رواية حور
الفصل الثالث3
بقلم دانيا
ابوي قال لي عاوزة تمشي الرحله؟ بقيت افكر واعاين ل حكمه ، ياربي اقول شنو قلت لأبوي ياابوي ممكن تمشي حكمه براها ؟ قال لي انا سألتك عن نفسك انتي ماشه قلت ليهو انا ياابوي م بحب الأجواء دي ، قال لي معناها حكمه م بتمشي براها عاينت ليها لقيتها بتعاين لي معاينة خيبه امل وترجي ، قلت لأبوي خلاص بمش .
رفع راسو عاين لي قال لي م تعملي حاجه م مقتنعه بيها يابتي قلت ليهو مقتنعه ياابوي وانا من جوا بقول والله نهائي م مقتنعه لكن بتك دي للسنه الجايه ح تلومني مافي خيار تاني.
عدت الأيام ومشينا الرحله البنات الخاته الطرحه في كتافها والخاتاها في نص راسها والفاكه الشعر واللابسه بنطلون وانا كنت لابسه فستان واسع وطويل ومحجبه الطرحه ، جينا ركبنا الباص بنات واولاد ومعانا اساتذه ، استاذه بثينه قالت لي ماشاء الله زي عادتك دائماً محتشمه قلت ليها تسلمي ، انا ركبت قدام وكنت ماسكه تلفوني ومركزه فيهو وباقي الشله راكبين ورا يغنو ويصفقوا ويكوركو لمن وصلنا.
كان المكان حلو شديد مشنا مزرعه المكان حلو وهادئ واصوات العصافير ، بعد نزلنا قعدو للفطور وبعدين بقوا يلعبو ويغنو ومشغلين اغاني ومبسوطين شديد اما انا قاعده هناك تحت شجرة وبطبز في تلفوني شفت الساعه لقيتها وحده قلت اكيد الظهر بكون اذن ناديت حكمه قلت ليها قولي ليهم ورح نصلي ، عاينت ليهم وتاني رجعت عاينت لي قالت لي صلي انتي ديل مندمجين م ح يقومو ، عاينت ليها بأستغراب قلت ليها ورح انتي خلاص ، قالت لي بصلي بعدين انتي امشي دايره بي شنو قلت ليها يابت م تأجلي صلاتك لأي سبب عاينت لي بأستفزاز قالت لي ياخ قدامنا العمر كله عشان نصلي ومشت مني.
بعد صليت مشيت عليهم في واحد من الأولاد قال ليها حكمه ماشاء الله عندكم شيخه مالك م تعرفينا جاء مد لي يدو قال لي مرحبا انا يوسف ، قلت ليهو وعليكم السلام بس انا م بصافح هنا هو حسى بالاحراج ونزل يدو ، حكمه قالت ليهو انت قلتها براك شيخه وبقوا يضحكوا فيهو ، خديجه قالت ليهو اكيد ح تطلع شيخه دي ما حفيدة الشيخ يعقوب الله يرحمو ، قال ليها وحكمه شنو م حفيدتو برضو ردت ليهو حكمه انا الحمد لله م حضرت جدي يعقوب وإلا كان عشت على هذا الطراز القديم وبقوا يضحكوا ، قلت ليهم عيب عليكم بقيتو تسمو الحشمه والإلتزام طراز قديم خساره والله (اتقوا يوم ترجعون فيه الى الله) وكمان الكلام دا ليكم انتوا يا بنات بالذات ، ردت لي واحده قالت لي انتي يا حور اول حاجه انتي حور بالجد زي إسمك حلوه وشاطره ومميزه وصغيره لسه ليه بتبهدلي نفسك باللبس الواسع دا وكمان حجاب هسي الطرحه دي م بتخنقك هسي لو لبستي فستان كدا ظابط وفكيتي شعرك وظبطتي نفسك والله تطلعي حوريه بالجد ، اما الحجاب واللبس الواسع دا والمواعظ دي خليها للكبار هسي خلينا نفرح ونمرح لسه قدامنا عمر لمن نصل سن الاربعين بعدها نفكر في الإلتزام والحجاب ، وكلهم بدو يضحكوا ويقولوا صاح كلامك اذا م فرحنا ومرحنا هسي نعمل كدا متين .
قلت ليها طيب انتي ضامنه نفسك تعيشي لسن الاربعين ديك او لبكره خلي سن الاربيعين؟ قالت لي لا لكن الواحد يتفائل خير ، قلت ليها الله يهديكي ويهدينا جميعاً ومشيت منهم.
رجعنا من الرحله نمت بعد العشاء لأنو كنت فترانه من المشوار دا ، الصباح في المدرسه قاعدين في الصف الأستاذه جات وكانت بتبكي ومتضايقه شديد ، قالت لينا إنا لله وإنا ليه راجعون زميلتكم نورا امس كانت معانا في الرحله والليله جابو خبر وفاتها ، انا هنا حسيت بالخبر زي السكين اتقرست في قلبي اتزكرت كلامها وقت اتناقشت معاي وكيف كانت بتقول لي بعد سن الأربعين نفكر نلتزم واتزكرت وقت قلت ليها انتي ضامنه نفسك تعيشي لبكره خلي الأربعين ، اعصابي بردت وبقيت ابكي واتزكر فيها وانا بقول ربنا يرحمك ويغفر ليكي .
طلعنا طوالي مشينا بيت العذاء مع الاساتذه لقينا البيت مليان ناس وامها واخواتها منهارين بالبكاء وم قادرين يتحملو ، المساء بعد صليت العشاء دعيت ليها واترحمت عليها ومشيت نمت ، شفتها كانت بتقول لي حور ادعي لي ياحور وكان حولها نار والعيازه بالله قمت مخلوعه وقلبي دقاتو زايده والعرق نازل مني قلت دا كابوس شنو لا حوله ولا قوه إلا باالله ، اثناء ما انا قاعده مخلوعه في نص السرير الصبح اذن مشيت اتوضيت وصليت ودعيت ليها وقعدت اقرا قران.
بعد شهر من الكلام دا المدرسه طبعاً طوابق ونحن الصف حقنا في الطابق الفوق اثناء ما انا قاعده على اتجاه الشباك بدرس كان عندنا امتحان شهري ، جو داخلين الطلبه بنات واولاد بقوا يعلقو على في منهم البقول الزمن كلو قرايه م بتمل هي ومنهم البقول دا كلو عشان تلفت انتباه وتأخد لغب الطالبه المفضله والطموحه .
الود الكان جاء يسلم علي في الرحله وانا رفضت وقلت ليهو م بصافح كل ما يجي داخل يعاين لي معاينه حقاره وغضب ، لأنو اتحرج قدام الدفعه وقت م رضيت اسلم عليهو ، اجتمعوا كل المغيوظين مني وطلعوا برا وانا م اشتغلت بالموضوع كتير قلت م عندي حاجه ليهم انا في حالي لكن سبحان الله براهم متغاظين مني بدون سبب ، اتاريهم مشوا يخططوا وكيدوا عشان يوقعوني في مصيبه وانا م حاسه.
بعد الامتحان الأخير جاتني سميه جاريه قالت لي حور اجري حكمه طلعت السطح وقاعده تبكي م عارفنها مالها ، بقيت اعاين ليها بخلعه قلت ليها حكمه اختي مالها ؟ قالت لي م بعرف ومشت مني ، مشيت فوق جري م لقيتها بقيت انادي عليها وافتش م لقيتها جيت ماشه انزل لقيت الولد داك في وشي ، عاوزه امشي قلت ليهو وين حكمه اختي وانت جابك هنا شنو بقى يضحك قال لي حكمه ؟ حكمه شنو قدامك يوسف تفكري في حكمه ، قاطعت كلامو وقلت ليهو احترم نفسك وابعد من طريقي ابا يزح اديتو كيف جامد وفي حديده واقعه جنبي شلتها قلت ليهو والله خطوه واحد بس تخطيها انهي حياتك بالحديده دي ومشيت على الباب نزلت تحت.