رواية ليالي الشتاء البارده
الفصل الثالث3
بقلم دانيا
الغنم كلهن ماشات قدامي وانا شايلة لي صوت وتابعاهن ، بعد شويه السوداء الامبارح ديك وقفت وكل الغنم فاتنها ، انا اتصدمت قلت دي مالها اكيد عاوزة تقطع الشارع.
قربت ليها ورفعت الصوت الفي يدي عاوزة اضربها عشان تمشي وانا شغاله ليها هش هش عاوزة اضربها اتلفتت علي فجأه وعاينت لي وبقت تضحك زي الزول ، انا م فضل فيني حيل جسمي كله بدا يرجف والصوت والكراسات وقعوا مني ، وهي لسه بتعاين لي معاينه خبث وبتضحك ، فكيت الجريه بنمره واحد جري الخوف داك والدنيا بدت تضلم ومافي غيري انا وهي وباقي الغنم في الشارع على حس رجليني الغنم بقت جاريات قدامي وصلت الحله الناس كانو طالعين من الجامع بعد صلوا المغرب بقوا واقفين بعاينو فيني مستغربين قايلني ساكه الغنم .
كل واحد بقى يعاين للتاني ويحكوا دي مش بت محمد زكريا ، ياها زاتها من بتين بنات الحله بقت يتجارن في الشارع قدام الناس سبحان الله ، وانا من الخوف م شايفه قدامي زاتو.
جيت اتطاقشت مع ابوي في الباب شغال يقول بسم الله بسم الله دا شنو يابت ولصق فيني كف لمن بقيت اشوف طشاش ، وانا شغاله ليهو ياابوي ياابوي وانا ياداب القط انفاسي عشان اقدر اتكلم ، قاطع كلامي بنبره حاده انتي المقعدك في الخلا للوقت دا شنو يابت.
وانا شغاله ليهو ابوي الغنمايه السودا الغنمايه السودا قبل اتم كلامي اشوفها جات وقفت قدامنا ورافعه راسها ، ابوي بقى يقول لي ياريت لو عندي ولد انتي دي اصلك م نافعه قلت ليهو وانا حاسه بالخيبه من كلامو ابوي الغنمايه السودا دي بتضحك والله ضحكت عديل ياابوي رفع يدو داير يضربني امي جات قالت لينا مالكم في شنو ياناس اصواتكم طالعه ، قال ليها بتك المنافعه دي سوقيها من وشي وقولي ليها تبطل هواجس اخير ليها غنمايه شنو البتضحك مجنونه هي.
ومشى ساق الغنم دخلهم الزريبه هي قدام البيت ، امي بقت تقول لي مالك يابت مزهجه ابوكي مع المغارب دي قولت ليها والله ياامي انا قاعده اقول الحقيقه ، ابوي مشى الجامع يصلي العشاء الناس حكوا ليهو جاء البيت معصب وشغال لأمي بتك دي اخير ليك تقولي ليها تخت عقلها في راسها.دخلت غرفتي عاوزة انوم لكن م قادره لسه بفكر في الموقف الحصل ، بقيت افكر والجو برد شديد وكالعاده الحله عمها الهدوء وصوت الهواء برا ومع حفيف الشجر ياداب يخلي الواحد يخاف زياده قلت خليني اقفل كل الابواب والشبابيك ، عشان مافي حاجه تخش.
قمت مشيت قفلت الباب حق الحوش بالترباس ، وجيت قفلت باب البرنده ودخلت قفلت باب الغرفه وراي وجيت اقفل الشباك ، اشوف ليك الغنمايه السودا واقفه مقاصده الشباك وبتعاين لي ، اتخلعت قلت دي الجابها شنو وفكيت الصرخه