روارواية غدر وقدر الفصل الحادي عشر11 بقلم دانيا
صلوا على النبي....
بعد هيثم كورك في مرام وطلع خلاها واقفه وعبونها محمره من الغضم ركب العربيه ومشى على شغله " حراسة المخزن " اول ما وصل نزل من العربيه جاهو واحد من الجماعه البناوبو معاهو من شدة حدته في التعامل ملغبنو "فرعون " جاء وقف قدام هيثم وكان بتكلم بالتلفون وآخر كلامو كان " خلاص تمام مقضي " وقفل الخط على كدا وعاين لهيثم بنظراتو الحادة ديك وقال ليهو بنبرة مستفزة " هات المفتاح والمسدس المعاك " هيثم كان ماسك مفتاح العربيه في يدو وعاين لفرعون بإستغراب وقال ليهو مفتاح شنو والمسدس دايرو لشنو ؟! رد ليهو بكل برود وقال ليهو انت مفصول امشي شوف ليك شغل في حته تانيه ... هيثم ابتسم إبتسامه جانبيه وقال لفرعون بتهظر انت فصل شنو ؟!! .
فرعون من دون مفاهمه مسك يد هيثم وشال منو المفتاح ولوى ليهو يدو على ضهرو وشال منو المسدس ودفرو لمن ضرب العربيه وبنبرة غضب قال ليهو هظار شنو صاحبك انا عشان اهظر معاك يلا من هنا اوعك المحك قريب من هنا تاني ... هيثم وقف وبقى يعاين ليهو وجسمو ينتفض من الغضب قال ليهو دي مديرتك الكلبه هي الأمرتك تعمل كدا كويس اصبرو لي بأدبكم انا استنو لمن القى صاحبي لو م خليتكم تتسجنو م اكون انا وقام ماشي ،، فجأة سمع صوت فرعون وراهو بضحك بطريقه مستفذه وهو بصفق بيدينو وقال لهيثم تسجن شنو انت عوير حتى لو اشتكيت مافي غيرك انت وصاحبك ح تتسجنو وتتحاسبو .. هيثم اتلفت عاين ليهو وقال ليهو كيف يعني ؟ فرعون مع إبتسامه ماكره قال ليهو ايوه زي ما قلت ليك لأنو كل مسجل ومكتوب بإسم صاحبك العبقري وانت قايل الزعيم الله يرحمه مزوج بتو لصاحبك حباً فيهو يعني ؟! اكيد لا هو عمل كدا عشان لو لا سمح الله وحصل والشرطه اتدخلت اول زول ح تقبض عليهو صاحبك لأنو كل شيء بإسمو والملكه ملكه بالإسم بس اسكورها نظيف الزعيم كان مفتح وم حب إسم بتو يتوسخ بالعمل الإجرامي دا صاح هو قائد كبير في الجيش وخان الدوله لكن خانها بحرفنه م زي صاحبك الغبي البخاف ليهو من مرأ منفسنه ومريضه .
هيثم كان واقف ومخو إزدحم بالأفكار والأسئله المالاقي ليها إجابات بقى يشوف فرعون عشره عشره رجع فيهو عاوز يضاربو واول ما لكم فرعون في وشو وبقو يتضاربو شافوهم بقية الحراس وجو حاجزوهم فرعون هدد هيثم قال ليهو إلا ما القاك في محل ،، هيثم طلع منهم وكلو غضب .
غفران :
طلعت من المطبخ وقبل اصل الحمام قعدت في الحوش وبقيت استفرغ أبتسام طلعت وراي قالت لي بسم الله يابت انتي كويسة ؟ اشرت ليها بيدي إني كويسة بعد الإستفراغ وقف قمت مشيت الغرفه وانا حاسه حيلي كله مهدود م تمت دقيقتين الغرفه اتملت علي بقوا يسألو فيني حتى امي جات من هناك زحمو راسي بالأسئله وانا اقول ليهم كويسة م عاوزين يقتنعوا .
بعد إسبوع في المدرسه طلعت انا وصحبتي سحر فسحة الفطور انا كنت جايبه معاي جبنه وهي حاشيه قيمة بطاطس اول ما طلعت الفطور حقها بطني طمت ... ختيت يدي في بطني وخمضت عيوني هي لاحظت لي قالت لي انتي كويسة ؟ قلت ليها كويسة قمت من جنبها قلت ليها نسيت عندي تمرين الرياضيات الأمس م صححتو ح امشي قبل الفسحه تنتهي قالت لي لسه ياغفران افطري بالأول قلت ليها بعدين هسي م لي نفس وطوالي مشيت منها وانا محتارة انا مالي ؟!.
مرام :
بعد العشاء تلفونها اتصل شالتو وطلعت فوق ردت على المكالمه وقالت اها انجز سريع .. الزول الإتصل ليها قال ليها صاح العربيه اتلقت قريب الحدود لكن عندنا شك إنو الزول دا م طلع من البلد دي وحتى الحبشي لمن وصلنا ليهو اكد لينا إنو ما شافو وم بعرف عنو اي حاجه صاح هو م فيهو ثقه لكن م عارف ليه المره دي حسيتو صادق ،، مرام انفعلت وقالت ضارب لي عشان توريني بشوكك وظننونك دي انا م قلت ليك حاجه م متأكد منها م تقولها لي انا م بعرف ليك كلام زي دا الزول دا لو طار في السماء تنزلو وطق قفلت الخط في وشو ومن الغضب والتوتر بقى جسمها كله يرجف .
بعد مرور خمسه شهور :
غفران : مشيت على بيت امي كنت بتكلم معاها عن وضع عمي الصحي قالت لي غفران يابتي انا خايفه لا يكون مرض ابوكي .. للحظه حسيت بتوتر قلت ليها لا ياامي م تقولي كدا وهو شنو مرض ابوي انتي عارفه ابوي مات بسبب الإهمال واصلاً مرضو م اتعرف لأنو مركز القريه إمكانياتو ضعيفه و حالنا م كان بسمح لينا نسفرو بس لكن عمي اكيد ح نلقو طريقه نسفرو المدينه ويتشخص مرضو ويتلقى العلاج المناسب ،، امي هزت راسها بأسف وقالت لي نسفرو بياتو طريقه يابتي ؟! قلت ليها ياامي اتفائلي عمي عندو ولد م تنسي نحن قاعدين نحاول نرسل لإبراهيم ،، قاطعت كلامي وقالت لي إبراهيم شنو ولادت السجم هو لو منو نفع هسي ليهو خمسه شهور المصاريف م رسلها لا بعرف عندو اهل راجنو ولا بعرف عندو مرا هنا خلاها بقفاهو وحامل بولدو عليك الله ريحيني منو أريتني م اديتو بتي .... قلت ليها بسم الله ياامي دا كلام شنو الحصل حصل تاني الأسف على شنو وبعدين الغايب عزرو معاه على كل حال انا كنت جايه اقول ليكي ح ابيع الدبله حقت العرس لعلاج عمي لمن ربنا يفرجها وإبراهيم يرسل ،، قالت لي يابتي م عارفه اقول ليكي شنو لكن عاد الدبله دي كان تخليها على الأقل تجهزي بيها حاجات الولاده الدنيا م مضمونه ... إستغربت شديد في كلامها لكن م حبيت ارد ليها لأنها امي بس اكتفيت بإني اقول ليها للوقت داك الله كريم .
مرام :
من شدة القلق والتوتر على إبراهيم الليهو اكتر من خمسه شهور م لاقين عنو خبر لمن بقت هاديه والزمن كله شارده في تلفونها وكل دقيقتين تتصل عشان تعرف إذا في تطورات .
قاعده في بيتها بالليل حوالي الساعه تسعه " البيت الكبير الفاضي " م فيهو غير ولدين حارسين الباب والبت الشغاله والسواق وهي ... بعد قعدة طويله في الكرسي وتفكير كتير في وسط غرفه مظلمه قامت مشت رقدت في السرير فجأة بقت تسمع صوت خطوات جايه عليها للحظه قامت من السرير وبلهفه قالت " جولص " لأنها عارفه الطابق التاني م بطلعو غير هي وجولص قامت مستعجله مشت على باب الغرفه