رواية كابوس قريه
الفصل العاشر10
بقلم دانيا
قال لينا عن إذنكم بعدا انا نمش لأنو عندي شغل ، قال لي وين امك قلت ليهو في المطبخ ، طوالي مشى دخل المطبخ ، سراج قال لي عمك طيب باين عليهو ماشاء الله ، قلت ليهو انا زاتي ياداب اكتشفت عاين لي واداني ضربه خفيفه على راسي ضربة مزح قال لي مستهبله انتي عشتي معاهو عُمر م بتعرفيهو وبقى يضحك ، قلت ليهو والله جد ياسراج انت براك قلتها عشت معاهو عُمر لكن يمكن زي ما بقولو في البعد المحنه.
عمي مشى المطبخ وقف قدام الباب وبقى يعاين لأمي عاينت ليهو وبقت تقطع في البصل بعصبيه وزهج ، قال ليها طولي بالك واتحملي كلنا متحملين واتعاملي بحنيه ولطف شوية وين حنان الأم وطلع مشى ، بنتكلم مع سراج وبنصحك عمي جاء طالع سراج قال لي بس اشر لي نظام اسكتي ، عاينت وراي لقيت عمي جاء طالع .
المساء قعدنا انا وسراج وامي للغداء سراج قال لينا معليش لكن انا ح احاول آكل سريع سريع عشان زمن آذان المغرب جاء ، امي كانت عامله اصناف كتيره ماشاء الله قامت قربت لي صحن الفاصوليا قالت لي عملت ليكي الأكله المفضله عندك صحى وهنا ، وقفت أكل وبقيت اعاين ليها قلت ليها تسلم يدك ياامي لكن شكلك نسيتي انا م بحب الفاصوليا ولا قاعده اكلها ، سكتت وحسيتها اتوترت سراج عاين ليها وشال الصحن من قدامي قال ليها ياسلام دي اكلتي انا المفضله تسلم يدك ياامي .
قال لي عادي الانسان بنسى احياناً مع مشاغل الدنيا ، طوالي قالت لي ااي والله يابتي بالي مشغول عشان كدا م مركزه اعذروني ، قلت ليها ولا يهمك ، سراج قام قال لينا يلا يا جماعه صحى وهنا انا طالع على الجامع بعد مشى ، عم الهدوء المكان كسرت الهدوء وقلت لأمي غريبه ابوي ليه م جاء من الخلا ولا اتصل انتي اتصل ليكي؟ قبيل كنت عاوزة اتصل ليهو لكن نسيت.
حست بالانزعاج وقامت شالت الصونيه قالت لي بكون م لقى وقت واصلاً هو شال معاهو مواد كافيه لكم اسبوع م اظنو يجي قريب ، وبكون م اتصل لأنو خلص شحن تلفونو م تهتمي لو عاوزة بكره انا بمشي اشوفو واطمئن عليه ، قلت ليها تكوني عملتي خير ، صحي وين الغنم م شايفاهم في الزريبه قالت لي الغنم من انتي مشيتي هن في بيت عمك خاتنهن مع غنم عمك في زريبه واحده ، اتزكرت كلامها امبارح قالت لي جيت من زريبه الغنم افكاري بقت ملخبطه قلت كيف دي بالجد م قادره استوعب ، قالت لي قلتي حاجه لمن اتهجمت قلت هي في المطبخ كيف سمعتني ، قلت ليها لالا م قلت حاجه.
بكره بعد الظهر جونا سعد وهدى وسهيله وراجلها ، قعدنا نتونس قلت ليهم شنو المفاجأة دي والله احلى مفاجأة بالجد فرحتوني بجيتكم لأنو البيت فاضي هنا مافي غير سراج وامي
سراج م بكون موجود الزمن كله وامي اغلب وقتها في المطبخ تعالو شوفو ليان والملل ، سعد قال لي ونحن كمان ملينا من دونكم والله البيت بقى لينا فاضي بلاكم هدى قالت ليهو ااي والله صاح ، عاينت لي وقالت لي ماما فاطمه بتسلم عليكم قلت ليها الله يسلمها ليه م جبتوها معاكم ياحليها ، قالت لي ما عمي براهو لكن م مشكله المره الجايه .
وانتي ياسهيله كيفك وكيف اهل بيتك قالت لي والله بخير بسلمو عليكم ، قلت ليها الله يسلمهم شوية وامي جات جابت العصير هدى شالتو منها قالوا ليها ليه عذبتي نفسك ياخالتي نحن م ضيوف تعالي اقعدي اتونسي معانا ، قالت ليهم م بقدر كلهم سكتو وبدت في وجوههم الدهشه ، قالت قصدي مصدعه شوية ، سهيله قالت ليها م مشكله ارتاحي قالت ح اخش انوم شوية يمكن ارتاح .
انا بقيت راسي يودي ويجيب في الأفكار ياربي امي مالها تصرفاتها باقيه غريبه ، اكيد داسه مني شيء امي مستحيل تتصرف مع ضيوفها كدا ، قالوا لي وين سراج قبل ارد ليهم سراج قال انا هنا مفاجأتكم عينه لكن حبيت اهلا وسهلا فيكم نورتو والله سلم عليهم وقعد يتونس معانا سعد قال لينا طولو بالكم لسه المفاجأة اكبر من كدا إن شاء الله بيتكم بسعنا الليله كلنا بايتين معاكم ، حسيت بفرحه كبيره قلت ليهم والله انتوا احلى ناس عرفتهم ياسلام ، سراج قال ليهم والله م قصرتو معانا بقينا نضحك ونتونس العصر قرب سراج وسعد وراجل سهيله مشو الجامع ونحن دخلنا المطبخ .
البنات قالوا لأمي انتي الليله ارتاحي نحن ح نعمل كل شيء ، م ادت اي ردة فعل قالت ليهم تمام ومشت غرفتها ، هدى قالت لي ليان انتي دي طبيعة امك ول هي عيانه سهيله قالت ليها عيب يابت دا كلام شنو ، بتكون تعبانه من شغل البيت المابخلص دا ، قلت ليها والله امي م كدا بالعكس امي انسانه مرحه وطيوبه وبتحب الضيوف شديد وكمان إجتماعيه انتي ياسهيله بتعرفيها كم مره جاتنا وجينا زرناهم هنا صاح قالت لي ليان م تشتغلي بكلام هدى هي بتحب المزح ، هدى قاطعت كلامها وقالت ليها والله م بعرف ليه لكن بتزكرني بأشخاص من العالم التاني ، قلت ليها يابت دا كلام شنو .
جهزنا الغداء واتغدينا ، اتونسنا كتير للساعه عشره مع بعض لسه م نمنا لكن امي م كانت معانا كنا نحن بس قاعدين في البرنده لأنو الجو برا مقيم كأنو ح تجي مطره ، هدى قالت لينا عن إذنكم ماشه الحمام ، طلعت شافت امي ماشه على باب الحوش فتحت الباب وطلعت هدى وقفت مستغربه قالت خالتو دي ماشه وين في الوقت دا وفي الجو دا ، الفضول سيطر عليها قالت إلا امشي وراها طلعت وراها وهي كانت لسه ماشه قدامها من غير ما تتلفت .
وصلت لشجره كبيره كدا في طرف الحله وكان الجو مغيم شديد لمن القريه مضلمه غير نور البراق البظهر احيانا ويختفي ، بعد وصلت تحت الشجره كان في زول واقف بقت تتكلم معاهو وبتلوح بأيديها طريقة الزول لمن يكون معصب ، هدى م قادره اسمع شيء ودا منو كمان الواقفه معاهو خالتو دا ، دقيقه لازم اقرب اكتر ، مشت في حيطه واقعه لبيت قديم وقفت جنبها ايوه كدا بقدر اسمع ، سمعتها بتقول انا زهجت من البشر ديل اتحملت سراج والغبيه ليان لكن جوني كمان قرايبينهم ديل م قادره اتحمل اكتر ، الراجل شغال ليها اهدي وانا مش عمها زهجان اكتر منك ولو م مصير القريه متوقف على الفي بطنها دا م كان اتحملتها ومثلت دور العم الحنون.
انتوا وعدتونا تخلو القريه وتخلونا نعيش مرتاحين بعد تاخدو الطفل عشان كدا اصبرو ، قالت ليهو بنبره حاده لااا