رواية نبض قلب
الفصل العاشر10
بقلم دانيا
رعاية الله ، وقفل على كدا انا قلت ليهو يا محمد كلام عم الشيخ دا واضع صاح فهمتو؟ قال لي ااي الحمد لله واضح وفهمت كل شيء.
قلت ليهو تمام يلا بعدا نحن ح نرجع البيت لانو خالتي بتكون منتظرانا ، قال لي خلاص تمام حسيتو متوتر او خايف ما عارفه مسكتا يدو وقلت ليهو ما تخاف الحل في كتاب الله نحن معانا الله اكيد حا ننتصر على الشياطين ديل ابتسم وكان باين في وشو التفائل والامل
قال لي اسمعيني ناس بيتنا دا كل ما عارفنو وانا ح اسافر وما اقول ليهم حاجه لكن انا عاوز منكم خدمه تانيه اذا ما فيها ازعاج عاينت ليهو وحسيت كلامو وترني شويه قلتا ليهو ازعاج شنو معقول اها قول ولا يهمك ، سكت مسافه وعاين لي قال لينا هو الموضوع ما ليهو علاقه بالخوف او كدا وانا واثق حا نطلع من المصيبه لكن برضو مع التفائل الانسان بكون جواهو احتمال سيء طيب شوفوا اذا لا قدر الله حصل علي اي شيء لاسمح الله احكوا الحقيقه لأهلي وانتبهو على امي صاح هي ما بتعرفكم لكن امي انسانه طيبه وبتحب الضيوف ولو جيتوها ما ح تكشكم ح تستقبلكم بصدر رحب وح تعتبركم اهل البيت ، وانا عاوز منكم شيء اخير بكره انا بسافر لبعد الظهر انا عاوزكم تجوا بيتنا عاوز اعرفكم على امي طالما انتوا كمان ساكنين في نفس المنطقه حتى لو بعاد مننا لكن تعالوا اتعرفوا عليها عاين ل مها وقال ليها جيبوا امك وتعالوا انتي ودانيا وانا بجي بسوقكم بوصلكم البيت وفي فترة غيابي تعالوا زوروها امنتكم عليها من هسي وقال انا امي دي بحبها شديد ودنقر راسو وبقى يبكي وكنا قعدنا نبكي فتحنا بيت عزاء في الكافتريا
مها كسرت الصمت وقالت لينا ياجماعه اهدوا وبقت تمسح في دموعها وقالت لينا فتحنا بيت عزاء والناس بقوا يعاينو لينا .
بقى يبتسم ويمسح في دموعوا قالينا اسف خليتكم تبكوا قلتا ليهو عادي ياخ اتفائل خير ، قال لي اها ح تجوا ؟ قلت ليهو طبعاً حا نجي قال لي الساعه 11 كيف معاكم قلنا ليه ممتاز ودعناهو وقمنا مشينا.
ورينا خالتي بالحصل بقت تبكي قالت لينا يا حليلو رغم انو ما شفتو لكن حنني والله، قلنا ليها اهدي ياخ مامعقوله بقيتي لينا زي محمد انتي تبكي وهو يبكي قالت لينا ان شاء الله بكره دا كلوا حا يبقى زكرى و ح نتزكر ونضحك ونقول الحمد لله عدت على خير.
قاعدين نتونس كدا جاء ود خالتي خاشي اسمو حمد سلم علينا وقال لينا الليله وين من الصباح ما شايفكم انتوا الاتنين ؟