رواية كابوس قريه
الفصل الثاني عشر12
بقلم دانيا
وصلت بيتنا جيت هاجمه على البيت زي المتوحشه لقيت العجوز الشيطانه محتفله في بيتنا ، كشفت عن وجهها بقيت واقفه في باب البرنده مخلوعه قلت ليها انتي انتي الجابك شنو من عالمك ياشيطانه ، وين اهلي ؟ وين امي وابوي ؟ بقت تضحك ضحك هستيري ضحك استحقار قال لي لحد هسي هم كويسين.
قلت ليها قصدك شنو يا حمقاء مسكتني من رقبتي وضغطت علي شديد قالت لي قصدي واضح ، قدامك خيارين خيارات م اكتر سلميني الطفل بسلمك اهلك وبطلع من القريه للأبد ، او تسعيدي اهلك مقابل القريه كلها ح نكون كابوس للقريه وم ح نخلي فيها كلب عايش، وبقت تضحك بطريقه كدا حسيت السقف حق البرنده ح يطير من حده الصوت ، فجأة ظهر عمي ياسين قال لي يابتي ليان انتي لسه بتفكري اديها البت وانقذي اهلك والقريه ، اكيد الإبن م اغلى من الأهل وبعدين انتي لسه بأول مشوارك وبتجيبي غيرها ، لكن اهلك بتعوضو ؟ ول القريه المن قمتي خلقتي واتربيتي فيها وكل الفيها يعتبرو اهلك معقول تفرطي فيهم .
مقابل بت لو كنت في مكانك م اترددت ، قلت ليهو بنبرة غضب شديد اسكت اسكت ياعمي انا لحد هسي محترماك لأنك عمي انت م بتخجل من البتقول فيهو دا يعني شنو بت ، فجأة ملامح وشو اتغيرت وبدأ على وشو الغضب والإنزعاج جاء وقف قدامي قال لي عارفك التحنيس م بنفع معاكي انتي تستاهلي الضرب وبس ، دفرتو بيديني لمن وقع قلت ليهو شكلك م بتفهم انا قلت ليك احترمتك لأنك عمي ، اتلفتت للعجوز قلت ليها م تحلمي تشوفي بتي زاتو خلي تشيليها معاكي ، قام على حيلو وقال لي دايرة تضحي بأهلك المن ولدوكي ماشافو يوم حلو .
بقيت اعاين ليهو بدهشه قال لي من اتولدتي امك وابوكي اتعرضو لحادث ومن وخقتها ، امك تاني م انجبت لحد الآن وحاولت اقنع ابوكي يتزوج كان هسي جاب ليهو ولد ينفعو بس رفض يتزوج ، وبعد حضرتك مشيتي العالم داك جبتي معاكي المصائب للقريه كلها خلي اهلك ، انتي اصلك منحوسه من قمتي ، دخلت كلمات عمي على قلبي زي السيف انهرت كلياً ولسه العجوز بتقول لي قرري بسرعه قرري م عندي وقت انا قرري اهلك ، القريه ، الطفله ، وانا قاعده في الأرض بسمع كلامها بتردد في راسي زي الصدى .
ختيت ايدي على اذنيني وانا ببكي منهارة وبقول ليها اسكتي اسكتي ، وبقى عمي يقول لي اهلك اهم من بتك افهمي والقريه الفيها ديل كلهم اهلك م تكوني عنيده اديها البت ، حسيت براسي تقيل شديد وبقيت اشوف طشاش تاني م قدرت اشوف شيء ووقعت على الأرض زي الجثه الهامده ، بعد شويه بقيت اسمع صوت هدى وسعد وهم بقولو اصحي ياليان اصحي ، تاني م وعيت نفسي إلا في المستشفى قمت مخلوعه لقيت نفسي في العنبر ومركبين لي درب.
وهدى وسعد جنبي قلت ليهم وين انا ووين بتي وسراج وين ، سعد قال لي البت سراج اداها لسهيله وراجله سافرو بيها المدينه ، وسراج طلع قال بجي هسي وقال لينا م نخلي تطلعي من المستشفى ، قلت ليهم كيف المدينه الضمان شنو تكون بأمان في المدينه ، قاعدين نتكلم شفت عمي كان واقف جنب الباب وبعد سمع كلامنا طلع مسرع مشى ، بقينا نعاين لبعض مخلوعين ، قمت وطلعت الدرب من يدي قلت ليهم عمي ياسين م ح يخليهم يصلو المدينه انا متأكده سعد قال لي بكونو قربو م تخافي تاني م بقدر يعمل شيء.
طلعت من المستشفى مسرعه وكانت الشمس على وشك الغروب سعد وهدى كانوا جارين وراي ، ركبت اقرب عربيه واتجهت للقريه وفعلاً زي ما اتوقعت لقيت عمي واقف مع الشيطانه تحت الشجره في طرف الحله وكانت بتتكلم معاهو بغضب ، الحاجه الفهمتها انو م بتقدر تصل المدينه ، قلت الحمد لله ، اول ما شافتني بقت تعاين لي بغضب اتغير لون وجهها من شدة الغضب قالت لي انتي م اختري لكن عرفت اختيارك بعدا اتحملو الحيحصل فيكم .
الليله الليل دا ح يكون كابوسكم انتظروني الساعه 11 ، جاييكم كابوس القريه الحايدمركم ، عمي جاء مسكني من رقبتي قال لي م ح اسمح القريه تدفع ثمن غبائك ، مسكت يدو زحيتها مني قلت ليهو زح مني ، مشيت عليها قلت ليها وين اهلي ، ضحكت ضحكه شريره واختفت من قدامي ، عمى مشى مني وبقيت براي قاعده تحت الشجره وببكي وم عارفه اعمل شنو جوني سراج وهدى وسعد وعمي عبد الله وماما فاطمه ، سراج مسكني من يدي وقعد جنبي قال لي م تخافي الله معانا م ح نضيع بإذن الله .
فجأة بقينا نسمع اصوات عاليه جايه من اتجاه القريه اتلفتنا نشوف الحاصل شنو ، بقيت مخلوعه واطرافي كلها بردت اصوات اهل القريه كلهم متجمعين وجايين علينا وهم بقولوا رجعو الطفله رجعو الطفله وانقذو القريه ، قمت على حيلي ومصدومه من البسمعو ، جو وقفوا قدامنا بقوا يقولو كلو بسببكم نحن ما بنضحي بأرواحنا مقابل روح كل الفقدناهم من القريه كان بسببكم القريه عايشه حالة كابوس بسببكم انتوا يا آل عبد الله وآل يونس انتوا لعنه على القريه.
وانتي يا ليان اخجلي م معقول تضحي فينا مقابل روح لسه م شافت للدنيا دي حاجه اخجلي وين اهلك حالياً امك وابوكية، انتي المسؤل الوحيد من الفوضى دي كلها ، سراج بحاول يسكتهم بس مافي فايده وانا انهرت بالبكاء ، بعد شويه ظهر صوت من نصهم وكان بقول ، احجزو آل عبد الله كلهم لمن ليان تجيب الطفله ، عاينت لقيتو دا عمي ياسين ، قبل افتح خشمي بحرف اهل القريه هجمو على سراج واهلو زي الوحوش وساقوهم اجباري عنهم وفضلت انا براي في الظلام تحت الشجره عمي ياسين قال لي انجزي م معاكي وقت ومشى مني ، كانت السماء مغيمه واصوات الرعد وضوء البرق يملا السماء .
كانت الساعه 9:30 م مره يوم لا أذن فيهو مغرب لا عشاء ، قمت قلت فضل لي ساعه ونص جريت على المزرعه مكان البير فتحتها وبقيت اصرخ حسيت بالتعب واغمى علي ، حسيت بهواء بارد بعد شويه صبت مطره فتحت عيوني لقيت بت واقفه قدامي قمت مخلوعه عايت ليها ، قلت ليها انتي منو كانت لابسه ابيض وبشرتها البيضاء مع ضوء البرق بتظر لي ملامح وجهها ، قالت لي م تخافي انا جيت اساعدك قلت ليها انتي منو قالت لي انا جيت من العالم التاني .
زحيت منها سريع قلت ليها انتي من العالم داك وجايه تساعديني قالت لي ااي ، انا صاح عايشه في العالم داك بس م بحب الأعمال الشيطانيه .