رواية بين الضياع واللقاء الفصل السادس عشر 16 والسابع عشر 17 بقلم شذى عبدالمكرم
مر يومين على غياب محمد حسيت كأنها سنة كل ساعة اعاين للتلفون عسى ولعل لقى شبكة ورسل لي بس ماف اي رسالة لمن عزمتني شمائل قهوة مع امي في بيتهم مشينا ليهم
خالتو مريم: اها يا خطيبة ولدي . قولت ضحكت بخجل كدا
امي: ملاحظة فيها كل دقيقتين تعاين في التلفون ساي
نعيمة: امي!!!! . قامو ضحكو
خالتو مريم: من هسي لازم تتعودي حيغيب بالشهور . ابتسمت وهزيت ليها رأسي
شمائل: والله صعب انك تكوني زوجة ضابط
نعيمة: حأتعود ان شاء الله
خالتو مريم: حتتعودي مع الايام
شمائل: تتعود شنو يا امي وانتي كل ما يرجع من مأمورية تبكي . ضحكنا
خالتو مريم: قلب الام لكن
امي: ليكي حق والله دا حشاكي
خالتو مريم: اكتر واحد مخوفني لانو ابوهو مات في مهمة فخلاص بخاف كل ما يطلع مأمورية بكون هامة شديد ليهو
امي: ليكي حق والله . مع كلام خالتو مريم قلبي عمل شح يعني ابوهم مات في مهمة ما كنت عارفة شمائل ما حصل جابت لي سيرة عاينت ليها وانا خايفة كدا
شمائل: نعيمة تعالي اشوفك حاجة . وقومت معاها دخلنا جوا وانا قلبي مآكلني
شمائل: عارفة بتفكري في شنو بس ابوي الله يرحمو دي كانت ايامو في الدنيا . دموعي نزلت
نعيمة: ليه ما حكيتي لي
شمائل: عشان ما تخافي
نعيمة: شمائل محمد حيكون كويس صح؟
شمائل: يا هبلة دي ما اول مأمورية ليهو وانتي خايفة هسي لانو بقى خطيبك بس ما تخافي حيرجع ذي كل مرة انا في البدايات كنت بخاف عليهو بس مع الزمن عرفت انو محمد ما عليهو خوف . اتنهدت عشان اطلع الطاقة السلبية
شمائل: ما تهمي كتير والمفروض من بقيتي زوجة ضابط تقوي قلبك
نعيمة: نفس كلامك اخوكي ياااخ ما بقدر . قامت تضحك
شمائل: يعني اخوي وراكي من البداية
نعيمة: اريتو لو ما وراني . ضحكنا وطلعنا وواصلنا شراب القهوة ورجعت البيت
عدا ذي اسبوع وانا قلبي في ايدي كأنو اول مرة يطلع مأمورية وانا التقول قالو لي داخل معركة عديل كدا يلا انا الدخلت معركة عديل كدا من الخوف والتوتر الفيني دايرة الاسبوعين ديل يمرو سريع عشان اشوفو وارتاح
الاسبوع التاني مر وماف خبر منو ما استحملت مشيت لشمائل في بيتهم ودخلنا غرفتها
_ شمائل محمد ما رجع وهو قال لي المأمورية اسبوعين بالكتير . ما عرفت تضحك علي حالتي ولا تطمني
__ هو لمن قال اسبوعين عشان ما يخوفك بس
_ لا ما حيكذب علي
__ نعوم المأموريات بتأخد شهر ومرات شهرين عادي يعني
_ عارفة انو في وحدات بتطول بس هو قال اسبوعين . قامت تضحك
__ انتي خلاص علقتي في اسبوعين دي . اتنفخت شديد وقومت طلعت الخاتم والمحبس من ايدي وختيتو ليها في يدها
_ انا ما ناقصة وجع قلب دا الخاتم رجعي لاخوكي بعدين . هي اتخلعت وبقت تعاين لي مشيت لباب الغرفة تاني جيت راجعة وشيلتو منها ولبستو
_ شمائل اخوكي حيقتلني . قامت تضحك شديد
__ والله ما بسألك يا نعيمة نهائي
_ انا ماشة بيتنا ولمن اخوكي يرجع قولي ليهو نعيمة طلقتك . ضحكت فيني وانا رجعت بيتنا منفوخة شديد
امي: مالك
نعيمة: ماف حاجة
امي: محمد ما رجع؟
نعيمة: ما رجع يا امي ما رجع . واتنهدت بزعل قامت ضحكت فيني
امي: حالتك حالة ربنا يعينك . عاينت ليها وضحكت ودخلت غرفتي ونومت وانا متوعدة انو محمد لمن يرجع حأشاكلو لانو كذب علي
____________
من جانب محمد
طلع للمأمورية وطبعا التلفونات بتكون قافلة تحسبا لاي حاجة وهو اصلا تلفونو قفل كهربة فما فرقت معاهو في يوم قاعد مع رائد زميلو من كتيبة تانية وهو كان سرحان بفكر في نعيمة هل فقدتو ذي ما هو فاقدها
__ سمعت انك خطبت . عاين لخاتمو وابتسم
_ ايي قبل ما اجي هنا بيومين
__ انا السمعت انك زول صارم شديد دي منو السرقت قلبك دا . قام ضحك
_ انت عارف اني كنت عاقد قبل الزولة دي . الرائد اتفاجأ
__ جادي؟
_ والله بس نهائي ما كان فارق معاي
__ كيف يعني
_ كانت اختيار امي وعشان رضاها عقدت بس ما اتفقنا لاني ما كنت فاضي ابدا فما استمرينا
__ والجديدة؟ . عاين لخاتمو مسافة
_ ما عارف فجأة لقيت نفسي معاها
__ اخترتها انت
_ ايي
__ بتشبهك؟
_ ماف صفة مشتركة بينا
__ وكيف اتفقتو
_ لسع بنحاول نتفق . الرائد ضحك
__ باين انها غيرت فيك
_ ولسع حتغير اكتر
__ مبسوط انك معاها؟
_ رغم انو ما بعدي علينا نقاش بدون ما نتشاكل بس مبسوط معاها
__ سبحان الله حسب السمعتو عنك ما اتوقعت انك ممكن تحب في حياتك . قام ضحك
_ والله صارم مع الكل بس لمن اجي ليها بتغلبني عديل . الرائد ضحك
__ ربنا يخليكم لبعض
_ امين يارب
__ حاليا فاقدها؟
_ شديد ومتأكد انها قالبة الدنيا لاني قولت ليها اسبوعين وراجع
__ قصتكم حلوة . ابتسم ليهو وبقى يعاين في خاتمو اول مرة في حياتو يتمنى انو متين المأمورية تخلص عشان يرجع يشوفها ...........
____________
من جانب نعيمة
عدا اسبوع تاني ولسع محمد ما منو خبر وانا يأست انو يرجع الا بعد شهر شهرين ذي كلام شمائل ومشيت لصحبتي فردوس لانو اختها ولدت مشيت عشان ابارك ليها اثناء ما انا قاعدة بتونس تلفوني رن برقم غريب عاينت ليهو مسافة ما عرفتو قومت رديت
__ يا جميل انت
_ احترم نفسك لو سمحت . سمعتو صوت ضحكتو شكيت انو صوت محمد
_ محمد!!!!
__ ايي محمد . الفرحة ما شالتني
_ يعني رجعت؟
__ ايي رجعت
_ رجعت بتين . فجأة اتذكرت اني زعلانة
_ ولا اقول ليك ما دايرة اعرف ذاتو ومع السلامة
__ دقيقه دقيقه
_ في شنو قبل ما اقفل
__ وين موقعك حاليا سامع جنبك ناس
_ ما بوريك
__ نعيمة خليكي جادة والله تعبان روحي طالعة دي يداب دخلتي المدينة وين انتي داير اشوفك حتى امشي البيت . طوالي رخيت
_ انا في بيت صحبتي
__ الموقع سريع . وصفت ليهو وقفلت كنت مشتاقة ليهو شديد منتظرة متين يوصل واشوفو قدامي بقيت منتظرة بلهفة
فردوس: دا محمد؟
نعيمة: ايي
فردوس: رجع؟
نعيمة: ايي هسي بس وحيجي بجاي يرجعني
فردوس: اااشي يا بختك . ضحكت وبقيت منتظرة لمن وصل الشارع العام اتصل لي بنفس الرقم القبيل وطلعت ليهو كان معاهو علي وبعريبة الجيش ولابسين الكاكي مشيت على العربيه هو نزل لي وكان مبتسم طوالي نسيت الزعلة كلو وبقيت اعاين ليهو
__ ما كنتي دايرة تشوفيني
_ زعلانة منك
__ ليه
_ انت عارف . والتفت على العربية ورفعت ايدي لعلي
نعيمة: حمدالله على السلامة
علي: الله يقبل حمدك
محمد: وانا ماف حمدالله على السلامة؟ . عاينت ليهو بزعل
نعيمة: حمدالله على السلامة
محمد: هسي دا وجه تقابليني بيهو وانا ناس بيتنا ما شوفتهم وجيت ليكي . دموعي نزلت مسحتهم
نعيمة: كنت خايفة انك ما حترجع بالاخص انو انت قولت لي اسبوعين والاسبوعين مرو وانت ما ظهرت
محمد: كنت عارف عشان كدا جيت ليكي بالاول
نعيمة: ليه كذبت . رفع اكتافو بمعنى ما عارف
محمد: هسي انا تعبان خلينا نمش وبعدها نتفاهم في الموضوع دا
نعيمة: اوكي بس انا راجعة لصحبتي
محمد: ماف رجوع اركبي
نعيمة: محمد
محمد: نينا ما اكرر كلامي
نعيمة: حقار خلاص . وركبت معاهم وعلي وصلني انا البيت وواصل مع محمد بيتهم دخلت البيت لقيت امي
امي: اتوقعتك تتأخري
نعيمة: ماف موضوع فرجعت ودايرة اقول ليكي محمد رجع
امي: متين حمدالله على السلامة
نعيمة: الله يقبل حمدك رجع قبل شويه
امي: ايواااا كويس والله
____________
من جانب محمد
رجع بيتهم ودخل وامي استقبلتو كالعادة بالبكي ولمن دخل غرفتو شمائل مشت ليهو
شمائل: طبعا نعيمة عملت فيني عمائل بسببك . قام ضحك وهو كان بقلع في البوت حقو
محمد: حصل شنو . حكت ليهو بموقف الخاتم وكم موقف عملتو نعيمة وهو يضحك
محمد: كنت متوقع
شمائل: بت الناس دي بتريدك ريدة اوع تفرط فيها . ابتسم ليها
محمد: ما بفرط ان شاء الله . وقامت طلعت من غرفتو وهو رجع ضحك على افاعيل نعيمة ........
__________
من جانب نعيمة
ما حبيت ازعج محمد بالاخص اكيد راجع تعبان قولت اخليهو يآخد راحتو بالاول بس هو اتصل لي بعد نص ساعة من رجعتنا
__ اها خلينا نحل موضوع الزعل دا
_ محمد انت يداب راجع من برا ارتاح ونتفاهم بكرة
__ ليه ما نتفاهم هسي او بالليل
_ دايراك تآخد راحتك ما حابة انكد عليك هسي وانت تعبان
__ من حقك
_ خلاص هسي نوم شوية ونتفاهم بالليل
__ متأكدة؟
_ متأكدة
__ بعد سافرت دا شايف انك بقيتي فاهمة
_ من يومي فاهمة بس انت ما مركز معاي
__ يلا في نكد في الموضوع
_ شايف انو كلامي نكد؟
__ نينا كلام قلبك شنو
_ محمد ارتاح وبعدين نتفاهم
__ والله ما بقدر انوم وانتي زعلانة مني
_ وانا ما بقدر انكد عليك وانت تعبان
__ والحل؟
_ قولنا تمشي ترتاح وبعدين بطلع ليك الجديد والقديم . قام ضحك
__ خلاص تمام . وقفلنا بالليل اتصل لي ما خليت ليهو جنبة ينوم عليها وفضيت قلبي كلو وهو كان بسمع فيني بس لمن خلصت
__ دا كلو شالا؟
_ اتخيل بس
__ ليه ما رفعتي دعوة عليهو
_ كان ارفع صح؟
__ دي جريمة كبيرة في حقك والله
_ شايف كيف ما حأسكت ليهو لانو كذب علي
__ بس ما ممكن لانو خايف عليكي من انك تقلقي وتزعلي
_ وهسي انا ما زعلت؟
__ بترضي كيف بس قولي لي وانا بعملو
_ ما عارفة
__ حقك علي لكي العتبة حتى ترضي
_ ما زعلانة خلاص
__متأكدة؟
_ متأكدة
__ ممكن امشي انوم بعد دا لاني تعبان؟ . قومت ضحكت
_ امشي يا محمد امشي . ضحك وقفلنا............
17
كنت مبسوطة شديد برجعة محمد سالم وكنا مستمرين في رحلة البحث عن التفاهم بس كالعادة بنجوطها في مرة اتشاكلنا في موضوع انو قولت مسافرة عرس صحبتي في ولاية تانية بس هو رفض
__ ماف سفر قولنا
_ محمد حأكلم ابوي وحأسافر
__ لمن اقول ماف سفر يعني تسمعي الكلام
_ ولو ما سمعت
__ والله بجيبك بأمر قبض لمن تستغربي . قومت ضحكت
_ ليه قاتلة زول انا؟
__ المهم يا زولة
_ حاليا ابوي المسوؤل مني لو وافق بمشي
__ والبتكلمي معاهو دا جردل طحنية صح . ضحكت لانو عصب
_ لالا علبة مربى
__ نعيمة احسن تجيبها لبر عشان نكون حلوين
_ محمد نفسي اعرف ليه رافض
__ انا قولت ما حتسافري حتكسري كلمتي؟
_ صحبتي حتزعل
__خليكي جاهزة
_ لشنو
__ جاي عليكي
_ ليه جاي
__ نحل الموضوع دا وجه لوجه كدا ما بتحل
_ لالا ما بقدر عليك في الواقع
__ عشان كدا بتتفاصحي في المواقع . قومت ضحكت
_ نص ساعه القاكي قدامي . وقفل الخط في وشي عاينت للتلفون بخلعة لمن استوعبت قومت اتجهزت سريع اتصل لي انو برا مشيت ليهو وركبت معاهو كان لابس مدني
_ الليلة ما شغال؟
__ ليه السؤال
_ ما لابس الكاكي
__ ايواااا
_ ما جاوبتني
__ ما عندي اجابة
_ والله؟؟
__ نمش وين
_ محمد لو ملاحظ قاعد تتجاهلني
__ ما ملاحظ واوع تفتحي خشمك تقولي لي رجعني بيتنا . ربعت ايادي قدامي ونفخت جضومي بزعل لاني بالجد كنت عاوزة اقول ليهو رجعني بيتنا ساق بهدوء لمن وصلنا مطعم كدا ونزل حتى ما قال لي انزلي قعدت في محلي جا بشباكي واتكل فيهو وهو بعاين فيني
__ نفسي يوم يمر علينا بكون زعل ونفيخ جضوم . قربت اضحك بس ثبتا
__ هسي يا نعيمة رائد ذيي كدا تهزمني شبر ونص كدا بجي عليكالله؟ . التفت عليهو وانا مكشرة
_ انا ما قصيرة بس انت الطويل زيادة عن اللزوم . قام ضحك
__ كويس خلاص هسي انزلي
_ ما نازلة
__ نينا مشينا عليك الله
_ والله انت حقار
__ كويس حقار و اي حاجة بس انزلي . هزيت كتفي بمعنى ابيت.
__ عايني هناك . وكان بوصف كان في ثنائي الشاب بهظر مع البت وهي بتضحك شكلهم كان كيوت
__ هسي لو ما نفختي جضومك دي حالتنا كانت كدا . هنا فكيت الضحكة
_ محمد انت تكون كدا؟ والله الا لو القيامة قامت . قام ضحك
__ ليه
_ لا كأني ما بعرفك كدا وهسي لو نفخت جضومي لبكرة ما حتراضيني بالعكس بتزيد الطين يلا كدا زح لي خليني انزل . ضحك وزح لي نزلت ودخلنا المطعم وكيف كيف اقتنعت انو ما اسافر انهزمت قدامو لو كان بالتلفون ما بقتنع ليهو
__ اها يا نينا ما خلاص شايفة انو الخطوبة دي طولت . قومت ضحكت ضحك
_ محمد يداب تمينا شهر واريتها لو تعتبر شهر اسبوع بس لانو تلاتة اسابيع كنت في مأمورية
__ اها وانتي عاوزاها كم
_ على الاقل خمسة شهور . رفع لي حاجبو
__ خمسة شنو؟؟؟ . كتمت الضحكة
_ خمسة شهور
__وانتي عاوزة تعملي شنو في الخمسة شهور دي
_ لسع ما اتفاهمنا ذي الخلق والناس
__ نتفاهم في بيتنا بعد دا لانك رأسك قوي ومحتاج تكسير
_ شايف يلا نزيدها تبقى سبعة اشهر عشان شايفة انو تفاهمنا صعب شويه . عاين لي بوجه خالي مشاعر وانا عاينت ليهو وانا بشرب العصير
__ المغرب حأكون مع ابوكي . اتشرقت بالعصير وهو بعاين فيني شربت موية
_ قولت شنو
__ المغرب حأكون عندكم
_والسبب
__ بتعرفي ان شاء الله
_ محمد اسمعني انا ما دايراك نهائي خلينا نفسخ الخطوبة دي
__ جدا . وكان بعاين لي ببرود والله المخلوق دا حيرني معاهو مرات بكون حنين وفجأة بقلب بارد و مستفز
_ محمد انت ليه كدا
__ كدا كيف
_ موش المواضيع دي المفروض نتفق عليها؟ عاوز تعمل ذي موضوع الخطوبة
__ وهسي نحنا بنعمل شنو موش بنتفق
_ لا والله؟
__ اي والله . قومت ضحكت لانو غلبني عديل
_ محمد والله..... . ما قدرت اتمو وعضيت اصبعي شديد واتنفست شديد عشان ما اطلع من طوري وقولت استخدم اسلوب تاني لانو دا ما بنفع معاهو اي حاجة اتنفست بعمق وعاينت ليهو بأبتسامة
_ ابوحميد . هنا ابتسم لي عرفت انو لو شديت عليهو هو حيشد اكتر عشان كدا غيرت السياسة
__ احكي سامعك
_ ما عندي مشكله انو تتكلم مع ابوي بس موش المفروض تأخد رأيي عشان اشوف نفسي جاهزة ولالا
__ انتي لو بتتكلمي من الاول كدا بنتفق على اي حاجة
_ حاضر عيوني ليك . ابتسم حلات ابتسامة
__ اها انتي جاهزة؟
_ لازم اتناقش مع امي بالاول وبقول ليها محمد عاوز انو نتم العرس ونحدد زمنا وبوريك بعدها ممكن تتكلم مع ابوي ووعد مني ما اطول المدة
__ لمن تتكلمي بهدوء كدا وتكوني فاهمة بتكوني حلوة شديد . خجلت هنا وهو ضحك
_محمد ياااخ . تاني ضحك
__ وكدا اتفقنا خلاص منتظر ردك . هزيت ليهو رأسي واخيرا اتوصلنا لحل وخلصت الطلعة على خير بعد سلة روح
رجعت البيت وكلمت امي وقعدنا مع بعض واتناقشنا معاها في الموضوع واتوصلنا انو شهرين مناسبة انو انحبس وكدا وكلمت محمد في الاول اعترض قال كتيرة بس اقنعتو انو محتاجة زمني وافق بعد تعب وهو جا لابوي كلمو وابوي قال شهرين مناسبة على الاقل راشد بكون خلص كان قدامو شهر ويخلص فلازم يحضر فرح اختو
اتصلت لي شمائل
__ لازم ننزل السوق نجهز ليكي حاجات الحبس
_ تمام . ومشيت لامي كلمتها ومشيت مع شمائل ما خليت حاجة حأحتاجها ما جابتو لي
نعيمة: شمائل ديل كفاية
شمائل: محمد موصيني ماف حاجة تنقصك . كنت فرحانة شيلنا الحاجات ورجعنا واليوم التاني جات مع خالتو مريم وشايلين كمية حاجات تانية لمن خجلوني
نعيمة: خالتو مريم ليه التعب دا كلو
خالتو مريم: انتي حتكوني مرت الغالي لازم
امي: ما قصرتو معاها
خالتو مريم: اي حاجة ناقصاكي كلميني . هزيت ليها رأسي معنى اوكي . قعدو شوية وطلعو
امي: دي حاجات مناسبة كاملة . قومت ضحكت لانو بالجد الحاجات كتيرة نهائي ما حاجات حبس
نعيمة: بالجد والله
اتصل لي محمد
_ محمد ليه التعب دا كلو
__ ماف حاجة بتغلا عليكي
_ وموضوع الشيلة حتجيبها متين
__ المفروض الاسبوع دا لانو حأنحبس وتاني ما بقدر اطلع
_ خلاص لمن تقرري كلميني
__ اوكي . واتفقنا على التفاصيل ومشيت كلمت صحباتي انو حأنحبس وكدا وانو اسبوع وحأنزل دخان وكلمت امي بخصوص الشيلة وانو هي تختارو لي انا بقتنع بذوقها فوافقت وشمائل قالت حتمشي معاها ونزلو السوق وكالعادة خمو السوق كلو
والايام مرت وانحبست ونزلت الدخان وصحباتي كانو معاي ودخلت الشيلة حقتك وكانت حلوة ما قصرو معاي يوم جاتني شمائل
شمائل: نعوم عاكف حينزل السودان . فرحت ليها
نعيمة: احلى خبر يلا تنحبسي معاي زيادة وتنزلي دخان
شمائل: اي مفكرة
نعيمة: خلاص تمي باقي حبستك معاي
شمائل: تمام . بالفعل نزلت الدخان معاي وبنقضيهو ضحك وونسة اسبوعين وراجلها نزل السودان ونزل معاهم في البيت لانو اهلو في ولاية تانية هي حكت لي قصتهم انو اتلاقو في الجامعة كان سنيرها وكدا ولمن جا ما لقيتو لاني محبوسة يلا اختفت يومين وتاني جاتني
نعيمة: اللقى احبابو نسى اصحابو . قامت ضحكت
شمائل: بس تقولي شنو دا راجلي لكن
نعيمة: رجلك في رقبتك يا بعيدة
شمائل: دايرة اقول ليكي حأسافر
نعيمة: كذابة وين
شمائل: حأسافر مع عاكف نزور اهلو اسبوع كدا وبرجع
نعيمة: وعرسي
شمائل: لسع قدامو اسبوعين وما تنسي العريس اخوي يعني .
نعيمة: وتخليني براي كدا
شمائل: بس لازم كمان اسافر معاهو
نعيمة: اسبوع بس وتكوني هنا
شمائل: لازم . ودعتني ومشت بقى لي شين لانو حتفرق معاي شديد
كان باقي اسبوع حتى تبدأ مراسم الزواج والفعاليات جاتني المكالمة الغيرت كل المخططات وطبعا اكيد حتكون من محمد
__ نينا دايرك تسمعيني براحة
_ في شنو
__ ظهرت لي مأمورية ضرورية
_ محمد بتهظر صح؟
__ لا والله
_ محمد عرسنا بعد اسبوع وانت جاي تقول لي مسافر مأمورية
__ انا ما عندي يد في الموضوع
_ لو قولت ليك لو سافرت ما حأتم العرس دا؟ ........