رواية خطايا واجتثات الفصل الثاني والاربعون 42 بقلم نور علي البصري
الحزن للروح كل ساعة يجي بلون
على الراحو بعد ماضن يجبلون
كمت أبچي مثل وادم يجبلون
عزيز إلهم دنت منه المنية
ــــــــــــــــــــــــــــ♡ــــــــــــــــــــــــــــ
مـــــــــــــ♡ ــــــــــــريم
السكوت صار أطول من الليل وصوت الجرس وهو ينگط دم جان مثل دقات ساعة القيامة بوسط راسي مديت إيدي والأصابع ترجف رجفة السعفة بمهب الريح حليت الرباط وعيوني غوشت وبس فتحتها الدنيا دارت بية سبع دورات.
حذاء ياسر.. هذا الحذاء الصغير اللي جان يملي البيت ركض و هوسة وگع من إيدي على الطين جوه الكونية
وجه نـصير.. الشاحب اليكسر الخاطر و بصفه.. بصفه راس ياسر.
ياسر.. اللي بعده عطره حليب و طفولة وشعره اللي جان يزحلق المشط من نعومته هسه غركان بدم أحمر قان.
ما طلعت مني صرخة الصرخة أنحبست ببلعومي و جوتني جوي الهوة صار ريحته دم.. و كلما أجر نفس أحس سكاكين تذبح بريتي.
باوعت لعمي نوري.. جان واگف بعيد
و عيونه بيها غدر السنين الخيانة ذبحتهم قبل لا توصلهم السكاكين.
بهاي اللحظة سمعت صوت طگة قوية بوسط راسي عبالك خيط و أنگطع أنمحت الصور و ضاعت الأسامي عيوني صارت تدور بالفراغ آني منو؟ وهاي الرؤوس لمنو؟ چنت أردد أسم ياسر.. بس ما أعرف هذا ياسر.. منو؟
الذاكرة صارت مثل شط طامس كولشي بي غرك وضاع أنمحت مـريم.. و أنمحت الدنيا وما بقى غير سواد وحفرة غميجة وسط الروح والجنون صار هو الصاحب والرفيق.
عـــــــــــــــ♡ـــــــــــــــون
ليلتي مامرت بسلام گلبي جان ينغزني نغزات مو طبيعية درت وجهي وجدان غركانة بنومها وآني گاعد وإيدي على خدي صراع بوسط روحي.. يا ربي مـريم.. هاي ترباية إيدي شلون أعوفها بهيج شدة أدري گلت لازم أمحيها و أبدي صفحة جديدة بس وجدان.. مالها ذنب بس النفس تضيك والروح ترف على ذيج الدار.
الفجر بدت تبين خيوطة فزت وجدان.. و جرتني لحضنها بقوة:
: تعال گاعد يم راسي فزعتني عبالي جاثوم لو طنطل شبيك گاعد چنك ناطور والله عبالي جلطة ضربتني من الخرعة.
باوعتلها هاي لسانها هواي طويل أشرت بيدي علامة المقص:
: اللسان مال گص.
ضحكت وتلمست لحيتي بدلع:
: و أصير وجدان.. بلا لسان بعد ما جانت أم لسان وتعودت على لسانها.
: أگول شعجب ولد عمج ما خطبوج؟!
ردت بثقة صدمتني:
: شردوا من لساني صجيجة لفتهم هم خسرانين راحوا خذوا خياتي الفاهيات وآني أبوي يخطب بيه لولدهم يردونه حجي بس هاي أم لسان زين هسة أنت عاشرتني وصارت بينا عيش وملح وحياة هم لساني أذاك بشي.
أبتسمت : اليسمعج يگول العشرة بينا صارت خمسين سنة تونا گلنا بإسم الله يعني قصدج خالي قشمرني ولج غير سواج إلي گمرة وعيد.
تدلعت : قابل غلطان فديت أبوي الورد.
رغم مختنك بس هاي فرهت علية خنگتي وأرتاحيت شوي.
: هو أسأل شمعنى ما أنطاج لغيري.
: ما يتقشمرون مثلك أنت أبوي قشمرك بأم لسان طويل.
: هههههههه اليطول لسانه نگصه إله يا وجدانوو.
سكتت و دنگت من خزرتها أريد أخوفها ظلت مدنگة وهم حجت:
: لا عبالك دنگت خفت لا بس عيونك الحلوة دوهنني.
: مو بس لسان طويل و لوتية هم.
: لا والله يا عـون.. مرتك مو بس لوتية حتى جنجلوتية.
ضحكت : كارثة أنتِ.
رجعت تمددت ورى ما حسيت شوي أرتاحيت وجريتها لحضني خجلت بيها تناقض شخصيتها عجبني منها جرأة ومنها خجل منها تجفص ولسان طويل أبد ما أحس بملل يمها أمسح بشعرها وآني صافن بالسگف بين راحتي يمها و بين كل شوي شعور خفي ما أفهمه يجافيني.
همست بصوت متناعس:
: دتمسح شعر بزيزينتك؟
غصيت بضحكتي هاي سوالفها تخبل وتونس نامت هي بس رجعتلي الخنگة و عدم الراحة عبالك صوت مـريم.. يصيحني أول مرة أحس بمـريم.. تصيحني.
باوعت لوجدان.. حسيتها طفلة مو حمل مسؤولية بس خالي.. رشحها إلي وگال هاي المدللة وآني أخذتها ردت أستقر.
بس النغزة بصدري زادت صرت أفرك بگلبي النفس ضاك عندي حيل طفرت بساع من الجرباية و هي فزت بخوف ورعب وگامت وراي:
: شبيك عـون.. منو مات شصار يمااي يماا أبوي أمس مريض أبوي مات ولكم وين حجابي أندهرت وربي.
تدور الحجاب وآني أبدل مستعجل.
: وجدان.. ردي نامي أبوج مابي شي آني طالع بشغلة.
جرت نفس وگعدت عالجرباية إيدها على صدرها تشهك:
: شگول عليك عـون.. وصلت ردت أسويها على روحي وين طالع خاف رايح للجامع أنتظر الآذان وصلي هنا.
جاوبتها بضيق:
: ما بية شي بس مختنك وأريد أشم هوة و أذا بقيت للصلاة أصلي بالجامع.
أخذت السويج و طلعت وهي وراي تتمايل وترمش بعيونها عبالك گاعدين بفلم مكسيكي مدبلج شبكتني وگالت:
: سأشتاق لك يا حبيب الروح.
ضحكت غصباً عني والله الشغلة خربانة نصيبي وگع يم وجدان.. اللي كل همها تنصب علية وتسوي دراما على رومانس على أكشن وحتى رعب مشتغلتني.ركبت سيارتي و طرت لبيت مـريم.. الطريق كوله وگلبي يرجف.. إحساسي ما كذب وصلت وشفت دورية الشرطة ببابهم المنظر يهد الحيل مـريم.. گاعدة بالباب بس مو مـريم.. اللي أعرفها عيونها بيها نظرة ضياع و جنون على ذهول ملامحها غريبة وتخوف.
نزلت من السيارة أركض و أستقبلني ونين يفتت الصخر صوت يشبه نعي الفواقد بنص المقبرة مرت أبوي.. أمها تدك على راسها وبقع الدم تملي المكان بعتبة الباب.
الضابط جان يحجي:
: رفعنا الكونية للطب العدلي ست تفضلي ويانا تنطين أفادتج.
مـريم.. ما جاوبت ظلت گاعدة تهز بجسمها وحاضنة ركبها و تون ونين يموت دنگت لزمت إيدها جانت ثلج:
: مـريم.. مريومة شبيج؟ أحجي وياي.
ماكو جواب.. بس حشرجات ووجع يصعد وينزل بصدرها وبعدها غابت عن الدنيا وطاحت بين إيديه مغمى عليها.
أريد أفهم شكو باوعت لأبوي بتساؤل ومرت أبوي تبجي وتنوح:
: يا حظج يا مـريم.. يمة راح رجلج و وليدج يا مـريم..
: فهموني شنو هذا الدم..
العقل ممكن يخمن بس الوضع اللي گدامي دهوني و صرت ما أعرف شيفكر توضحت المأساة المرسومة بعيون مـريم.. وملامحها وهي مغمي عليها بحضني.
شلتها بين إيديه جسمها جان خفيف عبالك ريشة بس الوجع اللي بداخلها يوزن جبال صرخت بصوت عالي هز الشارع:
: دكتور أخذها وياكم.
باوعت للكونية بالإسعاف وحسيت راح أتقيأ بس ليش إسعاف وسيارتي موجودة ركضت لسيارتي صرت ما أعرف شسوي.. من عظم المصيبة.
الضابط باوعلي بإستغراب وركض وراي:
: أنت شتصير منها؟ لازم ناخذ إفادتها.
: تاخذ إفادتها؟ أنت ما تشوف حالتها؟!
: تمام بعدين جيبها أستدعاء من تتحسن بس أنت شتصير منها؟
مرت أبوي أم مـريم.. أجت و صعدت بسيارتي وهي تجاوبه:
: أخوها.
باوعتلها بحيرة و الضابط گال:
: لازم تدلي بإفادتها من تصحى.
أبوي ورى الضابط حاجاه:
: سيدي آني أنطي الإفادة إذا تريد بواقع الجريمة.
آني تحركت بسيارتي للطوارئ عيوني مرة أسوق ومرة أباوع للكراسي الورى مـريم.. متمددة أباوع لوجهها اللي صار بلون الگطن شحطت تايرات السيارة لجهة المستشفى والدورية ورانا هي والإسعاف اللي تحمل بقايا أجساد.
مرت أبوي : لا تتلفت كل شوي هسة تگلب السيارة بينا.
وترجع تنوح ااخ يمة يا حظج يا مـريم
وصلنا الطوارئ.. الممرضين ركضوا بالسدية وآني واگف و أبوي رافق الدورية اللي سلموا الأجساد للطب العدلي الدنيا ضاگت بعيني ريحة الموت اللي جانت بالكونية لزگت بخشمي.
طلع الدكتور ورى نص ساعة وجهه ما يبشر بخير:
: أستاذ عـون.. البنية تعرضت لصدمة عصبية عنيفة (Post-traumatic stress disorder) بس الحالة اللي هي بيها هسة أصعب دخلت بحالة ذهان صدمي يعني عقلها قفل حتى يحمي نفسه من الوجع حالياً هي فاقدة الذاكرة المؤقتة وما تعرف أحد وبنفس الوقت تحس عقلها مو تمام.
لزمت راسي و الدنيا دارت بية:
: يعني شنو دكتور؟ مـريم تخبلت؟
الدكتور نزل عيونه:
: نسميه فقدان إتصال بالواقع أدعولها الصدمة جانت أكبر من طاقة تحملها البشرية أنتم هسة متگدرون تسولها شي بقت تدريجياً إما ترجع أو تبقى بهذا الحال.
بقيت أحوم أروح وأرجع أمها بقت ترافقها وصتني أجيب ملابس إلها و أنطتني مفتاح بيتها ما أخذته:
: مگدر أطب بيتها أعتذر خاف يضيع شي و أبتلي بي إذا على ملابس أو مستلزمات آني أجيب من السوك بس شوي تفتح الأسواق.
خليت وطلعت لگيت أبوي راجع من الطب العدلي گال:
: رايح للمركز أنطي إفادتي مسكين نـصير و أبنه شوف الزمن يمكن هاي حوبتك.
ما تقبلت الشماتة أولاً ما حبيت نظرتي لمريم وهي منهارة أذتني وتمنيت اللي صار ما صار ولا أشوفها بهيج حال وثاني شي أعرف أبوي يركض ومهتم ومتبني قضية مـريم.. أكيد مو بلاش ولا لله مـريم.. صارت وحيدة والذياب حواليها هسة عمها الطماع يرجع و حماها ذول من طفولتنا أعرفهم هواي لئيمين وما تهمهم مـريم.. گد الأملاك اللي سجلهن نـصير.. بأسمها حسب ما سمعت من مرت أبوي.
عفت أبوي واگف ورحت لسيارتي حسيت أحتاج أسبح رغم ما لمست الكونية بس أحس ريحة الموت چلبت بملابسي وآنفاسي.
دخلت لبيتي لگيت وجدان گاعدة وتهز برجليها شافتني مالت بوجهها زعلانة:
: كل هاي صلاة وتشم هوة أتصل عليك ما ترد گلبي لعب منك أخ من الزلم ولا يتأمنون.
مو بحال أضحك وهاي مستمرة تلغي گلتلها بحدة:
: وجدان بنت مرت أبوي من فترة خطفوا رجلها وأبنها وقتلوهم أمس وجنت هناك لذا مالي خلك لغوة زايدة.
رحت طلعت ملابسي وسبحت طلعت أنشف بشعري وآني أباوع لوجدان:
: أريد گلابية مو أكو وحدة جبتها طلعت قصيرة عليج؟
: أي لويش؟
: مـريم.. بالمستشفى أريدها إلها.
: وهاي مـريم.. بالمستشفى بلاية ملابس شسوي؟
ردت أكفخها على هذا العقل:
: ما لازم..
راح تصير بالستة تمددت وآني أفكر حسبة توديني و حسبة تجيبني لمن صارت ساعة بـ 8 بدلت وقررت أجيب ملابس من السوك أفضل.
أريد أطلع بس وجدان.. سدت الطريق كالعادة تريد تلعب نفس اللعب مال يومية قبل لا أروح للشغل بس اليوم مزاجي متعكر ظلت سادة الطريق:: ما أوخر لمن تبوسني يلا أجرة العبور
من گد ما ضايج خلگي و معصب ضربتها راشدي ووخرتها بساع:
: شو وخري عيديها وشوفي.
طلعت وما ألتفتت بس أسمع شهگاتها المصدومة بتصرفي الغير متوقع رحت للسوك تسوكت و رجعت للمستشفى دخلت الغرفة لكيت مـريم فاتحة عيونها للسگف بس شافتني مرت أبوي جرتني لبرى:
: عـون.. مريم ضاعت عـون.. متحجي ولا عرفتني گولي ولك شسوي؟
طمنتها : أزمة وتعدي.
و دخلت لمـريم.. صرخت صرخة ركضت مثل المجنون لزمت إيدها نترتهن:
: آني وين؟ آني خايفة.
گاعدة تشلع المغذي من إيدها عيونها تتلفت يمنى و يسرى بخوف مو طبيعي.
: مـريم.. آني عـون.. أهدئي يمعودة.
باوعتلي نظرتها جانت فارغة عبالك تباوع لواحد غريب واحد ما شايفته بحياتها.
همست بصوت يرجف:
: أنت منو؟ وين أبني أكو ريحة دم بالغرفة طلعوا الدم برة ياسر.. جاي يبجي أسمعه صوته جوه الگاع أحفروا أحفروا وطلعوا وليدي!
بدت تهذي آني ما عرفتني معقولة وما عرفت أمها بس أبد أبد ما نست ياسر
بدت تخرمش بوجهها وبصدرها لزمتها حددتها والممرضة أنطتها إبرة.
أنكسرت وراحت بذاكرة مشتتة هذيانها وجعلي گلبي.
مـــــــــــ♡ــــــــــــريم
گاعدة بالسرير أباوع للحيطان البيضة ليش الحيطان تصيح؟ ليش السگف ينگط دم؟
وقتها هيج أشوف الأشياء وقتها صرت ما أعرف واقع من خيال عقلي أحسه ما أملكه ذيج السنين اللي فقدت بيها عقلي أصعب سنيني.
نرجع لذاك اليوم أذكر عـون.. الواگف يمي وقتها نظرتي إله كغريب.
أكو ولد جان واگف يمي عيونه بيها لمعة خوف بس آني ما أعرفه ليش يسميني مريومة؟ آني منو أصلاً؟
فتحت الشباك الصغير اللي يمي شفت غراب واگف على الشجرة:
: أنت شفت ياسر؟
الغراب نعب عبالك يضحك علية حيل متوترة أحس بعالم غريب يحاوطني أحس بضياع ما أملك بذاكرتي من الأسماء إلا ياسر وهذا ياسر أبني بس وينه؟
صحت بصوت عالي:
: ياسر ضيع حذاءه لازم أدور عليه بردان وليدي بردان.
عبارات تطلع مني وآني مستغربة هو وينه ياسر؟ لازم أعرف وينه أحس إسمه يصيح براسي أي أي هيج يصيح
ياسر.. ياسر.. أبني ياسر.. هذا المطبوع بعقلي.
الممرضة دخلت تركض لزمتني:
: اگعدي.. اگعدي أستهدي بالله.
دفعتها حيل:
: عوفيني ريحة الدم بيدي غسلوها عفية غسلوها لا يشمها ياسر.. ويخاف
بدت نوبة تاكل بضلوعي و عيوني گلبت وما صحيت إلا وآني مربوطة بالسرير عبالك صرت مخبولة رسميًا ظليت أتمايل أريد أفك رباطي.. همه لويش رابطيني أريد أدور ياسر بس.
صرخت من شفت الدم ينزل من الحايط وسعت عيوني:
: دم.. دم.. ياسر وينك شنو هذا الدم.
أبرة بوريدي دقائق وسلمت للنوم.
عون : ظليت برى من طلعت الممرضة والطبيب.
: دكتور شنو وضعها آني معرفتني بس تصيح ياسر.
هز راسه بحزن وهو يگول:
: أنهيار عصبي حاد وهذيان صدمي. توقع بمرور الوقت تسوء حتى لهذيان جنون
: يعني تخبلت؟
: يعتمد .. الموضوع على العلاج والمحيط يعني اذا مثلاً صاحت دم أيدوها حتى لا تنفصل إلى أن تستقر حالتها هو هذيان صدمي مو مجرد فقدان ذاكرة بسيط الفرق إنو فقدان الذاكرة ممكن تعرف هاي غرفة وهذا أكل وهذول أهل و إن ناسيتهم ممكن تعرف أسمها بس بنتكم مو هيج هي هنا عقلها گد الصدمة القوية والإنهيار الحاد بنى حاجز دفاعي ليحمي نفسه يمكن اللمسة الوحيدة للواقع حالياً بس أبنها شدة الصدمة بلي شافته بأبنها متگدر تنسى أمور مثلاً أسمه وتعرف هو أبنها بس ترفض موته الدم هنا لأن شافت الحادث أو شافت الطفل بوضع بشع ترجمة عقلها تشوف الدم بكل مكان بواقعها مثلاً الحيطان الإيدين هاي الهلاوس البصرية نسميها ذهان صدمي هو أضطراب المفروض مؤقت نتيجة صدمة و بقى على تقبلها للعلاج الله يعينكم والله بعدها صغيرة على ما بلاها.
گالها الطبيب وراح وآني أفكر لبعيد بالعالم اللي راح تنهشها مدام هي بهذا الوضع هنا هي تتحول للوصاية و أعتقد هنا أمها تكون وصية عليها وعلى أملاكها خربت هذا نوري مسيطر عالأم شلون أحمي مـريم.. منهم؟
طلعناها من المستشفى والأيام المرت مـريم.. صارت من سيء إلى أسوء.
مــــــــــــــ♡ــــــــــــريم
گمت بخوف أتلمس الحايط وأرجع أباوع لإيدي أكو لعابة عالميز أخذتها وملصت راسها أشوف دم نزل من ركبتها ذبيتها من إيدي وآني أرجف خوف رجعت لورى أصرخ:
: دم.. دم... ياسر دم.. هذا دم..
فتحت الباب شفت هاي اللي تگول هي أمي جانت ما لابسة شي على راسها و شعرها توه يطلع كالتلي:
: مرمرتيني.. شنو الحل تعبت والله اليوم ماخذة جرعة هرمونية وأحس عظامي تدك بية دك.
حضنتني تبجي:
: وصلت بية أريد أتصل بخالتج بلكت تاخذج يمها مدحصلها هي هم زعلانة منج طردتيها ولج يمة وين أوديج وأخليج وآني بوضعي هذا.
رددت : خالتي شنو خالتي تعاي أگولج شوفي هذا دم شوفي تلعوست دم أخذيني غسليلي حبابة.
شفتها تبجي وتگول:
: الله لا ينطيهم الخبلوج.
رددت : الخبلوج هههههه
وآني أضحك وهي تخزر:
: ولج شبيج يمة..؟
: خبلوج.. خبلوج.. مخبلة.. مخبلة.. ترللي.
ظليت أردد لزمتني:
: يلة ماما يلة حبيبة تعاي أنومج صيري عاقلة.
ضحكت وضحكت:
: صيري أنتِ عاقلة.
دفعتها و طلعت أركض بالشارع وشافوني جهال:
: هاي مخبلة.
نططت عيوني عليهم وعصبت
: أنتم مخابيل أنعل أبوكم.
نزلت عليهم بالحجار و هاي المخبلة إللي بالبيت لبست عبايتها وأجت وراي تركض شافني هذا رجلها.. إللي دومه يطگني خفت منه ركضت بسرعتي وكل شوي ألتفت وبيدي أسوي إشارة الشتم.
: أنعل أبوكم.
لزمت شليل دشداشتي بحلكي هاي المخبلة يكولون أمي دتركض تريد تلزمني أسمع هاي الگرعة وهي تصيح.
: راح أخابر عـون.. عليج تعبتيني.
ضحكت وأصيح:
: أنعل أبوج و أبو عـون ترى أجر حجابج و أطلع كرعتج بالشارع ها ولج ها الكرعة.
صوت رجلها:
تشتميني آني إلج مخبلة بس خلي يوصل عمج وحماج إذا ما ذبيتج عليهم.
شلت طابوكة بيدي وشمرتها عليه ما أسمع إلا الصريخ ظل يتمرغث بالكاع و أجو زلم سندوه وهاي مرته لزمتني كتلتني و وصت علية الجوارين وهي تنزل شليلي من حلكي.
: لا ترفعيها أجويج همزين ألبسج سراويل تحت الملابس.
هي كالت هيج بالشارع وآني نزعت السروال ذبيته بوجهها أجت مرة غير أم كرعة حضنتني وهي تلاعبني
: مريومة الحلوة زعلانة جنها دتعاي يا أمي تعاي نلعب.
أبتسمت أي أحب ألعب ياسر وينك تعال نلعب.
: وياسر يلعب ويانة.
هي تحاجني والكرعة عدلت حجابها وراحت وي هذا الوحش الفشختة فكة همزين راحوا ظليت أكمز وألعب و أركض للبيت رحت للحديقة و آني أشوف طفل أبو شعر الذهب يركض كدامي يضحك.
: ياسر أنتظرني ألعب وياك.
المرة شبيها عيونها مدمعة شنو شصار؟
: تبجين؟! تعاي نلعب وي ياسر هنا.
: أوف ربي هاي مـريم.. بنت المنطقة الكل يحلف بعقلها يمة هذا حالج ألف الحمد لله والشكر.
هزيت إيدي ما أفهم العالم تشوفني تتحسر دولو ولو ألعب وي أبني ظل يبجي علية تركته.
كعدت بالكاع وآني أسوي صفيكة للبابا شوي ياسر كام للمرجوحة شوي ركبته تنزف دم.
آخخ وليدي شبيك أهذي بحدي المرة بس تباوع وتقرأ آيات تعبت من اللعب وياسر مدري أختفى و المرة ظلت هي تلعب وياي.
عــــــــــــ♡ــــــــــــــون
رن موبايلي شفتها مرت أبوي جاوبتها أجاني صوتها مخبوص:
: تعال يمة عـون.. الحك علية وينك مـريم.. تعبتني شوفلي حل يمة نركض وراها للشارع لا حجاب ولا شي طرك الدشداشة للركب وربع ردن كدام العالم ولك ضربت أبوك ونيمت براسه سبع غرز خياط.
باوعت لوجدان.. جانت تطبخ وآني أساعدها ما آمن تدخل مطبخ وحدها لأنها صغيرة رغم هي تكول متعلمة بيت أهلها بس أشوفها بعدها صغيرة.
: أكولج وجدان.. حياتي آني طالع بشغلة مهمة خابرتني مرت أبوي و هذا أبوي ضاربيه وفاشخين راسه وخياط فيا روحي من أرجع أجيب وياي غدة عازمج من مطعم عوفي البيدج رجعيه للثلاجة مو ترحين تطبخين ومحد يمج أخاف عليك يا حلو.
ردت ضايجة لأن ما أقبل تجيس طباخ ومحد يمها.
: و هاي الدجاجة الجاي أهلس ريشها و الماي اللي يفور عالطباخ.
: نظفيها و ظميها لباجر.
طفيت الطباخ وأشرت على جدر الماي.
: هذا كافي يغلي كملي بي غطيها بالماي وطلعيها كملي هلسها للدجاجة بس ديري بالج مو ينگلب عليج.
ضحكت وكالت:
: لا ما أحتاجة هن ريشتين بقن ها أها هلسناهن هسة بس أشك بطنها وأنضفها و أضمها.
: أحسنتِ عفية بالشاطرة التسمع كلامي.
شوي وكالت بخجل:
: العصر أختي كالت تاخذني للطبيب.
: شبيج مريضة؟ آني أخذج.
: لا بس هيج تكول شو طولتي!
: يعني شنو ما أفتهمت؟
: يوووو..
كامت مستحية غسلت إيدها وركضت.
: أريد بطني تشيل أفهم.
: شنو يعني.
تبعتها بقلق : شبيها بطنج.
: يااا..
أستحت وهي تهمس.
: أريد أحبل بطفل عبني جثير أريد أصير أم.
ضحكت : أن شاء الله باهر ينور حياتنا لو آية تجي تشبه أمها وجدانتي بس يا حلو مو هسة الكلام هذا بعد وقت لمن تكبرين تلحكين عالحبالة يلة أروح
سولفتلج عن مـريم.. بنت مرت أبوي هايجة عليهم وضاربة أبوي ولاعبة فلك.
: مسكينة من كلت أبوي مضروب وفاشخينه وخياط والله توقعت هالبت لو تعالجونها وتودوها مصح مخابيل لا النوب تموتهم.
باوعتلها محتد:
: عوفج من هذا الحجي أن شاء الله أزمة وتعدي وترجع مثل ما جانت.
: أي والله.. خطية عاد تشيل أُمها المريضة.
مرديت رحت أخذت السويج وبتراكي طلعت ما بدلت.
آني وي وجدان صريح بس ما كتلها جنت رايدها بيوم من الأيام كتلها ربت وياي وتكفلتها لحد ما تزوجت.
وهم آني بعد تزوجت و مو مال أرجع عـون.. الغشيم و حلمه مـريم.. هي باعتني وأنتهت بالنسبة إلي يعني كل اللي داسوي لأجل أمها ولأجل رباي و تعبي من هي و طفلة صعب أتخلى عنها بشدتها.
أخذت السويج وطلعت أتصلت بمرت أبوي:
: آني جاي بالطريق.
لا تجي للمستشفى روح لمــريم.. أضطريت أعوفها وحدها.
: تحجين صدوك تعوفيها وحدها؟
: لعد شسوي أعوف الزلمة دمه بطوله.
: أستغفر الله يارب.
: أمنتها يم جيراننا تجي يمها.
: والله شكولج وهاي تجازف هي مريم صايرة تخوف زلم ونسوان.
سديته منها وغيرت طريقي من للمستشفى لبيت أبوي.
ركنت السيارة لكيت الباب مفتوح و شفت مـريم.. بالمرجوحة ويمها مرة جبيرة بالعمر لازمة إيد مـريم.. وتلاعبها..
: مريومة هيجي تنكر التيتي.. بحويش بيبيتي هيجي تنكر تاكل عنكر.. هاي الخبازة.
و تضم إصبع إصبع وتعدد هاي الغسالة و هاي الطباخة الخ.. كركر كركر تدغدغها و مـريم.. ميتة ضحك.
أبتسمت و ظليت صافن بالضحكة الطفولية وسط هذيان نظراتها اللي تحسها مو طبيعية.
: شلونكم عيني.
وكفت المرة:
: هلا يمة مدام أجيت هاي أمانتكم.
: وين رايحة خالة أبقي.
ضحكت : هههه هاي أنت تخاف منها شنو؟ لطيفة هاي مـريم.. مو مريومة.
باوعتلي وهي تحاجي المرة وهي تردد
: مو مريومة؟
دوم تكرر كلامنا ببغاء.
ضحكت المرة :
: أنتِ مـريم.. أسمج مـريم.. و أحلا مـريم..
ضحكت مـريم.. وهي تكرر.
: أنتِ مـريم و أحلا مـريم..
تقربت المرة منها ولزمت إيدها وخلتها على صدر مـريم:
: أنتِ مـريم.. أسمج مـريم.
رجعت خلت إيد مـريم.. على صدرها
: وآني تفاني خالة تفاني.
ظلت مـريم.. صافنة وتردد:
: أنتِ مريم وآني تفاني.
ضحكت المرة و باوعتلي وكالت:
: مدام مرضها عن صدمة مو ولادي ولا وراثي فهي تطيب بس تحتاج علاج نفسي مكثف و تعامل لطيف عالجوها خطية.
: هو الدكتور بالمستشفى كال هيجي و دنسوي اللي نكدر عليه بس للآن ماكو أي تقدم.
: ما عرضتوها على أخصائي؟
: لا ولله تعرفين الظروف و حالياً دأمشي بمعاملة القيمومة بمؤسسة القصر رغم هي مو قاصر بس حالتها تعتبر تابعة لهاي المؤسسة وننتظر القاضي يحكم بالحجر لصالح أمها.
: الله كريم أبني.. آني جنت ممرضة بمستشفى بالعاصمة لهيج أمراض وياما مرت علية حالات نصيحة إذا ما تعالجوها و تهملوها.. تتأزم وجائز مترجع لطبيعتها ضروري العلاج ميتأخر.
: أن شاء الله..
راحت المرة و كعدت على المرجوحة يمها باوعتلي ونططت عيونها تقربت من وجهي ومدت أصابعها تريد تبخز عيني نترت إيدها بساع وكفت أضحك:
: شجاج؟
: تعال أشلعهن الك أنطيني ياهن!
ضحكت : وليش بلة و أظل بلايا عيون وما أشوف وصالي.
سكتت ألوم بروحي ليش رجعت أحن إلها ليش مو هاي اللي أذتني وتعبتني دمرتني وخلتني بحسرتها بس هسة هي لا حول ولا قوة هي تنكر أسم مـريم.. و مدتتقبله أجرب أعلمها على وصال.
: أنتِ اسمج وصال.
سكتت ودارت وجهها تلعب بذيال دشداشتها ترفعه لفخذها و هي تسلت من خيط الكفة وخرت عيني عن المنظر وآني أدردم.
: أشتغلن الخبالات نزلي ثوبج عيب ترفعينه.
ضليت داير وجهي بس مديت إيدي على إيدها و نزلت الثوب ونترته منها.
درت لوجهها : عيب زين.
رددت : مو كلت من تروح تجيب ياسر والدم ماكو يلة حباب أمشي نجيب ياسر.
بقهر كوتلها :
: مو جبتلج ياسر.. وكلما أجيب واحد تملصين راسه وتغطي بصبغ أظافر أحمر.
ضحكت بجنون:
: هههههه هههههه دم هذا دم شوف هناك دم.
: وصال.. ماكو دم.
ردت : وصال ههههههه آني وصال.
: أي أنتِ وصال.. وياسر ماكو.
: آني وصال.. وياسر أنت تعال ياسر.
لزمتني بجنون من ركبتي بيديها وهي تخط داير مداير ركبتي وسعت عيونها
: هنا دم.. ياسر هنا!
دك نقالي وهي مجلبة بية باوعت وجدان.. ما جاوبتها و مـريم.. سمعت الرنة و تقلدها النغمة تصوفر.
ضحكت: أنتِ ببغاء.
فجأة كرصت ركبتي بأظافرها حيل وتلوي الأضفر وخرت إيديها عني.
: تريديني اليوم أنشحت وجدان تشحتني ولج ااخ وصال.. كعدي عاقلة.
طفرت لشعري وجرته حيل.
: كول تجيبلي ياسر.
: صار.. صار..
شوية ورجعت أمها وأبوي شاد راسه من شافني ظل يون:
: أاخ لحد سأل علية معبالك عندي أبن.
وكفت وكتله : كوة يبة.
: صرت يبة أخذت لسان ذيج الصفحة خوالك اللي يحجون مثل الخليج.
سكتت مجاوبته باوع لمريم.. وگال:
: هاي تشوفيلها حل ذبيها بمستشفى لو بالشارع لا يوم نايمين وتكتلنا.
ردت عليه:
: ترى ما تريدها عدها بيت آخذها وأمشي.
: أحسن خلصني منچن أريد أعرس.
گلت هنا الزبدة و تعاركوا بينهم و أمها لمت ملابسها وملابس بنتها وگالت.
: يلا عـون.. وديني لبيت بنتي همزين من مات عافلها بيوت وأملاك.
صفن نوري مثل اللي أتذكر..
: التطلع أكسر رجلها وهاي مخبلة بس ينطوج الوصاية أنتِ حولي كولشي بإسمج.
ضحكت وآني أهز إيدي فاهم الحجر أو القيمومة بصورة غلط بس خليه حتى لا يعرقلي المعاملة لمن أكمل هو ينصدم مو من حق أي شخص يدير أو يبيع أملاك هالمسكينة إلا بإذن قاضي.
نوري : شوف ولك أتصلت بعمها يجون ياخذوها المن تبقى يمنا بس خلينا نحول الأملاك والله كريم.
گتله : أي خوش.
وبالسكتة غمزت لمرت أبوي وطلعت:
: رايح للبيت أي شي تحتاجي خابري لا تترددين.
بس طلعت للسيارة أتصلت بوجدان:
: آي جاي.
: تأخرت أتصلت مجاوبت خفت عليك من الخبلة.
فركت ركبتي أباوع لآثار الأظافر وأبتسم:
: چنت أتعارك وي بزونة.
: يا صدوك تحجي وشجاب البزازين عليك؟!
: طفرت علية وخربشتني.
: گول والله مرتين.
: والله مرتين.
: لا تغش مو هيج!
ضحكت : لا والله بس مـريم.. هايجة وچلبت بركبتي.
: الأدب سز ما تستحي لا تزعل بس ما أقبل ترى أغار.
: خليني أسوق لا أنگلب تغارين من منو؟!
: شلونه أبوك؟
: طريقة ناجحة بتغيير المواضي أبوي زين لا تخافين العار ميموت.
: يا صخام عيب تغلط على أبوك ترى ما يجوز.
: وجدان.. كافي!
: أختي تگول نروح للطبيبة على وكت.
: إذا مصرة آني جاي وآخذج بدلي.
ضحكت بخجل:
: هههههه شگد عيب.
: بالجيب يا عيب هذا ولج!
سديته منها ردت أدعم دراجة ورجعت دگت علية صيحت:
: هييي ردت أدعم دراجة لا تخابرين وآني برى إلا للضرورة.
سديته وبس وصلت لگيتها مبدلة ومجهزة نفسها گالتلي:
: نمر نتحمد السلامة لأبوك وهم أتعرف عليه تزوجت وما راويتني ياه.
: فد تختارين مصطلحات هو شنو سلعة وأراويج ياه قصدج ما تعرفتي عليه يمعودة المن تتعرفين عليه هاي عبالها نوري بيك مثل باقي الأبهات.
: ميخالف يبقى أبوك يعيوني وداعت عيون عمتي اللي بوجهك.
أبتسمت للغزل البريء.
گتلها : صار أمشي أتعرفي عليه خاف يظل بنفسج التعرف.
بس وصلنا لگينا مـريم.. بالشارع محد منتبه له أستغفرك يا رب نزلت ولزمتها:
: مـريم..
باوعتلي ودفعتني : أنت مـريم.
: ها نسيت؟ وصال.. أنتِ وصال.
سكتت متقبلة إسم وصال.
: شتسوين هنا؟
: أجيب ياسر.. مجبتلي ياسر.
: صار تدللين.
باوعت لوجدان صفح و ضحكت:
: أعرفج على مـريم.. بس ما تحب نصيحها بأسمها لذا سميناها وصال.
دنگت مـريم.. وأخذت طابوكة ورفعتها بوجهي وصاحت وجدان:
: يمة يارب أسترنا حتفشخك ولك!
آني عالجت الموضوع:
: عمي نسيت يلا أعرفج بوصال.. أما مـريم.. هاي تولي طايحة حظ.
أشرت علية وهي حركات وجهها بجنون و بإصبعها على وجهي تغرز ظفرها حيل بخدي تضغطه:
: أنت مـريم.. وآني وصال.
ضحكت : صار وصال.. هاي هي يلة للبيت عمي زحمة تالي هاي الشوارب وأطلع مـريم.
بس باوعتلي ومنططة عيونها:
: أروح وياك نجيب ياسر.
: لا متروحين أنتظريني بالمرجوحة وآني أجيبه.
: جذاب أروح وياك أجيب ياسر.
: يلة وجدان.. إمشي حتى تتعرفين على أبوي.
باوعتلي وهمست:
: هي هاي المسودنة؟ شو حلوة كلش حرامات مخبلة ومسودنة وجهها چنها من الشمال.
: عيب تگولين مسودنة أنجبي ما أقبل
: ها زعلت زين شو كولش حلوة؟
: أمها كوردية.
: هاا أگول وآني شبيه أمي مو كوردية
ضحكت عليها هاي ونسة:
: ليش شبيج كلمن وجمالها!
: هاي لوحة زيتية آني لوحة بقلم رصاص.
: ولج كافي.
قفلت باب الحديقة لا تسف مـريم.. أباوعلها بالمرجوحة وهي حاضنة ركب رجليها لصدرها وساندة راسها عليهن وهي تغني:
: دللوه.. يالولد يبني دللوه.. يا ياسر دللوه.. عدوك ذابحك والراس مگطوع.. ياسر..
للحظة عبالي بوعيها دتغني من صوتها وترتيب الكلمات بس شوي وشافتني وصرخت:
: جذاب شفت ما جبت ياسر أبو شعر الذهب.
: والله أجيبه.
النوب حلفت أستغفر الله دخلت جوة لاگتني مرت أبوي عاتبتها:
: الباب مفتوح و مـريم.. تركض بالشوارع ليش هيجي ها.
: والله أبوك حيل شالع گلبي بس ألتهي عنه بمـريم.. يرعص علية.
جريت نفس:
: مو حل هذا عموماً..
أشرت على مرتي..
: يمة أعرفج بمرتي.
باوستها : هلا بيج يمة هلا تفضلي..
گعدنا بالهول و مرت أبوي.. راحت تضيفنا وجدان. شاورتني:
: هاي الكوردية.
: بشحمها ولحمها.
: اللي بيها سرطان مو.
: أي هي.
: عمي تخبل آني اللي بية سرطان.
: أشش أسم الله شوف الفال شتفاول طاح حظج.
: يمة.. أبوي نايم لو كاعد؟
: هو من رحت راد ينام بس كاعد.
گمت : يلا وجدان.. نسلم عليه حتى آخذج دكتورة ترى منطول يمة لازم أروح آخذها.
: مكانكم ما أحتر.
: عالجايات يمة أهتمي بمـريم.. شنو بالشارع لا تندعم لا أحد يلگفها بابكم دوم قفل كون.
: تعبت يمة مترد وتضربني وآني گوة شايلة نفسي.
: الحل تسنسلي الباب وتبقى بالحديقة ولا بالشارع.
: هاي هي يمة.
دخلت غرفة أبوي:
: گوة يابة هاي مرتي أجت تسلم عليك
سوى روحه موات:
: آاخ شوفي بوية الخبلة رادت تموتني
: سلامات عمي عاد لا كلش تنام للمرض صير قوي.
بگلبي گلت وجدان دواك نوري هههههه
: ما بية حيل عمو.
ظل يباوع لكلادة وجدان وذهبها إلي من أهلها جابته وياها آني نيشنتها بس حلقة و محبس ذهب والساعة عادية.
: بوية هذا ذهب؟
أستغربت وجدان السؤال عكسنا أحنا متوقعين سؤاله نعرفه طماع.
: تعالي يمي بوية دنگي أبوسج بنت أصول أنتِ.
دنگت وباس راسها بس يتلمس كلادتها ويريد يجرها الطماع وخرتها عنه.
: سلامات خوما أكو شي عوف گلادة البت يلا وجدان.
وجدان مستغربة كولش والزاد طين بلة طلب أبوي:
: أنتِ بعد بنتي وأمون عليج مطلوب دين ورجلج ما ينطيني مصرف بوية گلادتج أسد بيها ديني.
أستحت و تريد الثولة تنزعها عاد وخرتها:
: أستجني ثول.
: هـاا..
ردت وهي متعرف شسوي بس حاجيته:
: أنت ما تستحي بنية أول مرة تشوفها تريد تحوسمها الگلادة أرتاح ذني شبه هيج للكشخة مو ذهب يلة ولج تأخرنا.جريتها من أيدها متفشل هذا أبوي التريد تتعرف عليه وجدانو من مال صجيجة والله.
صعدت السيارة و گتلها:
: مبروك التعرف بأبوي العار.
: بس ذني ذهب مو شبه!
: أنتِ تنجبين يا فطيرة!
: ويبقى أبوك أكيد الضربة أثرت بي يهلوس ممتوازن هاي مـريم.. تباوعلك من فتحة أعلى بابكم.
أباوع لمرت أبوي تسنسل بالباب و مـريم.. تباوع من فتحة فوك شلون الشبك بأعلاه.
: تلگيها صاعدة على كرسي القزمة خلي تباوع للشارع منا ولا تطلع.
باوعتلي وجدان وسكتت.. أخذتها للطبيبة رغم آني أگول بعد وقت مصار أشهر على زواجنا وآني هم أريد أأجل الأطفال لمن ألملم روحي بس هي تلح وما أريد أكسر بيها طلعت من الطبيبة چنت گاعد أنتظر برى.
: هـاا؟
: گالت ذني تحاليل وذني سونار.
: تمام يلة.
ورى ما كملنا گعدنا ننتظر فوك الساعة وأكثر لأن المختبر نفس عمارة السونار بس مو نفس مكان العيادة.
: آني تعبت من الانتظار روح شوف ما طلعت التحاليل وهذا السونار ماتقرالي ياه.
هزيت إيدي مبتسم:
گالولج دكتور أقرأ سونار من يصيحون أسمج يلة أگوم.
بعد نص ساعة أجة الفرج أستلمنا التحاليل وفاتت هي لطبيبتها بس طلعت تبجي ومقهورة.
: شبيج ولج؟!
ظلت تشهك:
: الدكتورة.. الدكتورة تگولي أنتِ ما تخلفين آاني.. آني أريد جاهل هسه أريد أحبل أريد جاهل.
حرام إذا أفتهمت شي أخذتها وطلعنا و الطريق كوله بس تبجي:
: شلون بية أريد جاهل آني من صغري أحب الجهال ألاعبهم أنوب أنحرم؟
: على أساس أنتِ هسة جبيرة سكتي كافي بجي نوصل ونتفاهم حتى من بجيج ما دخلت للدكتورة ورزلتها شلون هيج تحطها بوجهج شنو ماكو رحمة الله لو ماكو علاجات؟
: هي گالت المشكلة مو بالعلاج المشكلة رحمج طفولي.
رديت : وأذا تكبرين تخلفين أنتِ ترى مراهقة صغيرة صراحة آني ما ردت آخذج بهيج عمر گلت مدام أنكتبتي نصيبي تكبرين ونعرس بس أبوج ما قبل آني من أنصار زواج البنت بعد عمر الـ 23 سنة يعني ورى التخرج و أستقرار العقل والنضج.
سكتت وباوعتلي وتحول البغيج شلون تكولي هيج.
: يعني متلهفت لعرسنا تدور حجج شنو أتزوجك بعمر 23 لا ما مقبولة أي أطلع على وجهك الحقيقي.
ضحكت : والله أنتِ بلوة.
: شو مضايج ميصير عندي جهال أي أي ليش تضوج زلمة شعليك تزوج غيري ثلاثة.
ضحكت : ليش أتزوج وأخسر فلوس جهازهن وعرسهن غير مصاريفهن طول العمر خوب بهاي الفلوس أعالجج.
ردت : ولك ماكو أمل رحمي طفولي.
: بس أنجبي لا تگولين ولك ونشوف دكتورة غير هاي.
: والله عـون.. هي شرحتلي معنى الرحم الطفولي يعني لا عبالك ينمو هو توقف تگولي رحمج رحم طفلة بعمر أربع سنيـ..
قطعت كلمتها ببغيج ونحيب وشهگات بجي أول ما أهتميت بشرحها ما أعرف هيج حالة بس بمرور الأيام و يومية دكتورة آخذها و فهموني الوضع خلاص وجدان.. مستحيل تصير أم لا المبايض ولا الرحم يساعدن على الحمل.
كملت معاملة مرت أبوي ورسمياً حكم إلها القاضي الحجر على أملاك مـريم.. مع وقف التنفيذ بيع وشراء أو سحب أموال إلا بمتابعة وموافقة الدولة هيج ضمنت حقوق مـريم.. من نوري ومن عم مـريم.. وحماها اللي رجعوا يطالبون بمريم.. وسمعت رافعين قضية نقض قيمومة أم مـريم.. منتهزين أهم شرط القيم لازم قادر يعتني بمـريم.. ومرضها وحالتها وأمها أصلاً هي مريضة تحتاج عناية.
خابرتني بيومها أم مـريم.. تبجي:
: الحگني يمة عـون.. يردون ياخذون مـريم.. ويسفروها ومقدمين طلب بهذا و حتى طلب تحويل أموالها وبيع ممتلكاتها وتحويلهن إلى أموال ببنوك الدولة البيها عمها وحماها.
: شلون حجي هذا ما أعتقد القاضي يوافق إلا إذا قرروا العيش بالعراق يجوز يحولون القيمومة لعمها ونفس الشروط العليج مو من حقهم بيع ولا سحب أموال القاضي يتابع وما يطلع فلس إلا بتوقيعه.
: والله يمة.. ذول كولشي يسوون رشاوي فلوس هو البلد تايه بيد الحرامية وأخاف النوب يموتولي بنيتي حتى يورثونها.
: يمكن لا قدر الله الورث هنا إلج لأن ما عدها أولاد وأنتِ أقرب إلها من العم والحما.
: والله تمنيت تطلع حامل حتى ورى أربعين أبنها ورجلها حللتلها بس آآخ الله ما قاسملها.
: بعد فاقدة عقل و حامل هنا صعب عليج تدارينها المهم هذه مشيئة الله أما الأملاك مسجلهن رجلها بيع وشراء بأسمها صعب يطعنون بشي نـصير.. أول مرة يسوي شي بي خير لمـريم.. من تزوجها لمن مات.
سديته منها وراها أيام تفاجأت أبوي أجاني لبيتي:
: تفضل يابة.
دخل وگال : يا الله.
أجت مرتي سلمت عليه گاللها.
: بوية عوفينا.
هي راحت وهو گلي:
: شنو هالخبر السمعته مرتك ما تخلف زين آني هم أريد أشوف جهالك أحفاد يشيلون اسمي أنت وحيدي يعني الأحفاد منك لا عندك أخو وأگول غيرك يخلفلي حفيد.
گتله بگلبي : والله لو ما حرام وميصير آني ابنك أتبرى من أسمك وأمحيه من هويتي.
: المطلوب من الأخير؟
: أنت ليش ما مؤدب وليش ما تعدل أسلوبك وياي شوف أنت تزوج ما تظل على هاي الماخذها چنها جريد نخل.
: عاجبتني ومستقر بحياتي فلا تخربها أطلع منها وإذا الله ما قاسملي الخلفة راضي وحامد ربي.: والله أنت ما بيك خير عموماً تدري قصي أخو نصير؟
: شبيه؟!
: موضوع مـريم.. صار بيد القاضي وهاي سنة وكم أشهر مر على موت رجلها وأبنها والوضع بالجنوب ديستقر و الدوائر تاخذ مجراها فقدم طلب تزويجها لضرورة المحافظة عليها.
: مممممم أكيد فكرة عمها ميكدرون ياخذون الأملاك يتزوجها يخلف منها الوريث.
: أي لوتي والله أنطوني مبلغ كبير أقنع مرتي لأن طلبوها تشهد لصالح قصي بس رفضت گلت أبني أولى بيها يخلف الوريث مستقبلاً الأملاك كلهن لأبنك يا أثول.
: شنو أنت شيطان قليل بحقك هسة المطلوب مني يعني أتزوج مـريم أگولك يابة توكل بالله ماكو طلابة منا منا تروح تحلها شو ملتهي بمـريم... وأملاكها؟!
: أنجب وأفهم يالأغم أم مـريم.. تحبك وتسمعلك أنت أقنعها تزوجك مـريم.. أوف ولك لو تدري شسوت ركبت راسها و عافتني وگعدت بيت بنتها.
: زين تسوي والله هاي من الزينات أول مرة أم مـريم.. تتصرف صح.
: تحجي صدوك ولك أكيد هناك عدهن فلوس شوف وين مضمومات هي مـريم.. رادت تكمل مبلغ عدها وتطلع نـصير وياسر.. وهاي أمها من تالي صايرة ذكية نبهه الله يدري وين دفنت الفلوس.
: وأنت شلون ضيعت فلوس بيهن حياة وموت بشر وأبنه تگول سلبوك؟!
: أهووو سولفتلك أكيد أم مـريم..
: عوفك شلون عرفت بس صدوك هيج حياة البشر عندك رخيصة زين عوفك من هاي الطفل شنو ذنبه ولا أستوعب ما خفت تطلع بية وبجهالي كما تدين تدان يابة.
عيب علية وقلد طريقة نطقي يابة وهو يلوج الكلمة لوج مستهزئ:
: أبو يابة صايرلي من مناطق التحجي خلايجة هم جهالك الخايف عليهم وينهم إذا أنت باقي على بنت خالك جريدة السعف؟
گالها وگام : فكر زين بكلامي.
وطلع ما يتوب يبقى عار ونذل وأبتليت بي صار أبوي.. غريب وين وداهن الفلوس متأكد هو باگهن بس وين شو ممبين عليه ولا يصرف.
سديت الباب وراه من راح طلعت وجدان من المطبخ عيونها مغوركة دموع حضنتها وأبتسمت:
: ألمن هاي الدموع يروحي؟
: حقه ترى آني ما أخلف صح وحقه يزوجك صح بس مال يگولي جريد نخل وسعف لا ما أقبل يهين جمالي الجنوبي.
حتى وهي مقهورة تصنف الحلو بيها الواحد يرتاح يمها.
: هسه لو أبوك مسميني أم سنون بيها مجال عندي فركة بسنوني.
: مو نشاز أبد لا تضوجين.
: أكعود لگيت الحل نجيب جهال هواي لا عبالك نبقى بلا جاهل عود أعوفك بحسرة ريحة طفل أطمن ولا أعوفك تتحسر على جاهل إلا أترسلك البيت جهال بس صبر.
: وضعج ونعرفه مستحيل.. أي نورينا بلة نستوردهم مو؟ لو نتبنى؟
أبتسمت : أي نتبنى بالأول أمهم اللي تخلف إلنا الجهال والله إذا ما ترست بيتك جهال ما أطلع وجدان.. إلا كله ورى الأربعين حبالة.
: يعني شتقصدين أم عقل مربوط بالعكس هاي يا مفرخة تقبل بهيج خبالاتچ ورى الاربعين حبالة شنو أرنب؟
: لا تصنف وركز وياي وتعرف شقصد.
: أي بلة نورينا.
قبل لا تحجي قاطع كلامنا رنين تلفوني المحمول:
: شنوووو جاي بساع جاي..