رواية حور
الفصل الرابع4
بقلم دانيا
رجعنا البيت بعد العصر للساعه خمسه كدا قلت لأمي ابوي في السوق قالت لا ابوكي جاء بدري ودخل نام لأنو قال حاسي نفسه تعبان شويه اخد مسكن ونام ، قال لي صحيني لصلاه المغرب قلت ليها انا عاوزة لي كراسات وقلم معنا إلا امشي الدكان انا زاتي قالت لي سوقي معاكي حكمه ، مشيت لقيت حكمه راقده في السرير وماسكه التلفون قلت ليها حكمه قالت لي هاااا من دون ما تعاين لي لسه مدنقره في التلفون ، قلت ليها ورح معاي الدكان برضو لسه مشغوله في التلفون قالت لي م بقدر امشي براكي عندي حاجه في التلفون بعمل فيها .
طلعت خليتها امي قالت لي وينا حكمه قلت ليها م رضت تمشي قالت لي عارفه حركاتها لو م بتخافي امشي براكي قلت ليها الدنيا ماشه على مغارب وانا اكتر حاجه بتخوفني المقابر الجنب بيت ناس حبوبه فاطمه ، قالت لي اغشيهم سلمي عليهم وسوقي مؤن بت خالك معاكي قلت ليها فكره حلوه.
طلعت مشيت دقيت الباب فتح لي خالو البراء سلمت عليهو ودخلت سلمت مع الباقي وسقت مؤن وطلعنا مشينا ، وصلنا الدكان لقينا حاج محمود جايط مع ميسره بتاع الدكان دخلنا قلت السلام عليكم ردو لي السلام حاج محمود لسه قاعد يجوط قلت ليهو خير ياعمي محمود قال لي والله يابتي حور القريه دي اهلها ديل بقوا غريبين خلاص مصداقيه زاتو بقت م عندهم وحتى في الكيل والميزان دا غير الفساد العامي في القريه حفلات لأول الصبح والشباب والبنات بقوا عندهم عدم إلتزام والله يابتي القريه فاقده لجدك يعقوب كان على الاقل في الزمن داك الناس ماشه دقري لكن هسي والله حتى في الجامع بقوا قليل البجو يصلوا .
قلت ليهو استغفر الله ياعمي محمود الناس بتخاف من الله ول من جدي يعقوب جدي ما كان إلا هادي يهديهم للطريق الصاح لكن الخوف الاعظم من الله ، عاينت لميسره سيد الدكان وقلت ليهو قال تعالى({ وَإِلَيٰ مَدْيَنَ أَخَاهُمْ شُعَيْباٗۖ قَالَ يَٰقَوْمِ اِ۟عْبُدُواْ اُ۬للَّهَ مَا لَكُم مِّنِ اِلَٰهٍ غَيْرُهُۥۖ قَدْ جَآءَتْكُم بَيِّنَةٞ مِّن رَّبِّكُمْۖ فَأَوْفُواْ اُ۬لْكَيْلَ وَالْمِيزَانَ وَلَا تَبْخَسُواْ اُ۬لنَّاسَ أَشْيَآءَهُمْ وَلَا تُفْسِدُواْ فِے اِ۬لَارْضِ بَعْدَ إِصْلَٰحِهَاۖ ذَٰلِكُمْ خَيْرٞ لَّكُمُۥٓ إِن كُنتُم مُّومِنِينَۖ ) صدق الله العظيم .
عاين لي ودنقر راسو ورجع لعمي محمود باقي قروشو واداهو كيس السكر وطلع مشى .