رواية نبض قلب
الفصل الثلاثون30
بقلم دانيا
تلفوني اتصل عاينت لقيتو دا محمد فكرت م ارد لكن تاني قلت كدي اشوف الحاصل شنو ، رديت عليهو سلمت ليهو وسألتو عن ناس البيت وكدا قال لي نزلتي الجامعه قلت ليهو ااي الحمد لله اتكلمت معاهو حبه وقفلت.
حمد بقى يعاين لي قال لي اها هسي البحصل شنو قلت ليهو بالنسبه لشنو قال لي وعدك لي ، عاينت ليهو وقلت ليهو انا حاليا م بفكر في الموضوع دا انا في وش امتحانات وبعدين انا لو م مسكت شاهدتي في يدي م تحلم .
قال لي دا م بتغرري انتي دا ح نتناقش فيهو مع بعض ، قلت ليهو يا ود خالتي ممكن طلب عاين لي بحقاره قال لي عاوزة شنو؟ قلت ليهو م تتكلم معاي في الموضوع دا عاين لي مسافه وسكت مني تاني لمن وصلنا مافي زول اتكلم مع التاني.
وصلنا ونزل سلم على ناس امي وقعد اتونس معاهم شويه وقال ليهم عن اذنكم ودعهم وطلع مشى ، قعدت مع ناس امي واخواتي برانا اخواني واحد مسافر والتاني في الشغل مرتو بس قاعده حكيت لناس امي بالحاصل امي بقت تجوط قالت لي هسي لو حصل ليكم شيء نعملوا شنو نحن ، قلت ليها ياامي م تخافي م حصل شيء ، قالت لي كلو من حنان تصبر لي كيف تخليكم تعملوا مخاطرة زي دي .
قاعدين نتكلم كدا خالتي اتصلت لي ، قلت لامي والله خالتي دي بت حلال وبقينا نضحك .
رديت عليها قلت ليها خير يا خالتي اشتقتي لي بالسرعه دي قالت لي شوق بحر والله .
عاوزة اقول ليكي محمد جانا بأهلوا يا حليلك استعجلتي كانوا حابين يسلمو عليكي والله ، قلت ليها سلمي عليهم نيابة عني ، ليه محمد حكى ليهم ول شنو قالت لي ااي حكى ليهم والله بشكرو فيكم الوقت كله ومشوا لبيت الشيخ شكروهو وادوهو هديه سفريه للعمره قلتا ليها ماشاء الله والله م قصرو ونحن م عملنا غير الواجب.
قالت لي سلمى قالت عاوزاكي ادتني ليها بالتلفون سلمت عليها وهي تشيل وتشكر فينا يا حليلها، قالت لي انا والله قلت لحنان الا اجيك توديني ليهم في شرق النيل منها بشوفكم ومنها بتعرف على امك الملاك ، قلت ليها بتشرفينا في اي وقت.
بقت بكره الجمعه قمنا من الصباح انا رتبت البيت وعملت الشاي وقعدنا نتونس وبعدين قمنا على الفطور ياسلام جو بيتنا البحبو شديد .
بعد الفطور دخلت استحميت واتجهزت لصلاة الجمعه بعد شويه الباب دقه، مشيت فتحتو لقيت خالتي حنان ومها وحمد وولدها الصغير مهند وكمان خالتو سلمى ومحمد واخواتو اتنين واخوهو الصغير