رواية ليالي الشتاء البارده
الفصل الثاني عشر12
بقلم دانيا
قمت مشيت منو خطوتين واتلفت عاينت ليهو قلت ليهو انت لو بالجد نيتك تساعدني م تحسسهم بأني عاوزة اهرب ، وعاوزة اسألك انتوا كيف بتحسبو زمنكم قصدي كيف بتفرقو بين الليل والنهار ، ومتين بطلع الصبح قال لي الليل هنا طويل شديد بعكس النهار لكن م فضل شيء شوية وبطلع الصبح.
قمت ماشه منو قال لي م تعاندي انتي م عندك وقت كتير ومن غير مساعده م ح تقدري تطلعي من هنا الأفضل ليكي تقبلي بمساعدتي وإلا انتي عارفه بكره المساء ح بحصل فيكي شنو ، سكت مسافه وقلت ليهو لو اليوم م قدرت ح اطلب مهله اخير وين المشكله ، قال لي وانتي مفتكره ح يوافقوا ليكي م تجني بكره بطلع البدر وبالنسبه ليهم بداية الشهر دي اهم حاجه ، كلامو خوفني واتوترت وبقيت م فاهمه اعمل شنو ، قلت ليهو ليه قال لي لأنو عندهم حاجات معينه بعملوها في اليوم داك بزات ، ومن ضمنها موضوعك انتي دا.
عاينت ليهو وكل خوف قلت في نفسي هوي ياليان معقول م عندك حل غير تثقي في كلامو دا قال لي م عندك اتخلعت قلت ليهو انت كيف عرفت انا بفكر في شنو بقى يضحك وقال لي مهارات ، قلت ليهو وانت كيف ح تساعدني ؟ قال لي انا قضيت سنين في عالمهم دا وبقيت جزء منهم ووثقوا فيني وخلوني اعرف حاجات كتير عنهم بس الحاجه الوحيده الماوروني ليها طريق الخروج من عالمهم دا لانهم عارفين انو انا ك بشري اكيد ح يتجيني لحظات احن فيها لعالمي الخارجي ، عشان كدا م وروني طريق الرجوع.
حسيت باليأس من كلامه دا قلت ليهو طيب جاي تستعرض علي مالك من قبيل ، قال لي م استعراض صاح هم م وروني لكن انا عرفت بطريقتي ، عاينت ليهو نظرة استهتار قلت ليهو لو عرفت كان طلعت ، عصب من كلامي وقال لي انا صاح عرفت بس م بقدر اطلع لأني بقيت مرتبط بيهم بشكل دائم في حاجات بقت مقيداني م ح يسمحوا لي اطلع ، وحتى انتي لبكره المساء لو م طلعتي تاني ح تبقي زي انا زي العبد المأجور والمطيع ، قلت ليهو طيب ليه م ساعدت الناس القبلي انا قال لي دي قصه طويله يابت وهسي الفجر قرب يطلع ارجعي قبل العجوز تصحى وتفقدك لو فقدتك ح تكون ليك مصيبه وح تشوفي وشها التاني.
انا بكره بوريكي تعملي شنو ، وثقت بكلامو لأنو م عندي حل تاني وقمت راجعه قال لي استني وقفت جاء وقف قدامي اداني حاجه زي الشال قال لي اتقطي بيها من البرد ، ختاها لي في يدي ومشى ، رجعت براحه لمن جيت في خشي باب الكوخ .