رواية ليالي الشتاء البارده
الفصل الرابع عشر14
بقلم دانيا
مشى خطوتين لقدام ودنقر على الارض زح التراب والأعشاب وصفق الشجر ورفع حاجه زي الخشبه وقال لي الشمس قابت م فضل ليكي وقت ، عاينت ليهو وقلت ليهو سراج الدين منو رفع راسو عاين لي مسافه وقال لي سراج الدين عبد الله مسعود ، وقفت وبقيت اتزكر اسم عبد الله مسعود دا لاقاني وين قاطع تفكيري صوتو وهو بعاين فوق على السماء وقال لي الهلال ظهر تعالي بسرعه الوقت م لصالحك.
مشيت عليهو عاينت لقيتها دي حفره طويله يعني بير ، قلبي عمل شح واتزكرت موقف الغنمايه اتوترت وبقيت اعاين فيها وم قادره اصل حدها لانها عميقه والدنيا بدت تضلم ، قال لي م تخافي كل العليكي تقفذي جواها م ح تتأذي صديقني ح تصلي لعالمنا الخارجي وبقى يشجع فيني ويوصي في لمن امشي هناك اعمل شنو ، فجأة ونحن واقفين سمعنا اصوات عاليه شديد جايه من إتجاه النفق عاينت عليهو لقيتو واقف مصدوم بخلعه عاينت على النفق لقيت العجوز جايه علينا ومعاها مجموعه من الكائنات المتوحشه ديك.
بقيت واقفه وانا برجف وهم لسه بصرخو وجايين علينا ووجوهم حمرا من الغضب ، سراج بقى يقول لي ليان اقفذي جوا البير سريع يلا ياليان بقيت اعاين ليهو واعاين ليهم ، قلت ليهو وانت قال لي دا م وقت تفكري فيني ، لمن قربو مننا العجوز رفعت عصايتها م عرفتها عاوزة تعمل شنو لقيت نفسي واقعه بعيد من الحفره وهم خلاص وصلو وهو شغال لي ياليان قومي اقفذي على البير في اتنين جايين علي مسكهم وشغال لي قومي .
اتشجعت وسريع قمت نطيت في البير حسيت بصوت سراج الدين في اذنيني بتردد صمعت صوت صرخه قويه منو م عرفت الحصل عليهو شنو ، فتحت عيوني لقيت نفسي نايمه في غرفه ومغطيه ببطانيه حاولت اقوم حسيت راسي تقيل ، قعدت في نص السرير عاوزة انزل رجليني رجلي اليميني دي حسيتها واجعاني زحيت منها البطانيه لقيتها ملفوفه بشاش.
نزلت رجليني براحه واتمسكت في رجل السرير ووقفت على حيلي بقيت اتزكر الحصل حسيت عيوني بشوفو طشاش ، مشيت على الباب طلعت لقيت حريم ورجال قاعدين برا ، في واحدة قامت جات مسكتني وبقوا يسألو فيني انتي كويسة ؟ حاسه نفسك احسن بقيت اعاين ليهم باستغراب قلت ليهم انا وين ، الخاله الواقفه جنبي قالت لي تعالي اقعدي انتي في قرية السعدان ، بقيت اعاين ليها بإستغراب قلت ليها كيف يعني استغربو من سؤالي قالوا لي انتي من وين ، قلت ليهم انا من قرية الحميدان ، بقوا يعاينو لبعض ويتوشوشو قلت ليهم عن إذنكم بس انا عاوزة امشي منطقتنا.
في واحد قال لي لكن منطقتكم م قريبه من هنا وفي الوقت دا م بكون في عربيه طالعه ، ياداب اتزكرت موضوع الوقت اثناء ما انا بتكلم معاهم سمعنا صوت الاذان قالوا لي دا العصر ، بقيت بعاين ليهم بدهشه وبفكر مع نفسي كيف يعني العصر انا لمن طلعت من هناك كان الدنيا مغربت وبدال ما اطلع في منطقتنا طلعت بعيد الحاصل شنو.
قاطع تفكيري صوت الخاله القاعده جنبي قالت لي يابتي القريه م فيها غير عربيه واحده بتطلع الصباح ، وانتي زاتك تعبانه الليله ارتاحي وبكره امشي وباقي الجماعه بقوا يأيدو في كلامها ، قمت دخلت جوا وانا في حيره كبيره بعد شويه الخاله ديك جاتني جابت لي مويه وعصير قالت لي يابتي اشربي العصير دا وارتاحي وإن شاء الله بتتسهل انتي جايه من وين والحاصل معاكي شنو ، قلت ليها الليله يوم كم قالت لي يوم 25 شهر عشره اتفاجأت كيف يعني شهر عشره يعني انا لي اربعين يوم برا البيت بدت ملامح الدهشه في وشي .
الخاله م حبت تسألني تاني قالت لي ارتاحي لبعدين وطلعت مشت وقفلت الباب رقدت في السرير وبقيت افكر واتزكر ، حسيت الوقت خلاص ماشي للمغرب قمت طلعت برا لقيت الخاله ديك في الباب قالت لي هسي كنت جاياكي وكانت شايله في يدها ملابس ادتني ليهم وقالت لي جهزت ليكي الحمام شلتهم ومشيت استحميت وطلعت، اول ما شافتني ملامح وشها اتغيرت وحسيتها فيها ملامح الحزن قلت ليها انتي كويسة ؟ قبلت مني وقالت لي كويسة ااي قالت لي صلي المغرب عشان اخت ليكي الغداء.
مشيت صليت وجيت ختت الغداء قعدنا انا وهي ، سألتها قلت ليها انتي عندك بت قدري ول شنو قالت لي كيف عرفتي قلت ليها من الملابس قالت لي ااي عندي قلت ليها وينا م ساكنه معاكي سكتت ودنقرت راسها مسافه قالت لي بتي اختفت ليها تلاته شهور من المنطقه وبقت تبكي عاينت ليها بخلعه وانا مصدومه قلت ليها اختفت؟ قالت لي ااي فتشناها م لقيناها اتزكرت قرية الجن قلت معقول .
قلت ليها اهدي ياخالتي ربنا يجمع بيها ، بقيت افكر لو فعلاً الفي بالي دا صاح معناها م بتكون عايشه وإلا سراج الدين كان ساعدها حسيت بقصة كبيرة في قلبي قلت إن شاء الله م تكون هناك ، قاطعت تفكري وقالت لي انتي من متين برا منطقتك اترددت قلت م بقدر اشاركها معلومات زي دي ابداً ، قلت ليها مشينا رحله مدرسيه للغابه وانا ضعت هناك .
صليت العشاء ودخلت انوم رقدت في السرير وانا بتزكر في اللحظات الاخيره هناك قلت ياربي سراج بكون حصل عليهو شنو ، بقيت افكر لمن غفيت بقيت بشوف سراج الدين وهو بصرخ وواقع في الأرض والكائنات ديك متلميه حوله عاميلين حلقه دائريه وهو واقع وبصرخ وهم وجوهم حمر زي الدم وانيابهم بارزه زي مصاصين الدماء .
قمت مخلوعه وانا بصرخ لمن عرقانه على الرغم من إنو الجو بارد شديد ، الخاله ديك سمعت صوتي جاتني قعدت جنبي ومسكتني وقالت لي اهدي يا بتي دا حلم مجرد حلم روقي حضنتها وبقيت ابكي ، قالت لي دي انتي كدا بتي حالها بكون كيف ، عاينت ليها وقلت ليها بتك وحيده ياخالتي قالت لي لا عندي ولدين وبت قلت ليها إن شاء ترجع بالسلامه قاعدين نتكلم كدا سمعنا صوت آذان الصبح قمت اتجهزت وصليت وقعدت ادعي لمن الضوء طلع شويه مرقت برا لقيت الخاله شايله جردل وقالت لي ماشه احلب الغنم تجي معاي؟من سمعت سيرة الغنم جسمي كشى ، قلت ليها لالا انا بخت ليكي الشاي الساده في النار قالت لي خلاص تمام .
جات لقتني عملت الشاي قالت لي زكرتيني ببتي هدى كانت بتساعدني ، قعدنا شربنا الشاي قاعدين كدا راجلها جاء صبح علينا وقال لي يابتي ماشه قلت ليهو ااي قال لي خلاص اجهزي لأنو العربيه بتطلع بدري