رواية بين الضياع واللقاء الفصل العشرون 20 والواحد والعشرون 21 بقلم شذى عبدالمكرم
ساعات الحياة بتكون عكس توقعاتنا وما بتمشي ذي ما خططنا ليها ابدا لانو دايما القدر ليهو رأي آخر ...... بعد آخر نقاش مع محمد بقيت شاردة هسي اعمل شنو وانا فسخت خطوبتي بسبب ما شايفة انو محمد متمسك بي ابدا بكيت قدري وقومت غسلت وشي وصليت امي جات داخلة غرفتي لقيتني في المصلاية وقفت استنتني لمن خلصت طبعا كانت معزومة برا ما كانت عارفه انو محمد ظهر شكلو راشد كلمها من عرفت جاتني في الغرفة
امي: راشد كلمني انو محمد رجع الف حمدالله على سلامتو
نعيمة: الله يقبل حمدك
امي: كيف هو حاليا
نعيمة: كويس
امي: الحمدلله انو ما جاتو عوجة
نعيمة: امممممم
امي: مالك انتي
نعيمة: ماف حاجة تعبانة بس
امي: ايوااا . وطلعت مني وانا رقدت لاني كنت مصدعة وحاسة روحي ما تمام اصلا عندي اسبوع حاسة روحي ما تمام اتغطيت ونومت مع انو نوم المغارب كعب بس نومت امي جات صحتني للغدا بس رفضت طلعت خلتني تلفوني رن حتى ما عاينت للمتصل طوالي قفلتو وواصلت نوم بحاول اهرب من الواقع الصباح صحيت بحمى وجسمي مكسر امي جاتني زمن الفطور رفضت اقوم
امي: من امس نايمة مالك انتي وهسي ابيتي الفطور
نعيمة: جسمي واجعني . جات هبشتني
امي: حرارتك مرتفعة قومي نمشي نفحص ليكي
نعيمة: ما قادرة بردانة انا غطيني بدافيتي . طلعت خلتني جا راشد داخل وشايف حرارتي وقاس ضغطي
راشد: شكلها ملاريا لازم تفحص لبسيها يا امي بجيب ركشة لانو ابوي مشى بعربيتو . امي ساعدتني غسلت وشي ولبستني عباية وانا ما مستوعبة حاجة
راشد: اطلعو . طلعنا كدا وانا متكية في امي والركشة كانت برا جيت اطلع كدا محمد كان جاي ما عارفة من وين جانا طوالي
محمد: مالا
امي: ما عارفين ماشي نفحص ليها شكلها ملاريا . وانا دي محمد دا شايفة خمسة خمسة ومع الشمس دي خلاص
نعيمة: امي انا ما قادرة . وجيت مليت فيها ثبتني ومحمد سريع مسكني معاها لانو راشد كان بعيد شوية مننا وقعدوني في الركشة
محمد: جسمها مولع
امي: ايي والله
محمد: خلاص انا بلحقكم بعربيتي
امي: تمام . واتحركنا وهو لحقنا بعربيتو وصلنا المستشفى وكان زحمة
محمد: خلونا نعمل الفحص في معمل خارجي
راشد: محمد صح كلامو وانا بقرا النتيجة وبشوف الادوية المناسبة
نعيمة: انا ما بقدر خلوني هنا
امي: دا كلام شنو يا بتي
نعيمة: امي جسمي واجعني . وعيوني دي حاسها نار بس ودموعي دي جارية بس
راشد: اشيلك؟ . هزيت ليهو رأسي بمعنى لالا
محمد: خلاص بنساعدك انا وراشد . هزيت ليهو رأسي بمعنى ايي . وتكلوني الاتنين ووصلت عربية محمد واتحركنا لمعمل خاص وعملت الفحص وكنت راقدة في كراسي المعمل البتجي تلاتة لصق بعض وكنت خاتة رأسي في رجل امي وهي بتمسح في رأسي وبتعمل لي مساج عسى ولعل يخفف لي الصداع وهامة ليه شديد لمن النتيجة طلعت
راشد: دي ملاريا تلاتة صليب والتهاب وتايفويد و ضغطك منخفض شديد لازم تآخدي درب انتي ما كنتي حاسة بروحك ولا شنو شايلة المرض دا فترة
نعيمة: كنت بحس بصداع وشوية حمى من اسبوع بس ما مركزة معاها
محمد: دي حاجة ما بركزو معاها دايرة تموتي؟
راشد: دا انتحار عديل
امي: عليك الله خلوها براها تعبانة عاتبوها بعدين ما شايفين حالتها . ساعدوني تاني وركبنا العربية وشالو لي الادوية ومحمد وقف شايل لي فواكه ورجعوني البيت ما صدقت لاني عاوزة انوم بس امي عملت لي نشأ شربتني غصب عشان ابلع الادوية وبلعتو ونومت جوني خالتو مريم وشمائل عشان يكفرو لي كنت لسع تعبانة لمن طالعين شمائل جاتني قريب
شمائل: محمد قال ليكي افتحي تلفونك لانو قلقان عليكي شديد . هزيت ليها رأسي وهي طلعت فتشت تلفوني ورفعت وضع الطيران نزل لي محاولات محمد كلها ختيت التلفون جنبي ربع ساعه اتصل لي تاني رديت
__ نينا بقيتي كيف
_ احسن الحمدلله
__ متأكدة
_ امممممم
__ بلعتي ادويتك؟
_ اممممم
__ حاليا تعبانة شديد؟
_ لالا
__ متأكدة ولا نرجع نعيدو الفحص تاني
_ محمد
__ عيوني احكي
_ نعيمة تعبانة
__ ما عارف اعمل شنو عشان اخفف عنك نينا خلينا نمش لاخصائي
_ ما يحتاج بكرة حأكون احسن
__ جسمك واجعك؟
_ ما حاسة بجسمي والله
__ اجي نمش للدكتور
_ محمد قولت ليك ما بحتاج بس عايزة انوم وحأرتاح
__ اخليكي ترتاحي بس ما تنسي ادويتك
_ تمام . قفل مني وطوالي نومت الصباح حالتي بقت اسوء طلعو بي للمستشفى والا راشد شايلني شيل ركبو لي درب وانا ما فاهمة حاجة طلعوها تاني ركبو لي وحدة حتى يداب جمعت لقيت ركبو لي فراشة وجنبي كانت امي لمن فتحت قامت بكت
امي: خوفتيني عديل . بغمض وبفتح وعاينت كان محمد واقف وهو لابس الكاكي وراشد وابوي كلهم حولي
ابوي: كويسة انتي؟
نعيمة بهمس: كويسة الحمدلله
محمد: سلامتك
نعيمة: تسلم . قريت الخوف في عيونو بس قدام ابوي ما قدر يقول حاجة لمن خلصت الدرب رجعنا البيت ونومت بس
تلاتة ايام مستمرة في الادوية لمن حسيت نفسي احسن ومحمد كان كل رأس ساعة يضرب ويسأل بقيتي كيف ويقفل لمن زهجت من السؤال في اليوم التالت لمن اتصل لي رديت حتى ما خليتو يقول حاجة
_ محمد انا ما كويسة
__ اجيكي نعمل نفحص تاني خلاص انا جاي في الطريق خليكي جاهزة . قومت ضحكت
_ والله انا كويسه
__ نعيمة مالك ياااخ براي متوتر من حالتك ديى
_ انا تعبت من انو اقول ليك انا كويسة
__ عايني في يدك اليمين فيها شنو
_ امممممم الخاتم المفروض تجي تستلمو
__ وتاني
_ فراشة
__ فيها فراشة معناهو لسع ما بقيتي تمام
_ كويس خليتك اها حتجي تشيل خاتمك متين
__ بعد تبقي كويسة بجي بحولها من اليمين لليسار . هنا فصلت
_ اممممم ما عاوزاك تحولها
__ غصب عنك حأحولها
_ بس موش قولت نفسخ
__ نينا انا لمن قولت كدا والله من خوفي عليكي وهسي كرهان نفسي لاني اكيد السبب في مرضك دا والله شايف نفسي اذى بالنسبة ليكي ودايما معيشك في حالة توتر وخوف اهو لمن مرضتي بسببي وهسي ذاتي متردد انو اواصل ولالا والله انتي غالية علي ما بقدر اشوفك في الحالة دي . عرفت احساسو في اللحظة وانو حاسي بالذنب انو بأذيني
__ محمد
_ سامعك
__ حنتم عرسنا متين؟ مأموريتك وخلصت تاني عندك حاجة؟
_ نينا متأكدة من قرارك دا؟
__ متأكدة ذي اسمي دا
_ بس حتتعبي بسببي
__ انا اصلا من زمان الله كاتب لي التعب فشنو ما تركز معاي
_ والله ما عندي غيرك اركز فيهو . بقيت اتفصل ساي
__ خلاص تعال سوقني . قام ضحك
_ ابقي كويسة اسبوع بس بسوقك معاي
__ لالا بهظر هوي
_ نقطة سطر جديد
__ اسمعني يا جنابو الموضوع ما بحصل كدا
_ اها بحصل كيف يا مرت جنابو . فصلت
__ محمد تعال سوقني بفراشتي دي . قام يضحك
_ لو ابوكي بديني والله اخر الليل دا بسوقك . وبقينا نتونس ونحب في بعض ساي وكانت مكالمة حلوة شديد ..........
__________
من جانب محمد
كان قلقان وخايف على نعيمة بالاخص متأكد مية المية انو تعبت بسببو وبسبب خوفها عليهو بس خايف كمان من خسارتها بس بعد اخر مكالمة معاها وشايفة انها مصرة تكون معاهو اداهو دافع انو ما يتخلى عنها مهما حصل وانتظر لمن نعيمة رجعت ليها عافيتها قرر يمشي لابوها عشان يحدد عرسو كلم امو ومشى وفضلوهو
محمد: عمي جاي الليلة عشان نحدد العرس من جديد
راشد: انا ما موافق على العرس . الاتنين عاينو ليهو بخلعة
طارق: كيف يعني يا راشد
راشد: ابوي ما شايف حالتها بقت كيف انا ما قنعان من اختي
طارق: يعني انا قنعان من بتي؟
راشد: ابوي نعيمة حساسة وما حتتحمل وقلبها ضعيف
محمد: راشد مقدر خوفك على اختك وانا اخترتها لانو شايفة مناسبة لي
راشد: نعيمة ابدا ما مناسبة ليك
طارق: الحاجة دي بتحددها نعيمة وانا ما جبرتها على حاجة جيت اتكلمت معاها موافقه على محمد قالت ايي يبقى هي عارفة الراجيها
راشد: هي لمن واقفت عارفة الراجيها بس ما عاشتو كانت بس ياهو كلنا شوفنا النتيجة وقربنا نخسرها
طارق: هي مرضت
راشد: وسبب المرض منو . ابوهو حمر ليهو ومحمد اتحسس من الكلام دا
طارق: انا اديتو كلمة زمان وهسي برضو نستشير البت لو موافقه تواصل حأكلمك ونحدد موعد مناسب للعرس
محمد: تمام يا عمي . وطلع وهو زعلان شديد وخايف في نفس الوقت انو بسبب راشد العرس ما يتم بقى يفكر البحصل شنو
بعد العشا اتصل لراشد
محمد: فاضي؟
راشد: ايي
محمد: في جنبة آخر الشارع منتظرك فيها
راشد: تمام . وطلع للجنبة وانتظر راشد وجا وقعدو
__ راشد عارف انك خايف على اختك بسبب شغلي دا بس انا ما بيدي حاجة شغلي كدا
_ انا ما طلبت منك تغير شغلك بس غير مرتك
__ عارف وفاهم احساسك شنو لاني عند اخت وبفهمك لو كنت محلك حأخاف عليها ذيك
_ خلاص مدام فاهم احساسي ابعد
__ لو قادر كان بعدت والله حاولت انو اخلي اختك وحتى انا خايف عليها ذيك بس اعمل شنو الامرين صعب علي والله انا جنس حواء ديل كلهم ما حصل اتعاملت مع بت غيرها ولا عمري كلو حأتعامل
راشد: بس نعيمة حساسة واكيد لاحظت
محمد: ملاحظ والله وبوعدك اني احافظ عليها وبحاول اني اسعدها بقدر الامكان ولو في يوم ظهرت لي مأمورية وفي شخص تاني غيري ممكن يطلعها ما بتردد ابدا انو الغيها
راشد: متأكد انك تحافظ عليها وما تزعلها
محمد: ما بقدر اوعدك اني ما بزعلها لانو المشاكل بين الازواج حاجة طبيعية بس بوعدك اني احاول بقدر الامكان انها ما تزعل مني
راشد: تمام
محمد: يعني خلاص فينا نحدد العرس
راشد: منتظرينك بكرة واصلا نعيمة بدون تردد حتقول موافقة تواصل . وضحكو الاتنين..........
___________
من جانب نعيمة
بعد بقيت كويسه و اي حاجة ابوي ناداني بعد ما كنت نايمة وامي صحتني وقالت ابوي منتظرني غسلت وشي ومشيت ليهو
طارق: محمد هسي كان معانا هنا
نعيمة: محمد جا هنا؟
طارق: ايي وجا عشان نحدد العرس . قولت في سري خلي يصبر لي دايما بتخذ قرارات بدون ما يرجع لي الليلة حألفها معاهو قطع تفكيري ابوي وهو واصل كلامو
طارق: بس ما راشد ما موافق . فتحت عيوني بصدمة
نعيمة: ليه
طارق: شايف انك حساسة وما قدر الحاجة دي وكلنا شوفنا النتيجة يلا لغينا العرس . لسع كنت مصدومة ودايرة ابكي كيف يعني يلغو العرس
نعيمة: ابوي انت جادي؟ . قام ضحك
نعيمة: ابوي ياااخ
طارق: والله اخوكي رافض
نعيمة: ليه
طارق: شايف انو قلبك رهيف ياااخ مأمورية وحدة بس قربتي تفوتي فيها راشد صح كلامو انا ذاتي ما عارف محمد دا اختارك ليه بنات حواء انتهو . المفروض ازعل بس ضحكت شديد وهو ضحك معاي
نعيمة: ابوي!!!!
طارق: هسي طفشنا العريس احسن تقعدي مع امك هنا . عاينت ليهو بزعل كدا
نعيمة: تمام
طارق: اسمعيني موافقة تواصلي طريقك مع محمد دا؟
نعيمة: امممممم . وهزيت رأسي
طارق: يبقى قوي قلبك عشان ما ابقى انا ذاتي في صف راشد
نعيمة: وراشد البحصل فيهو شنو
طارق: هسي ضرب ليهو محمد ومشى يشوفو ان شاء الله يقنعو . قولت في سري ان شاء الله يا رب لاني مستحيل اتزوج وواحد من اخواني رافض
نعيمة: ابوي راشد لو ما وافق انت اوع توافق لاني ما حأطلع من هنا وواحد من اخواني ما رضيان . ابوي ابتسم لي برضا وهز لي رأسو وقومت مشيت غرقتي وانا متوترة انو راشد يثبت على رأيو كنت منتظرة متين يجي وعملت شاي لبن ومنتظراهو لمن رجع اخر الليل و سمعت حركتو ناديتو جاني
نعيمة: عملت شاي لبن تعال اشرب معاي . جا وقعد معاي وكبيت اللبن
نعيمة: بابا قال لي ما موافق خلاص انا ذاتي ما موافقة
راشد: بتقيفي جنبي؟
نعيمة: انا دايما جنبك بس بعدين لمن تجيب لي مرتك برفضها ليك ذي ما حصل حاجه
راشد: نظام تكفي حقك ولا شنو
نعيمة: لازم اكفي حقي
راشد: اسمعي هنا يا بايرة انتي .... داير يتم كلامو رفعت ليهو ايدي واشرت ليهو اتجاه خاتم قام جاي علي قومت سريع عشان اجري وبالفعل جريت وهو جرى وراي
نعيمة: والله العظيم بهظر معاك
راشد: تعالي نشرب اللبن دا . مسكني ذي الحرامي و رجعنا قعدنا تاني
نعيمة: هسي البحصل شنو يا توأمي
راشد: نفتش ليك عريس تاني بس محمد دا قفلنا صفحتو
نعيمة: امممممم . عاين لي مسافة
راشد: نعيمة حتتحملي؟
نعيمة: انت شايف اني ما قدرها والله الصراحة ما قدرها . وضحكت هو لمن ضحكت قام ضحك
راشد: والله هبلة خلاص
نعيمة: راشد انا وافقت على محمد وعارفة شغلو ومتأكدة انو حياتو صعبة بس وافقت ليه ما عارفة ويلا دي قسمتي
راشد: انتي من الله خلقك منحوسة وياهو واضح . وضحكنا
راشد: هسي المفروض اخاف على محمد ما عليكي انتي . ضحكنا
نعيمة: هوي انا اختك والمفروض تخاف علي انا
راشد: كويس
نعيمة: عندي ليك خبر سمح خلاص
راشد: شنو
نعيمة: جيبت ليك عروس
راشد: جياشية صح ؟. ضحكت ضحك لمن دمعت
نعيمة: الله يجازي محنك . وقعدنا نشرب في اللبن ونضحك.......
21
أخيرا حددت موعد زفافي كان بعد اسبوعين بس من رجعت لي عافيتي حاولت ازيد المدة عشان اجهز بس محمد رفض بشدة فخلاص اتحدد الموعد ورجعنا عزمنا الناس من جديد واهلي من البلد جو عشان يحضرو العرس واخوي عبدالله برضو رجع لانو قولت ليهو لو ما جيت ما حأعرس اضطر يآخد إجازة وجا اما شمائل راجلها أجل السفر عشاني لاني كنت حأخاصمهم لو ما حضرو العرس بتاعي وانا مشيت بيت عمتي لانو فاضي قولت انحبس فيهو الاسبوعين ديل والشباين حقاتي معاي وحبوبة ام ابوي جات من البلد ونزلت مع بنتها الهي عمتي ذاتها وشمائل بتجيني بتقيل وبترجع لانو راجلها قاعد
فردوس: حنتك حتعمليها جبنة حبشية ولا حفلة
نعيمة: حأعملها حفلة
شمائل: انا حأعمل ليكي جبنة حبشية على حسابي هدية عرسك . البنات قامو يزغرطو من الفرحة مشيت حضنتها بفرحة
نعيمة: تسلمي حبيبتي
شمائل: ما يغلى عليكي . كنا فرحانين انو حيكون في فعاليتين
بالليل اتصل لي عبدالله
__ الغالية
_ حبيبي انا
__ عندك حفلة هدية من اخوانك بس انتي حددي اليوم حسب برنامجك
_ بالجد؟
__ اي
_ تسلمو لي شديد حبايبي
__ العفو نحنا عندنا كم اخت
_ وحدة بس وانا محظوظة انكم اخواني
__ نحنا المحظوظين انك امنا التانية وعبدالرحمن اعتذر انو ما بقدر ينزل بس حيتابع معاكي
_ كنت بتمنى انو يحضر لي سنين منو
__ لو ربنا كاتب حتتلاقو
_ بأذن الله
جريت للبنات وصرخت فيهم طبعا ما بخليهم يرجعو بيوتهم معسكرين معاي
فردوس: بشري
نعيمة: اخواني قالو لي عندي حفلة هدية منهم . قامو صرخو وينططو وبعدها قلبناها زغاريد
ريم: اخوانك ما قصرو
نعيمة: اختهم وحدة بس
ريم: يا بختك
فردوس: هوي دقيقه ونلقى فساتين من وين كدا
نعيمة: والله تتصرفو بس
سمر: انا لو بتوب بمشي . ضحكنا فيها فجأة تلفوني ضرب كان محمد
نعيمة: يلا دا وقت راجلي شاو . فردوس فنتني بالمخدة ضحكت ومشيت غرفة تانية ورديت
_ السمحة امست كيف
__ امممم تمام الحمدلله وانت كيف امسيت
_ تعبان بس
__ ليه من شنو
_ بحاول اخلص الشغل العلي واقفل القضايا الماسكها واحول الباقيات لضباظ تانيين لاني عريس وكدا
__ يحليلك
_ اها انتي برامجك كيف
__ اممممم عندي الحنة وتاني شمائل قالت حتعمل لي جبنة حبشية كهدية واخواني عندهم لي حفلة هدية
_معناهو انا ذاتي علي حفلة هدية
__ماف داعي ديل كفاية
_لا تستاهلي وانا علي وحدة
__تسلم لي شديد
_ وانتي تسلمي لي
__ اها وانت
_ للان ستة حفلات حنة هدايا . قومت ضحكت
__ يا بختك والله
_ المشكله اي رئيس عامل لي وحدة واصحابي عاملين لي وحدة
__ ما قصرو معاك شكلو عرسنا حيكون اسطوري من كترة الحفلات
_اي حيكون كدا و ان شاء الله الحفلة الكبيرة حأخليها ذكرى حلوة ليكي لانك تستاهلي
__ وانا متأكدة انك ما بتقصر بس احلى هدية هو انت
_ نعيمة ما حتندمي صح؟
__محمد لو قالو لي محمد حيطلع مأموريات بالسنين حأنفسن وحأمرض وحأتوتر بس بنتظرك لاخر عمري
_ كنت متأكد من اختياري ليكي
__ بس راجيك نكد بالكوم الا تجهز نفسك من هسي . قام ضحك
_ علي قاعد طوالي بقول ليهو ارفعها لي في البوكسي دا
__ نهائي ما بسألك يا محمد
_ اسأليني
__ ببيتك برا البيت بس اصبر لي
_ يا زولة؟
__ الصبر بس يا ود نصرالدين
_ وين احترام الجيش وين احترام الضباط
__ ليهم كل الاحترام
_ وانا برا الدائرة ولا شنو
__ كويس انك عارف نفسك
_ الوحيدة المحاقرة بي
__ معقولة يا جنابو؟
_ معقولة يا قلب جنابو . نحنا فصلت هو ضحك لاني فصلت
__ محمد ياااخ
_ هسي انا قولت حاجه
__ ما عارفة . وواصلنا ونسة تقريبا المكالمة جرت ساعة حتى قفلت وجريت للبنات وانا برقص
سمر: قالو ليكي شنو ذي دا لمن مبسوطة
نعيمة: هو كونو اتكلم معاهو ساي بكون مبسوطة بس جاية لكم بخبر ظابط
فردوس: الله يرضى عليكي قولي في حفلة تانيه
سمر: شغلة هي
نعيمة: محمد عامل لي حفلة هدية
ريم: كذابة
نعيمة: والله العظيم . كلهم قامو يرقصو معاي مبسوطات
سمر: محظوظة يا بت المحظوظه
فردوس: يلا دا نتيجة صبرك عليهو
نعيمة: اممممم
ريم: صح والله . اليوم داك نومنا مبسوطين من الفرحة
عدت الايام وعملت الحنة بتاعتي وكانت حلوة عجبتني وشمائل ما قصرت في الجبنة الحبشية وبعدها اخواني عملو لي حفلة تانية وتاني محمد عمل لي وحدة وبهناك محمد عمل حفلاتو وطبعا شمائل ساقت البنات حضرو كم حفلة والحفلة اصلا عبارة عن ضباط بس لكن مختلف الرتب طبعا الهيبة كلهم انتهت عندهم والبنات يرجعو وينبرشو لي فيهم
قبل العقد بيوم كنت بتكلم مع محمد مكالمة
_ بكرة حتنكتبي على اسمي
__ امممممم
_ منتظر اللحظة دي بفارق الصبر
__ نفس الاحساس
_ قبل ما اعقد عليكي حابي انك تعرفي بعض الحاجات
__ سامعة
_ يمكن تفضلي شهور براكي
__ عارفة
_ ما بضمن ليكي انو ايامنا كلها حتكون سعيدة بس بحاول بقدر الامكان انو اسعدك
__ امممممم
_ ويمكن تحصل نقاشات بينا بس مشاكلنا تكون بينا ما ندخل طرف تالت
__ اصلا ما حتحصل مشاكلنا حتكون في بيتنا بس
_ حلو وانا عصبي يمكن للان ما شوفتي عصبيتي بس لمن يقفل علينا باب واحد حتكتشفي صفات كتيرة
__ شوفت عصيبتك كم مرة بس وانا كمان عنيدة
_ حلو ندرس بعض بس بتفاهم
__ من دون مشاكل
_ حلو . وحكينا حاجات كتيرة عشان اي واحد يكون في الصورة
وبعدها كانت المناسبة والعقد الصباح قبل الفطور كنت قاعدة في بيت عمتي مع البنات ومنتظرة اتصال محمد انو يقول لي عقدو
فردوس: مالو اتأخرو كدا
نعيمة: احتمال طلع مأمورية
ريم: بعملها؟
نعيمة: والله بتوقعها منو
فردوس: تفي من خشمك . قومت ضحكت وانا اصلا متوترة شديد وما قادرة استقر ابدا وبحرك في رجلي بس اتصلت لي امي
امي: خلاص بقيتي في عصمة راجل . وقامت بكت وانا قومت ابكي وباركت لي وادتني الناس الجنبها باركو لي واثناء ما الناس بباركو لي محمد اتصل بس ما بقدر افصل فيهم بحاول اخلص سريع لمن خلصت صحباتي مسكوني وبكو معاي وهم بباركو لي
فردوس: اول وحدة في الشلة مرقت
نعيمة: عقبالكم كلكم يا رب
كلهم: امين يارب
سمر: محمد ما اتصل ليكي
نعيمة: اتصل لمن كنت في المكالمة
سمر: ارجعي ليهو سريع قبل ما ينشغل مع الرجال . مشيت بعيد واتصلت ليهو ما رد تاني حاولت المرة دي فصل ورجع لي
__ رسميا بقيتي حرم محمد نصرالدين الف مبروك لينا ربنا يقدرني اسعدك . انا كنت ببكي بس
__ ان شاء الله اقدر ابقى ليكي سند ورفيق درب صالح انا اديت وعد لابوكي قدام الرجال انو احافظ عليكي ان شاء الله ربنا يقدرني انو ابقى قدر كلمتي
__ بقيتي مرتي امام الله ورسوله وانتي وصية رسول الله حأواحل بقدر الامكان انو انفذ الوصية دي . كنت بسمع ليهو بكل اذن ضاغية وقلبي برفرف من الفرح ودموعي بتعبر عن مدى سعادتي في اللحظة دي الحتكون خالدة في ذاكرتي دايما . اخدت نفس ورديت ليهو وسط دموعي
_ ربنا يقدرني ابقى ليك زوجة صالحة وكتف تستند عليهو واقيف جنبك في السراء والضراء وربنا يرزقني منك الذرية الصالحة
__ اللهم آمين يارب دي اسعد لحظة في حياتي انك انكتبتي على اسمي
_ محظوظة بيك انا
__ والله انا المحظوظ . بعدها في زول ناداهو
_ بستأذن منك يا حرمي المصون الرجال بتبارك لي بالانجاز دا . كلامو لمس قلبي فرديت ليهو
__ اذنك معاك حبيبي انا . وقفلت منو ورجعت ابكي تاني ما مصدقة ابدا ورجعت لصحباتي
سمر: نطلع الكوفير بتين
نعيمة: لو ما اكلت ما طالعة مكان
فردوس: دقيقة دقيقة عندك نفس للاكل كمان
نعيمة: حي بسم الله
سمر: قلبك ميت خلاص
نعيمة: عقد وعقدت وبقيت مرتو خلاص عادي امشي معاهو بجلبابي دا . قامو ضحكو
فردوس: ربنا يعين محمد عليكي اتدبس تدبيسة الا ربنا يعينو
نعيمة: ان شاء الله يا رب . جابو الفطور اكلت بنفس وبعدها طلعنا الكوفير
وعارفين البحصل شنو في الكوفير اتجهزت وكنت منتظرة العريس يجي بس اتصل لي محمد وانا كنت متوترة وست الكوفير بتظبط لي في الطرحة
__ نينا
_ نعم
__ دايرك تسمعيني بس ما تنفعلي اوكي؟ . كلامو وترني شديد
_ في شنو يا محمد
__ طلعت لي مأمورية ضرورية لازم اطلعها هسي . زحيت من ست الكوفير واتكلمت معاها
نعيمة: كدا دقيقه بس . ورجعت لمحمد
_ قولت لي شنو
__ لازم اطلع انتي عارفة انو الوطن بناديني
_ محمد عاين لي لو العالم كلو بناديك ما حتمشي
__ بس يا نينا . انا خلاص اعصابي تلفت ودايرة ابكي
_ محمد طلقني هسي دا وامشي محل ماشي . صحباتي اتهجمو ودايرين يعرفو الحاصل
__ اطلقك كيف يعني
_ الواحد دا وهسي كمان . قام ضحك شديد
__ كدا خلي عقد قراننا حبرو يجف على الاقل
_ محمد بتهظر صح؟ لاني خلاص والله اتوترت زيادة
__ بهظر بهظر
_ محمد ما ممكن معاك ياااخ . طوالي بكيت ليهو
__ لالا بلاش بكي الميكاج دا انا دافع فيهو قروش تقيلة . قومت ضحكت
_ سجمان خسارة فيني يعني؟
__ والله اي شي فداكي
_ تسلم لي
__ قربت عليكي ربع ساعه وبكون عندك
_ تمام منتظراك . وقفلت
فردوس: خلعتينا الحصل شنو . اتذكرت الحدث وقومت ضحكت وحكيت ليهم الحديث الدار وكلهم ضحكو فيني
سمر: لو جد تعملي شنو
نعيمة: خلاص بقيت مرتو اعمل شنو بس
سمر: والله صح كلامك
ست الكوفير: باين عليهو ظريف . ضحكت وقولت في سري ظريفة انا والله
نعيمة: اممممم . وقامت صلحت لي الميكب الخرب بسبب البكي دا وصلحت لي الطرحة وبقينا منتظرين وسمعنا العربات وصلنا ومحمد جا داخل كنت خجلانة ارفع رأسي اعاين ليهو جا سلم علي في رأسي وحضني
محمد: مبروك علينا
نعيمة: الله يبارك فيك . ومسكني من ايدي وصحباتي صورنا كم صورة وطلعنا ولقيت ليك كمية عربات لمن اتخلعت واصحابو يقولو ليهو ابشر ورصاص بكميات خيالية اكيد طبعا لانو جياشي وانا من الصوت العالي بضغط على ايد محمد كل ما ضربو طلقة وهو ميل علي
محمد: خايفة؟
نعيمة: شوية
محمد: انتي مرت ضابط المفروض ما تخافي من صوت الرصاص
نعيمة: محمد الليلة بالذات ما تتكلم معاي بعد حركتك ديك خلي يومنا يعدي على خير . قام ضحك لي وركبنا العربات واتجهنا على الصالة وهي عبارة عن ضباط بس كل الرؤساء حقو واصحابو موجودين وكان عالم بطريقة خيالية بالجد كان حفل اسطوري انبسطت شديد وبعدها عملنا الجرتق بس خفيف كدا لانو محمد ما بحب الحاجات دي وطلعنا على الفندق
محمد: يومين كدا ونسافر
نعيمة: تمام . غيرت ملابس الجرتق وجينا صلينا رجعتين لله كبداية جديدة لحياة جديدة وطلعت توب الصلاة و قعدت جنبو مسك لي يدي كنت شوية خجلانة
_ بتصدقي انو انقفل علينا باب واحد؟ . هزيت رأسي بمعنى لالا
_ ما عايزة تتكلمي . تاني هزيت بمعنى لالا قام ضحك
_لمن تكوني بعيدة بتتفاصحي هسي معاك ساكتة كدا لمن ايدك بردت
_ انا ما بأكل ناس شكلك سمعتي عني غلط . قومت ضحكت
__ يعني ما اخاف؟
_ اي ما تخافي
__ امممممم تمام . والتفت عليهو
__ محمد
_ نعم
__ ولا حاجه
__ شكلك جوعانة لاني انا ذاتي جوعان . قولت ضحكت
_ عرفت كيف
__ حسيت بس . رجعت ضحكت
_ البسي ليكي حاجه نمش نآكل في المطعم تحت
__ تمام . ولبست فستان وطلعنا اتعشينا في مطعم الفندق ورجعنا قريب وش الصبح انتظرنا صلينا ونومنا دا كل الحصل في اول يوم .......