رواية كابوس قريه
الفصل الثامن8
بقلم دانيا
بعد سراج جاء من الصلاه كنت عاوزة احكي ليهو الحلم ، جاء سعد ناداهو قال ليهو تعال الصالون ابوي منتظرنا للشاي ، قام طلع قبل افتح خشمي بحرف بعد طلع قمت مشيت المطبخ لناس ماما فاطمه شربنا الشاي وبعدها جاء سراج قال لي تعالي.
مرقت معاهو برا لقيت عمي وسعد قاعدين ، قام سراج قال لي صراحه ياليان كلام ابوي الامبارح منطقي اولدي هنا ولو دايره امك بنجيبها ليك هنا ، بقيت بعاين لسراج بين مخلوعه وبين مستغربه من كلامو رغم إنو انا وهو اتكلمنا في الموضوع وإتفاهمنا بس ليه غير رايو ، عمي قال لي والله يابتي نحن م دايرين غير مصلحتك عاينت لعمي ، وفجأة خطر على بالي حلم امبارح .
قمت على حيلي وقلت ليهم لا لا بصوت مهزوز ومرعوب ، قلت ليهو مع احترامي ليك ياعمي بس انا م موافقه م راضيه مع عاوزة اقعد هنا عاوزة امشي بيتنا وشبكت يديني في وشي وبقيت ابكي ، سراج مسكني قال لي بسم الله ياليان مالك اهدي دا كلام شنو بتتصرفي وكأنو نحن م عاوزنك تمشي بيت اهلك او تقطعي علاقتك بأهلك ، ماما فاطمه وهدى جن من جوا مخلوعات وبسألن ليان مالها .
سعد عاين فيهم وقال ليهم مافي شيء مجرد هرمونات ، يا جماعه خلوها تمش انتوا مالكم هسي موترين البت من اتفه الأسباب سراج قال لي اهدي خلاص ح نمشي انا وانتي ح نمشي نقعد في بيت اهلك ، عاين لعمي وقال ليهو انا ح امشي مع ليان م تخافو عليها ، عاينت ليهو بإستغراب وزحيت منو قلت ليهو خوف ؟ يخافو علي من بيت اهلي ياسراج ليه يخافو يعني انتوا احن علي من اهلي ، عمي قال لي م كدا يابتي استغفر الله نحن م قصدنا كدا والله وقام خشى جوا من غير ما يفسر لي قصدهم شنو .
للظهر كدا طلعنا مشينا بيت ناس امي من وصلنا الباب كان فاتح بس البيت كان هادي وكأنو م فيهو زول سراج عاين لي قال لي انتي كلمتيهم انو جايين ؟ قلت ليهو ااي تلفون ابوي قافل م بعرف مالو وحتى تلفون امي م خشى معاي لكن اتصلت لعمي ياسين وقلت ليهو كلمهم وهو قبل نجي اتصل لي قال لي كلمتهم.
دقينا الباب قبل نخش مافي اي حركه ولا زول م رد لينا دخلنا جوا م كان في زول ، ختينا حاجاتنا في غرفتي فجأه ظهرت امي سلمنا عليها قلت ليها انتي قاعده هسي لمن جينا م كان في زول ، عاينت لي جوا عيوني معاينه غريبه كدا ودنقرت راسها قالت لي كنت في بيت عمك.
قلت ليها طيب ياامي م مشكله ابوي وين ؟ وتلفوناتكم مالها مقفوله ؟ سكتت مسافه