رواية من انا الفصل العاشر 10 بقلم مروة الصافي
مشيت القاعة وحضرت المحاضرة وانا طالعة شفت حيدر واقف مع ريم وحسيت انهم بتكلمو عني شكلها قرررت تفضحني خلاص بس دعيت ربنا الموضوع يكون واقف عند حيدر بس
المهم وقفت اعاين ليهم من بعيد شفتو زي الكان بشاكل فيها وبتكلم معاها بي لهجة حادة قلت يلا خليها تاخد الفيه النصيب منو ناديت علا قلت ليها رايك شنو الليلة نمشي برا ناكل فتة مزاجي في فتة قالت لي بس الفتة دي عايزة ناس كنار ونحن برانا مااظن نقدر ناكلها
قلت ليها يلا نجرب وفعلا طلعنا وقلنا لي سيد المحل ظبط لينا فتة على مزاجك تكون حقت نفرين وعايزين معاها بيبسي ياريت حق قزاز قال لي طلبكم متوفر
فعلا الزول دا ظبط ليها حلاة فتة ضربنا من غير نحس وشربنا البيبسي وحاسبناه وجايين راجعين الجامعة لقينا حيدر جنب الباب
قال لينا ماشاء الله اتطورنا الليلة فطرنا برا قلت ليه مرة من نفسنا زهجنا من السندوتشات اسه كان في الكافتريا بعملو فتة مالهم
قال لينا احسن الواحد يغير مرة مرة استأذناه ومشينا علا قالت لي انتي استاذ حيدر دا مالو زي العينو منك شكلو كلام زولتك ديك صح
قلت ليها ولا صح ولا حاجة ماتركزي معاهم انا ماشغالة بي الموضوع كتير
دخلنا القاعة وكملنا محاضراتنا وطلعت سريع قلت عشان حيدر مايشوفني ويقول ماشي معاي والحمدلله مالقيتو ركبت الحافلة لمن وصلت محطة ناس حيدر شايفة ريم طالعة من هناك دي الجابها هنا شنو كمان وانا العارفاه انها ماساكنة هنا
وصلت شارعنا ونزلت وانا في الطريق ضربت لي حيدر وريتو اني شفت ريم طالعة من شارعهم عندك فكرة هل في زول بتعرفو ساكن هناك قال لي ابدا ماحصل شفتها في شارعنا قلت ليه الله يستر مايكون الفي بالي قال لي في شنو قلت ليه انت راجع البيت متين
قال لي اسه انا في المواصلات شوية وبصل البيت قلت ليه خلاص تمام بعد ترجع نتكلم قال لي اوك
وصلت البيت وانا في راسي انها هي مشت لي اهل حيدر ماعارفة ليه بس دا تخميني الوحيد الله يجيب العواقب سليمة
#في بيت ناس حيدر
حيدر جاء داخل البيت لقى امو سلم عليها وهو داخل على غرفتو نادتو تعال عايزاك
قال ليها خير ي حجة
قالت ليه علاقتك شنو بي بت الملجأ
قال ليها اهااااااااااا انا كدا وقع لي سبب جية ريم لي حينا قالت ليه يعني الكلام دا صح
قال ليها هو شنو الصح
قالت ليه يعني حابي لي بت مامعروف اصلها من فصلها ولا تربيتها شنو وتقول لي شنو الصح
قال ليها يا امي اولا البت دي اسمها حياة وبت كويسة جدا ومؤدبة على الاقل افضل من بت الناس الجاتك هنا وفتنت
بت مؤدية ومحترمة في لبسها وفي تصرفاتها
قالت ليه ادب شنو وكلام فارغ شنو انت لو عايز تخسر امك جيب سيرة البت دي تاني
قال ليها يا امي يعني بتقيفي في طريق سعادتي
قالت ليه سعادتك لو مع اي وحدة غير دي انا معاك
قال ليها بس انا سعادتي مع دي بالذات وعلى فكرة هي ماحصل ادتني مجرد امل انها حترتبط بي وماراضية حتى اني افتح معاها موضوع زي دا
قالت ليه واعية وعارفة هي شنو وعارفة انه ماف زول حيقبل ليك بي حاجة زي دي
قال ليها يعني الحاجة الحلوة الوحيدة الاتمنيتها في حياتي حتقيفي لي فيها قالت ليه احمد ربك اني اتكلمت معاك كلام براحة ابوك لو عرف ماعارفة ممكن يعمل شنو الموضوع دا انساه نهائي وما اسمعو منك تاني ...
انا اتصلت لي حيدر فصل فيني الخط اتوترت شديد اول مرة يعملها ياربي في شنو تمت نص ساعة كدا واتصل علي
رديت سريع قال لي اسف اني فصلت فيك
قال لي انتي قبيل قلت لي الله يستر مايكون الفي بالي كان في بالك شنو قلت ليه انا كنت شاكة انها مشت بيتكم
قال لي تتخيلي انو دا الحصل وانا لمن فصلت منك كنت من امي
وريتها اني عايزك وطبعا حصل نقاش كتير قلت ليه وانت مكلمها ليه قال ليها الشيطانة دي فهمتها انه في علاقة بيننا وانا فهمتها انه الحاجا من اتجاهي وانك رافضة اي ارتباط
قلت ليه انا كنت رافضة عشان عارفة في يوم من الايام انو دا الحيحصل وماف داعي ادخل نفسي في دوامة انا ماقدرها
قال لي انتي ماحبيتيني دا السبب الانسان لو حب انسان بقوى بي حبو دا وبقدر يواجه اي عاصفة قدامو
قلت ليه كل العواصف ممكن اواجهها بس حاجة تخليني افقدك دي مابقدر اتحملها
قال لي دقيقة دقيقة قلتي تفقديني مابتتحمليها انتي قصدك اني مهم عندك هل الفهمتو دا صح
قلت ليه ايوا صح بس الفايدة شنو دا وراه وجع واحسن الحاجة دي تتدفن قبل تبدأ عشان ماممكن تخسر اهلك عشاني
قال لي ومنو القال حاخسرهم انا حافضل وراهم لحد مايقتنعو انا بس ناقصني ردك لي لانو هو الدافع لي اني اقيف واتكلم مع اي زول واقنع اي زول
قلت ليه انا خايفة من الجاي شديد وانا ماعايزة اتكسر انا عشت عمري كلو مكسورة وحيدة قال لي صدقيني وعد ليك ماف حاجة حتكسرك وانا قبل كدا وعدتك اني في ضهرك وحا اكون سند ليك طول ما انا عايش بس راجي منك كلمة انا ماعايز حاجة غيرها لانها حتقويني شديد
لحظتها اتشجعت وقلت ليه ايوا انا حبيتك من اول يوم وكتير كنت بحلم بيك في نومي وانا كل البتمناه اننا نكون لي بعض بس خايفة افقدك انت بالنسبة لي زي الهواء وكان اهون علي اشوفك حتى لو من غير كلام بس ما افقدك
قال لي بس كلامك دا حيكون هو الدافع اننا نواصل ونكون لي بعض واوعدك اني حاكون سندك وحمايتك بس دقيقة كنتي بتحلمي بي شنو حكيت لي الحلم المتكرر وانقاذو لي
قال لي ان شاء الله كل خير بعدها قفلت الخط ورقدت
سبحان الله بالرغم من انو الحاجة دي صعبة وانا عارفة حاواجه قدر شنو بس صراحة كنت حاسة بي راحة ماطبيعية
مشبت لي خالتو نسيبة وحكيت ليها كل الحاصل قالت لي يلا طالما اخترتي انك تواجهي معناها انتي بقيتي قوية ودا العايزاه منك وانا حادعمك واكون معاك في اي حاجة قلت ليها ربنا مايحرمني منك والله لو كنتي امي الحقيقيه ما كنتي حتعملي معاي كدا
قالت لي يا بت انا امك وانتي بتي حضنتها من الفرح اريج جات داخلة قالت دا شنو الحب دا ياجماعة انا كدا حا اغير وابكي ...