي ما تشوفها شلون غدت تراب ماتعرفها تحب حاجتها 

ما رد عليه غفار صد صوب عنبر نشدها 

غفار :: عنبر ترديهن لو تردين الجدد اذا ترديهن هسه اردهن الج واجيبن الها 

عنبر :: لا جدد اريد 

رفع جراح حاجيه شلون اقتنعت بكلام غفار راح يدردم 

عنبر :: رجعت لبيتنه گتلهم اي بس گلبي يم الدفاتر و الطمغات وبنفس الوگت اريدن الكتب الجدد جي ريحتهن طيبة 

شمرت عباتي وكعدت لوحدي ابوي يم جدي يحجي وياه بسالفة مرمر و جراح مدري وين راح هم 

ندگ الباب ع كيف و انفتح مد راسه عون حفزت بساع جريت عباتي حطيتها ع جتافي 

:: عنبر 

:: هاا شتريد انت الاخر جاي تتشمت بيّه مو 

:: صوجي انا نقهرت عليج و جبت الج كتبي انطوني بيهن فلوس عبن انا صرت دكتور من وراهن وما بعتهن وجايبهن الج بيدي و بلاش هم 

طبگ الباب راد يروح ركضت اله وصحت ورا 

:: تعال والله بعد ما احجي ها اها سكتت 

رجع بيده نضدة كتب و دفاتر 

:: هاج جدد بعدهن محافظ عليهن و ذني دفاتر بيهن كلشي حتى اسئلة وزارية 

اخذتهن منه بلهفة ربعت ع گاع و حطيتهن بصفي اگلب بالاوراق بين الكتب و الدفاتر 

::الله حلو خطك موش نفس خطي مجعمر من اكتب اجي اريدن اقرا ما اعرف

:: شوفي 

رفعت راسي اله بستفهام وهو گال 

:: اذا شي ما تفهمينه تعاي الي اعلمج عليه 

:: و شلون اجيلك وانت عايش لوحدك بالبيت 

:: لا موش للبيت انا ما ارضاها عليج اگصد روحي يم جدي بالديوانية وهو يدز عليه ادرسنج 

:: خوش.. جا يمكن راح اصيرن مثلك دكتورة 

مخبوصة و فرحانة بالكتب نظيفات و مأشر ع كل المهمات و الدفاتر تسوي واهس للدراسة سمعته همس 

:: نستلة 

رفعت وجهي اله بعدم فهم نشدته استفسر 

:: شني 

:: اگصد مشتهي نسلة اروحن اشتري

راح يمشي وانا اعاين لظهره لنص الدرب اجت بت شابة مفرعة گصيبتها سودة جايبتها لگدام و تنورتها طالعة سيقانها بيض 

وكفت تحجي تنشده وتحجي وياه شفته ركض للبيت مدري شـ اخذ و شغل سيارته وهي صعدت وياه وراحوا 

وبعد ما رد الليل كله 

براءة :: طلعت احوشن خضرة للغده يحبونها كلش و الحجيات كل يوم الضحى يفرشن حصيرة خوص و يكعدن يشربن جاي و كليجة احبن شوفتهن 

ترفة تبرعت هي تحوش بدالي وانا رجعت للعجين العجين لگيته مختمر شنكت و طلعت اشجر التنور رحمة  كاعدة بسد التنور بالدفو و صافنة انتبهت ع عنبر مدت راسها من باب بيتهم من شافتنه اجت بساع تمشي و تكف بطراف عبايتها تتحزم بيها 

عنبر :: اليوم لو بالهدف لو بالنجف 

براءة :: شكو اسم الله 

عنبر :: شنهي ما اعرف اخبز و كاضيتها اجدي خبز منكم اليوم تعلميني شلون أخبر 

براءة : جراح ما يرضه حلفني ما اعلمج 

:: جذابة 

:: وعلي يكول اخافن انا و ابوي موش هنا تروح  تخبز و تحترك لا سامح الله 

:: مالج غرض بيه هذا لوحدة يسولف يله علميني 

:: حلفني والله ما أكدر بعد 

عاينت اللي مغتاظة و برطمت شفايفها طبت لبيتنا شوية و اجت جايبة سجدة وياها رغم سجدة مالها خلك هل سوالف بس من عرفت جراح موصي بجيادة و عنادة راح تعلمها 

سجدة :: يله انا اعلمج عايني و سوي مثلي 

كضت الشنگة و رصتها ع صينية النوب شالتها بيدها تطركها و عنبر تسوي مثلها 

سجدة :: داوريها بيدج 

عنبر ::: شلون أحسنها راح تموع 

:: وانتِ تطكينها فريها ع ايدج 

فرتها شو هاي صارت بالطول خلتها ع مخبازة حال الضيم حالها مزرفة و بطول الحاشية ثخينة بالضبط نفس خبزات رحمة تگربت ع تنور منعتها 

براءة :: جيبي احطنها الج بالتنور خاف ما تنوشين 

:: لا انوشن ميلن عن دربي 

تكف بعبايتها و كطفت أطراف شالها منا ومنا و تتكرب ع تنور بحذر عبالك راح تدخل معركة سجدة وراها تعاين الها 

اخذتها منها سجدة لطشتها بالتنور خلصنه خبز يمنه سلة الخضرة و ترفة شلعت طماطة غسلتها و فشگتها بدون سجين و رشة ملح وخبز حار حتى رحمة حبتها 

انتبهنه ع عون من امس غط و اليوم رجع نزل من سيارته وياه طفل حديث الولادة لافه ابطانية صغيرة و لـامها لصدره بحذر مبالغ طب بيته وعنبر ركضت لجدي انطته خبر كالت اله

اجه جدي وكلنه وياه هم دخلنه بيته لگيناه حاطه ع جرباية و مخلي اصبعه كدام خشمه... رفع راسه النه بوجه اصفر وگال 

عون ::  ما تتنفس ماتت 

من كلامه عرفت بنت تگربت رحمة بساع شالتها عاينت الها وجاست صدرها 

رحمة :: لا مابيها شي هو حديث الولادة هيج يصير تنفسه 

من خوفه عليها نسى ان هو دكتور ويعرف حتى نشده جدي بملامح غضب 

هاشم ::  منين هل طفلة عون

                 الفصل التاسع عشر من هنا 

لقراءة باقي الفصول اضغط هنا