رواية عقدة نقص الفصل السادس 6 بقلم شذى عبدالمكرم
العيد خلص وخلاص موسم رجوع الحجاج بدا وانا وامي بدينا تجهيزات استقبال ابوي من الحج عشان الكرامة كنت طالبة حاجات وجهزت والمفروض استلمها وما بقدر الا يكون عندي عربية او أأجر ترحال لانها كتيرة فقررت اكلم عزام لو بيقدر يمشي معاي طلعت وكنت ماشة على بيتهم لقيته طالع دا من حسن حظي سلمت عليه
_ عزام عندي حاجات دايرة استلمهم عاوزاك تمشي معاي
__ عندي مشوار ذي ما شايفة
_ تمام حأكلم ايمن يمشي معاي ، عاين لي قوي ودخل اياديه جوا بنطلونه
__ انتي بتهدديني يعني ولا شنو؟
_ حاشا والله بس ايمن ما برفض لي طلب ومستني فرصة مني بس عشان اطلب منه حاجة ، رفع لي حاجبه بسخرية وانا ما كذبت طلعت تلفوني قدامه واتصلت
_ ايمن كيفك ان شاءلله بخير ، فجأة عزام خطف التلفون من ايدي وقفل الخط شديت تلفوني مني بزهج
_ مالك انت؟
__ سدين ، رديت ليه وانت على اخري منه
_ نعم
__ ما تفتكري انك كدا حتمشيني على هواكي تمام؟
_ غلطان والله ، تلفوني ضرب كان ايمن سلمت عليه واتحججت ان الرصيد قطع وسألته من ناس البيت وقولت ليه اتصلت عشان اتفقد احواله وقفلت وعزام بعاين فيني بس
__ اطلعي قدامي
_ شكرا ليك ، ومشيت على الزلط اوقف ترحال ركب عربيته ووقف جنبي ونزل الشباك
__ اركبي
_ ما دايرة استغلك ولا اهددك ولا امشي على هواي امشي مشوارك ربنا يسترك ،
__ سدين خلصينا واركبي
_ والله ما راكبة
__ انتي عارفة ليه بقول كدا؟ او بعمل معاكي كدا ؟
_ ليه وريني
__ اركبي وبكلمك ياااخ ، وبقى يتكلم معاي كتير لمن ركبت معاه وكنت مكشرة
_ يعني حتفضل كتير كدا ما حتتكلم معاي؟
__ انتي رفضتيني لو ناسية يعني ، عاينت ليه بكسرة كان بعاين قي الطريق
_ اممممم انت ما سألتني من أسبابي
__ ولا حأسألك نهائي
_ انت ليه حقار كدا خلاص ما تعاملني كدا هل بستاهل بعد العمر القضيناهو مع بعض؟ ، هنا عاين لي بنظرة انسان مكسور شديد
__ انتي ما راعتي لي وطوالي بعد رفضتيني بتلاتة يوم بس انخطبتي يعني ما عملتي حساب لمشاعري ولا كان هاميكي ابدا ، ورجع عاين للطريق قلبي وجعني من كلامه
_ انت قايلني مبسوطة يعني؟
__ هل في زول جبرك؟ ، ما رديت
__ سألتك في زول جبرك؟
_ عزام
__ عاوز جواب واحد يا اي يا لا
_ لا
__ بس خلاص ماف زول جبرك وحبيتي تكسريني اكتر بخطوبتك السريعة دي دايرة مني اتعامل عادي؟ يعني بعد عشرتنا دي كلها ما بقول ليك ما تخطبي لانو من حقك تختاري شريك حياتك بس تلاتة يوم يا نينا؟ ، هنا بقيت ابكي عارفة انو حركتي كانت كعبة وشديد كمان ما راعيت ليه نهائي بس كمان انا كنت موجوعة واخدت قرار بتهور شديد ودي كانت النتيجة
__ انا عملت دا كلو بسببك ، التفت لي بأستغراب
_ كيف يعني بسببي؟ ، فجأة صرخت فيه
__ عزام انتبه ، عاين قدامه كان في عربية حيدخل فيها بس اخد لفة ودخلنا في عربية تانية بس العربية التانية كبيرة شديد وتاني ما حسيت بحاجة.........
___________
عزام صحا لقى نفسه في المستشفى عاين للناس الواقفين في رأسه وبحاول يستوعب الحاصل فجأة اتذكر انه ما كان براهو في العربية وسدين كانت معاه فجأة قعد لمن رأسه وجعه وايده ما كان قادر يحركها صرخ من الالم
الدكتور: كدا يا شاب ارجع ارقد اخلص انضف ليك الجرح دا ، الدكتور ما بنضف ليه جرح عميق في رجله وحيخيطها ليه
عزام: انا كان معاي بت وين هي؟
الدكتور: والله ما عارف
عزام: خليني اشوفها وين ، مسكه رجعوه في السرير
الدكتور: انت ما شايف حالتك كيف خليني اعقم جرح رجلك دا ولازم نعمل ليك صورة اشعة للايد
عزام: خلاص شوفوها عليك الله لو كويسة ، الدكتور كلم الممرضة تشوف لو في بت جات معاه وربط الجرح لعزام وحتى رأسه كان فيه شاش
الدكتور: خلينا نعمل الاشعة
عزام: بس اطمن على سدين
الدكتور: الممرضة حتطمنك ورح عشان الزمن ، اخدوه غرفة التصوير وعمل صورة اشعة وطلع في كسر في الايد
الدكتور: محتاج جبص سريع ، هو كان اخر همه ايده
عزام: والله يا دكتور حأعمل اي حاجة بس اطمن على سدين
الدكتور: تمام حأطمنك ، والدكتور طلع يفتش على سدين وعزام كان منتظر وحاسي الخمسة دقايق دي كأنها خمسة سنين بعد مسافة الدكتور رجع وعزام بعاين ليه بأمل انو يقول ليه سدين كويسة
الدكتور: والله ما بكذب عليك لسع في العملية بس الدكاترة معاها ، دموعه نزلت وختا الذنب على نفسه
عزام: عملية شنو
الدكتور: استرواح صدري
عزام: عملية كبيرة شديد؟
الدكتور: حسب حجم الاسترواح عشان تقدر ترجع تتنفس
عزام: ربنا يطلعها بالسلامة ، وكان ببكي
الدكتور: اتصل على اهلكم
عزام: حتصحى صح؟
الدكتور: ان شاءلله حتصحى
عزام: ان شاءلله يا رب ، واتصل لناس البيت ومشى مع الدكتور عملو ليه الجبص وعمل حملات للايد واهلهم وصلوا وامهاتهم ببكوا وهو متوتر ورأسه واجعه وحالف ما يرقد لو ما اطمن على سدين وقاعدين منتظرين فترة طويلة بعدها الدكتور قال ليهم المريضة طلعت من العملية ومشوا ليها كلهم وشافوها كانت تحت الاكسجين يداب بتفتح اول كلمة قالتها........
__________
لمن صحيت حاسة رأسي تقيل وحاسة الدنيا لافة بي وما شايفة كويس ومركبين لي درب وعندي ألم شديد في الصدر اول زول شوفته امي لانها واقفة في رأسي بس اول جملة قولتها
سدين: عزام كويس؟ ، فجأة شوفته قرب مني وهو لابس حمالات ايد ورأسه فيه شاش
عزام: انتي كويسة؟ ، غمضت عيوني بمعنى ايي وهمست ليه
سدين: انت كويس؟
عزام: انا كويس معليش ، حسيته داير يبكي هزيت ليه رأسي بمعنى لالا انت ما غلطان ، شوية الدكتور جا فحصني طلع عندي فصل في رجلي اليمنى من تحت قالو الا جبص برضو بس ماف كسر بس كان عندي استرواح صدري بس الدكاترة اتدخلو واصلا كان مركبين لي اكسجين لاني ما بقدر اتنفس طبيعي لازم اقعد تحت الاكسجين 48 ساعة بقيت احاول افتح بس كنت بجد صعوبة رجعت نومت لمن صحيت لقيت نفسي في غرفة تانية و عزام قاعد بعاين فيني والغرفة فاضية
سدين: كان ترجع البيت ترتاح ما شايف حالتك ، فجأة قام وجا قعد جنبي في طرف السرير
عزام: ما بطلع من هنا براي ابدا ، ابتسمت ليه ما عارفة اذا شافني ولالا لاني لابسة الاكسجين وعندي درب مركب وألم في الصدر بقيت اعاين ليه وهو بعاين لي
عزام: متأكدة انك كويسة؟ براحة حركت ايدي الما فيها درب وهبشته براحة عاين لايدي ومسكها وضغط عليها خفيف غمضت عيوني مسافة بعدها فتحتها
سدين: انا كويسة ما تخاف
عزام: انا السبب ياااخ انا غبي كان انتبه في الطريق وما كان اتناقش معاكي وانا سايق ، ضغطت على ايده
سدين: انت ما غلطان ما تشي...... ، صدري وجعني ما قدرت اكمل غمضت عيوني بألم شديد وبقيت اكح
عزام: ما تتعبي نفسك خلاص ، جا يقوم مسكت شديد في ايده رجع قعد كنت مغمضة عيوني لاني متألمة بعد فترة فتحت عيوني لقيت عيونه مدمعة هزيت ليه رأسي بمعنى لالا ما تبكي وقولت براحة رغم ألمي
سدين: ابو العز خلاص انا كويسة
عزام: انتي ما كويسة والله
سدين: والله كويسة ، ما حبيت احسسه اني متألمة عشان ما يحس بالذنب اكتر
عزام: تمام خلاص ارتاحي انا جنبك هنا في السرير التاني ، هزيت ليه رأسي بمعنى تمام وغمضت عيوني صحيت بالممرضة كانت بتغير لي الدربات عاينت ليها كدا ورجعت نومت تاني.......