رواية ليالي الشتاء البارده
الفصل الخامس5
بقلم دانيا
بقيت بفكر لمن نمت وغفيت بقيت اشوف كوابيس مرعه ، انا جاريه وبعدين وقفت قدام بئر وفي حاجه دفرتني وقعتني جوا البئر ، اتخلعت م لقيت نفسي غير وقعت في الارض لمن امي قامت مخلوعه من صوت الوقعه نورت فلاش التلفون شافت حاجه واقعه قبل تتأكد بقت تصرخ ، وانا اتخلعت من صراخها وبقيت اصرخ معاها .
ابوي سمع وجاء جاري وشغال يقول لينا مالكم في شنو ، ونحن بقينا نعاين في بعض وم مستوعبين الحاصل شنو ، سكنا ساي ودنقرنا وهو شغال لينا ما بسأل فيكم انا في شنو ، امي قالت ليهو اسأل المجنونه دي مالها ، انا اتخلعت وبقيت اعاين ليها قلت ليها انا ياامي انتي البديتي ، قال لي وانتي المقعدك في الارض شنو .
اتحرجت وم قدرت ارد ليهو امي قالت ليهو سمعت صوت الوقعه وم عرفت الحاصل شنو قمت مخلوعه ، بقى يعاين لينا بنظرة حاده قال لينا الله يصبرني كلكم دايرين علاج.
الصباح طلع الشغل وانا مشيت المدرسه فضلت امي براها في البيت ، اتصل ليها بعد الظهر قال ليها رتبي لي ملابس في شنطه انا ماشي المدينه بجي بعد يومين ، انا جيت من المدرسه قالت لي ابوكي جاي هسي قال مسافر المدينه وبجي بعد يومين كدا ، اتوترت من الكلام دا لأنو كدا الغنم ح يكون رعايتهم علينا وكمان المزرعه برضو ، قلت ليها ياامي ضروري يسافر ، عاينت لي معاينه كدا بالنيه قالت لي من متين بنسأل ابوكي مسافر ليه وإذا ضروري ول لا لو عاوزة اسأليه انتي قلت ليها لالا خلاص ودخلت غرفتي تاني اتزكرت الغنمايه السوداء رجعت لأمي قلت ليها امي عليك الله قولي ليهو يسوق الغنمايه السودا معاهو قالت لي انت الغنمايه دي مالك ومالها زاعجاك من بين الغنم يابتي م تجني .
مشيت منها شويه كدا ابوي جاء من السوق قال ليها سريع انا مستعجل العربيه منتظراني في السوق وين الشنطه ، جيت سلمت عليهو قال لي انتبهي على الغنم ديل كويس وبكره اصلا م عندك مدرسه سوقيهم وديهم المزرعه في عشب يخليهم يرتعو فيهو وآخر اليوم طلعي ليهم مويه من البئر خليهم يشربو وجيبيهم قلت ليهو حاضر ، بس الغنمايه السودا قبل اتم كلامي طلع فات.
المساء بعد صلينا العشاء وخلاص عاوزين ننوم امي قالت لي حاسه بطني دي مكركبه شديد بقت تخش الحمام وتطلع ، لمن شفتها تعبانه شديد قلت ليها ح امشي الصيدليه الفي آخر الشارع ديك اجيب ليكي حبوب واجي قالت لي لالا م تمشي الزمن فات والزمن دا بكونو قفلوا قلت ليها لالا ياداب طلعوا من الجامع.
طلعت برا فعلاً لقيت الحله صانه والجو هادي بس صوت الأشجار لمن الهواء يهب عليها ، وقفت مسافه بين امشي ول لا تاني قلت اتوكل وامش حتى لو لقيت الصيدليه قافله بمشي للدكتورة في البيت لأنو هي ساكنه قريب ، طلعت كنا طافين ضوء الزريبه لأنو دخلنا على اساس ح ننوم ، قلت الحمد لله م ح اشوف الغنمايه السودا ، طلعت ماشه في الشارع والدنيا برد والهواء هابي والشارع فاضي وكل شويه بس بصوت حاجه ماشه وراي اتلفت م بلقى حاجه لمن قربت للصيدليه شفت الدكتورة عاووة تقفل الباب جريت عليها جري حكيت ليها وادتني حبوب كدا وجيت راجعه.
عاوزة ادخل جوا سمعت صوت بقول لي حمد لله على السلامه، جمدت في محلي بقيت عاوزة اتلفت وم عاوزة اتلفت ، وانا برجف من الخوف اتلفت وراي مافي اي شيء غير الغنم قاعدات في الزريبه ، اتحركت على الباب عاوزة اخش سمعت صوت ضحك قلبي عمل شح اتلفت وراي.