رواية بين الضياع واللقاء الفصل الثامن عشر 18 والتاسع عشر 19 بقلم شذى عبدالمكرم
كان باقي اسبوع حتى تبدأ مراسم الزواج والفعاليات جاتني المكالمة الغيرت كل المخططات حقي وطبعا اكيد حتكون من محمد
__ نينا دايرك تسمعيني براحة
_ في شنو
__ ظهرت لي مأمورية ضرورية
_ محمد بتهظر صح؟
__ لا والله
_ محمد عرسنا بعد اسبوع وانت جاي تقول لي مسافر مأمورية
__ انا ما عندي يد في الموضوع
_ لو قولت ليك لو سافرت ما حأتم العرس دا؟
__ هسي انا جاي ومتوقع منك تتفهميني
_ محمد انت فاهم انو عرسنا بعد اسبوع ولا قادر تتخيل الحيحصل شنو لو اجلنا العرس
__ عارف وفاهم بس كمان جاني امر انو اطلع المأمورية دي
_ ما ممكن رائد تاني يطلع بدلك
__ ما ممكن والمأمورية دي منتظرها لي سنين . سكتا لاني ما قادرة اتخيل حجم المصيبة دي
_ يعني حتمشي؟
__ هل شايفة حل غير كدا . قفلت الخط وانا قومت ابكي قادرين تتخيلو انو الدنيا كلها عارفة انو عرسي بعد اسبوع هسي في آخر لحظة يقول لي طالع مأمورية وما معروف يرجع متين احتمال شهور وانا خلاص جاهزة وانحبست وحتى عزمنا الدنيا كلها اجي الغي اي حاجة المفروض افهمو بس انا البفهمني منو وبفهم احساسي في اللحظة دي بقيت ابكي بس اتصل لي كنسلت فيهو وانا رأسي بقى مشوش كان مصر يتصل لي وانا مصرة ما ارد ...........
____________
من جانب محمد
كان ما عارف يتصرف كيف كان حاسي بيها بس ما في يدو حل لمن ما ردت ليهو اتصل لشمائل
__ شمائل
_ اوووو العريس
__ دايرك تسمعيني
_ في شنو
__ طلعت لي مأمورية
_ محمد مستحيل ما جادي طبعا
__ والله ياااخ
_ محمد انت عرسك بعد اسبوع
__ عارف ياااخ
_ نعيمة عرفت؟ مستحيل تتحمل الصدمة دي
__ كلمتها قبل شوية
_ شنوووو وقالت شنو
__ زعلت وقفلت الخط
_ والله لو لغت العرس ليها حق ياااخ دا احلى ايام حياتها داير تخربو ليها ونعيمة دي تعبانة معاك تعب واتحملت كتير
__ انتو ليه ما دايرين تفهمو الموضوع ما بيدي يعني شايفة انو انا مبسوط انو طالع المأمورية دي
_ والحل شنو
__ ماف حل غير انا اطلعها بس داير اوصل لنعيمة كدا اتكلمي معاها خليها ترد لي
_ والله دا كلام كبير اكيد مدمرة حاليا
__عارف لازم احل الموضوع دا ماف زمن ياااخ انا مسافر بكره . قامت تضحك
_ محمد عليك الله قول انك بتهظر لاني ما قادرة اصدق . صرخ فيها
__ هسي شايفة انو دا موضوع يهظرو فيهو ياااخ دايرة تساعديني ولالا
_ كدا روق بحكي معاها وبرجع ليك
__ تمام . وقفل منها وقاعد محتار يعمل شنو وضروري كمان يطلع المأمورية دي والمأمورية دي 90٪ ممكن يترقى لرتبة مقدم كان منتظر اللحظة دي سنين بس جاتو في وقت حرج جدا قام طلع لامو برا
_ تعال يا ولدي قبل شوية اتكلمت مع عمك من البلد قالو حيتحركو بعد بكره
__ امي انا طالع مأمورية بكرة . امو عاينت ليهو بخلعة
_ محمد بتتكلم جد؟
__ اووووف ياااخ والله جادي
_ سجمي دا كلام شنو وعرسك . رفع اياديهو نظام ما عارف وقام طالع
_ تعال يا ود هنا فهمني
__ اذا انا ذاتي ما فاهم حاجة افهمك كيف . وطلع مشى اشترى الدكان اشترى سجاير وقعد يشرب وما فاهم حاجه ومنتظر اتصال شمائل قعد ذي ربع ساعة قال دا ما حل لازم يتكلم مع ابو نعيمة ولازم يكون في الصورة ما يخلي نعيمة هي التكلمو من مكانو مشى بيت ناس نعيمة وفتح ليهو راشد واستغرب من وجودو
راشد: اووو ابو النسب اتفضل
محمد: عمي طارق موجود؟
راشد: موجود . فضلو جوا ودخلو الصالة وابو نعيمة جا وقعدو
محمد: عمي جاي والموضوع المرة دا كبير
طارق: اتفضل سامعك يا ولدي
محمد: عارف انو العرس باقي عليهو اسبوع بس مضطر أأجل شوية . استغربو
طارق: ليه الحاصل شنو ان شاء الله خير
محمد: ضربو لي الصباح وظهر لي مأمورية ضرورية لازم امشيها
طارق: جدا لازم تمشي . محمد عاين ليهو متفاجأ لانو ما اتوقع الرد دا
محمد: والعرس؟
طارق: والله يا ولدي الوطن بناديك ما تتردد ولا ثانية انك تمشي ولمن تجي راجع سالم تتمو العرس اصلا العرس ملحوق بس الوطن ما بستنى
محمد: والله ما اعرف اقول ليك شنو خجلان منك
طارق: المفروض رأسك يكون مرفوع دايما لانك بتدافع عن وطنك وانا فخور بيك ولمن الوطن يناديك ما تلتفت وراك ابدا
محمد: ونعيمة؟
طارق: نعيمة مدام حتبقى مرت ضابط المفروض تتفهم الحاجة دي وانت كلم ناسك بتأجيل العرس ونحنا بنكلم ناسنا وربنا يحميك ويرجعك سالم
محمد: تسلم شديد يا عمي والله جيتك وانا هامي بس حأطلع من هنا وانا رأسي مرفوع
طارق: دا المطلوب منك . ودعهم وهو مبسوط وفخور انو حيناسب ناس فاهمة كدا كان باقي ليهو نعيمة بس كيف ترضى...........
___________
من جانب نعيمة
بعد ساعة كدا اتصلت لي شمائل
__ نعوم حبيبي . طوالي بكيت ليها
_ محمد يا شمائل
__ عارفه والله
_ حيلغي العرس في آخر لحظات
__ ما حيلغي بس حيأجل وانتي عارفة انو الحاجة دي ما في ايدو
_ عارفة بس انا كمان موقفي حيكون شنو
__ عارفة انك اتحملتي كتير بس لازم تتحملي اكتر من اول مرة وافقتي عليهو المفروض تختي احتمالات ذي دي تحصل وانا اسفة حبيبتي بالنيابة عنو
_ ما عارفة اعمل شنو
__ عاتبيهو بس ما تخلي يمشي وهو زعلان لانو زعلك
_ هسي البحصل شنو
__ ننتظر محمد يرجع بس وانتي عارفة هو ذاتو كان متلهف لعرسكم دا وهو الاستعجلك صح؟
_ صح
__ اكيد حاسي بنفس احساسك دا حاليا . سكتا واصلت هي
__ والله من قبيل هامي اتصل لي عشان اتكلم معاكي هو حاليا محتاج دعمك ما جفاكي يا نعوم
_ تمام . قفلت منها وقعدت افكر بالجد هو كان صعب عليهو يقول لي الكلام دا بس كمان انا برضو صعبة علي قعدت شوية كدا لسع بفكر ناداني ابوي مشيت ليهو
ابوي: يا بتي محمد جا هسي هنا واتكلم معاي
نعيمة: اها
ابوي: طلع ليهو مأمورية ولازم يسافر
نعيمة: ابوي والعرس والناس الكلمناهم
ابوي: عارف انها صعبة بس كمان يا بتي الوطن بناديهو لازم يلبي النداء لو كان اي وظيفة تانية ما حيكون عندو عذر وهو جاني وكان خجلان انو يقول لي كدا بس دي خدمة وطنية انا لو محلو والله ما بكلم زول اصلا وبطلع لاني اكيد بكون حالف قسم وانتي المفروض تكوني فخورة بيهو انو طالع عشان يخدم بلدو ووطنو لو كان لغى المأمورية انا بنفسي كنت حأجبرو يطلعها او ما بزوجك ليهو ابدا الما حافظ على وطنو ما حيحافظ عليكي ولو على الناس هينة بس كيف انو يرجع ليكي سالم ادعي ليهو ربنا يسدد رميه . بعد كلام ابوي دا الزعل الفي قلبي كلو راح لانو ابوي كلامو صح ويداب قلبي برد ورجعت غرفتي واتصلت ليهو وسكتا
__ نينا
_ حتطلع بتين
__ بكرة الصباح
_ والله لو ما رجعت لي سالم ما حأعافيهو ليك لا دنيا ولا اخرة
__ والله ما هان علي اخليكي في الموقف دا بس.... . قاطعتو
_ الوطن بناديك بس لازم تلبي النداء وانا حأنتظرك
__ حأرجع ليكي وحأكفر عن الحصل دا كلو بوعدك
_ محمد
__ عيونو
_ انتبه على نفسك لاني ما قنعانة . قام ضحك
__ حاضر وتاني؟
_ ما تطول
__ حاضر وتاني؟
_ خلاص
__ بس كدا ما حتقولي لي ذي المرة الفاتت؟
_ لا
__ خلاص انا بقول وحأشتاق ليكي كوني بخير لحدي ما ارجع
_ تمام وانت اتصل لي قبل ما تطلع الصباح
__ حاضر انتي عارفة حاجه؟
_ شنو
__ والله من قبيل سرحان بفكر كيف اراضيكي كملت علبة سجاير وانا ما حاسي
_ اسمعني قبل ما اقبل عليك وابقيها نكد هسي اوع تجيب لي سيرة السجاير دي
__ والله عشانك بس حأخليها ووعد دي حتكون اخر وحدة
_ جد حتخليها عشاني؟
__ اتحملتي كتير عشاني تستحقي اتنازل عشانك
_ اممممم انا محظوظة بيك
__ والله انا المحظوظ ربنا يحفظك لي
_ في اللحظة دي انا فخورة اني مرت ضابط
__ وانا فخور انو انتي حتكوني مرتي
الصباح اتصل لي قبل ما يطلع ودعتو ومشى وشال قلبي معاهو مشيت قروب الشلة بتاعي
نعيمة: بنوت انا حأجل عرسي لسع كم شهر كدا . جاطو ليه ولشنو والحصل شنو وكلام كتير
ريم: ان شاء الله ما يكون اتشاكلتو
نعيمة: لالا كل شي تمام بس محمد عندو مأمورية بعد يرجع حأعمل العرس
ريم: زول عرسو الاسبوع الجاي ما ممكن يكلف زول تاني والمفروض ذاتو رئيسهم يكون عارف وما يطلعو
فردوس: صح كلامك
نعيمة: انتو قايلين دا اجتماع شغل ولا شنو دي مأمورية يعني خدمة وطنية قادرين تفهمو الحاجة دي؟
سمر: نعيمة كلامها صح وانتو مالكم بتفتو في الموضوع قالت عرسها اتأجل يعني خلاص
ريم: ما قصدي كدا حبيبتي ما تزعلي من كلامي
نعيمة: عادي . وطلعت من القروب زهجوني خلاص وبعدها اتصلت لكل صحباتي واعتذرت منها وقولت ليهم انو اجلت العرس لحدي اعلان آخر وهم اتفهمو الموضوع ومشيت لامي كلمتها وهي كلمت معارفنا وابوي نفس الشي ولملمنا الموضوع جاتني خالتو مريم عشان تواسيني
_ والله يا بتي ما عارفة اقول ليكي شنو ولا اواسيكي كيف ولا ابرر موقف محمد كيف
__ خالتو الموضوع ما في ايدو هو وانا ما زعلانة المهم انو يرجع سالم والعرس ببقى
_ صعبة انك تكوني مرت ضابط . ابتسمت ليها ومسكت اياديها الاتنين
__ بس انا اخترت والمفروض اتحمل صح؟ . ابتسمت لي برضى
_ محمد محظوظ بيكي والله انتي عارفه كنا قاعدين مع شمائل كدا جا داخل قال لينا انا داير اتزوج بس تكون نعيمة غير كدا ما عايز غيرها نهائي والله قال كدا لا زاد ولا نقص وطوالي ادانا ضهرو وطلع . نزلت رأسي وضحكت بخجل من كلامها وكنت مبسوطة بكلامها دا
__ اممممممم
_ فأختيارو كان مناسب جدا والله كونو محمد ولدي يجي بنفسو ويقول لي داير اتزوج دي كانت معجزة عديل للان ما مصدقه . قعدت حكت لي بمواقف كتيرة وانا مبسوطة بكلامها في اللحظة ديك لو قالو لي محمد حيرجع بعد قرن كنت حأقول والله حأنتظرو ............
19
ذي ما عارفين انو الانتظار اصعب حاجة بس انا بنفسي اخترت الطريق دا ماف زول جبرني عليهو لازم اتحمل وعارفة عمري كلو حأعيش في قلق وخوف بس كلو يهون اذا كان الشخص البتضحي عشانو بستحق التضحية دي وانا ضحيت براحتي عشان محمد وواثقة انو ما حيخزلني بس مع الايام نشوف
مر شهر على طلوع محمد للمأمورية وانا كنت ما عارفة اواصل حبسة ولا اعمل شنو والبتصبرني مافي والهي شمائل بعد تأجيل عرسي قعدت مع اهل راجلها فترة و لسع ما رجعو وصحباتي فيهم الشمتان فيني ومفتكرات اني اتشاكلت مع خطيبي وطفش لاني ما حددت عرسي تانى قولت الى اجل غير مسمى وفيهم البواسي فيني وخالتو مريم ما مقصرة معاي ابدا كل يومين تجيني عشان ما تحسسني بحاجة وتحكي لي بطفولة محمد مع انها عادية بس كانت بتهون علي وبتحكي لي كيف وقف حياتو بعد وفات ابوهو وخلى القراية اول سنة عشان يرتب لاخوانو حياتهم بعدها واصل وعافر وبقى في المكانة الفيهو دا عشان كدا دا سبب الصمود والصلابة ال هو فيها دا كل يوم ومع كل حكاية كان بكبر في نظري اكتر
عدا الشهر التاني وعمتي جات ساقتني بيتها عشان تغير لي جو وبالفعل غيرت لي مودي واتغيرت 180 درجة ومع كل يوم بمر كنت بكون هادئة شوية وبفكر بس وبدعي انو محمد يرجع بالسلامة ما عاوزة اكتر من كدا والشهر القعدت فيهو مع عمتي دا ما خلت حاجة ما عملتو لي لمن سمنتني زيادة
نعيمة: عمتو خلاص ياااخ ما شايفة بقيت بومبة كيف
عمتي: انتي عروس يا بت
نعيمة: عروس من غير عريس
عمتي: ما تقولي كدا احتمال بكرة محمد يرجع لازم تكوني جاهزة
نعيمة: عمتو حأعمل دايت ما ممكن شايفة جضومي بقت كيف . مسكتني منهم
عمتي: وحلاتي ام جضوم . قومت ضحكت
نعيمة: عمتو ياااخ
بعدها قررت ارجع بيتنا عمتو رفضت نهائي وشمائل رجعت اخيرا وجات لي في بيت عمتي شافتني كدا ضحكت
شمائل: دي منو دي ام جضوم دي
نعيمة: بقيت شينة صح
شمائل: بالعكس والله بقيتي كبلوظة حلاتك
نعيمة: شمائل تمشي لربك شين والله . قامت تضحك
شمائل: عمتك ما قصرت اشتغلت فيكي لكن
نعيمة: لالا ما بنفع حأعمل دايت
شمائل: مستحيل طبعا والله كدا عسل عديل كدا
نعيمة: احلفي
شمائل: والله العظيم
نعيمة: اممممممم
شمائل: واللون ما شاء الله
نعيمة: على الفاضي
شمائل: ياااخ مالك يااخ ما تتشأمي
نعيمة: ما متشائمة
شمائل: عندي ليكي خبر شين جدا جدا
نعيمة: اتحفينا
شمائل: عاكف قال عمل لينا الاجراءات وحنرجع معاهو السعودية انا والبنات
نعيمة: بتهظري صح
شمائل: والله
نعيمة: متين
شمائل: شهر كدا
نعيمة: والله يا شمائل خطوة ما بتخطيها لو ما عملت عرسي
شمائل: الموضوع ما بيدي . حمرت ليها
نعيمة: اسمعيني هنا راجلك داير يرجع خلي يرجع بس انتي والبنات لو ما سلمتوني لمحمد ماف وحدة بتتحرك موش انتي اللصقتيني في اخوكي تتمي خيرك للاخر بعداك . قامت تضحك
شمائل: نعيمة
نعيمة: اديني عاكف دا
شمائل: طوالي . طلعت تلفونها واتصلت ليهو سلمت عليهو وادتني لفيتها معاهو لمن اقتنع وشمائل تضحك بس وهو في التلفون يضحك
عاكف: خوفتيني عديل كدا خلاص تمام نحضر عرسك وبعدها الله كريم
نعيمة: دا الكلام الصح يلا ياها مرتك . ومديت ليها التلفون وهي تضحك اتكلمت معاهو وقفلت
شمائل: نعيمة خوفتي لي راجلي
نعيمة: لازم يخاف . وضحكنا وقيلت معاي ويومي كان حلو شديد
مرت تلاتة شهور على سفر محمد ودي كانت اطول مأمورية يطلعها محمد من عرفتو ورجعت بيتنا والناس القريبة لي بقت مركزة معاي شديد و اي يسأل منو بقو مركزين على حياتي اكتر مني مرة قاعدة كدا ضربت لي وحدة من زميلاتي اسمها هناء وحدة من المركزات في حياتي رديت بآخر نفس
هناء: الدوام لله ربنا يرحمو . استغربت طبعا قالتها بدون مقدمات خلعتني طبعا
نعيمة: بتعزيني في منو
هناء: في خطيبك . كأنو كبو فيني موية باردة
نعيمة: بس محمد ما مات
هناء: كيف ما مات والدنيا قالت مات
نعيمة: جيبتي الكلام دا من وين
هناء: ما سمعتي انو في كتيبة بتاعت جيش عملو ليهم كمين ماف زول طلع عايش وعفراء قالت لي خطيبك معاهم والبنات كلهم بحكو . جسمي برد
نعيمة: ما سمعت
هناء: ما شوفتي الاخبار . قفلت الخط في وشها ودخلت النت وانا ايدي بترجف اثناء ما ببحث تلفوني ضرب طوالي كنسلت المكالمة وواصلت بحث لقيت الخبر صح انو في كتيبة كاملة ماتت هنا حيلي مات عديل جدعت تلفوني وطلعت برا لقيت امي واقفة في الصالة وبتعاين في التلفيزيون وراشد وابوي قاعدين وكلهم بعاينو في التلفيزيون عاينت معاهم لقيت الخبر ذاتو هم بعاينو ليهو
ابوي: لا حولا ولا قوة الا بالله ربنا يرحمهم ماتو شهداء . امي حست في زول وراها عاينت لي بخلعة خايفة من ردت فعلي
امي: نعيمة . كلهم عاينو اتجاهي حسيت انو رجلي ما شايلني منتظرة زول يكذب لي الموضوع او يقول لي محمد ما معاهم ابوي كأنو حسا بي
ابوي: نعيمة ختي الايمان في قلبك للان ما عرفنا الاتوفو منو كدا استغفري
نعيمة: استغفر الله . وبراحة انسحبت منهم وخلاص كتمت نفس وبقيت ابكي وادعي انو يكون ما معاهم شوية تلفوني اشتغل مكالمات بس طيرت التلفون وبقيت استغفر بس المغرب جاتني خالتو مريم معاها شمائل طبعا كنت في غرفتي جاتني شمائل جوا وبتها جود تابعها من ورا لقت حالتي حالة بدل تهديني بكت معاي
شمائل: نعيمة مالك ياااخ ما تبكي محمد ما معاهم . عاينت ليها بخلعة
نعيمة: محمد اتكلم معاكي؟ . هزت لي رأسها بمعنى لالا
نعيمة: وعرفتي كيف
شمائل: موش وعدك انو برجع . هزيت ليها رأسي بمعنى ايي
شمائل: بس خلاص حيرجع
نعيمة: ان شاء الله يا رب اها للان ما جابو اسماء المتوفيين عشان نتأكد
شمائل: لسع وتعالي لامي برا والله من سمعت الخبر فتحت بيت البكا وضغطها ارتفع وتعبت تعب عشان اهديها واحمد اتصل واتكلم معاها حتى هدت وقولت ليها ورح نشوف نعيمة وجينا
نعيمة: ورح . طلعنا برا قعدت جنبها ومسكت ايدها
نعيمة: خالتو مريم
خالتو مريم: يا بتي والله الخبر دخلنا فينا ذي البرد
نعيمة: بس لازم ما نبادر بالشينة احتمال دي كتيبة تانية
خالتو مريم: ان شاء الله يا رب كيف حالك انتي
نعيمة: انا تمام
امي: من سمعت الخبر من غرفتها ما طلعت
خالتو مريم: حيكون كويس
نعيمة: ان شاء الله بس ندعي ليهو . قعدو شوية واسينا بعض ورجعو بيتهم مشيت شيلت تلفوني ورفعت الطيران لقيت كمية مكالمات من معارفي ما حبيت ارجع لزول فيهم اتصلت لي فردوس رديت ليها
فردوس: الكلام السمعتو دا صح؟
نعيمة: يا عباد الرحمن ما تسألوني والله انا الفيني مكفيني تعبت من انو اقول ما عارفة ياااخ محمد والله بكلام الناس دا لو ما مات ذاتو حيموت
فردوس: كدا اهدي
نعيمة: اهدأ كيف بس كدا قولي
فردوس: ما تجوطي سألتك بس
نعيمة: الله والنبي ما تسألوني ياااخ
فردوس: خلاص يا نعيمة معليش على الازعاج
نعيمة: فردوس لو بالجد صح انا بكلمكم بس حاليا ما ناقصة والله لاني قاعده في النار بس
فردوس: ربنا يرجعو سالم
نعيمة: ان شاء الله يا رب . قفلت منها واتنهدت وانا بقول وين انت يا محمد قطعت قلبي معاك لو موتا عشان اعرف الحاصل بس حاليا بعد الخبر دا بقيت معلقة بس ما فاهمة حاجة من الحصل دا والناس كلها بتسأل وتلفوني بالمرة قفلتو عشان ما عاوزة وجع قلب ..........
____________
من جانب محمد
مشى المأمورية وعدا عليهو ايام عصيبة شديد بس عداها وتفكيرو كان مع نعيمة وانو عملت شنو بعد ما خلاها في آخر لحظة وقبل العرس بأسبوع عارف انو ختاها في موقف صعب شديد بس ما باليد حيلة كان بحسب الايام بفارق الصبر عشان يرجع ويعوضها وخلاص المأمورية خلصت ما كان مصدق انو راجع خلاص وكانو كتيبتين الاولى طلعت وهم كانو حيرجعو اليوم التاني حسب قرار العقيد الظهر فجأة دا بس جابو ليهم بالثريا انو الكتيبة الاتحركت دي اتعرضت لكمين خلاص الامور كلها جاطت من جديد والكتيبة دي كان معاهم الرائد الكان اتكلم معاهو المرة الفاتت يلا حزن شديد عليهو وجا قرار انو ما يتحركو من مكانهم حتى يتأمن الوضع وطلع فرقة منهم لتأمين الوضع والاجراءات اخدت اسبوع حتى اتحركو ورجعو المدينة اول حاجة عملها فتح تلفونو واتصل لنعيمة لقى التلفون قافل طوالي اتحرك على بيتهم وامو من شافتو واقف قدامها سليم فتحت بيت بكا عديل وشمائل بكت
محمد: امي خلاص
امو: وااااي يا محمد قطعت قلوبنا عديل
محمد: امي دي ما اول مرة اطلع مأمورية
امو: انت ما عارف الحصل فينا شنو من الخبر النزل دا
محمد: انا رجعت سالم اهو قدامك خلاص
امو: الحمدالله الحمدلله
شمائل: امي دي ضغطها ارتفع تلاتة مرات
محمد: امي هسي انتي كويسة؟
امو: والله بعد شوفتك دي كويسة الحمدلله كدا ارتاح . ومشى غرفتو شمائل لحقتو بالموية
شمائل: لقيت نعيمة؟
محمد: تلفونها قافل
شمائل: والله حالتها بقت حالة المسكينة من الزعل وسؤال الناس لمن ضعفت و قفلت تلفونها القى طريقة اوصل ليها او انا بمشي بكلمها
محمد: بتصل لراشد هسي
شمائل: تمام . وطلعت وهو اتصل لراشد
راشد: محمد الف حمدالله على السلامة
محمد: الله يقبل حمدك
راشد: والله الخبر الحصل للكتيبة ديك قلقت بينا بس الحمدلله انك رجعت سالم
محمد: الحمدلله كيف ناس البيت
راشد: كلهم بخير الحمدلله
محمد: نعيمة دي تلفونها قافل
راشد: والله ما عارف دقايق بديك ليها
محمد: تمام . وراشد مشى بالتلفون لنعيمة.......
__________
من جانب نعيمة
بعد اسبوع من الخبر نزل وانا قفلت تلفوني عشان ازعاج الناس كنت قاعدة في غرفتي راشد ضرب باب غرفتي
نعيمة: اتفضل . جا داخل ومدا لي التلفون
راشد: هاكي محمد في الخط . عاينت ليهو بخلعة كدا لمن قومت فوق بعد ما كنت قاعدة في السرير
نعيمة: محمد منو
راشد: محمد خطيبك . مسكت التلفون وانا ايدي بترجف وهو طلع وجرا الباب وراهو ختيت التلفون في اضاني وانا ما مصدقة قولت ليهو بصوت مهزوز
_ مممحمد
__ عيونو . طوالي فتحت بيت البكا وهو بهناك بحاول يسكتني
__ نعوم خلاص . وانا مواصلة بكي حتى ما قادرة اتكلم عشرة دقايق كاملات وانا ببكي بس
__ نينا والله لو ما سكتي حتلقيني قدامك هسي . حاولت اهدأ شوية شوية لمن بقيت بتنهد بس
__ كدا قولي بسم الله
_ محمد انت كويس؟
__ والله ما كويس
_ ليه ما كويس حاصلة ليك حاجه؟ جات حاجة كدا قول لي كيف ما كويس
__ كدا اهدي انا ما كويس لانك بتبكي كدا وانا ما قادر اعمل ليكي حاجه
_ انت ما عارف الحصل فيني شنو
__ والله عارف بس انا اهو كويس خلاص اسكتي هسي امشي غسلي وشك ورجعي التلفون لراشد وافتحي تلفونك وارجعي لي انا منتظرك اوع تتأخري
_ تمام . قفلت وانا ما مصدقة اخدت لي بكية بكيتين تانيات من الفرحة ومشيت غسلت وشي ورجعت التلفون لراشد
راشد: حمدالله على سلامتو
نعيمة: الله يقبل حمدك
راشد: والله يا اختي حاسي بيكي وما عارف اعمل شنو عشان اخفف عنك . هنا كلامو بكاني
راشد: ليه وافقتي من البداية . ما عرفت ارد
راشد: والله كل مرة بزعل لمن اشوف حالتك دي والتوتر العايشة فيهو والله كل مرة بقول خلي يرجع وانا بفسخ خطبتها دي لانو انتي غالية علي شديد والله حالتك دي ما عاجباني نعيمة خليهو في الف راجل غيرو . بكيت على خوف اخوي علي وحنيتو دي مشيت قعدت جنبو ومسحت دموعي
نعيمة: افسخ الخطوبة؟
راشد: ايي والله ورح هسي . قومت ضحكت
نعيمة: راشد عارفة انو خاف علي
راشد: شديد والله
نعيمة: ما بتجيني عوجة ان شاء الله وانا دخلت المعركة دي بأرادتي لازم اكون قدرها
راشد: بس انتي حساسة وانك تكوني مرت ضابط والله ما جاي معاكي . ضحكت
نعيمة: ليه انا ضعيفة؟
راشد: شديد وما حمل الهم دا كلو
نعيمة: انا عندي اخوان ذي الجبال في ضهري ما بتجيني عوجة ان شاء الله
راشد: لو حسيتي نفسك تعبتي تعالي لي
نعيمة: اكيد بدون ما اتردد . اتكلمت معاهو شوية عشان ما يخاف علي والله راشد دا اكتر واحد بحبو من اخواني لانو مقرب لي واكتر واحد بخاف علي رجعت غرفتي وفتحت تلفوني ورجعت لمحمد فصل ورجع لي
_ وين اتأخرتي كدا
__ كنت بتكلم مع راشد
_ كل الزمن دا
__ امممممم
_ اكيد قال ليكي محمد دا ما بنفع صح
__ عرفت كيف
_ لانو انا لو محلو بقول نفس الشي لمن اشوف اختي بالحالة دي والله انا ذاتي ما هاين علي اشوفك بالحالة دي بس ما بقدر اخليكي والله ودي طبيعة شغلي كدا
__ عارفة الحاجة دي انا
_ نفسخ؟
__ محمد جاي بعد الزمن دا كلو تقول لي نفسخ؟ قول بالواضح خلاص انك تعبت وما قادر تواصل
_ انا تعبت؟
__ ايي تعبت
_ انا بقول كدا عشان ما عاجبني حالتك دي وكل مرة تعيشي نفس الاحساس
__ وفيحاء ما كانت حتعيشها؟ ليه عقدت عليها من الاول
_ جادة انتي في البتقولي دا؟
__ جادة يا محمد وخلاص مدام داير تفسخ تعال بعدين شيل الخاتم بتاعك وارتاح مني ومن قلقي الما عاجبك دا . وقفلت فيهو الخط هسي بدل نعدلها جوطناها وقعدت ابكي لانو شايفة كل مرة الضياع بتغلب على اللقاء ..........