رواية ليثا
الفصل الثامن8
بقلم دانيا
نجله جات علي مسكتني وقبلت على نهله بنبرة حادة قالت ليها دا شنو يابت انتي غبيه ولشنو ونهله واقفه في محلها ترجف مدت لي السلسل وقالت لي بصوت مرتجف " اسفه يانسمه والله م قصدي " وبقت تبكي مسكت راسي الكان ح يتفجر من الوجع شلت منها السلسل وقلت ليها روقي يابت م حصل شيء .... طلعت مشيت الحوش وانا قلبي يخفق من الخوف قلت السلسل دا ظهر من وين الليله اكيد وراهو حاجه وبعدين دا شنو الإسم المنقوش فيهو دا حاجه غريبه يعني شنو " ليثا " .
شلتو مشيت رميتو في الحمام قلت إن شاء الله م ترجع تحصل معانا نفس الحاجات الكانت تحصل لينا في ايامنا الجينا .... واقفه كدا نجله نادتني مشيت جوا لقيتهن قاعدات كل واحدة صاره وشها من التانيه اول ما شافني ملامحهن اتغيرت ،، نجله قالت لي لا حوله ولا قوة إلا باالله يانسمه تعالي اقعدي معقولة الضربه دي كانت قوية للدرجه دي عاينت لنهله وقالت ليها حرام عليكي والله انتي اكيد جنيتي .... نهله تاني رجعت تبكي قالت ليها ما قلت ليكم م قاصدة انا والله انا زاتي مستغربه في التصرف الأنا عملتو دا وقامت مشت الغرفه .
قعدت جنب نجله في السرير قلت ليها مالي راسي نزف ؟ قالت لي لالا بس محل الضربه ورم ورم بسيط .... جات نهله شايله حبوب مسكن في يدها ومشت المطبخ جابت لي كباية مويه مدتهم لي وهي مدنقرة م قادرة تعاين لي ،، شلتهن منها وقلت ليها خلاص يابت م تلومي نفسك وشيلي هم الموضوع كله قدر وبعدين انا م موجوعه قومي يا نجله ختي الغداء نهله قالت ليها خليكي قاعده انا بختو .
نمت بدري لأنو حسيت راسي واجعني شديد قمت بالليل على صوت نجله وهي بتصحي فيني فتحت عيوني بالجلاله .... عاينت ليها هي كانت راقدة في السرير الجنبي قالت لي اسمعي ،، ختت ايدها جنب اضانها سكتنا حبه سمعت صوت ضحك وونسه جاي من الغرفه الجنب باب البرندا عاينت على سرير نهله لمن جسمي رجف عاينت لنجله قلت ليها " نهله "؟ هزت لي راسها بمعنى نعم قمت مخلوعه قلت بسم الله نزلت من السرير ،، مشينا على الغرفه كان الباب فاتح انا كنت متقدمه ماشه وخاته يدي في قلبي من الخوف .
وقفت جنب الباب ونجله كان وراي ماسكاني من يدي عاينت جوا لقيت نهله نايمه في السرير لمن جسمي كشى نجله قالت لي في شنو ؟ قلت ليها دي نايمه هنا ليه ؟ قالت لي بإستغراب شديد " نايمه "؟ هسي مش كانت بتتكلم وبتضحك متين نامت ؟ دخلت جوا مسكتها من كتفها وبقيت بصحي فيها " نهله ، نهله " قالت لي همممم بصوت ناعس طوالي نجله جات ضربتها في كتفها قالت ليها قومي يابت اتحركي انتي هسي مش كنتي صاحيه كنتي بتتكلمي مع منو ؟ قامت على حيلها بقت تعاين لينا قالت لينا انا الجابني الغرفه دي شنو مش كنا نايمين برا ؟ عاينت لنجله وهي عاينت لي قالت ليها اصحي يابت كيف جابك هنا شنو شالك حمار النوم ولشنو اصلاً دا كله بسبب تفويتك للصلاة دا اكيد م صليتي العشاء .
عاينت ليها وقلت ليها صحي م صليتي العشاء ؟ دا كلام شنو اوعك تفرطي في صلاتك يلا خلينا نمشي ننوم عشان بكرة عندكن مدرسه .... رجعنا نمنا في سرايرنا وانا غلبني النوم بقيت بحاول اربط الأحداث مع بعضها وبحاول افهم ليه تصرفات نهله متغيرة ،، وتاني بقيت بفكر في موضوع البيت والقروش الإختفت قلت خلاص تاني م الم القروش في البيت اخليهن عند عمك سيد الدكان ولمن يبقن كتار امشي افتش بيت بقيت بفكر لمن شالتني نومه .
الصباح صحيت وصحيت البنات للصلاة صليت ومشيت المطبخ عملت الشاي وعندي بن جاهز بقيت بعبي فيهو نجله جات بقت تساعدني .... جات نهله شالت كباية الشاي وطلعت قعدت في البرندا الساعه جات سته نجله قالت لي بعدا ماشه اجهز للمدرسه طلعت برا وقفت بقت تتكلم مع نهله قالت ليها انتي مالك لسه قاعدة م جهزتي ؟ قالت ليها انا الليله م ماشه حاسه نفسي تعبانه شويه ،، سمعت لمن قالت تعبانه طلعت مشيت ليها قلت ليها خير حاسه بشنو ؟ جيت ختيت يدي في جبينها كان بارد كأنها طالعه من تلاجه لمن جسمي كشى بقيت بعاين ليها نجله جات مسكت ايدها كمان استغربت قالت ليها في شنو يابت ياهو جسمك ابرد من جسمي انا النصيحه زاتو .... قلت لنجله اسكتي م كل مرض بتقاس بدرجة الحراره .
قلت لنهله نومي وارتاحي مالك حبيبتي انا واجعك شنو ؟ كانت خاته يدها على بطنها قالت لي حاسه بقبضه شديدة من الألم لمن كشرت وشها .... قلت لي نجله امشي جيبي ركشه من الشارع خلي نوديها الدكتور طوالي مسكت يدي قالت لي لالا م ماشه هسي بتروح بقيت احنس فيها ابت تمش ،، قلت لنجله خلاص انتي اجهزي اتأخرتي امشي مدرستك وشيلي قروش نهله حقت الإمتحانات ادفعيها معاكي قالت لي سمح .... نجله طلعت وانا ضايرت البيت وعملت الفطور ختيتو نهله قالت م دايرة قلت ليها يابت دا كلام شنو اكلي او قومي اوديك المستشفى ،، قالت لي يانسمه عليك الله خليني في حالي انا لو جعت براي بقوم بأكل هسي عاوزة انوم .
قلت ليها خلاص بودي البن الدكان وبجيب ليكي معاي مازا لو م عاوزة تأكلي اشرت لي بيدها نظام امشي طلعت مشيت الدكان عمك من شافني قال لي سلامتك يابتي راسك مالو؟ قلت ليهو ضربه خفيفه اتطقشت مع الحيطه قال لي سلامتك يابتي ،، صحي مع اللخمه نسيت اسألك انتوا جاين من وين وسكنتو وين ووين ابوكي م قاعد اشوفو في الجامع قالت لي ابوي وامي متوفيين الله يرحمهم .... معليش مستعجله دي عشرة علبه واديني مازا شال الكيس مني وجاب لي مازا من التلاجه قال لي الله يرحمهم ويجعل مثواهم الجنه وسكنتوا وين هسي ؟ جاوبتو وانا ماشه قلت ليهو في بيت النيمه الفي اخر الشارع التاني وطلعت مشيت ،، العم بقى واقف محتار قال لا حوله ولا قوة إلا باالله داك بيت بتسكن لكن ؟.