رواية كابوس قريه
الفصل السادس6
بقلم دانيا
مضى شهر والقريه عماها الهدؤء والأمان قلنا الحمد لله الأمور انحلت وارتحنا ، يوم قاعدين في الحوش نتونس بعد العشاء عمي قال لينا يوم الجمعه ناس اخوي عبد الرحمن جايين يخطبو سهيله وإن شاء الله لو ربنا وفق العرس بعد شهر ، عاينت لسهيله قلت ليها انتي رايك شنو يابت معقولة ياعمي مافي مشاورة خجلت ودنقرت راسها ، سراج قال لي شفتي السكات علامه الرضى واصلاً باين من وشها نحن م بندي اختنا حبيبتنا لأي زول من غير رضاها وبقينا نضحك قلت ليهو ربنا يتتم على خير .
عمي قال ليها رايك شنو يابتي ، سكتت مسافه وكانت ميته من الخجل قالت ليهو البتشوفو مناسب ياابوي قال ليها بارك الله فيكي يابتي وانا م شايف انسب من يوسف ود اخوي دا ليكي ، ماما فاطمه قالت ليهو ااي والله م فيهو كلام ، سعد انت رايك شنو عاين ل عمي قال ليهو م راضي والله ياابوي ، كلنا أستغربنا بقينا نعاين ليهو سراج قال ليهو مالك م راضي ، قال سهيله اصغر مني كيف تعرسو ليها قبلي .
سكتنا لأنو كلام مقنع شيءً ما ، عمي قال ليهو لكن انت ياسعد ولدي م جبت لينا سيرة بت عاجباك وعاوز تعرسها نفتش ليك نحن يعني ، زي ما بقول المثل بت اعزل ليها وولدك خلي يعزل وينو عزلك انت ، قال ليهو بس ياابوي جيت في وفتك انا والله في بت في بالي وباقي عليها ، عمي قال ليهو بت منو في القريه لأني بعرف الكل هنا إن شاء الله تطلع بت ناس محترمين .
سكت مسافه ورفع راسو قال م من قريتنا ياابوي ، عمي قال ليهو كمان داير تجيب لينا بت من برا القريه اها م مشكله بنسأل عنها ونعرفها بس إن شاء الله من القرى المجاورة ؟ قال ليهو م من المجاوره لكن م بعيده شديد كلها مسافه اربعه ساعات ، عمي ملامحو اتغيرت وقام على حيلو قال ليهو اربعه ساعات مافي غير قرية ، قبل يتم جملتو قاطعو سعد وقال ليهو ااي ياابوي قرية السعدان عاين ليهو عين حاره وقال ليهو بنبرة حاده انت جنيت من هنا لقرية السعدان ، دايرنا نمشي من هنا لقريه طول عمرنا بنسمع بيها لكن م حصل شفناها ودا كلو عشان مرا مالو الحريم هنا في عدم ، وبعدين انت الوداك هناك شنو واتعرفت عليها كيف؟ .
قال ليهو صراحه ياابوي البت دي صاحبة سراج من العالم الآخر بقيت اعاين ليهو بخلعه وانا فاتحه عيوني كبار ، عاين لي لقاني مصدومه قال لي آسفه على الكلمه يامرت اخوي م قصدي كدا والله ، انا قصدي هدى عمي قال ليهو هوي ياولد بلا هدى بلا كلام فارغ كمان داير تجيب واحده عاشت في عالم الجن بالشهور وبالليالي ، خلينا سعد بقينا نعاين لعمي ومصدومين من كلامه ، سعد قال ليهو وانا كنت هناك ياابوي وسراج وليان المانع شنو هدى فرقها مننا شنو ، وقام دخل جوا .
بكره الصباح كنا في المطبخ بتكلم مع ماما فاطمه وسهيله قلت ليهم والله اهل هدى ناس طيبين وم فيهم كلام وبديت اشرح ليهم ، عمي كان جنب الباب بسمع وانا م جايبه خبر لمن المساء اجتمعنا عمي قال موافق وسعد كان طاير من الفرح وبقى يسأل عمي ياابوي اقتنعت كيف انت ، عاين لي وقال سمعت بتي ليان كيف كانت بتحكي عن اخلاق ومعاملة اهل البت عشان كدا ، سعد فرح وشغال لي شكراً ياليان انتي احسن اخت سهيله قالت ليهو احم احم وبقينا نضحك
بالليل كنا راقدين في السرير وبنتونس قلت لسراج انا قربت للسادس لكن بعد العرس بمشي بيتنا قال لي تمام مافي مشكله ، عدت الأيام والعرس تم وسهيله مشت بيتها لكن قريبه م بعيده مننا وهدى جات سكنت معانا والأمور طيبه، بعد 15 يوم كنا قاعدين كلنا بنتونس ونتزكر في لحظات العرس والحفله وكدا ، قلت ليهم ياجماعه انا بعدا ح امشي بيتنا لأنو دخلت في السابع بأسبوع وانا قعدت الفترة دي عشان العرس وكدا ، فجأة عمي قام على حيلو وقال لا