رواية ليالي الشتاء البارده
الفصل الخامس عشر15
بقلم دانيا
ودعت الخاله فوزيه وشلت رقمها قلت ليها ح اتواصل معاكي واعرف اخبارك ، مشيت منها وخليتها تبكي كأنها مودعه بتها ، وصلنا السوق لقينا العربيه على وشك المغادره ودعتهم وشكرتهم وركبت العربيه واتحركت طول الطريق وانا افكر في الحصل لبت الخاله فوزيه شهرين مختفيه طيب بكون الحصل عليها شنو وإذا كانت في نفس المكان داك ول لا.
طول الطريق وانا شارده في افكاري بعد شويه العربيه وقفت ، سألت الجنبي قلت ليهو وصلنا يعني قال لي لالا إستراحه لصلاه الظهر والفطور ، عاينت برا لقيت وقفنا جنب إستراحه وكان في لافته كبيره في الطريق مكتوب عليها مدخل قرية السعدان ، قلت في نفسي معناها نحن ياداب طلعن من قريه السعدان ، نزلت مشيت صليت الظهر م كان عندي نفس للأكل اشتريت مويه وجيت ركبت العربيه بعد شويه الناس جو واتحركنا .
الطريق كان طويل وصلنا بعد آذان العصر ، نزلت من العربيه ومشيت على قريتنا وانا م مصدقه ، في حاله زهول كيف غبت منها 41 يوم جيت ماشه لقيت الناس طالعين من الجامع ، بقوا يعاينوا لي وعلى وجوههم ملامح الدهشه والاستغراب ، كانوا متفاجئين ونظراتهم كأنها بتقول شافوا شبح قدامهم م اهتميت ليهم ومشيت طوالي على اتجاه بيتنا.
لمن قربت للبيت بت عمي الصغيره كانت بتلعب برا من شافتني وقفت مسافه وتاني جرت دخلت بيتهم ، انا م استغربت ابداً من تصرفها لأنو دا حال كل ناس الحله الدهشه لمن شافوني ، جيت وقفت قدام بيتنا قبل ادخل عاينت على الزريبه لقيت الغنم مافي ، اتحركت على الباب الكان كالعاده فاتح لأنو كل بيوت القريه بالنهار ابوابها بتكون مفتوحه دي عاده عندنا لأنو البقفل بابو بالنهار بكون بخيل او م بحب الضيوف .
خطيت خطوتين للداخل وانا بعاين في بيتنا الحاسه نفسي لي سنين منو ، امي جات طالعه من جوا وقت شافتني من الدهشه والخلعه كانت شايله صحن في يدها وقع منها وبقت واقفه في محلها م قادره تتحرك من الصدمه وحتى انا م قدرت امشي عليها او اتكلم من الدهشه ، ابوي جاء طالع من الصالون وكان بقول لأمي مالك دي شنو الكركبه دي شافها واقفه مندهشه وبتعاين على الباب ، دار وشو واتلفت شافني اتخلع وبقى شابك يدينو في راسو ، مشيت على امي حضنتها وبقيت ابكي وهي تبكي .
تاني مشيت على ابوي الكان لسه مصدوم وم مصدق حضني وبقى يبكي وبعد شويه جوا ناس عمي ، وقلبنا البيت بيت بكى خلال كم دقيقه القريه كلها اتلمت في بيتنا البيت بقى زي بيت العذاء من كترة الناس ، بعد هدوء شويه بقوا يسألو فيني عن الحاصل معاي ، بديت احكي ليهم حكيت ليهم كل شيء ابوي بقى يبكي ويعتذر مني ، قالوا لي وكيف طلعتي من هنا قلت ليهم طلعت بمساعده بشري إسمو سراج الدين وحيت ليهم قصتو ابوي قال لي اسمو سراج الدين منو ، قلت ليهو سراج الدين عبد الله مسعود.
عم الهدوء المكان وبدأت في وجوه الحاضرين الدهشه والاستغراب ، بعد شويه قلت لأبوي بتعرفو؟ سكت مسافه وقال لي دا ود صاحبنا في السوق انا بقيت مخلوعه ومستغربه من كلامو ، قال لي اختفى قبل زمن طويل قلت ليهو قال سنتين اتزكرت وصيتو لي قبل اطلع من هناك قلت ليهو وصاني وقال لي اقول لأهل القريه اقفلوا البير عاينت لأبوي وقلت ليهو البير الفي المزرعه لازم تتقفل ، قامو ومشوا هو وعمي ورجال القريه عشان يقفلوا البير.
بالليل بقيت اشوف نفس الكابوس سراج الدين حولوا الكأئنات المتوحشه ديك وهو بصرخ وبقول ساعدوني ، قمت مخلوعه امي جات قالت لي دا كابوس مجرد كابوس اهدئي ، سألت امي عن الغنم قالت لي ضفناها لغنم ناس عمك عشان يعتنوا بيهن لأنو ابوي كان عيان وم قادر يعتني بيهن ، بعد اسبوع نزلت المدرسه لقيت صاحباتي كانن فرحانات شديد برجعتي ، شفت سهيله جايه ياداب داخله المدرسه من شفتها اتزكرت سراج الدين بقيت مصدومه ومندهشه نطقت اسمها الكامل سهيله عبد الله مسعود .
ياداب اتصدمت اكتر قلت عشان كدا ملامحو م كانت غريبه عني وم قادرة اتزكر هو بشبه منو ، قاطعت تفكيري تقطقه البنات وهن بقولن لي شردتي وين انتي يابتي الووو ، عاينت ليهم قلت ليهن عن اذنكن برجع هسي قمتا منهم ومشيت على الصف لقيت سهيله قاعده تقرأ براها جوا ، من شافتني استغربت وقامت سلمت لي وقعدت معاها ، فكرت أسألها لكن قلت دا م وقتو قلت ليها فسحه الفطور عاوزاكي في موضوع انا تمام قالت لي تمام وقمت مشيت منها.
زمن الفطور طلعنا انا والبنات قعدت معاهن شويه قلت ليهن عن اذنكم شويه وبجي قالن لي انتي كويسة من جيتي م بتتونسي م بتضحكي وم قاعده تشاركينا الونسه ، قلت ليهم كويسة بس هي عندي حاجه بعملها وبجي ومشيت منهم لقيتها منتظراني في الصف ، قعدت معاها وبقينا نتونس سكت مسافه وانا بتأمل ملامحها الكانت بتشبهو شديد قلت في نفسي غبيه يا ليان معقولة م لاحظتي للشبه دا كله ول من الخوف م قدرتي تميز ، طقطقت لي اصابعها وقالت لي انتي كويسة .
قلت ليها اااا كويسة انا انتي عندك اخو اسمه سراج الدين ؟ فجأه سكتت وملامح وشها اتغيرت وحسيتها شويه ح تبكي ، عاينت لي بدهشه قالت لي ليه السؤال وبتعرفي الإسم من وين ؟ قلت ليها بصوت متردد بعرفو وم بعرفو