رواية ليثا
الفصل الرابع4
بقلم دانيا
اثناء ما انا قاعده بحاول اركز على الصوت دا شنو سمعت صوت ونسه وضحك من الخلعه لمن جسمي رجف وقلبي بقى يخفق بسرعه قلت في نفسي بسم الله الرحمن الرحيم الحاصل شنو والبتكلم جوا شنو معقول حراميه ؟ قمت من السرير والكشاف في يدي نورتو بقيت بفتش لي في عصا م لقيت اتزكرت السكين قبيل ما قطعت بيها البصل كانت واقعه جنب الكانون ...... مشيت شلتها ومشيت على البيت بخطوات بطيئه لمن وقفت في باب البرندا الصوت قطع فجأة بقت مافي اي حركه .
دخلت جوا وانا برجف من الخوف اللمبه القبيل ديك كانت لسه منورة طفين الكشاف مشيت على واحده من الغرف لقيت الباب مقفول من برا زي ما هو مافي زول فتحوا عاينت على الغرفه التانيه بابها كان فاتح ..... مشيت عليها وانا يد ماشكه بيها الفلاش والتانيه ماسكه بيها السكين ورجليني ديل من شدة الخوف حسيتهم تقال م قادرات يمشن للحظه لمحت ظل مع الظل حقي على الحيطه لمن قلبي عمل شح والكشاف وقع من يدي .
اتلفتت ورا بسرعه وعلى لفتتي اللمبه طفت للحظه من النور للظلام لمن عيوني وجعوني بقيت برجف في مكاني داك دنقرت بقيت بفتش في الكشاف في الأرض ويديني برجفن .... فجأة بقيت بحس بأنفاس قريبه مني شديد رجعت ورا من الخوف حسيت نفسي اصطدمت لي بحاجه ،، حاولت اصرخ في اللحظه دي بس حسيت حلقي كأنو مربوط " صوتي راح " الكلام ابا يطلع معاي فجأة بقيت بسمع نفس الصوت القبيل الكان بقول " ليثـــا " اطرافي كلها بردت وحركتي اتشلت والعرق نازل مني زي المطر .
فجأة اللمبه اشتغلت وانا كنت قاعده في الأرض منصنعه على الحيطه لمن اللمبه نورت لمن قلبي عمل شح بقيت بتلفت حوالي زي المجنونه مافي اي شيء .... قمت سريع من مكاني خليت الكشاف والسكين واقعات في ارضهن وجريت على باب البرندا عاوزه اطلع فجأة الباب قفل مسكت يد الباب وبقيت بحاول افتحوا مهما جريتو ابا يفتح ،، في اللحظه دي م جات في لساني غير عباره واحده " حسبي الله ونعم الوكيل اللهم إني اعوز بك من شرور الإنس والجن " بقيت بردد فيها لمن من غير ما احس لقيت الباب فتح .
جريت برا قعدت في سريري وانا بحاول التقط أنفاسي بصعوبه واثناء ما انا قاعده في السرير وبحاول استوعب الحصل نهله صحت قامت وهي بتتثاهب عاينت لي بإستغراب .... قالت لي نسمه انتي مالك قاعده كدا ؟ م رديت عليها هبشتني في يدي وقالت لي يابت انا بتكلم معاكي لمن نطيت من الخلعه ،، قالت لي بسم الله مالك ؟ قلت ليها هاااا مافي حاجه شفت كابوس ... قالت لي اللهم اجعله خير قومي ورح معاي الحمام قمت قلت ليها ورح مشيت قدامها وقفت وبقت تعاين لي قالت لي الحمام م فيهو نور وين الكشاف نشيلو معانا ،، قلت ليها الكشاف ؟ اتزكرت إني خليتو جوا وانا م قادره ارجع جوا تاني وم بقدر اوريها عارفاها قلبها كبير وخوافه شديد.