رواية ليالي الشتاء البارده
الفصل الرابع4
بقلم دانيا
وقفت على الشباك عاوزة اقفلو ، عاينت برا لقيت نفس الغنمايه السودا واقفه مقاصدة الشباك وبتعاين لي، اتخلعت ورجعت لورا حسيت جسمي كلو نمل ، بقيت اعاين فيها تاني بقت تضحك لي حركات الزول الشمتان ديك ، وفكيت الصرخه .
امي وابوي جو جارين وابوي بحلف لأمي المره دي إلا ادقها فضحتنا في الحله ، يتكابسو في الباب بقى يقول يابت مالك ااا امي قالت لي في شنو يابتي خوفتينا في الليل دا بتكوركي مالك ، قلت ليهم تعالوا شوفها قاعده تضحك كيف عشان م تقولوا انا عذابه ياابوي والله واقفه برا بتعاين فيني وبتضحك.
ابوي جاء كبس على الشباك بقى يعاين برا م لقى اي حاجه ، من غير اي مقدمات جاني كف قوي لمن وقعت في السرير ، امي اتخلعت جات وقفت بيني وبينو شغاله ليهو ياراجل قول بسم الله مالك ، قال ليها شوفي شوفي برا هسي شايفه حاجه وين الغنمايه ، جراني من يدي وشغال لي قومي قومي تعالي جاريني وماشي سريع سريع وامي ماشه ورانا وشغاله ليهو اهدأ ياراجل ماشي بيها وين.
جاريني للزريبه برا ضوا اللمبه لقينا الغنم كلهن نايمات ومن دونهن السودا دي راقده في نصهن ، بقى يقول لي دي شنو عايني كويس دي شنو والله حق الزول يربطك معاهن في البرد دا.
قال لأمي سوقيها امشي نومي معاها ، وعاين لي معاينة غضب قال لي تاني اسمع صوتك ، مشت معاي وشغاله لي سجمي يابتي الوحيدة سحروك مالك عاد دايره تجني، قلت ليها حتى انتي ياامي .
يلا تصبحي على خير رقدت واتقطيت وعامله نفسي نايمه ، لمن نمت بالجد بالليل بقيت اشوف كوابيس نايمه كدا م احس بنفسي إلا دقيت الارض لمن امي قامت مخلوعه قالت الحاصل شنو نورت الفلاش لقتني في الارض بقت تصرخ وانا على صراخها بقيت اصرخ معاها م فاهمه حاجه.