نورت فلاش التلفون على اتجاه البطانيه وقعت ، اتخلعت لمن التلفون وقع مني وبقيت بصرخ بأعلى صوت ، امي وابوي جو جاريين وعشان الحله صانه ومافيها حركه صوتي اتسمع لبيت ناس عمي ساكنين جنبنا جو جاريين والشايل عصاء والشايل ساطور والشايل فاس ، امي وابوي جو يتخابطو في الباب قالوا لي بسم الله مالك يابت في شنو ، م قدرت اتكلم اشرت ليهم قدامي عاينو لقوها دي غنمايتنا السودا ، قلت ليهم دي كيف جات من الزريبه لهنا ابوي قرب يديني كف قال لي دا كلو عشان الغنمايه اثناء ما بتكلم معاي نسمع ليك صوت خبيط على الباب.
امي ولعت اللمبه ومشت على الباب ابوي قال ليها تعالي هنا انا بطلع بشوف وبقى يحمر لي معاينة زعل نظام كلو منك ، وطلع فات يفتح الباب امي بقت تعاين لي وتعاين للقنمايه قالت لي عليك الله م تخجلي فضحتينا في الحله قلت ليها لكن ياامي الدنيا كانت ضلام وهي جات سحبت مني البطانيه قالت لي هوس اكستي .
بعد نورتيها شوفتيها بتصرخي مالك وبعدين الغنم ديل مش ربتطيهم انتي؟ قلت ليها ااي ، ابوي فتح الباب لقى عمي واولادو برا شايلين سواطيرهم وعصايهم وواقفين اول مافتح الباب دخلو قالوا ليهو مالكم في شنو الجاكم شنو ؟ انا وامي طلعنا سايقين الغنمايه وابوي مدنقر راسو من الخجله م قدر يقول ليهم دا بسبب الغنمايه .
قال ليهم شافت كابوس عشان كدا سرخت مافي شيء ، عمي بقى يعاين لي وبنبرة زهج قال لي صليتي العشاء قبل ما تنومي ؟ امي قالت ليهو صلينا سوى والله ، عاين ليدي لقاني ماسكه حبل الغنمايه قال لينا ودي جابها هنا شنو دنقرت راسي وقلت ليهو يمكن نسيناها م ربطناها عشان كدا ، عاين لولدو وقال ليهو امشي اربطها.
الصباح ابوي طلع بدري مشى السوق وقال لأمي ليان بعد تجي من المدرسه تسوق الغنم توديهن الحواشه ياكلن وتجيبهن المساء ، ومرق انا جيت شربت الشاي وعاوزة اطلع كلمتني ، مشيت المدرسه وجيت بعد الظهر صليت وسقتهن ومشيت هن باكلن وبرتعن وانا قاعده في ظل الشجره بكتب وبزاكر وم حسيت بالزمن لمن المغرب قرب ، سوقتهن وجيت ماشه في الخلا داك إلا انا وهن الناس الكانو في الخلا كلهم اظن رجعو الحله إلا انا والجو بدأ يبرد وخلاص المغرب على وشك انا سايقاهن قدامي وشايله لي صوت وتابعاهن كلهن ماشات بعد شويه السودا الامبارح ديك وقفت وكلهن فاتنها ، اول ما قربت ليها ضحكت لي