رواية بيت جنب المقابر
الجزء الثاني2 الفصل الثامن8
بقلم دانيا
جريت على الباب عاوزة اطلع الباب قفل فيني لمن جسمي رجف مسكت مكبس الباب وحاولت افتحو م فتح معاي فجأة سمعت صوت بقول ساجده ساعديني ياساجده ..... من الخلعه جمدت في مكاني قلت دا صوت محمد بقيت بتلفت بحاول احدد مصدر الصوت لكن اختفى وتاني رجع صرخ بصوت عالي ساجده وسكت تاني م نضم بقيت بعاين لمكان الضوء عرفت الصوت جاي من وين ،، ومن دون تفكير جريت على إتجاه الصوت وانا بجر رجلي جر من شدة ما واجعاني .
بقيت بنادي عليهو محمد انت وين ؟ محمد م جاني رد بقيت جاريه لمن فجأة اصطدمت بحاجه قدامي لمن راسي لف وقفت مخلوعه سمعت صوت محمد وهو بقول لي " مالك يابت نمتي ولشنو طقشتيني قربتي توقعي التلفون مني لحقتيني مالك اصلا قربت اخلص " عاينت ليهو بتفاجأ شديد فجأة البيت نور وعرفت إنو نحن واقفين جنب السلم ..... بقيت بتلفت بعاين للمكان بتفحص محمد مسكني من يدي من الخلعه لمن نطبت قال لي مالك في شنو ورح الغرفه الكهرباء اتصلحت مشيت معاهو كنت ماشه وراهو وهو قدامي ماسكني من يدي من غير ما اقصد عاينت على إتجاه الحيطه كان ضوء اللمبه على الإتجاه التاني عاكس علينا ومبيت الظل حقنا .
بس الحاجه الخلتني اقرب اجن وافقد عقلي لمن شفت الظل حقي انا بس وماشه ويدي الماسكها محمد دي كأني ماداها قدامي ساي وماشه ..... عاينت ليها بخلعه وعاينت لمحمد الكان ماسكها ومركز قدامو وماشي تاني رجعت عاينت للظل برضو شفت نفس الشيء ،، وقفت مخلوعه وسحبت يدي بقوه من يد محمد ورجعت منو خطوتين للوراء وهو م ادى اي ردة فعل من تصرفي وقف ودار وشو عاين لي بنظره جامده نظرة حادها م شفتها منو قبل كدا وقال لي " ورح ، ساحده " حتى صوتو حسيت دي ما نفس النبره البتكلم معاي بيها .
ختيت يديني على وشي وبقيت ارجف وحسيت حلقي اتربط م قادره اتكلم ومن غير مااحس جيت واقعه على الأرض .... صحيت فتحت عيوني لقيت الصباح اصبح عاينت لقيت نفسي نايمه في السرير قمت سريع نزلت من السرير عاينت في كل انحاء الغرفه محمد مافي ،، مشيت على الحمام لقيت الباب فاتح واقفه جنب باب الحمام حسيت في يد لمست كتفي لمن اتخلعت اتلفت بسرعه لقيتو دا محمد