رواية كابوس قريه
الفصل الثالث3
بقلم دانيا
سراج جاء طالع من الحمام وقف في باب الغرفه وقال ، ليان دي جنت ول شنو ليه طفت الضوء حق القرفه ، مسافه اجي من الحمام دي م قدرت تتحمل الضوء نورت اللمبه عاينت للسرير لقيت ليان مافي .
بقيت واقف ومحتار ياربي بتكون مشت المطبخ تشرب مويه ول شنو ، قعدت في السرير مسافه خمس دقائق م جات ، بقيت احس بالقلق عليها بس تاني قلت ح تمشي وين في الوقت دا عاينت للساعه لقيتها اربعه ص قلت يمكن مشت الحمام البرا تتجهز للصلاه .
طلعت مشيت برا في الحوش مشيت على الحمام كان نورو طافي ، دقيت الباب فتح طوالي عاينت م كان فيهو زول ، حسيت بخلعه قلت البت مشت وين رجعت جوا لقيت الضوء حق غرفة سهيله شغال قلت يمكن تكون معاها ، مشيت دقيت الباب سهيله فتحت لي قلت ليها ليان معاكي كان باين عليها ياداب صحت من النوم ، قالت لي بصوت نعس ليان في الوقت دا بجيبها لي شنو يااخوي م معاي شوفها في الحمام .
مشيت برا وقفت في الحوش وكان في راسي الف علامة استفهام ، مشيت على باب الحوش عاوز اطلع افتشها برا مسكت مكبس الباب لقيت الباب فاتح اصلاً ، وقفت مهجوم قلت ليان طلعت من الباب ، عاوز اطلع اتطاقشت مع ابوي في الباب لمن رجع ورا .
قلت ليهو بسم الله ابوي جاي من وين انت ، عاين لي مسافه ومشى على الباب داير يدخل قال لي كنت ماشي الجامع لكن جيت راجع نسيت السبحه والليله زاتو م عارف الحاصل شنو الآذان م اذن ، قال كلامو دا وهو ماشي داخل على البيت وكانت نبره صوتو م عاجباني .
قلت ليهو ياابوي ليان مافيشا م لاقيها في كل البيت ، وقف ودار وشو وعاين لي بدهشه قال لي كيف يعني مافي بتمش وين بالليل دا ؟ اتصل لأبوها شوف لو معاهم قلت ليهو ياابوي دا كلام شنو كيف تمش بيت اهلها في الليل دا انا قمت الساعه تلاته دخلت الحمام هي كانت قاعده .
انا ماشي افتشها ، سعد سمع حديثنا وجاء قال لي ورح انا زاتي ماشي معاك ، ابوي قال لينا امشي معاكم قلت ليهو لا خليك مع ناس امي هنا م صاح يقعدن براهن في البيت ، طلعنا مشينا وما كان في ناس في الطريق بعد شويه لمن وصلنا جنب الجامع لقينا ناس متلميين وبقولوا لا حوله ولا قوه إلا باالله ، مشيت جري عليهم لقيناهم لامين على زول واقع في الأرض انا هنا خلاص حيلي كله برد وقلبي بقى يدق بسرعه قلت اكيد دي ليان ، قربنا منهم قلت ليهم زحو في شنو دا منو ، قربت للزول الواقع لقيتو دا المؤذن .