رواية خطايا واجتثات الفصل الثالث والاربعون 43 بقلم نور علي البصري
بيه فرح وبيه حزن
واثنينهن يردن دمع
والعله مدري بيا كتر
لا تنشاف ولا تنسمع
ـــــــــــــــــــــــــــ᭓͜ــــــــــــــــــــــــــــــ
عــــــــــــ♡ـــــــــــــــون
ـــ شنوووو جاي بساع جاي!
سديت الخط و الدنيا صارت سودة بعيني و تناوشت السويج وطلعت أركض و وجدان.. وراي تصيح:
ـــ شبيك مصربع عـون.. خليني أفهم شصاير؟
ـــ مـريم.
ـــ المسودنة شبيها؟!
جريت نفس ولا أحب أحد ينعتها بهاي الصفة مهما كان السبب دفعتها عني.
ـــ شو وخري لا تلطشين لازم أروح.
طلعت شغلت سيارتي و كبل لبيت مـريم.. لأن أمها أخذتها وتركن بيت نوري وسكنن هناك ببيت مـريم..أول موصلت لكيت أبوي بالحديقة ولازم مـريم من شعرها ويدك عليها بصوندة
و يصرخ بوجهها:
ـــ أريد أرجعلج عقلج اليوم ولج دورت البيت كوله وين الفلوس؟ أنتِ كلتي أبيع البيت واللي بقالج من الملك أكمل فلوس الفدية.. يعني أكو فلوس بعد وين وديتيهن؟!
وهي خطية مفرفحة تصرخ :
ـــ وخر.. وخر.. دم.. دم.. عوع.. عوع!
تلزم بدم من راسها فاشخها.. وجهها كوله دم تاخذ بيدها من يافوخها و تلعوس وجهها و ملابسها مو نزف مستمر أعتقد توقف بس بقايا أثر الضربة واضحة فاشخها براسها.
هجمت عليه ودفعته:
ـــ أنت بشر لو حشر حرام عليك أبنية تعذبها بهالشكل وهي لا حول ولا قوة عدها ليش فلوس الفدية البكتهن وين وديتهن؟ وجاي اليوم تدور غيرهن هاي إذا صدوك جان أكو فلوس أصلاً بعد من اليوم ممنوع توصل لهنا يلة أطلع الله يبتلي البشر ويختبر صبره وآني أبتلاني بيك وصابر وأمري لله.
من شافتني شلون أدفع بي و أحميها هنا أستسبعت بية صارت وراي وتشتم بي.
ـــ أبن ــــــــــــ
فشرت عليه وعلى أمه وأبوه.. يعني أجدادي هم ناس خيرة بس من ورى أبوي كالولهم خوش فشاير وأم مـريم.. هم مكتلولة أو تحاجزه عن مـريم.. ماخذتلها نصيب حيل أنقهرت مستغل ما عدهن سند بهاي الدنيا و يريد ينهبهن راح وأمها تريد تلزمها و ظلت تركض بالحديقة وأمها وراها ما تلزم عبالك طير الزيطة تنط منا وتجي منا وهي تأشر على راسها:
ـــ منعول أبوه طگني بعد لا يجينا أشحته بحجار.
ظلت تلم حجار بشليلها:
ـــ والله الطبلنا هذن حجار أفشخة.
تركض وأمها وراها تتوسل.
ـــ ولج يمة بس أشوف راسج عـون.. تعبت ألحگني ما تلزم.
لعبتنا لعب ما أدري منين تجيب هاي القوة لو تصيح:
ـــ أخاف دم.. دم.. أنترست دم.
فاتت للبيت و أحنا وراها وأخر فعالية رفعت گلابيتها و نزعتها تريد تتعرين
و تنزع داخلياتها بساع درت ظهري يا ربي شلون بهاي الورطة بلة.
حسيت برجفة أخذتني و الگلب اللي قفل بيبانة و أعلن نهاية نبضاته حن
وأشتاق ظليت مغمض عيوني وآني رجفة توتر صابتني لأن حتى من درت ظهري وغمضت عيني مر طيف جسمها اللي شفته من خلعت ثيابها كدامي همست بصوت مبحوح و مشاعر حنين وحب رجع تتجدد بعد ما ظنيت أنتهى طلعت أغشم.. بروحي أحجي بين حيرتي وبين أمنيتي آخذها بحضني وأشم نحرها :
ـــ يمة ستريها فدوة خليني بس أشوف راسها.
بس شوي وهي أجت يمي وهي تضحك:
ـــ طگاني بصوندة المخبل.. هو مخبل مخبل هههههه.
رجعت أمها تركض من شافتها لازمة إيدي وتريدني ألتفت أحاجيها وآني مغمض وأحس متورط شلون ما أعرف
نقذني صوت أمها:
ـــ عيب يمة مريومة.. جبتلج النفنوف هذا لبسيه هسة لمن أسبحج وأمشط شعرج وأسويلج تسريحة الدب.
بس هي ظلت لازمة إيدي يمكن أمنت الي لأن دوم أحميها من أجيهم وجهال الشارع تضربها لو من نوري.. ضربها
ـــ أنت أنت هسة تطگه طگني المخبل.
همست : صار بس ستري روحج ولبسي ترى راح أطلع.
حيل أنحرجت موقف محرج أنحطيت بي أسمع أماطل أمها وياها تريد تلبسها وما تقبل ولإ تهدأ..
ـــ ما أريد وخري أم كرعة المخبلة.
طلعت برى وصحت:
ـــ يمة.. من تبدليلها صيحيني موقفي مو حلو بس جيكي راسها مفتوح لو سطحي.
ـــ يمة.. أعذرني هذا حظي و حظها اللي دولبنا هيج وآني ماعندي غيرك أتصلت عليك ولله فرفحت يدك عليها وهي لا حول و لا قوة أعرف كوله مني حرجتك وهي هم أعذرها يا يوم هي تسوي هيج لو بعقلها مريمتي بنيتي التستحي من الهوة متنزع بس هي ماكو عقل مريضة يا بعد أمك أحسبها جاهل و تعرينت.. يمة و هسة هدأت أنطيتها لعبتها وبدلتلها تعال فوت لا تبقى بالباب ومنطي ظهرك ماكو شي لبست وراسها ما ينزف متوقف النزف جرحها مو عميق مو مال خياط بس هذا دم باقي بشعرها.
دخلت لزمت وجهها أتفحص جروح خدها :
ـــ عندج معقم وقطن ومرهم جروح.
ـــ أي جايبة كل اللوازم المهمة تحسب لأي حادث من صار وضعها هيج بعد صرت يومية أضمد.
همست بحرگة:
ـــ الله المعين بلكت فترة و تطيب.
ـــ مر أكثر من سنة يا يمة شتطيب آني
أيست حتى أسمها ترفضه تريد عقلها يرجع طبيعي.
ـــ هو آني سميتها وصال.
جريت نفس وآني كلما أجي أكول أقوي گلبي وصالي المفقود اللي نهيتها من يوم قررت أبدي حياتي بس آخ و آخ أباوعلها هادئة و منعسة تمددت طبعًا ماكو عدها بريك.. لا بكلام و لا فعل تمددت وراسها بحضن أمها وهي متناعسة تهمس:
ـــ نوميني هنا.. هنا يعور.
تأشر على راسها.
ـــ يروحلج فدوة مريومتي.
ـــ أنتِ مريومتي.. هذا.. هذا يكول آني وصال.
أشرت علية و غمضت تثاوب أعتقد دايخة من الضرب أمها كالت بقهر:
ـــ مخلتني أسبحها زفرة الدم بشعرها
ظلت تبجي.
ـــ شوف القهر اللي بي آني ولك عـون.. هاي مريمة.. النظيفة السنعة أم عقل الجبير.. هذا حالها عداوتها الماي و النظافة وين آخذها وين أوديج يمة يا وحيدتي.
شبعت قهر والنبي بس مال هي أم عقل الجبير لا ولا أعتقد لو عقلها جبير و فاهمة ما وصلت لهاي المرحلة.. ما باعتني و راحت لأجل الفلوس ومن طلعتها من گلبي و روحي و كياني و حنيني رجعتلي و غصب علية رجعت بس شلون رجعت أوف أوف..
هزيت راسي وكمت.
ـــ شوي تعبان.. عوفيها نايمة من تفز سبحيها لا تتمرض ترى أستحي أنبهج ليش هيج كاتلها الوسخ شعرها الجان شحلاته متعكر من يمتى ما سابحة ولا مشطة.
ظلت تبجي وتدك على هامتها:
ـــ ولك شسوي كول.. ولك مالي حيل والله المرض ماخذ عافيتي زين مني و أداريها بلي أكدرله.
أستغفرت الله مشاهد مؤلمة ما كدرت أتحمل خليت و طلعت رحت يم النهر ركنت سيارتي ظليت كاعد هناك ما أعرف شكد بس أفكاري حيل مشتتة.
لمن كمت و أخذت بطريقي عشا من المطعم رجعت للبيت متضايق ومهموم گلبي معصور وأعاتب روحي أي مـريم مو طردتج من گلبي شلون المشاعر ترجع إذا تنطرد حتى ما أكلت كملت وجدان و نظفت المكان طبت سبحت وأجتني بسيت نوم متعطرة ومبدلة أجت يمي تمددت وخلت راسها بحضني تباوع علية.
ـــ أهيسك ضايج شبيك يبعد الروح؟
ـــ ماكو شي هيج سالفة صارت.
ـــ شنو هي مو متفقين محد يضم على الثاني إذا ما تشكيلي همك ألمن تشكي
جريت نفس و بس كتلها:
ـــ أتصلت بية أم مـريم تناشدني تنتخي بية ألحك مـريم.. تنضرب وبتعنيف.
ما أعرف ليش مختنك بس جبت سيرة مـريم.. دمعتي لمعت من بين رموشي حاولت أصدها لا تنزل و تفضحني بمشاعري بس نزلت غدرني الرمش ما صد دمعتي اللي بيها وي نبضي وجع إسمه مـريم.. كعدت مستغربة دموعي الظلت تصب دمعة تغار من دمعة ودمعة تلحك دمعة وشهگة وحسرة ذبيتها من أعماق روحي بيديها الناعمات وهي مسحت خدودي.
ـــ شبيك عـون.. منو وياك؟
ـــ لا هيج بس إنسانيتي متحملت مشهد تعنيف بنت لا حول ولا قوة.. بنت فاقدة كولشي دمار حياتها و خسارتها عظيمة خسرت حتى عقلها مسولفلج من تزوج أبوي أمها جانت مـريم.. طفلة جدًا صغيرة وجنت أتلطف وياها جنت ألها المربي الرباها و اللي تكفلها.
ردت : أي كتلي جانت الأخت الما ولدتها عمتي إلك يلة شسوي هاي أمر دنيا نتخبل نموت نتمرض حكم ربك لا تضوج.
ردت أهز إيدي هاي الفطيرة مصدكتني من كلت أعتبرها أختي وآني أسايرها بس حتى متغار وتشلع گلبي كلما أروح أطل عليهن هي وأمها.
ـــ منو ضربها خطية هي مسودنة لو بس العالم تترك المخابيل بحالهم هم ممأذين أحد.
ردت أدفرها لأن أنقهر من أسمع أحد يسمي مـريم.. مسودنة.
ـــ آني أبوي سولفتلج عنه و عن أفعاله يحوم على فلوس مـريم.. تعالي تذكري من جنتي عاقلة وين ضميتيهن؟!
ردت : زين هنه الفلوس شگد ووين ضمتهن؟
غميتها : صجيجة شوف هاي الثانية وين تفكر.
ـــ ههههه لا والله مجرد فضول.
ـــ ما أعرف ولا أريد أعرف أذا شفتهن أحس بمرارة لو هالفلوس مكفيات جان أبن مـريم.. بحضنها هسة.
شهكت وآني بداخلي أعاتب روحي أي عفية و ألف عفية عليك يا عـون.. ظل نوح وأبجي أشبع قهر على الصار لبنت گلبك ظليت مصفن وهاي وجدان.. طرقت الموضوع وكالت:
ـــ أنت لو تقتنع بالحل اللي أنطيته إلك جان هي بخير منو يحاجيها ورجلها عـون..
ـــ سدي السالفة شلحيتي.
ـــ ليش أسدها أريد جاهل خوما نبقى أول و تالي أبوك يريد أحفاد و يقرأ براسك و تجيبلي ضرة تنافسني عليك عاد هاي هي و الماكو بس خلي تكون وسيلة فراش تخلف منها جهالي.
كمت وكفت معصب منها.. على نعتها مـريم.. وسيلة فراش و هي و الماكو هذا عصبني أكثر من أي كلام و فوكها تريد تستولي على جهال مـريم.. في حال خلفت.
ـــ أنتِ.. تخبلتي ولج أنتِ.. صدوك ما تستحين.
سكتت من ظليت أتأتأ من كد العصبية أحس شرايني راح تنفجر.
ـــ أنتِ شلون تقترحين.. هذا الأقتراح مساع من رشحتيها و رفضت رجعتي عدتي السالفة.
وهي تمادت أكثر بهيج مقترح.
ـــ أعرف تعتبرها أختك بس ترى هي مو أختك ولا رضيعتك أصحى عـون.. بنت مرت أبوك يعني حلال تأخذها وبعدين أكولك شبيها شو حلوة و هم تجيبلنا جهال حلوين أنت عيونك خضر وهي حمرة برصة الشعر ذهب.
رفعت أيدي أشر بأصبعي على شفتي:
ـــ أششش.. أسسس ولا كلمة غلقي موضوع مـريم.. رجاءًا.
بس هي أستمرت تلح.
ـــ لا ما أغلقه وتاخذها تاخذها لا والنبي هسة عود شخاط.. و أحرك روحي و أبليك ولك تعبتني مرمرتني شتريد ها أسكت و أكول أنعم الله ها عـون.. تقبلني عاجر و من تحن لو أحد يقرأ بعقلك تجيني راح أعرس و تدور مرة تامة كاملة تنافسني عليك لا والله ما أقبل أول و تالي تريد جهال.. تزوج المسودنة و فضها عود على أساس أبوك يسكت ترى أنت وحيدة لابد يريد أمتداد النسل و أجة وكالها أريد أحفاد و أنت وحيدي ما عندي غيرك يخلفلي حفيد.
هزيت إيدي استهزأ:
ـــ أي مو خايف لا ينقرض نسل الملك ارثر.. أشششش دسكتي من عسانا أنقراض
خلت إيدها على حلكي.
ـــ أسم الله عليك حبيبي أنت بس فكر بالموضوع من جانب أنساني فيد وأستفيد البنية أرملة رايح طفلها أنت هنا راح تنطيها طفل يعوضها زائد هنا فكر.. لا قدر الله وأمها تموت منو ألها تظل بالشوارع بزمن ما يرحم لو يخطفوها عصابات تجارة أعضاء اللي مثلها صيد سهل لهيج عصابات تزوجها و تكفلها أمها مرضها بالخبيث أول و تالي تموت عاد تموت مرتاحة.
رددت : أستغفري ربج كلنا مصيرنا نموت.
جريت نفس وهي أستمرت تقنعني.
ـــ أعرف كلنا نموت بس لا عبالك هسة أمها مرتاحة تلكاها تفكر ببتها من بعدها شنو مصيرها أكيد الشارع مخبلة هييي هووو.
أشرت علامة ترللي وهي تقلد مخابيل.
ـــ شفت تضيع هاي هنا أنت دورك تنقذ
و تاخذ القيمومة عليها أكيد تخلفلنا طفل يورث أمه.. و هذول المجانين سامعة أعمارهم صغيرة.
وكفت متضايق رغم آني شلت مـريم.. من فكري بس تبين لسة بعدها بگلبي فصعب تنهان وتنوسم بالجنون ويتنمر عليها وآني ساكت.
ـــ أنتِ ليش ما تنجبين و تاكلين _ـــــ_ ترى جانت طبيعية مو مرض ولادي زائد لتكولين على وصال مخبلة أوكي.
ـــ أوكف.. أوكف لحظة يلة أعترفلي منو هاي وصال؟
ـــ مـريم.. دلعها وصـال..
ـــ و شدعوة تدلعها خوب دلع بية..
سكتت و لطمت صدرها.
ـــ بس لا عاشگها ولك ردتها بس تخلفلنا وحدة خبلة ناخذ أبنها إلنا وهي تبقى يمنا معززة مكرمة.. بس تخلف وبعد متدنالها تبقى هنا للثواب يمنا و هم تأمن مصيرها لو ماتت أمها.
رديت بإستهزاء:
ـــ ليش تراجعتي مو ردتيها لفراشي مفرخة جهال فد ست سبع جهال.
ـــ لا يمعود ما أتحمل هو واحد وكوة أتحمل على أعصابي حاول تخلف منها ولد يشيل أسمك وهاي هي ماكو بعد ذرية.
ـــ أنتِ عود مسوية فضل ولج أدب سز شوفي وجدان.. لا تتعدين حدودج السالفة سديها بوية عيب.
تركتها و طلعت غاضب بقيت بهاي الأيام أتجنب وجدان.. أقضي وقتي بالشغل لأن كلما تشوفني تلح فكاضي وقتي أشتغل بالسيارة ليل و نهار أرجع وقت الوجبات والنوم وراح يبدي دوام المدارس سويت أستئناف أرجع لدوامي وبيوم آني أفتر بالسيارة أشتغل تكسي ورى عدة كروات أجرني واحد لمنطقة بيت مـريم نزلت ورحت كبال بابها مدام كروتي جابتني هنا أمر أشوفنهن شمحتاجات دكيت الباب فتحتة أم مـريم.. جانت تعبانة.
ـــ يمة.. ضاربة جرعة مو كتلج بيوم اللي تضربين جرعة هرمونية تدزين علية أبقى يم مـريم..
ردت بصوت يرجف من التعب:
ـــ لا يمة بس تعبانة اليوم هلكت أطارد بين دائرة القصر وبين المحكمة ردت أسحب مبلغ لدوة مـريم هاي المهدئات خلصت متت يمة متت المستشفى كاتبين علاجات وواحد منهن ما متوفر لازم أشتريه تجاري وسعرة غالي نار وهذا هو الوحيد يخليها هادئة وتنام ما بية حيل أروكض وراها وآني بهذا حالي.
دخلت للصالة وكلت:
ـــ وليش ما خابرتيني أجيبلج ياه ليش تتعبين روحج.
ـــ يمة عـون.. وأنت تظل تصرف علينا.
ـــ أبوي خوما رجع أتعرضلكم بعد لو أجة لهنا؟
ـــ تعبني وتعاركنا وهدد راح يحجرون على مـريم.. عمها وحماها جابهم علية وعاركوني رادوا ياخذون مريم بالقوة.
كعدت أراقب بمـريم.. جانت بيدها لعابة ولد بس دون راس أستغفرت الله هم ملصت راسها كلتلها بصوت هادئ:
ـــ مريومة لا تخربين اللعابات.
باوعتلي و عيونها نططتهن علية.
مــــــــــــــ♡ ــــــــــــــريم
هذا ليش هيج يباوع لأبني ياسر أكيد يريد يبوكه مني شبگت أبني حيل وآني أباوعله بحذر وكمت أمشي على كيف لازم أقتله قبل لا يبوك أبني الحرامي
تناوشت تحفة وشمرتها عليه هو وخر بساع ركض حضني حدد إيدي ضربته عضيته حيل شيريد مني آني ما أذيهم عوفني أمس أبو كرش والأكرع الوياه ورجل هاي الكرعة اللي يمي تعاركوا والله مال أخذ ابني وأهرب بعيد عنهم لزمت أبني و دورت راسه واكع يم رجلين عـون.. الحرامي رحت بحذر ودنكت أخذت راس أبني وبيد أسحل الجسم وآني أروح للغرفة كمطته والوليلة وخليت الراس بصفه دللوه يالولد يبني نعست ونمت...
عـــــــــــــ♡ـــــــــــــــون
تقربت مني أُم مريم وسألتني:
ـــ ها يمة عـون.. خو ما أذتك؟
ـــ لا تعلمت على وضعها بس الوضع جاي يسوء هاي مسكينة يمة مـريم.. دتضيع من إيدينا.
سكتت شوية بعدين باوعت بعيوني بنظرة وصية:
ـــ يمة عـون أريد أحاجيك وأدري صعبة و ما أريد أصير حقيرة وأخرب بين رجال ومرته.. بس أنت مرتك ما تخلف أخذ مـريم.. يمة آني أريد أأمن إلبنت يمك آني ترى ما أعيش وربك مأجل هالموته لمن أطمن على هالبنية هذول ما راح يعوفوني راح بمعارفهم و رشاويهم ياخذون القيمومة مني على مـريم.. وثق راح بالرشاوي يخلون القاضي يوافقلهم بيع أملاك مـريم.. وفلوسها تتحول ويتقاسموها بيناتهم
الوضع شو بعده ممستقر ويخوف والقانون ما يطبق عالحيتان أمثالهم يطبق علية وعليك و من أريد أسحب من البنك مبلغ أدوية مـريم.. مينطوني الا موافقة القاضي وتعاي جيبي تقارير
أدويتها وكل الصرفيات زين ما نريد نلبس ناكل شو إحنا بلة معيل ستر الله عليك تذب علينا القاسمة الله بس يا وليدي الى متى؟ أنت لو تاخذها هنا القيمومة رجلها ومحد يطعنك ويكدر ياخذها منك آني أخاف المحكمة تحكم لصالحهم لأني مرة بمرض مهلك والحجة غير مؤهلة للعناية بمريم.
ـــ شلون أتزوجها آني متزوج.
ـــ يمة هي هم بيا حال مو مال زواج
و أكيد أنت ما تريد توصلها لذا كافي بس تعقد عليها وتعوفها أمانة برگبتك يمة خاف أموت أخذها بيتك هو هسة خلي القاضي يحكم بالقبول بتزويجها لمصلحة الحفاظ والعناية بيها وبعدين أعترض.
ظلت تقنعني وتعهدت تحاجي مرتي بس عالورق كدام أهل مـريم.. حتى لحد يتدنالها ويطالب بيها.
ضحكت وكتلها:
ـــ أصلاً مرتي تريد زواج حقيقي وتريد مـريم.. تخلف إلنا طفل!
ـــ هاي هي لعد آني.. راح التمس من القاضي ضرورة التزويج وأنت يوقعوك تعهد آني هم حاجيت سيد وشرحتله الظروف كتله زواجها.. أفضل لأني مرة مريضة ميتة ميتة و هيج فعل وفعل حماها وعمها و تدبيرهم و منا رجلي طمع عدهم يموتوها و يدفعون نوري يشيل القضية.. بكم فلس ويهربون للخارج و يستولون على أملاكها والله بس أموت هذا مصيرها نظرتي متخيب وآني أم أريد أحمي بنتي بظل رجال أمين و ثقة و يحبها ويخاف الله بيها قبل لا أموت تعاطف السيد و قبل التزويج بشرط تتعهد متتركها و تتعهد بعلاجها و تقسم كدامه على القرآن بهذا وهم بلغت السيد إن المحكمة ودائرة القصر متابعين أمورها المادية بصرامة حتى من ردت أسحب فلوس دواها جرجرة لمن وافقوا وطلبوا وصولات بالعلاج التجاري وفتحت إلها دفتر تستلم بي باقي العلاج الإضطراب النفسي.
توترت.. ليش هسة صرت عزيز وينج قبل ما خليتي موقف قوي و منعتيهم ياخذوها مني.. ليش حرمتيني منها جان لزمتيها بنية طفلة مراهقة جانت متعرف صالحها علمتيها وفهمتيها جان مصار كل هذا.
هنا التناقضات والكرامة خلتني أرفض يعني وكت الشدة ألحگني تزوجها.
رفضت : ما أكدر والقاضي ملتقي بي ومو غبي يعرف يحميها هي وأملاكها.
طلعت مصرفهن من جيبي وخليته على الميزة :
ـــ أي أحتياجات خابري علية.. وأحسن قرار من قررتي تعوفين أبوي والأفضل تخلعيه حتى لا يظل رايح جاي يضرب بهاي المسكينة مو جنج ناوية زعلان و ظهره مصطلح.
شيـــــــــــــ♡ــــــــــــــــــلان
شكد حاولت أمي تتواصل ويه خالتي ماكو من آخر يوم خلصنا.. أمتحانات
و أنعلن تخرجي من الكلية و آنقطعت أخبارهم وماكو تواصل يمكن العالم بدت تترك الأرضي و تحول للمحمول
الله يدري شنو حال خالتي وأحوال مـريم.. رغم مـريم تكبرت على أمي إجت متعنية تداري أختها وطردتها وخلت شرخ بالعلاقات بس دتوصل أخبار إن الجنوب صار بيد جماعات و القتل بالشوارع ما أعرف إذا جانت الأخبار صح لو إشاعات.
ـــ ماما لو تروحين للجنوب أروح وياج أشوف صاحباتي.
ـــ أبوج ما يقبل يكول هناك أوضاع مخربطة كولش وخاف تنخطفن.
ـــ لعد نبقى ما نعرف شي عن خالتي؟ عن مـريم؟!
ـــ والله يا بنتي ما أدري شكول الوضع كولش تعبان وحتى رجلج ترك الدوام بالجنوب تعرفين وضع إقليمنا يحتاج رجاله وعدنا معاملنا وشركاتنا ويشتغل
ـــ عمي وبابا مكلفيه برعاية مصالحنا.
ـــ شيلان ماكو خبر عن الحمل هواي طولتوا.
هزيت راسي : لا ما أعرف السبب من منو آني فحصت ما بية شي.
ـــ و هو مو خاف متأثر بالكيمياوي بقريته المنكوبة.
ـــ والله ماما ما أعرف يكول آني مبية شي وفحصت و الرزق بيد الله.
شوي ودخل بـروان.. وهو ضايج كمت تلكيته:
ـــ ها حبيبي جاي من وقت.
ـــ تعرفين سلوم اللي تزوج ويانا اليوم مرته جابتله الطفل الثاني.
بلعت الغصة : الله يحفظهم.
ـــ وإحنا يمتى حيل متلهف لطفل.
ـــ هذا أمر الله بعد ليش متجي وياي لطبيبتي و أنت وين حللت وفحصت يجوز تحليلك غلط وبيك صوج نعالجه ؟
صيح علية:
ـــ وشنو قصدج ها آني ما بية شي أبد.
ـــ بس..
ـــ تلمحين لشي أحجي ؟
ـــ ها خاف أثر عليك تعرضك للكيمياوي بقريتك؟
وسع عينه وهمس بغضب:
ـــ أنجبـي مابية شي ولا تفتحين جراح قريتي.
طلع برى بين الجمال الطبيعي يمشي تبعته و وكف يم شجرة بلوط صوته مبحوح.
ـــ شيلان. سدي موضوع الأطفال وثقي بالله ما أكذب رحت طبيب ومبية شي هم أجيت كلت منج الصوج؟!
وصار موضوع الأطفال هاجس بينا ومشاكلنا وتباعدنا ظل يدور أبوه كل فترة يروح للوسط بلكت أحد يحصل معلومات أغلب اللي جانوا برى رجعوا بس أبو بـروان.. ماكو كل اللي حصله إنه مسافر بلد أجنبي ومستقر و عندة عائلة هناك بروان.. صار هواي يطلع ويه آدم.. وتغير كولش خاصة ورى وفاة عمي.. كولش مشاكل هو وآدم هو بقوة يدير الأملاك لأن آدم.. ملتهي بسفراته ونسوان.
طلعت تفاحة القرنفل وآني أذكر ذيج الأيام المملية حب دخل وهو متوتر:
ـــ شيلان حاجي أبوج من مات عمي وهو صاف ويه آدم.. ترى راح أضطر أنسحب من الأراضي إذا يبقى يسمع لآدم..
ـــ ترى آدم.. أخوك ليش هاي الحزازيات
باوعلي صفح:
ــــ أنتِ ليش الدفاع عنه والله من مات عمي هواي أمور تغيرت هنا.
بلة شحاجيه هذا ما أكدر أوزه على أخوه بس هو صاير عصبي مدري شبي راد يطلع سألته:
ـــ صارحني عندك مشكلة بالشغل.
طلع وما جاوبني صاير ميتحاجه.
و بيوم إجاني بابا يشتكي..
ـــ أريد أشيل رجلج من المكانة الخلاها المرحوم إله هذا ميخجل يبوك ويزور الحسابات والله قبل جنا بلا دفاتر عايشين وخيرنا يزيد من مات أخوي هذا عود يسجل كولشي لو ما عنده ذنب ما سجل.
ـــ بابا مستحيل بـروان يبوكنا شتحجي أصلاً لو ما أمين ما جان عمي كلفة بأموال العائلة.
ـــ والله كاضيها سربتة مدري وين أخاف أحجي وما تصدكيني.
ـــ بابا شتقصد؟!
ـــ شقصد يعني.
خلا وكام : لا بلة أحجي أريد أفهم قصدك ليش ورى ما مات عمي كمتوا تحجون على رجلي تشككون بي.
باوعلي وكال:
ـــ كيفج باجر تكتشفين الحقيقة أنتِ بس بعديش.
حجاها و طلع هاي شبيهم من عقلهم يحجون على بـروان.. عاد لليل رجع تعبان تمدد وهو بملابسه.
ـــ عاد أنزع ملابسك.
باوعلي بحيرة وكال.
ـــ وليش عصبية أرتاح و أسبح و أنزع
و أونس.
وسعت عيني المنحرف بس لا حجيهم صح.
ـــ ترى عيب تحور كلامي.
ذب ملابسه وتمدد يصيحني أستحيت
نمنا متأخرين فالصبح كال:
ـــ أريد منج شغلة.
ـــ وهي.
ـــ آني أخاف أحاجي عمي وهم ميصدك
ـــ لويش شكو.
ـــ آدم.. يجي ياخذ فلوس ويطلع ومن أحجي عليه يكولي كصهن من ورثي هذا شحاجيه.
باوعتله : زين وهو فعلاً ياخذهن لو..؟
أستغرب كلامي : شنو قصدج؟
هزيت راسي : ماكو شي.
هو صفن بكلامي وحس مثل اللي داشك بي عاد كال:
ـــ لو تشوفون الكم غيري آني هم وراي وظيفة ما أفرغ جنت لخاطر عمي أدير أموره وعمي هسة مات.
ما حجيت و راح هو.
خطب آدم وفرحتله بلكت يهدأ خاصة بـروان يشتكي منه يكول يبوك بالوارد وديبليني أول شي شكيت بزوجي بس بعدين كلت مستحيل بـروان ميسويها
بس ما أرتاحيت بنظرات خطيبة آدم.. لبروان.. وهو يباوعلها و يرجع يدور وجهه يتهرب هاي مو مريحة الله يستر منها شنو يعرفها الغيرة والشك حيل تعبني رحت يمه.
ـــ شبيك شو ضايج وهاي جوانا لويش تباوعلك؟
ـــ أكولج باوعتلي يعني شنو بطلي شك وغيرة رجاءً اوك و أريدج بموظوع وصلي خبر من وسط الوطن كدروا عمامي يحصلون تواصل ويه أبوية طلع عايش ومستقر وعنده عائلة.
حجاها بقهر ودنك يخفي مشاعره.
ـــ أنت سبق و كلت هو مستقر ببلد أجنبي.
ـــ أي واحتمال بس الوضع يتحسن يجي للوسط يم عمامي والتقي بي وصلولي الخبر آني الناجي الوحيد من عائلته.
فرحت و كوتله : آني فرحانة إلك راح يجي يوم تلتقي بأبوك.
ـــ إن شاء الله شيلان.. آني دأفكر أتواصل وياه ونهاجر.
بس آني رفضت:
ـــ لا بـروان.. ما أكدر أعوف البلد.
دنك و ذب حسرة:
ـــ مات عمي اللي رباني أبو آدم.. بقائي هنا جان لوجوده و هسة آني باقي لأجلج شـيلان.. خليها ببالج متحمل كولشي لأجلج.
و مرت الأيام و تزوج آدم.. بعد مرور أكثر من سنة على وفاة عمي خلالها بـروان.. كثرت روحاته لوسط البلاد ويغيب أسابيع بحجة أبوه راجع مرة كتله أروح وياك ما قبل و ظل يتحجج ما ترتاحين يمهم عاداتهم مختلفة عن عاداتكم و كلما أفاتحة بموضوع الأطفال والله آني فحصت بس هو من أكوله عيد الفحص يأكدلي.
ـــ ما بية شي و صحتي.. تمام و هذا الموضوع بعد لا تحجين بي لأن بقى يم الله يمتى ما يقسم تخلفين طفل.
ومرت سنة و آدم.. خلف توأم وظليت بحسرة ريحة الطفل واليوم حفل ختان أبن آدم.. رحنا آني و بـروان.. لكينا الأهل الأقارب كولها مجتمعة بس أبد ممرتاحة لجوانا.. مرت آدم.. أحس عينها على رجلي
فرحت لبروان كوتله:
ـــ حبيبي أدينا الواجب تعبانة خلي نرجع للبيت.
بس هو عجبته الكعدة وكاعد بنص جهال الأقارب من عشيرتي و أهالينا
و يلاعبهم متونس بيهم كمبصت يمه وأخذت الوصواصة من إيده اللي ينفخ بيها للجهال وتوصوص وهم يصفكون يضحكون.
ـــ يلة بـروان.. كافي دخت من المكان متعلمة على الهدوء و ذول الأطفال سوها ضوضاء.
التفت من بين جتافه وكلي:
ـــ بعد وقت لو متونسة العالم تكول تمشيه بمرامها ومسيطرة عليه.
ظليت مصفنة بوجهه وآني متفاجئة بكلامه عجيب أمرك يا بـروان.. هواي تحس بنقص بس طبعًا ما حاجيته لأن أكيد العالم ما تخلي أثنين عايشين بتفاهم فيبسمروه.. و الظاهر هاي سوالف جوانا ومرت عمي ما تتعداهن خلقن داخله أنو الناس دتنظر إله محبس بِإصبعي.
رجعنا للبيت وكال.
ـــ أتمنى أخلف منج بنية هاي سبع سنين وما خلفتي.
اليوم تخبل علية من شاف الجهال ولاعبهم حسيت يدور طلابة باوعلي وذبله كلمة.
ـــ بلة آني رجال أتزوج وأخلف إذا لزم الأمر بس آني أفكر بيج أخذج للخارج أبوي موجود وعنده أمكانية وما يبخل علية أعالجج.
ـــ شنو هذا الكلام رحت هواي أطباء ما بية شي مليت من الوظع مو لو موزوز لأن أنت كلما تروح و تجي من عمامك بوسط البلد تجيني موزوز وتلمح تريد تعرس و كاعد تحجي بأسلوب شقى مدري جد تجس نبضي مو غبية آني طفل ماكو وهذا الموجود لمن ربك يفرجها شبيدنا أحنا الله ما قسمه.
بس صدمني بكلامه من صيح علية.
ـــ لعد شوفي حل.. لا أتزوج.
فتحت عيوني على وسعهن الصدمة لچمتني:
ـــ شنووو نعم شگلت؟!
ما سيطرت على أعصابي ودفعته من صدره وآني معصبة.
ـــ عيدها بلة.. شگلت؟
دفعني بغضب:
ـــ أكسر إيدج بس جربي تدفعيني.
ـــ ولك سنين حامدة ربي و شاكرته وعايشة على الأمل بيوم من الأيام أصير أم هسة تجرحني و تريد تخليني بخانة اللي متخلف مو؟ لعد أسمع مني آني ما بية شي مفهوم روح أنت عالج روحك أول وتأكد من روحك عود تعال دور عرس وزواج ثاني.
ظلينا أسبوع منتحاجى لمن بيوم دنيا ليل إجاني اتصال من جوانا مرت آدم..
ـــ أكولج شـيلان.. هذا رجلج سكران جايني لو يدري آدم والله طلقة بكصته يخلي تعاي أخذيه.
أنصدمت معقولة؟ رحت من الكوخ طلعت وآني أركض بين الحدائق لكيته متمدد عالقنفة بصالتهم والغثني هي بملابس نوم ذولي مستحيل شغلة عابرة أكيد بينهم شي.
ـــ تشتكين و طالعتلة بملابس نوم يا هانم أنتِ شنو بينكم ها؟!
بس الباب أنفتح وركض آدم وهو يجر بـروان.. السكران من ياخته ونزل بي بوكسيات:
ـــ أخذي رجلج النذل متعدي على بيتي خابرتني مرتي تشتكي.
ـــ أسألها ليش هي يمه و بملابس نوم
هاا ليش.
ـــ أنجبـي وأخذيه و أطلعوا برى نكار جميل بـروان.. تريد تتعرض لشرفي؟!
باوعت لبـروان.. وهو يترنح ومضيع الأول والتالي لعبت نفسي منه وهو بهذا الحال عود هم أجي وأسنده حتى آخذه كوخنا لا والله عفته و طلعت دموعي على خدي ليش وصلنا لهنا ليش؟! شوي و سمعت صياح و صوت بابا والعمال شايلين بـروان.. شمروه بباب الكوخ أباوعلهم من الشباك مستهضمة و بابا رزلني.
ـــ طلعي ولج ألمن تباوعين من الشباك طلعي وشوفي هو هذا أختيارج مو؟ طاح حظج على هذا الأختيار.
حيل تفشلت خلاني بموقف لا يحسد عليه هو هذا أختيارج طلعت للباب أباوع و أبجي حظي فشلني وخذلني تعيرت بسوء الأختيار من ورى تصرفه
صفن بية بابا و غمني وراح وهو يعدل الجمانة اللي على راسه
(الغطاء او وشاح كردي )
دخلت للكوخ و آني أبجي النوب جاي سكران بديت أصدكهم بـروان.. معقولة مغشوشين بيك تبوكنا وتروح تسكر بيهن.. دخل يترنح يميل ويريد يسند طوله بس رجليه ما تعينه يوكع ويرجع يلزم الحايط بالكوة و يكوم فات للحمام سبح وطلع شوي أهون بس بعده لسانه ثكيل و يمشي أعوج من أثر الشرب.
باوعلي وكال:
ـــ دايخ.. أريد قهوة.
هنا فقدت أعصابي رحتله أنطيته راشدي و صرخت بي:
ـــ قهوة؟! وجاي سكران ولك هاي تاليها لو هي هاي حقيقتك اللي جنت ضامها عني.
دفعني عنه وهو يفتح بـالكمر الملفوف على خصره شمر القصل والتشوغة..(سترة وبنطلون كردي) وهو كوة يتحرك محسيت إلا وكع وهو نازع ملابسه عالنص و شمر روحه على الجرباية تخبلت جمدت بمكاني من شفت بنص ظهره العريان طكعات
عزة العزاج شـيلان.. جايني مطكع وين جنت وبيا ملهى وبيا مكان ولك هيج أنغشيت بيك ما حجيت بس عاتبت روحي لميت ملابسي بقهر وآني أبجي أخذت جنطتي وطلعت.
لكيت آدم.. بسيارته يشرب جكارة ضحك وكال.
: خانج مو بلة آني هاي دروبي القديمة بس أنتِ الغشيمة متعرفينة صاحب مزاج.
نزل من السيارة وهمس.
: تدرين صدفة رحت و لكيته خوش كاعد كعدة لو ما وصية أبوي بي جان عفته بس هم وصيتة وهم أنتِ بنت عمي ما أقبلها رجلج ينحرف فسحلته الج ولو هو سبق مضايق مرتي.
نترت إيد آدم.. ودفعته عن طريقي من سنة ونص أهلي.. عزلوا عن البيت الجبير رحت تمشيت لبيتهم.. بنفس البساتين مالتنا قريب بيت أهلي شجرة البلوط هاي بيوم من الأيام نحت أحرفنا عليها ذكرياتي سافرت لذاك اليوم مسحت دموعي وكعدت تحت الشجرة منتجيه عليها رافعة راسي لفوك أتأمل النجوم.
وأذكر أجمل يوم من أجه يساعد أهلي بالأنتقال لبيتهم أذكر كلامه.
ـــ عمتي كملت نقل الغراض.
أجت أمي مبتسمة.
ـــ تعبناك بـروان..
ـــ عمتي الحلوة تعبكم راحة أحسن خطوة تستقلون ببيت وحدكم.
ـــ إي والله اللي مبقينا جان أبو آدم من راح بعد تطشرنا ومرت عمك ما تنجرع ومكدر أعاشرها قبل أستحي من عمك فبقيت.
ـــ هي عصبية رغم مأذيته ما أنطى بيها.
ورى ما كملنا كعدنا يم شجرة بلوط وكف وطلع وياي وبدأ يحفر أحرف أسامينا ويرسم قلب و بالكوردي كتب
أجمل عشق أبدي مسحت عيوني ووجهي مشدود بألم مجروحة من تصرفه دكيت باب بيت أهلي و فتحه بابا.
: عفتي بنتي هذا أفضل ما سويتي يولي هذا حثالة و متشرد لو ميت بقريته المنكوبة ولا هاي أفعاله هم حرامي وهم حثالة.
دخلت البيت وسط كلام أبوية القاسي و أمي ترده:
ـــ يا رجال إهدأ كافي ترى كلامك جارح بـروان.. مو حرامي كافي تهم عجيب أمرك و حقدك على الولد؟
ـــ ليش منو حرك المحصول بذيج السنة قبل موت أخوي و لهانه نطفي و باك الرباه بس هو و أخوي يعرفون الرقم السري شلون حيال نلتهي نطفي الحريق وهو يبوك.
ـــ شـيلان.. شهدت جان يمها.
ـــ بس كالت رجع من برى يعني قبلها جان مموجود نفذ جرايمه ورجع يتستر بمرته ذكي وثعلب و هسة هم باكنا و يحاول يذب التهم على آدم.. هيج نذل وحقير وناكر معروف فلا شايف من راجعت الحسابات نقص فضيع.
سكتت مجاوبت شحجي يجوز كلامهم صح بعد ما أثق للصبح بـروان.. إجه معصب.
ـــ شلون عايفة البيت؟
ـــ كول لروحك يا سكران أنت واحد ما تستحي.
رفع أيده وضربني حضنت أمي أبجي
أمي : لا يا أبني ليش؟!
وقتها بابا ما موجود.
ـــ سمعيني زين آني مستحيل أشرب وأسكر ما أعرف شصار بس زوجة آدم أتصلت بية إلحك آدم.. رجع لسوالف النسوان والبارات والملاهي رحت آني حتى أجيبه و معرف شنو صار حاولت أسحبه كال أكعد بس أكمل هذا الداس
جان يقامر حاولت بس منعوني شقاوات الملهى وما كدرتلهم ظليت أنتظر يمل لعب و آخذه لا ساعة لا ساعتين الله يشهد مطلبت مشروب هو مي والله عطشان طلبت مي هو آني شربته وآني الدنيا تلف بية لا آني واعي ولا آني السكران بين وعي ولا وعي أكدر أمشي وما أكدر الدنيا تهتز بية و أمشي أترنح ما شربت غير مي وطعمه مي أبد مو مشروب جان حسيت بالطعم.
ـــ كذاب ولا أصدك بيك وين أكو هيج شي شنو مخدرينك؟ هة أكبر كذبة أجيت شميتك بيك ريحة مشروب شلك بالكذب بعد ها بس أنت خاين و حرامي إي هيج كول تستقطع من الأمانة الأمنك عمي فلوسنا و أملاكنا حتى تكضيهن نسوان و شرب.
باوعلي بصدمه:
ـــ تحجين صدوك أبد ما شربت جان مي و ريحتي منين أجت ما أعرف بلكت مؤامرة ورى ما فقدت رشوني مشروب حتى يبين شارب.
ـــ خوش فلم ومسلسل ألعب برى مو يمي بعد ما أثق بيك هم كذاب وهم خاين وهم طلعت تشرب وتدور نسوان ملاهي وقمار تلكاه أنت التقامر وتضيع فلوسنا على هاي السوالف و تشمر سوالفك سرقاتك براس المكرود آدم.. ولك فشلتني بسوء أختياري إلك حرامات ضيعت سنيني يمك همزين الله ما كتبلي طفل منك.
ظل يتوسل : لاتخسريني بتهمج.
ـــ طز كرهتني بروحي.. فشلتني وي ناسي يعني تمد أيدك وتبوكنا ولك أنت منيلك تطشر عالنسوان و الملاهي.
ـــ أولاً أكدر أخذ من أبوي رجع بس آني ما آخذ و أستغل غيري فلوسي من تعبي وشغلي لو أريد عندي أب ينطيني مو أبوك العالم اللي تكفلتني من النكبة لليوم من الثمانينات وآني أبد ما أشرب ولا أسكر أبد يمكن غبي ووكعت مكيدة رجعي للبيت نتفاهم و تعوذي من الشيطان لا تخسريني أروح ترى ما أرجع.
بس عاندته : ما أرجع الأفضل طلاق وروح لأهلك شجلبت لو هنا تبقى حتى تنهبنا نهيبة بالبوك أبو النسوان روح من يمي.
حجيت وبجيت..
ـــ ولج؟!
وجرني من إيدي حيل و أُمي تصيح.
ـــ الله يستر على كيفك يمة.
ـــ عمتي ماكو شي لا تخافين نتفاهم بس.
دخلت للكوخ أبجي و آني أشمر بيدي.
ـــ تخوني ها إي راقصات ملاهي وشرب وفوكها ولك تمد إيدك.
حضني يهدأني وهو يقسم ويحلف.
ـــ لا تصدكين بيوم أسويها ترى كذب ما سكران يجوز خلولي شي خربط حالي.
ـــ والفلوس اللي دتنقص.
باوعلي مصدوم.
ـــ هواي كررتيها و تسامحت لا تخليني أروح وما أرجع آني حرامي؟ مو عيب هيج تهم من كل عقلج تشكين بية ترى آني بـروان.
ـــ مو أشك بس الأدلة ضدك.
ـــ فوتتها إلج بس مرة الجاية عيدي التهم ولله أعوفج فاهمة ثقي أعوفج.
ظليت كاعدة أبجي.
ـــ نطلق أحسن.
ـــ أنجبي و أكلي تبن أروح أجيب جنطة الزعلات اللي على أتفه سبب أخذتيها و شردتي لأهلج ترى إحنا زوجين كولشي يصير بينا هنا نتفاهم أفضل مو كبل تهربين.
جنت ضعيفة تجاهه بـروان.. وما أكدر بلياه بسرعة أقتنع و كدر يقشمرني كرص خدي أبتسمت..
ـــ بعد لا تعيدها سامحتك.
جر نفس وهو يخزرني.
ـــ وآني شمسوي حتى لا أعيد ممسوي شي ترى يردون يخربون بينا وشاك بآدم..
ـــ هو تزوج بعد المن يخرب كول مرته حاطة عينها عليك لوتية تستنجد بيك ودزتك للملهى تريد تخرب بينا تشوه سمعتك عندي.
لزم إيدي وجرني لحضنه وهو يشم برگبتي يغويني ضحكت وهو يهمس.
ـــ آني أحبج.. ألج بعد لا تخلين أحد يخرب بينا لا تخسريني شـيلان..
حضنته حيل ونسيت وقتها اللي صار
بطيبة گلبي بس ما أستمر الوضع بيوم أجاني بابا.. يدك على راسه
ـــ الخزنة مصفرة باكنا أبن الكلب ولج وينة رجلج راحت فلوس المحصول البعناه أمس.
طلع بـروان.. مستغرب:
ـــ شتحجي عمي شنو أنباكن ترى بيدي رزمتهن والمفتاح عندي و عندك.
ـــ ولك منو حرامي غيرك كاضيهن على النسوان مو؟
تعاركوا بينهم و بـروان طرد أبوي
و شمر المفاتيح عليه.
ـــ لهنا ومالي علاقة بيكم و بأملاكم ترى عيب تتهم دون دليل روح شوف آدم.. أبو الأقمار مو جاي علية.
ـــ كذاب أنت سوابق وتطردني.
تدخلت مقهورة:
ـــ تطرد أبوية و نسيت هم مكعدينا بكيعانهم.
ـــ هاي سهلة لمي ملابسج بعد ترحين لوسط العراق تعيشين يم عمامي هناك مكاني و تتبعيني هنا بعد ما أبقى واضح؟
بس كدرت أهدئه بقى زعلان وي أبوية بس قنعته نبقى ببيتنا و معلي بعد بالأملاك و أبوي راد يرفع قضية سرقة على بـروان.. بس أمي مخلته و آدم.. هم ما قبل كال يبقى من العائلة وزوج بنتنا فلوس المحصول فدوة يجن بس ما نشوه سمعى بنتنا والأملاك بعد آني أديرهن صح نمر بأزمة مالية بس العوض على الله بابا ما أقتنع بس ماكو دليل بـروان.. السرق فسكت و صار كل همه يعوض الخساير لأن صرنا مهددين بالإفلاس
ظل بـروان.. بوظيفته الحكومية و ما تدخل بالأملاك بعد داخلي شك بي بس سكتت أخاف أحجي ويتركني وما أكدر دونه ما أعرف مديون وميكول و أخذهن وسدد لو متورط بشي حاولت ألمح إله بس يباوعلي بنظرة ومرة همس مجروح.
ـــ هواي تحملت لأجل حبنا.. ما ينتهي وزواجنا يستمر كله لأجلج بس أنتِ شنو المقابل داحس تلميحات تشكين بية من أروح لوسط البلاد ترى أشوفج تفتشين الجنطة بسكتة كل بالج أبوكم وأوديلهم هواي أنتم ناس مغرورين ليش كل عقلكم بس الفلوس عدكم و الأملاك بس أنتم تملكوها لو ما أعرفج مشكلجية آخذج هناك تشوفين أملاكنا شكد هناك آني هنا بقيت لأجل عمج ما قبل أعوفه و لأجلج ما تردين تعيشين خارج قريتج بس لهنا و كافي.
ظلينا بين صلح وزعل لمن أجا اليوم المشؤوم وقتها رحت للبيت الجبير أشوف جوانا.. ولا أرتاحلها لأن بـروان أجاه أتصال و شكيت من ظل يباوعلي و يضمضم بعيونه حسيت وراه شي فأمنته ورحت للمطبخ سمعت يهمس.
ـــ جوانا.. مو وكت هذا الكلام أجي ونتفاهم أهووو كتلج جاي.
وخرت عن الباب لا ينتبهلي خلا وطلع أمنته دقايق وراها تبعته للبيت الجبير فارغ بس عمتي متمدده على القنفة.
ـــ لعد جوانا.. وين؟!
ـــ طلعت تكول ضايجة تلكيها بالبساتين لو شوف وين تتمشى.
هزيت راسي وآني أمشي بين حدائق الفيلا طلعت منها و أتلفت بس هاجس خلاني أروح بأتجاه مراعي الحلال و تجاه الإسطبلات وكفت وراها ركضت وآني أصرخ...
مـــــــــــــ♡ـــــــــــــــريم
لزمت ياسر.. وملصت راسه.
ـــ منو جاي يركب راسك أنت راسك مفصول من جسمك منو هيج موخر الدم سكتت وآني أطشر الغراض بهستريا ولج وينج يا كرعة و طلعلج شعر بلة هاي شسميها شو شعرها رجع نبت أم شعر زغيرون وينج أجت الصفرة تركض تنهت..
ـــ يمة بس تعبت ولج توني جاية من العلاج أريد أنام أرتاح النهار كوله و الليل كوله أفتر وراج ولج بصغرج وبمراهقتج ما تعبتيني مثل ما تخبلتي علية شكد توسلت بعون حتى عـون ما يقبل بيج..
شمرت راس ياسر.. عليها.
ـــ هج رجعي الدم براسه ياسر راسه دم يلة
ظليت أصرخ و أملش بشعري و أضرب بيها وهي تلزمني تريد أهدأ.
ـــ ولج لعابة وحلوة تفصلين راسها ليش وتلونين ركبتها أحمر ولج كاااااااااافي أصحي مـريم.. أصحي ياسر.. ما يرجع تعبتيني.
كمبصت وتبجي والله وترتني شلون مخبلة هاي وتصيح لا يا خبلة هاي العالم كلهم مخابيل و باوعت للسكف بس شفت شي ينزل منه ظلال خفت ظليت أصرخ وآني على مقعدي أرجع لورى أختفى الظلال.. ورجعت لهاي الصفرة مديت لساني أعيب وآني أخلي كفين إيديه يم حلكي و أطلع أصوات.
ـــ تررررلللي لولي لولي مخبله هة مخبلة هة
كعدت مكمبصة و ضمت وجهها بين إيديها وهي تبجي وتنوح
ـــ اااخ يمة تعبتيني ولج ليش هيج يمة ليش تعبت ولج.
أهووو أشتغلت الخبالات مال الصفرة
كعدت كبالها أوخر إيديها
ـــ أنتِ بجيتي؟
هي تنحب تبجي كابلتها أنحب وأبجي جرت نفس
ـــ لا جاي أضحك شوفي.
و أبتسمت ولزمتني حضنتني تبوس بية
ـــ بنيتي الحلوة أبوسج صيري عاقلة.
ـــ والله مخبلة هي وهي شلون تبجي وحلكها يضحك شفتي لو ما عايلة بية وبياسر ما بجيتج.
ـــ دخت ربي راح أتمدد أنام شوي عفية الحلوة هنا لعبي راح أسد الباب.
أم مريم : قفلت الباب و أخذت المفتاح ورحت نمت ربي أرحمني و طيبها لو تموتني وتموتها وياي لا تبقيها بعدي وحيدة.. تضيع بالشوارع لو عمها وحماها يأذوها ربي أنت أرحم الراحمين ونمت رحت بسابع نومة من التعب وما كعدت الا على عـون.. يم راسي شدخله هذا؟
ـــ يمة الباب مال المطبخ مشرع وباب البرى مفتوح وين وصال أقصد مريم؟
رمشت أستوعب وفزيت أضرب كصتي.
ـــ يمة بنيتي وين راحت قفلت البيبان لا.. يمكن نسيت المطبخ ما قفلته.
عـون : ركضت لبست عبايتها وآني وراها..
ـــ شلون تيهتيها شلون بنية حلوة بس لا أنخطفت هاي مو منطقتنا الشعبية وتروش بالعالم هنا هدوء الينقتل محد يحس بي مو بعد ينخطف.
ـــ معقولة أنخطفت حتى من تطلع يم الباب تكعد والله ما تروح بعيد حدها الباب لو تروح يم أبو صالح بمحلة تاكل ويسجل علية الحساب.
ـــ عاشت إيدج محلات تروح ربحنا وهي بهيج حال.
رحنا لأبو صالح وسألناه.
ـــ لا والله ما أجت اليوم.
بس طفل جاي يشتري باوع لمرت أبوي و كال.
ـــ تدورين بنتج المخبلة أهوو غير وكفت سيارة و أخذوها..
ضربت مرت أبوي صدرها.
ـــ يمة أنخطفت بنتي يمة راحت بنيتي يمة أخذوها عصابات الأعضاء لو مدري وين يودوها ألحك علية عـون.. ولك بنيتي ضاعت.
باوعتلها وأني ما أعرف شسوي وين أنطي وجهي مدري ليش أجه ببالي أتصل بي...