رواية كابوس قريه
الفصل الحادي عشر11
بقلم دانيا
قال ليها انتوا وعدتونا إنو الطفل دا ح يكون الثمن لهدوء وسلامة القريه بعد تأخدو ح تطلعوا من قريتنا ، هدى من سمعت الكلام دا اتخلعت ورجعت لورا وهي بترجف من الخوف ومن الصدمه ، رجعت للوراء خطوتين قامت ضربت في الحيطه والحيطه اصلا مع المطر بقت م شاده حيلها وقعت ، سمعوا صوت الحركه والإتين اتلفتو على مكان الحركه ، هدى خافت وفكرت مشي قبل يشوفوها ، قامت جرت جري الخوف م وقفت إلا في باب البيت دخلت وقفلت الباب .
جات نحن كنا قاعدين بتحاول تلقط انفاسها بصعوبه ، قلنا ليها مالك يابت سعد مشى عليها مسكها من ايدها وخت يدو على كتفها قال ليها يابت قولي بسم الله ، في شنو بقينا ساكتين وبنعاين ليها مستغربين في حالتها ، سراج قال لسعد خليها تقعد وترتاح بالأول امشي يا سهيله جيبي ليها مويه ساقها قعدها في الكرسي وجابت سهيله المويه ، شربت قالت لينا انا شفت برا برا قبل تتم كلامها امي جات قاطعتها قالت لينا شافت غنمايه سودا برا واتخلعت منها شكلكم ونستوها كتير بقصة الغنمايه السودا صاح ياهدى بتي ، هدى بقت تعاين ليها بتوتر عم الهدوء المكان وبقينا نعاين ل هدى .
قبل تفتح خشمها تتكلم اللمبه ضربت عملت صوت قوي لمن خلعنا ، مسكت في يد سراج من الخلعه قال لي بسم الله روقي ، قلت ليهم ضوء بتلفوناتكم سرج قال لي شكله تلفوني في الغرفه ، قام زوج سهيله نور فلاش تلفونو سراج قال لأمي م عندكم لمبه اسبير في البيت عشان نغير اللمبه عاينت جنب الباب م لقيت امي ردت قالت مافي والله عاينت لقيتها واقفه جنب هدى ، قلت في نفسي متين جات امي اتحولت بهنا.
هدى قالت لسعد عاوزة انوم انا قال ليها انتي كويسة يابت م تميتي كلامك مالك كنتي خايفه من شنو ؟ امي قالت ليهو بتكون نعست خلي البنات كلهن ينومن في غرفة ليان وانتوا نومو في الصالون ول رأيكم شنو ؟ راجل سهيله قال ليها فكره ممتازة ، قمنا هم دخلو الصالون ونحن دخلنا غرفتي ، قبل ننومو قلت ل هدى انتي كويسة يابت؟ قالت لي كويسة بس مصدعه شويه عاوزة انوم قلت ليها طيب خدي راحتك .
الصباح بعد شربنا الشاي هدى قالت لسعد ورح البيت ، كلنا بقينا مستغربين هدى من امبارح م طبيعيه سراج قال ليها انتي متأكدة انك كويسة قالت ليهو ااي ، ودعونا وطلعوا مشوا .
سراج قال لي والله انا حاسي انو في حاجه م ظابطه لكن م داير اوترك انتي براك م ناقصه ، امي جات قالت لي عندي حله في النار راقبيها لي ماشه بيت عمك وجايه ، قلت ليها تمام سراج قال لي طالع هسي بجي هم طلعوا وانا مشيت على المطبخ جيت داخله لقيت الارض فيها زيت مدقف ختيت رجلي كدا زحطت ووقعت حسيت بألم فظيع بقيت بحاول اقوم م قادرة ، بقيت انادي ياامي ياامي ياسراج مافي رد بقيت ابكي وانادي مافي زول جاني والوجع لسه زايد .
اخدت زي نص ساعه واقعه وبصرخ مافي زول جاء بعد شويه جاء سراج لقاني غميانه ، بقى ينادي فيني ليان ياليان قومي مالك بسم الله رش فيني مويه بارده فتحت عيوني بصعوبه عاينت ليهو بقيت اشوف طشاش ، قلت ليهو سراج وبقيت ابكي قلت ليهو موجوعه شديد رفعني وطلع برا لقى امي جايه من بيت عمي قال ليها وين انتي خليتي بتك الوقت دا كلو براها هسي لو ماجيت ، ومشى خلاها وقفت وابتسمت ابتسامه شريره وبعدين مشت ورانا .
وقف اقرب عربيه ووصلنا المستشفى بعد الكشف الدكتور قال لازم عمليه مستعجله ، سراج اتهجم قال ليهو كيف يعني عمليه يادكتور هي لسه في السابع ، الدكتور قال ليهو متفهم وعارف كلامك لكن الوقعه مؤثره شديد ، عشان كدا ح نضطر نعمل ليها عملية ولاده مافي حل تاني ، سراج شبك يدينو في راسو وبقى يبكي عاين لأمي الكانت واقفه جنبو وممثله دور الخايفه على بتها ، طلع برا اتصل على ناس البيت وراهم .
جو المستشفى وهدى كل ما تعاين لأمي بتتوتر ، العمليه اخدت ساعتين والدكتور طلع سراج مشى عليهو قال ليهو طمنا يادكتور الله يطمنك ، الدكتور قال ليهم م تخافو العمليه كانت ناجحه جابت بت والأم والطفله بخير ، سراج اخد نفس عميق وقال الحمد لله ، بعد ربع ساعه جاء سراج داخل العنبر فتحت عيوني لقيتو قاعد جنبي قلت ليهو طمني وقول لي الأمور بخير قال لي اطمني كلو تمام قلت ليهو الحمد لله قال لي جات اميرة ابوها بقيت اضحك بعد شوية جات امي ، وباقي الجماعه باركو لينا امي طلعت قالت ماشه البيت وجايه .
نمت وصحيت لقيت هدى قاعده جنبي وباين عليها م مرتاحه ، قلت ليها انتي كويسة قالت لي مافي زمن لازم تسمعيني قبل الشيطانه امك تجي ، قلت ليها يابت دا كلام شنو ؟ بنبرة غضب كدا قالت لي يا ليان خليني اتم كلامي دي م امك وبدت تحكي لي لمن راسي لفى وبقيت اشوف طشاش ، بقيت اكورك وين بتي جيبو لي بتي ، سراج والمعاهو جو جاريين بقو يقولو لي مالك ياليان في شنو قلت ليهم الشيطانه شالت بتي جيبو لي بتي وينك ياامي ووينك ياابوي ، ياالله وين اهلي وانهرت بالبكاء وهم لسه بسألو مالك هدى بقت تحكي ليهم ، سراج صرخ في وشها قال ليها ليه م اتكلمتي من الأول غبيه انتي بقت تبكي قالت ساعه اللمبه ضربت جات قعدت جنبي وهددتني بأهلي وانا حالياً زاتي م بعرف اهلي الحاصل عليهم شنو وبقت تبكي.
الدكتورة جات قالت مالكم في شنو سراج قال ليها وين البت جيبي البت سريع ، بعد شويه جات الممرضه شايله البت قالت لينا بسم الله ياها بتكم في شنو البت مولودة ولاده مبكره لازم تكون في الحضانه ، قلت لسراج بتي دي امانه في رقبتك ليوم القيامه انا ماشه اشوف محل اهلي الشيطانه دي بتكون ودتهم وين ، حاولت اقوم م قدرت بقيت ابكي بحرقه وحسرة واتزكر في اهلي شديت حيلي وقمت قلت ليهم اطلعو برا طلعو .
شويه كدا جهزت وطلعت سراج بقى يقول لي مجنونه انتي اهدي انتي اقعدي مع البت هنا انا بمشي بشوفهم ، سعد وعمي عبد الله قالوا لي نحن كلنا ح نمشي نشوفهم انتي ارتاحي ، قلت ليهم م قدر ارتاح ديل اهلي وبقيت ابكي قلت لسراج بتي امانه عندك وطلعت سعد قال ليهم خلاص انا بمشي معاها هدى قالت ليهو ح امشي معاك .
طلعت مشيت بيتنا لقيت العجوز الشمطاء محتفله في البيت بنصرها واخيرأً ح تقدر ترجع لعالمها ، قالت ليها وين اهلي يا شيطانه