رواية كابوس قريه
الفصل التاسع9
بقلم دانيا
قلت ليها ياامي وين ابوي وكمان تلفوناتكم مالها مقفولة ؟ سكتت مسافه وبعدين ردت لي من غير ما ترفع راسها تعاين لي قال في الخريف الشبكه غالباً بتكون ضعيفه ، إستغربت من كلامها بس م اديتو اهميه لأنو انا بعد لقيت تلفوناتهم قافله اتصلت لعمي ياسين تلفونو كان شغال .
قلت ليها طيب م قلتي لي ابوي وين ، قالت لي بنبرة زهج كدا انتي م عارفه ابوكي في الخريف بكون وين اكيد في المزرعه ، بقيت اعاين فيها مندهشه طلعت من الغرفه قالت لينا ارتاحو انا عندي شغل في المطبخ ، بعد طلعت قفلت الباب وراها ، سراج عاين لي لقاني لسه سارحه في الباب ، طقطق لي بأصابعه وقال لي الووو وين شردتي انتي كويسة ؟ قلت ليهو كويسة .
للمغرب كدا قال لي انا ماشي الجامع عشان وقت الإذانه قرب وطلع مشى ، قاعده مع امي في الحوش برا جانا عمي ومرتو قعد يتونس معانا شويه كدا قال ماشي الصلاه ، قام طالع امي قامت طلعت وراهو وطولت قريب ربع ساعه حتى جات داخله قلت ليها وين كنتي ياامي قالت لي مشيت شفت الغنم قلت ليها طيب .
مرت عمي رجعت بيتها وسراج جاء من الجامع دخلنا نمنا كانت السماء مغيمه وتحسها ح تجي مطره ، نمنا حبه المطره جات قمت طلعت برا اشوف لو باب البرنده فاتح والشبابيك اقفلهم عشان المطر م يخش ، طلعت من الغرفه سراج كان نايم قفلت شبابيك البرنده ومشيت على الباب عاوزة اقفلو شفت امي جايه من برا الشارع دخلت ووقفت في الباب مسافه بقت تحرك راسها بإيجاب وبعدين قفلت الباب وجات داخله لقتني قدامها وقفت مهجومه وبعدين قبل أسألها قالت لي علفت للغنم يلا خشي جوا عشان م تبردي .
دخلت وبقيت اعاين فيها بإستغراب شديد قلت نحن م بنعلف الغنم بالليل أساساً م باكلن بالليل ، قبل ادخل سراج جاء قال لي مالك صاحيه في الوقت دا حاسه بحاجه انتي كويسة؟ قلت ليهو كويسه.
الصباح قاعدين نشرب في الشاي عمي ياسين جاء قعد معانا وبقينا نتونس وبقى يسألني محتاجه حاجه ناقصك حاجه قلت ليهو لا كلو تمام في قلبي قلت عمي دا من متين حنون كدا م عرفتو والله ، قاطع تفكيري صوتو وهو بقول لي فضل ليكي كم؟ عاينت ليهو لأني استغربت من سؤالو ، قلت ليهو بصوت متردد خمسين يوم دنقر راسو وقال بينو وبين نفسه واخيراً الحمد لله ، سراج قال ليهو ياعمي قلت حاجه قال ليهو ااا لا قصدي قلت تولد بالسلامه إن شاء الله وقال لينا عن إذنكم