رواية ليثا
الفصل السابع7
بقلم دانيا
عاينت لعمك بإستغراب وقلت ليهو مشروع شنو؟ دار ضهرو وشال نفس رطل البن الجبتو بعتو ليهو قبيل داك ،، مداهو لي وقال لي امسكي يابتي دا رأس مال المشروع .... مسكت منو الكيس وانا لسه م فاهمه حاجه ، قال لي بتعرفي ناس الحي ديل هنا ناس جاهز جنهم الحاجات الجاهزة م بحبو يتعبو مش بتعرفي تقلي البن وتسحنيهو ؟ حركت راسي بمعنى نعم فتح الدرج طلع اكياس " البوزنو فيها ربع الرطل دي " ختاها لي قدامي قال لي اقلي البن دا واسحنيهو وعبيهو في الأكياس وجيبي بعد يتباع تاني عيدي نفس الحركه ولمن تجمعي اضعاف راس المال بترجعي لي راس المال وبتشتغلي بالربح حقك .... قلت ليهو والله ياعم م عارفه اقول ليك شنو لكن نجرب مالو الأرضى جربت الحجر شكرتو وشلتهن وطلعت ماشه وقفت جنب الباب قلت ليهو لو جهزتو اجيبو ليك بعدين؟ قال لي البريحك .
رجعت البيت قبل اصل المغرب اذن جيت خاشه لاقيت نجله في الحوش بتتوضى سألتها من نهله قالت لي والله نهله دي لسه راقده م قامت من جات من المدرسه .... خشيت جوا صحيتها قلت ليها قومي يابت دا كلام شنو نايمه للمغرب م بتعرفي نوم المغرب دا بجيب العوارض والعياذه باالله ،، رفعت راسها عاينت لي وطوالي انا مشيت المطبخ ختيت الحاجات وطلعت برا اتوضيت وجيت صليت المغرب وقلت لنجله ختي الغداء عشان عندي شغل وينا نهله صلت ؟ قالت لي خليتها برا يمكن بتتوضى .
ختينا الغداء وناديناها جات اتغديت سريع سريع ومشيت المطبخ بقيت بقلي في البن وبعد خلصت طلعت برأ شغلت السحانه برا في البرندا جنب البنات وهن كانن بقرن .... سحنته سريع سريع وعبيتو في الأكياس وقلت للبنات ورح نوديهو نهله قالت لينا م ماشه امشن انتن ،، انا ونجله بقينا دي بتعاين لدي وقبل افتح خشمي نجله سبقتني قالت ليها اجي يابت جبتي الفراسه دي من وين الليله لمن تقعدي براكي في الليل دا ؟ عاينت ليها نظره حاده انا زاتي اتهجمت قلت في نفسي الليله البت دي مالها كمان من جات م طبيعيه .
قلت لنجله خلاص اقعدن انتن انا بجري جري وبجي الزمن بدري لسه العشاء م اذن قالت لي سمح انتبهي من الطريق .... طلعت وانا بين الماشه والجاريه حصلت الدكان اديتو لعمو قلت ليهو م حسبتهم كم كيس لكن م مشكله للصباح وطلعت جري البيت ،، الشارع كان فيهو ناس والجو طبيعي رجعت البيت لقيت نجله ماسكه كتابها وبتدرس ونهله م معاها قلت ليها اختك وينا طبعاً م ح ننوم في الغرف كلنا ح ننوم في البرندا هنا مش احسن ؟ قالت لي ااي احسن والله .
قعدنا نتونس نهله جات قلت ليها وين كنتي يابت ؟ سكتت مسافه وقالت لي في الحمام .
مرا شهر كامل تاني م شفت اي شيء غريب في البيت البنات بمشن المدرسه الصباح وانا بجيب البن بقلاهو وبسحنو لمن بدال الأكياس بقيت بعبي في العلب وعملت لي ماركه " بن نسمه " جمعت قروش كويسة فرحت شديد قلت خلاص بعدا ح نطلع من هنا ،، ختيتهم في علبه وجيت نمت مبسوطه على اساس ح امشي افتش بيت في الأيام الجايه .... الصباح كان عندي علب جاهزة كتيرة مشيت وزعتها على دكاكين الحله والإتباعن شلت قروشهن وجيت فرحانه عاوزة اختهم مع القديمات .
فتحت الدولاب طلعت العلبه من بين الملابس فتحتها لقيتها فاضيه انا للحظه راسي لفه اتهجمت لمن م لقيتهن قلت معقولة دخل حرامي بغيابي؟ لكن البيت لقيتو مقفل زي ما خليتو حتى مفتاح الدولاب معاي .... قعدت في السرير وانا في راسي الف علامة إستفهام ،، سمعت الظهر اذن ختيت القروش المعاي في نص الملابس ومشيت اتوضيت صليت شويه كدا البنات جن من المدرسه .... غيرن وجن قعدن معاي قالن لي الإمتحانات اتحددت وعاوزين الرسوم نجله إمتحاناتها بعد شهر ونهله الإسبوع الجاي قمت القروش المعاي دي اديتهم منها وفضل لي حق اللبن والسكر بس .
المغرب مشيت جبت اللبن وجيت من برا سمعت اصواتهن عاليه بتناقشن استغربت شديد قلت ياربي في شنو ؟ جريت عليهن قلت ليهن مالكن في شنو ؟ نجله قالت لي نهله لقت سلسل جنب شجرة النيم مكتوب فيهو " ليثا " قلت ليها م تلبسيهو السلسل دا م معروف حق منو بجيب لينا مشاكل .... عاينت لنهله وقلت ليها وينو السلسل كدي جيبيهو مديت ليها يدي وهي كانت ماسكاهو في يدها قامداهو قوي ،، بقت تعاين لي قالت لي لا عاوزة البسو م بديكن ليهو " حاقدات " .
كلمتها دي حيرتني شديد نحن اخواتها الكبار م من عاداتها تقل ادبها علينا فجأة حسيت نفسي كأنو اتزكرت حاجه " ليثا "؟ اتزكرت الإسم دا من اول يوم جينا وانا بسمعو بتردد في اذني .... بنبرة حاده قلت ليها جيبيهو يابت اخير ليك لمن نطت ختيت الكيس في التربيزه ومسكت يدها عاوزة اشيلو منها الساعه اللفت لي يدي وطقشتني مع الحيطه بقيت بشوف طشاش