رواية ليثا
الفصل الخامس5
بقلم دانيا
بقيت واقفه بعاين ليها وانا بين الخوف والتوتر قاطع تفكيري صوتها وهي بتقول لي يابت ورح مالك واقفه قلت ليها هااا امشي وانا بجيب الكشاف وبلحقك .... مشت على إتجاه الحمام وانا مشيت وقفت في باب البرندا وانا متردده ادخل سمعتها نادت لي طوالي قلت بسم الله واتحسبنت ودخلت بخطوات سريعه مشيت شلت الكشاف وطلعت جري ،، مشينا وجينا هي طوالي رقدت في سريرها ونامت وانا بقيت قاعده في طرف السرير ولا عارفه انوم ولا عارفه اعمل شنو قلت بيني وبين نفسي معقولة البيت دا مسكون ؟ ياداب خوفي زاد زياده قلت لا انا م بقدر اقعد في مكان زي دا بكره الصباح بمشي للمرا دي بشيل منها قروشي حقت الإجار وبفتش بيت تاني الله يعدي الليله دي على خير .
قاعده وانا بتحسبن وبقرأ ايآت قرانيه لمن سمعت اذان الصبح اذن قمت اتوضيت صليت الرغيبه والصبح النبات صحوا صلو الصبح نهله كانت متحمسه شديد للمدرسه ،، نجله قالت ليها المفروض الليله م ننزل المدرسه نقعدوا ننضفو البيت ونرتبوا مع نسمه .... قلت ليها لالا النظافه دي م تشغلن بالكن بيها انا ح اوصلكن المدرسه اسجلكن وبجي بتم باقي النظافه قومن اجهزن مسافة اسوي الشاي .
مشن يتشاكلن في الحمام كل واحده بتقول هي عاوزة تجهز بالأول قلت ليهن من الكبير للصغير طوالي نهله كشرت وشها وجات قعدت جنبي وبقت تطنطن .... عاينت ليها وقلت ليها المسافه ديك سرحي شعرك وطلعي جزمتك بدال تقعدي تتجري يابت قولي بسم الله الدنيا صباح ،، قالت لي برضو فهم دقيقه انا امبارح لمحت لي مرايا وين في البيت دا ؟ بقت تفكري تاني قالت لي اتزكرت في واحده من الغرف الجوا ديل شالت الفرشه والمشط وخشت جوا .
ماتمت خمسه دقائق سمعت صوتها بتسرخ لمن اتخلعت ، حيلي كله مات جريت عليها اتطاقشنا في باب البرندا قلت ليها بسم الله مالك في شنو ؟ قالت لي بصوت متقطع وهي بتأشر على الغرفه ويدها بترجف " جوا جوا شفت بت واقفه وراي في المرايا " للحظه جسمي هبط قلت ليها كدي روقي بت شنو وبت بجيبها هنا شنو وح تخش بي وين دي اوهام ساي وانتي المكان م منضف البخليكي تخشي جوا شنو .... اثناء ما واقفين نجله جات من الحمام قالت لينا في شنو هجمتوني م خليتوني استحم سمح زاتو ،، قلت ليها دي اختك المجنونه دي يلا يانهله م تضيعي الزمن امشي استحمي عشان تجهزي للمدرسه وطلعي الأوهام دي من راسك مسكت منها المشط لميت ليها شعرها وقلت ليها قولي بسم الله .
مشت وهي لسه خايفه انا عارفه كلامها صاح والبيت دا فيهو شيء م طبيعي بس م حبيت اوريهن قبل امشي والاقي المرا دي واضمن حق الإجار ..... شربنا الشاي وقمنا طالعين شلت حقيبتي وطلعنا وقفلت الباب بالطبله ،، مشينا الظلط ركبنا المواصلات المدرسه جنب السوق وصلنا دخلنا للمديرة سجلتهن ووصفت لينا الفصول " اولى ، و تالته " اديتهن مصاريف المدرسه وحق المواصلات ووصيتهن يطلعن سوى من المدرسه مافي واحدة تطلع براها ومن المدرسه للبيت .
طلعت من المدرسه شلت باقي القروش الفضلن لي حسبتهن لو دفعت حق الرجعه للبيت البفضل معاي رطل لبن م بجيبو .... شلت نفس عميق وقلت الحمد لله على ما اراد الله مشيت ركبت المواصلات ونزلت جنب الدكان الأمبارح اشتريت منو ،، غشيت الدكان اشتريت لي بسكويته ومشيت طوالي على بيت المرا الأجرت منها وقفت في الباب رفعت يدي عاوزة ادق الباب شفت الطبله " الباب مطبول " قلت ياالله على حظي انا المرأ مشت وين من اول الصباح كمان وانا الغبيه نسيت اشيل رقمها دي يحلوها كيف .
رجعت البيت وكلي حسره وحيرة من امري فتحت الباب الشمس كانت مولعه جريت السرير ختيتو تحت النيمه وقعدت فيهو مسافه وانا بفكر اعمل شنو واتصرف كيف البسكويته الجبتها افطر بيها طلعت من نفسي .... قلت دي م قعدة تقعديها يانسمه اتحركي تاني امشي شوفي المرأ دي اكسبي الزمن هسي لنفترض لقيت المرأ وقررنا نرحل وين حق مشوار العربيه ؟ كل ما احلل وافكر بطني بتطم من الحال لأنو كل ماليها بتطلع لي مصيبه جديده والبنات لمن يجن من المدرسه دايرات الغداء واللبن ومصاريف المدرسه بكره ،، للحظه حسيت راسي لفه من كترة التفكير ... اتزكرت ابوي قلت ياحليلك ياابوي كنت شايل المسؤليات دي كلها فوق كتافك ونحن م دريانين بشيء دموعي ابو يقيفو .
قمت طلعت وقفلت الباب ومشيت تاني على بيت المرا لقيتو مقفول في قفلتو جاء ماري بجنبي زول سايق عجله قال لي يااخت البيت دا م فيهو زول اهلو مسافرين ليهم زمن .... قلت كيف يعني دا كلام شنو امس المرا طلعت لي من هنا اتلفت لقيت الزول فات ،، الباب فيهو ثقب اتاوقت جوا لقيت فعلاً البيت لمن العشب قايم في حوشو باين عليهو مهجور من سنين .... قلت معقولة انا مخربطه في البيوت ؟ انا متأكدا دا نفس البيت سمعت صوت حريم في البيت الجنو مشيت دقيت الباب طلعت لي مرا سلمت عليها وسألتها قلت ليها مش دا بيت ميمونه؟ قالت لي ااي لكن المرأ دي مع اولادها سافرو ليهم سنتين قلت ليها كيف يعني ؟ قالت لي والله يابتي دا الحاصل اتفضلي جوا قلت ليها لا ماشه طوالي قفلت الباب وخلتني واقفه في حيره شديده .
انا امس لاقيتها الليله يقولو سافرت طولت دا كلام شنو والقروش انا اديتها لمنو والمفتاح اداني ليهو منو ؟ بقيت واقفه في نص الشارع م عارفه امشي على وين لمن حسيت بالشمس في راسي قمت رجعت البيت قلت لو طلعنا ح نتشرد مافي حل تاني .... مشيت ربطت طرحتي في راسي وشلت المكنسه وبديت انضف قلت اول ماالم في قروش نطلع من هنا طوالي ،، بنضف وانا بقرأ وبتحسبن لمن خلصت وقفت في نص البرندا وقلت اتكلم معاهم " قلت ليهم السلام عليكم ياجماعه نحن م عاوزين مشاكل ولا عاوزين نأذيكم نحن قصدنا الظل بس والبيت ليكم وفترتنا بسيطه وبنخليهو ليكم " م لقيت اي رد .
كنست ومسحت عديت اليوم كله نظافه لمن الظهر اذن خلصت وبديت ادخل في الحاجات جوا بس في حاجات تقيله غلبتني .... احترت اعمل شنو قلت اطلع برا لو شفت زول اقول ليهو ساعدني اصلاً الزمن دا الناس بكونو جاين من الجامع طلعت برا وقفت مسافه الشمس مسخنه ومافي ولاا زول في الشارع الشارع فاضي ،، يأست وقلت اخش جوا جيت داخله