رواية حور
الفصل الخامس5
بقلم دانيا
طلعنا من الدكان ماشين على البيت ، مؤن قالت لي والله كلام حاج محمود صاح القريه دي بقت فسادها كتير خلاص ، قلت ليها والله دي الحاجه البتخوف لأنو المكان البكثر فيهو الفساد بنزل على اهلوا غضب الله والله يسترنا من الجاي .
جينا بجنب المقابر قلت ليها على الرغم من انو المقابر دي فيها اعز الناس على قلبي بس دي اكتر مكان بخاف منو ماشين وبنتونس لمن وصلنا بيتهم قلت ليها يلا ادخلي وشكرا لانك رافقتيني ، قالت لي ولو يابت العمه سلمي على عمتي إسراء والباقين لمن لو قدرت بكره بمر عليكم قلت ليها تسلمي .
بالليل حوالي الساعه11 الناس مشوا نامو وميسره قفل دكانو وماشي في الطريق على بيتو الشارع هادي ، خالي من الناس غير صوت الهواء مافي شيء اثناء ما هو ماشي سمع صوت حاجه ارجل ماشه وراهو وقف واتلفت م لقى اي شيء قال في نفسه اكيد بتهيأ لي الناس كلهم مشو نامو مافي اي او يمكن كلب ول قطه في الزقاقات، اتحرك وكمل مشي تاني سمع صوت ارجل والمره دي قريبه منو شديد وقف واتلفت وراهو جات حاجه ناطه في وشو.
الصباح الصبح اذن والناس طلعوا مشو على الجامع لصلاة الصبح ، انا قمت كالعاده اتوضيت وصليت وقعدت في المصلايه اقرأ لي ورد من القرآن مسافه الضوء يطلع ، الناس صلوا وطلعوا من الجامع ماشين على بيوتهم شافوا حاجه واقعه في الأرض مشوا عليها وكل ما يقربوا منها بتظهر ليهم اكتر بس كان الضوء لسه م طلع سمح ، لمن وصلوا لقوهو دا جسم والدم بعبي الأرض والملابس مشرطه والجسم كلو كدمات و الرأس مافي وقفوا مخلوعين ومصدومين وم مصدقين المنظر الشايفنوا تقشعر منه الأبدان ، بقوا يقولوا لا حول ولا قوه إلا باالله اتصلوا للشرطه جات بقوا يفتشوا في الراس لقوه جنب المقابر واثار ارجل بس م عرفوها دي اثار شنو والشرطه حزرت ناس القريه م يعملو اي شوشره إلا بعد يعرفو الحاصل دا من شنو اخدوا الجثمان المشرحه يعرفوا دا من شنو.
في المدرسه قاعدين في الحصه اتصلوا للأستاذه اتخلعت وبقت تبكي قالت لينا في واحده من الطلاب ابوها اتفقد امبارح ومضى اسبوع على الحال دا القريه كل يوم فاقدين منها اشخاص.
الناس بقت من العصر بقفلوا ابوبهم ومافي زول بطلع حتى صلاة المغرب والعشاء في البيت بس الجامع بقفلو من صلاة العصر آذان زاتو مافي بس تشوف التوقيت وتصلي اما بالنهار دا الناس بتكمل حياتها عادي بالنهار مافي شيء ، الوضع في القريه بقى سيء يوم بعد يوم.