رواية الفراق هو نصيبنا الفصل الحادي عشر11 بقلم حبيبة الديب
_هاا يا زهره؟
موافقه..؟!
بصيت لبابا و اتكلمت بهدء :
_اللى تشوفه يا بابا.!
بابا اتنهد و بص ل ماما و اتكلم
_تمام ماشي
انا هروح الشركة دلوقتي و هكلمه هقوله كل شئ قسمه و نصيب...
عيوني وسعت و بصيت له :
_هو انا رفضت يا بابا؟؟
_اه مش قولتي اللى تشوفه؟
انا شايف انه مش مناسب..!
اتكلمت بدفاع :
_مش مناسب ليه يا بابا؟
كريم كويس و محترم على فكره و انا هبقى مبسوطه معاه.....
انا قولت كده و سكت فجأه و تداركت اللى قولته
بابا بص لي و ابتسم :
_يعني موافقه؟
هزيت راسي بكسوف و هو ضحك و اتكلم :
_اومال ايه اللى تشوفه دي؟
_ما اللى تشوفه دي معناها موافقه..
ابتسم و باس راسي:
_ماشي يا زهرتي اللى يريحك هعمله
هكلمه يجي الخميس الجاي ايه رايك..؟!
مش عارفة ليه بس معالم الفرحه زهرت على وشي ابتسمت اوعي و انا بتكلم
_حاضر يا بابا....!
***
كنت قاعدة في أوضتي بتفرج على مسلسل تركي مترجم من على اللاب و باكل سوداني و مقرمشات
ماما خبطت و دخلت على طول و انا بصيت لها :
_ياماما نفسي اعرف انتِ بتخبطي ليه طلاما هتدخلي على طول كده أفرضي قاعده براحتي بقا...
شالت اللابتوب من قدامي و قعدت مكانه و هى بتتكلم :
_بس يابت قال قاعده براحتك قال
بقا في عروسه تقعد تتفرج على مسلسلات كده و قراية فاتحتها بعد يومين..؟!
_اه فيه يا ماما عادي و بعدين انا هعمل ايه بايدي المكسوره دي هقوم امسح الفيلا و لا المع تحت السرير عشان كريم هيجي يشقر عليه؟!
_اقعدي ردي عليا كده كتير
قومي يلا عشان نروح نشتري فساتين و لبس جديد و كمان في حاجات كتير ناقصه
تعالى نجيبها يلا....
اتكلمت بكسل :
_اروح فين يا ماما بشكلي ده
انا مش هخرج كده استحاله يعني..
***
_هاا يا ماما ايه رايك في الفستان ده؟
كنت واقفه في الاتيليه بقيس فستان مناسب لقراية الفاتحة مع اني عندي فساتين كتير بس ماما مُصره اجيب جديد
_حلو بس شوفي واحد غيره كده
_لا بقا انا تعبت و فرهدت من والله
دي المره الكام اللى تقولي فيها شوفي واحد غيره؟؟!
مسكت واحد بينك و ناولتهولي :
_معلش يا زهره خدي قيسي ده كده..!
خدته منها و انا بتكلم بزهق :
_يووه يا ماما بقا..!
دخلت اقيسه جوا و هى ساعدتني عشان ايدي
و كان حلو اوي فعلاً و طلعتلها و اتكلمت بسرعة قبل ما تتكلم :
_حلو اوي و عجبني يا ماما مش هقيس حاجه تانيه خالص .
_طب مرتاحه فيه
_جداً جداً و ياريت نمشي بقا عشان انا زهقت..!
_ماشي يا زهره يلا..!
مشينا انا و ماما بعد ما جبنا حاجات كتير و انا تعبت و جبت اخري
اول ماروحت خدت شاور و اتغديت و خدت مسكن و العلاج بتاعي و خدت من الڨيتامينات اللى كريم جبها
و قعدت على السرير بصيت للدبدوب الاحمر اللى جبهولي لما كنا في الملاهي
مسكته و ابتسمت تلقائي لما افتكرت اليوم ده
مين يصدق ان نفس الدبدوب و انا ماسكه دلوقتي و فرحانه كنت ماسكه و انا قلقانه
كنت قلقانه اتعلق بكريم او يكون شخص مش كويس بيتسلى و خلاص
بس هو أثبت عكس ده
نفسي اشوفه، حاسه انه واحشني
هانت كلها يومين و هشوفه
بصيت للدبدوب و افتكرت يوم ما قالي اول ما اوحشك احضنيه..
ابتسمت للذكرى دي و لقيت نفسي بحضن الدبدوب فعلاً و شميت ريحتة كريم فيه
كنت مغمضه عيني و حاسه انه حواليا فعلاً
فضلت لحظات كده لحد ما لقيت تلفوني بيرن
بصيت لقيته هو
كريم
بصيت للفون و ابتسمت ، و فتحت عليه و انا ماسكه الدبدوب و سانده راسي لورا
_الو.!
_ازيك يا زهره عامله ايه..!
_انا كويسه الحمدلله
انتَ عامل ايه؟!
اتنهد و اتكلم بصوت مرهق :
_بقيت كويس لما سمعت صوتك..!
_مالك في حاجة ولا ايه؟
_لا اليوم كان متعب شويا في الشركة
عندي شوية مشاكل بسيطه بس هتتحل ان شاء الله ..!
_ان شاء الله كل حاجة هتتحل يا كريم..!
سكت لحظه بعدها اتكلم بصوت هادي :
_عارفة مشاكلي كلها هتتحل امتي..؟!
اتكلمت باهتمام :
_امتى.؟!
_لما نكون سوا
و لما اشوفك يوم الخميس ، مستني اليوم ده يجي اوي متتخيليش انا فرحة قد ايه لما عمي علي كلمني يا زهره .!
اتوترت و معرفتش اتكلم ف قولت اي حاجة:
_اومال جودي عامله ايه يا كريم؟
ضحك ضحكه بسيطه عشان عارف اني بتهرب :
_جودي كويسه ياستي
و خدت رقمك كمان قالتلي هتكلمك على طول استحملي صداعها بقا ..!
اتكلمت بابتسامة :
_دي جودي دي عسل يا كريم خليها تكلمني عادي ..!
_طب و اخو جودي؟!
_احم ، طب انا هقفل بقا دلوقتي عشان بابا ميزعقش و.....
قاطعني و اتكلم بسرعه :
_ياستي انا خدت رقمك منه و استأذنته اصلاً اني هكلمك...
_ده على أساس ان الرقم مش معاك؟
_عارف انه معايا بس لازم استأذنه ف قولتله عايز اتكلم مع زهره في موضوع مهم و هو اداني الرقم..
_امم،
طب ايه هو الموضوع المهم ده؟!
_كنت عايز اسمع صوتك هو في اهم من كده؟!
ضحكت بهدوء و هو اتكلم :
_كنت عايز اعرف بتحبي اي نوع من الورد
عشان البوكيه اللى هجيبه معايا..!
ابتسمت و اتكلمت :
_بحب الورد الجوري ..!
_انتِ شكلك بتحبي اللون الاحمر اوي
يعني بتحبي اي حاجة بالفراولة، بتحبي الورد الجوري،
عربيتك لونها احمر ..
_ايوه انا فعلاً بحب اللون الاحمر اوي بحسه واضح و مميز كده..
قولت كده و سكت و هو سكت لحظات بعدها اتكلم :
_ايه رايك نتقابل بكرا؟
هروح اجيب ريم و وليد جوزها من المطار تيجي معايا..!
_لا مش هينفع.
_ليه.؟
_بابا مش هيوافق
_ممكن اكلمه انا عادي
_لا مانا مش فاضية بكرا يا كريم..!
ضحك و اتكلم :
_تمام ، ماشي.!
اتكلمت باستغراب :
_بتضحك على ايه؟
_على كريم اللى بتقوليها دي ، وحشتني كلمة يا كابتن و ريس اللى كنتي بتقوليلهالي على طول دي .
ابتسمت و انا بفتكر اول مره شوفته فيها :
_لسه فاكر
_امم، فاكر كل ذكرى حتى لو بسيطه
و هلى فكره لينا سباق تاني مع بعض عشان اللى فات مش هيتحسب..!
بصيت ل ايد المكسوره و اتكلمت بيأس :
_ انا فيا حيل يا كريم؟
ده انا بقيت مكسحه خلاص و مش عارفه اعمل حاجة لوحدي ،
حتى شايله هم جيتكوا يوم الخميس دي
انا مش عارفه انتَ مستعجل ليه ماتستنى لما اخف و افك الجبس..
_ما احنا نقراء فاتحه دلوقتي و لما تقومي لي بالسلامه ان شاء الله نبقا نعمل حفلة خطوبة..!
قعد يكلمني عن يومه كان علمل ازاي
و انه اول ماقفل مع بابا كلم اخته عرفها عشان تيجي بسرعه...،
اتكلمنا شويا بعدها قفل عشان وراه شغل هلى اللاب هيخلصه و ينام
لما قفلت مع كريم كنت مبسوطه
مبسوطه عشان بكلمه و انا مرتاحه....، يعني في الاول كنت عايزه اتكلم معاه و اشوفه بس خايفه
خايفه حد يعرف ماما او بابا او يحيى حتى
خايفه لاني عارفه اني بعمل حاجة غلط إذا كان قدام نفسي او قدام ربنا
لكن دلوقتي مبسوطه بجد و مطمنه اني مش غلط و مش بعمل ذنب
مطمنه ان لو ماما او بابا دخلوا الاوضه عليا و انا بكلمه مش هبقا قلقانه و لا خايفه بقا و اقفل بسرعه
لا هبقا مطمنه اني مش بعمل حاجة غلط
و هو ده الفرق بين العلاقة المحرمه اللى كلها خوف و قلق
لعلاقة في النور و تكوني في السليم قدام ربنا و قدام نفسك و قدام اي حد تاني ..!
قفلت مع كريم و انا مبسوطه ف كنت عايزه اشكر ربنا
قومت اتوضيت و صليت ركعتان شكر و كمان صليت العشا عشان انا من ساعة ماجيت من المستشفى ماصلتش
و ده اهمال مني، كنت بصلي بحذر عشان ايدي و بصلي على قد ما اقدر احرك حركات جسمي صح
بس قلبي كان بيصلي معايا بجد
كنت بشكر ربنا و بحمده بجد
اصل الصلاة دي مش المفروض نصليها عشان فرض و بس
لا
احنا بنصلي لما نكون عايزين نطمن عايزين حد يطبطب على قلوبنا
عايزين نتواصل مع ربنا بدعواتنا و هو يرد علينا باستجابه
نريح قلوبنا و نقلل الذنوب،
الواحد كل لما ذنوبه بتكتر كل لما بيبقا في غفلة اكبر و قلبه بيقسى اكتر
الاول كان بياخر ف الصلاة، بعدين بقا يسيب فرض و يصلي الباقي
بعدها قلل فروضه و قاطع النوافل
لحد مايلاقي نفسه قطع الصلاة خالص و بعد عن ربه
و حياته تبوظ اكتر و قلبه ملئ بالذنوب
و التهى بغفلة الحياة و نسي اخرته..
ف الصلاة دي احنا اللى بنحتاجها مش ربنا ، احنا اللى بنصلي عشان يطمنا و يريح قلوبنا
و مهما نحط اعذار مالهاش قيمه اصلا
زي اصلي عندي دور برد و مش قادره اقف ، اصلي مكسله، اصلي مصدعه، اصلي ملحقتش اصلي
طب ماتصلي ، صلي و انتِ تعبانه و ادعي بالشفاه ليكِ هتلاقي ربنا يستجاب،
في ناس بتصلي بقلبها او بعيونها وبس عشان جسمها مشلوش من الحركة
جسمها مش بيتحرك بس مع ذلك بيصلوا ف احنا ايه يمنعنا عن الصلاة الا انه استهتار و بس
يعني كسر ايدي مش عائق أبداً اني افضل بروطه في سريري و اقول اصلي تعبانه و مش قادره ..!
خلصت صلاة و كمية الراحه اللى حسيت بيها مش طبيعية
ظبت المنبه على الفجر و لسه هنام لقيت هنا بترن عليا
_ يا اهلاً يا هنون وحشاني والله
ابتسمت و اتكلمت بصوتها الرقيق :
_ازيك يا زهره عامله ايه؟!
_فل الفل، انتِ ازيك؟!
_بخير الحمدلله...
سندت ضهري لورا وغمزت و انا بتكلم و كأنه يشافني يعني:
_طب ايه مش ناويه تحني على الولا طيب؟
صوتها جالي مكسوف و انا متاكده ان وحشها أحمر و اتكلمت :
_انا كلمت بابا خلاص و حدد ميعاد
تشرفوا الخميس الجاي لو مناسب..!
_هو ليه كله بيختار الخميس ياستي؟
اي خميس الجاي ده!
_اه، مالو؟
اتكلمت بإبتسامة بلهاء :
_مفيش بس جايلي عريس الخميس الجاي ده
لو ينفع تخليها الجمعه و نيجي كلنا و اجيبه معايا بقا هيبقا من العيله خلاص..!
كنت بتكلم بفرحه كبيره معرفش مالي في ايه
هنا ابتسمت و اتكلمت :
_الف مبروك ياحبيبتي فرحتلك اوي ، تمام هنستناكوا الجمعه الساعة 7 ماتتاخروش و هبعت لك لوكيشن..
_تمام ، و انتِ تعالي الخميس كمان
_مش هينفع والله هكون بجهز نفسي و كده..
_ماشي يا هنونه و انا هقولك ل يحيى برضوا
ولا انتي عرفتيه؟
_لا انا قولت اقولك انتي اصلي مش فاضيه اكلمه..!
_مش فاضيه ايه؟
يابنتي انتي طول النهار في الشغل معاه في الشركة مش عارفه تقوليلوا موافقه و تعرفيه الميعاد..!؟
_خلاص بقا يا زهره ما انا عرفتك انتي اهو يلا عرفيهم بقا سلام..!
_باي..
قفلت مع هنا، فهمت انها لسه بتتحرج منه
انا مش عارفه هى مالها ، يعني الاول في تردد من فكرة الجواز و خدت وقت كتير تفكر
و محرجه تكلمه كمان امال وافقت ليه مش عارفه..!
***
عدت الايام و جيه يوم الخميس أخيراً
كمية التوتر اللى انا فيها مش طبيعية عمتًا
ماما كانت مشغوله مع فادية شوية و التجهيزات و شكل الفيلا و الاكل و المقبلات
و معايا شويتين
اليوم ده انا اول ماصحيت و فطرت لقيت ماما مسكتني بقا مسكات وحركات و حمام زيت و حمام كريم مع اني هلبس الطرحه عادي بس مش عارفه في ايه
خلصنا فقرة المسكات و الاسكربات و دخلت اخد شاور
و الصراحة بحس بالذل و انا بستحمى بايدي المكسوره دي..
اول ما طلعت من الحمام ماما نشفت شعري و سرحته كويس عشان انا مش هعرف اسرحه لنفسي
و ليقيتها جايبه ممرضه كمان تفكلي جرح راسي و حطت لزقه صغيره عليه بدل اللزقه اللى كانت واكله نص وشي دي!
ماما وصلت الممرضه على الباب و اختفت في المطبخ تاني و انا كنت لابسه بيجامه عادي و قاعده في الاوضه ماسكه الفون بكمية روقان غير مبالي بتفرج على روبانزل و بغني معاها كمان
سمعت خبط على الباب ٣ مرات بانتظام كده
دي استحاله تكون ماما، عشان ماما بتخبطت و تدخل على طول
و فاديه لما بتخبط بتحط ايدها على الباب و مش بتشيلها غير لما تزهق
_مين؟!
_انا يا زهره.
ده يحيى اللى عمره ما جالي الاوضه عايز ايه الولا ده
_عايز ايه يا يحيى
_ممكن ادخل..!
_لا استنى.!
لطعته ٥ دقايق على الباب عشان البس الاسدال بعدها قومت فتحت له
_عايز ايه ياعم.؟!
كان بيحرك راسه يمين و شمال بيحاول بيبص على الاوضه ورايا
_عايز اشوف الفستان اللى هتلبسيه.!
اتكلمت باسغراب:
_ليه..؟!
هز كتفه و اتكلم ببساطه:
_كده
_هو ايه اللى كده ، هو كده دي اجابه يعني.؟!
سكت لحظات تقريباً كان بيفكر بعدها اتكلم بزهق :
_زهره امك عايزاكي تحت و بتنادي من بدري..!
_ماما؟!
_اه انزليلها يلا..!
بصيت له بشك و نزلت فعلاً بس اول ما طلعت مالقتش يحيى ولا لقيت الفستان اللى كنت معلقاه على الشماعه
دورت عليه كتير في الاوضه و ملقتهوش
نزلت دورت على يحيى و مش تحت
_ماما هو يحيى فين؟
_معرفش مشي تاني و قالي رايح مشوار و جاي..!
بصيت لها بدهشه و مره واحده صوتت :
_اه يا يحيى يا حرامي اكيد خد الفستان عشان يديه ل هنا صح..؟!
كنت بقول لماما كده على اساس انها تنصفني مثلا لقيتها بتزقني برا المطبخ و هى بتكلم فادية :
_اوعى انتِ كده اطلعي انا مش فاضيالك
بصي يا فادية زودي من العصير ده و اعملي صنية كيكه زياده تاني بس بطعم مختلف..!
فضلت تكلمها و متجاهلاني تمامًا ده ايه الاسلوب الكلابي ده بس ياربي
دي مش معامله دي..!
طلعت الاوضه و انا مش عارفه اعمل ايه فضلت واقفه شويه في البلكونه مستنيه بابا يجي
و لقيت عربيته وصلت تحت
_شوفت يا بابا ابن اخوك الحرامي عمل ايه؟
خد فستاني من ورايا يديه ل هنا..!
_انتِ عبيطة يابنتي ايه اللى بتقوليه ده..؟!
_ايوه هو خده ،
و كريم و اهله على وصل، ساعة ولا اتنين و هلقيهم هنا و يحيى خد الفستان و اتقطع ..!
لقيت بابا منع ابتسامته بس حط ايده على كتفي و طلع معايا فوق :
_طب تعالي كده ندور عليه سوا؟
اول ما طلعنا و فتحت الباب و شاورت له يدخل
_اهو دور و مش هتلاقي الفستان، اكيد خده لهنا خطيبته ايوه..!
بابا دخل و انا دخلت وراه و اول مادخلت لقيت فستان احمر على السرير شكله تحفه احلى ميت مره من اللى كان معايا
و جنبه في بوكس كبير لونه احمر و بشريط اسود
بصيت لبابا بدهشه و بابا اتكلم :
_ما الفستان اهو يا بنتي..!
قربت من الفستان و مسكته :
_لا مش هو ده يا بابا
_هو في غير ده يعني يا زهره؟
قومي جهزي نفسك يلا و انا هبعت لك ماما تساعدك..!
قالي كده و خرج و قفل الباب و انا بصيت للبوكس الكبير اللى جنب الفستان و فتحته
لقيته مليان هدايا
ميكب على سكين كير على شيكولاتات و كذا علبة زبادوه فراوله و عليه ورقة مكتوب عليها
"ل احلى فراولايه"
و كان فيه ورد واحده و فيها جواب
"لعروستي الجميلة، ل احلى زهره في البستان"
حسين بالفرشات اللى بتطير حواليا؟
طب شايفين عيوني اللى بتطلع قلوب دي؟!
لقيت كريم رن عليا و انا خدت الفون بسرعة و رديت
_الو
صوته جاي رايق كانه مبسوط و مبتسم :
_البوكس وصل؟!
_اه تحفه اوي بجد عجبني
_و الفستان مقاسك.؟
بصيت للفستان و ابتسمت :
_اكيد هيبقا مقاسي مش خدت واحد تقيس عليه..!؟
ضحك و اتكلم :
_فكرة جودي دي.!
_انك تجيب الفستان و البوكس؟
_لا اني اخلي يحيى و عمي علي يساعدوني..!
_ده انا هنفخه يحيى ده ماشي..؟!
ابتسم :
_طب ممكن تنفخيه بعدين.؟
قومي اجهزي يلا عشان احنا على وصول اهو...!
_حاضر باي
_مع السلامه.!
قفل من هنا و طلعت جري على اوضتة يحيى و مالقتهوش نزلت تحت و سمعت صوته جاي من المطبخ
دخلت المطبخ و لقيت يحيى واقف و كان معاه ماما و بابا و فادية
و بياكل صوباع ورق عنب و يتكلم بتلذذ :
_لا بس اتحسنتي في الطبخ كتير يا عيوشه تسلم ايدك بجد..!
_تسلميلي يا حبيب عيوشه ، خد يا علي دوق دي كده
سيبت ماما و بابا بيتانقشوا و روحت ل يحيى اللى اتفاجئ اني ظهرتله من العدم
و ابتسم ببلاهه و هو بياكل
_زوزا انتِ هنا؟ ، تعالى كلي ورق عنب هيعجبك اوي..!
_ورق عنب ايه؟
بقا تاخد الفستان من ورايا و تخليني الف حوالين نفسي يا يحيى..؟!
_انا مالي مش خطيبك هو اللى قالي اعمل كده..!
سكت و عيوني طلعت قلوب اول ما قال خطيبك
الله هو بقا خطيبي خلاص؟!
يحيى كمل و هو بياكل صباع تاني :
_و على فكره انا سمعتك و انتِ بتقولي يحيى سرق الفستان يديه لخطيبته
هدي فستانك ل هنا ليه لاموأخذه يعني
معيش اجيب لها فستان..!
انا مكنتش سامعاه خالص، كنت لسة سرحانه في كلمة خطيبك دي
يحيى خد باله اني لسه هيمانه في الكلمه راح ضربني على كتفي بخفه
_في ايه يابت ماتتلمي كده..!
شوحت بايدي و انا طالعه الاوضه :
_ياخويا خليك في حالك
روح كلم بسكوتك روح..!
قولت كده و طلعت على طول و ماما جت ورايا و ساعدتني البس الفستان
***
_يعني ده اخر كلام ياجدي و برضوا مش هتيجي معايا؟!
جدي كان قاعد على الكنبه في الليفنج و شرب من قهوته ببرود و مردش عليا حتى و سايبني اتكلم مع نفسي..
ريم قربت من جدو و اتكلمت معاه برجاء :
_لو سمحت يا جدو تعالى معانا ماتكسرش فرحته..!
مردش عليها برضوا و كان متجاهلنا كلنا و ده ضايق جودي اللى اتكلمت و هى بتشدني :
_خلاص يا كريم سيبك منه مش مهم يجي ولا لأ تعالى نروح احنا..!
جدي بص لها و أخيراً اتكلم معاها بس بعصبيه :
_انتِ ناقصه ربايه على فكره...
و قام كمل كلامه و هو بيمسكها من ايدها جامد :
_الظاهر اننا دلعناكي زيادة عن اللزوم و انا هرجع اربيكي من اول و جديد..!
_اوعى سيب ايدي كده
كانت بتشد ايدها منه و انا اتدخلت بسرعه و حوشت ايدها من ايد جدي
_خلاص يا جدي سيبها و براحتك لو مش عايز تيجي كنت فاكر اني أهمك..!
_انتَ اللى مش شايف الصح يا كريم و انا بحاول انبهك .
_لا انا عارف انا بعمل ايه كويس يا جدي...
سيبتله ورقه قدامه :
_العنوان اهو لو حابب تيجي و تفرحني هتنور يا جدي..!
سيبت الورقه و مشيت وانا ماسك ايد جودي معايا
اول مافتحت بابا الفيلا و طلعنا برا لقيت حازم و معاه اتنين من صحابي المقربين واقفين مستنيني
روحتلهم بتفاجئ و حازم اتكلم بإبتسام ةو هو بيقرب :
_يلا يا عريس عشان مانتأخرش ..!
_عرفت منين..!
قبل ما يتكلم لقيت جودي بتزق كتفي بكتفها :
_عيب عليك يا زميلي احنا مش هنروح لوحدنا اكيد
قولت ندخل على العروسه بزفه كده ..!
بصت لحازم و غمزت :
_جبت الامانه؟
رفع لها ايده بشماريخ و غمز زيها:
_طبعاً..!
اتكلمت هى بحماس :
_و انا جبت الصب بتاعي اللى بشغله بليل لما بتجيلي الحاله و جدي بيجري وريا بعصاية المقشه.
_فين الصب ده
_في عربية كريم ، تعالى يا كريم انا هركب معاك و هحفظك الاغنية كويس عشان تغنيها وانتَ داخل للبونيا..!
_بونيا..؟!
_اه يلا يلا..
شدتني و ركبت انا و هى و ريم و وليد في عربيه
و حازم و الباقي في عربية....
***
_هاا يا بابا مفيش اخبار عن كريم؟
_لا لسه
_طب و فارس هيرجع امتى؟!
عدلي بص لسلمى و اتكلم ببرود :
_كلمته و قولتله يجيي و هو هيشوف دنيته و يرجع ..!
_امم، طب و.....
_استني كده ده عزت بيرن عليا...!
اتكلم مع جد كريم و ملامحه كانت بتتغير بعدها بص لسلمى و قام اتكلم بعيد و بعد ماقفل راح لها تاني :
_انتي ليه ماقولتيش ان كريم متقدم لزهره؟!
بصت له و اتكلمت ببرود :
_عادي يعني مش مهم
كده كده هيسبها و يخطبني صح..؟!
قالت كده و كأنها مستنياه ياكد لها و هو بص لها شويا و هز راسه بالايجاب :
_ايوه صح..!
بصت له بترقب :
_هو جد كريم قالك ايه؟
_بصي يا سلمى هو قالي هيوافق كريم مؤقتًا في رأيه عشان مايتمرضش عليه بس في الاهر هيخطبك انتي..!
_قصدك ايه؟
_اقصد ان كريم هيخطب زهره بس هيسيبها تاني
جده هيقف معاه بس هيفرقهم عن بعض
مش انتي المهم عندك تبعديه عن زهره..؟!
_اه
_خلاص و هو ده هيحصل بس اصبري شويا..!
اتنهدت و سكتت و هو قالها بترقب :
_انتي قلبتي على زهره ليه؟!
هزت كتفها و اتكلمت ببساطة :
_ماقلبتش عليها هى اللى سابتني و انا عايزه اندمها على ده..!
***
في أوضة زهره..
كنت واقفه قدام المرايه و بشوف شكلي بعد ما لبست
الفستان كان ضيق و ماسك فيا من فوق و نازل على وسع من عند الوسط
و القمام كانت قصتها حلوه اوي كانت نازله بوسع و قصه جميله ، و ايدي كانت مداريه و الجبس مش باين ،
كنت لابسه"حمالة ذراع" لونها اسود بس كانت مضيقاني
و الفستان كان لونه برجندي مش احمر اوي يعني
و ماما ساعدتني و لفت لي الطرحه كانت سودا
و حطتلي ميكب بسيط و حلو..
اصل ماما محترفه في الميكب اصلاً، ماما كانت من البنات اللى بتهتم باللبس و الميكب اوي و كانت تلبس كل حاجة عادي ضيق او قصير عادي،
و اول ما درست لغات و من ضمنهم اللغه العربية و حبت العربي و عرفت كمان ان العربي في القران الكريم اصعب من اللى هى بتدرسه ده
التجويد بقا و كده
ف حبت العربي اكتر و تعمقت فيه لحد ماعرفت احاديث و قصص للانبياء و تفسير بعض ايات القران
و ده كان اول طريقها للاسلام
و ده يدل ان ربنا بيبقا عاين لنا الخير بس احنا مش شايفينوا دلوقتي ف الانسان لما بيصبر بينول ..!
انا خلصت و جهزت خلاص ، و نزلت تحت مع ماما كلنا كنا جهزنا و بابا و ماما كانوا بيتكلموا مع بعض و هما مبسوطين
و انا و يحيى كنا بنتصور سوا
كانت كل حاجة بيرفكت ماعدا شكل ايدي المتجبسه دي مضيقاني اوي..،
و كريم اكيد كان جايب الفستان بالقصه دي عشان يكون مريح على ايدي..!
كنا قعدين لحد ماسمعنا صوت اغاني جاي من برا، طلعنا كلنا نشوف في ايه
و اول ما طلعت لقيت كريم وصل و معاه جودي و 4 رجاله كمان و بنوته تاني أظن دي ريم كانت شايله شنط و علب في ايدها
و كريم كان ماسك بوكيه ورد كبير اوي و شكله تحفه كان الورد الجوري اللى قولتله يجيبه
صحابه كانوا مولعين شماريخ ام لون دي و مهيصين و جودي كانت ماسكه واحده معاهم
و كريم داخل ب بوكيه الورد و هما ماشيين حواليه و جودي كانت ماسكه صب في ايدها التانيه و مشغله اغنية
بابا قرب لهم هو و يحيى
كريم عيونه كانت عليا انا وبس
و كلمات الاغنيه صوتها عالي حوالينا
ناولني بوكيه الورد و هو بيغني مع الاغنية :
_احساسك ايه انهارده و انا جاي لك في بيتك؟
جاي اقول ل اهلك قد ايه انا حبيتك..
خدت الورد و ابتسامتي من الودن للودن و هو كمل و هو بيبص في عيوني و بيضحك :
_جاي للبيت بحاله نتكلم يوم بطوله
جواه قلبي الكلام بس ياربي اعرف
اقوله......
جودي جت قاطعته و هى بتمسك ايدي و تلفني و غنت هى بصوت عالي :
_و اكيد قلبك بيرقص و اكيد قلبك قلقان
ما انا بردو زيك و اكتر مستني من زمان
اليوم اللى تبقى فيه دايما حواليا
اقدر احبك و اشيلك جوه عنيا ..!
جودي حضنتي و باست خدي و ابتسمت :
_مبروووك يا خطيبة اخويا احلى عروسه يا ناس..!
خلصت كلامها و باستني مرتين تاني و انا بصيتلها بأستغراب و انا بضحك و هى اتكلمت بغمزه :
_دي من كريم هو وصاني ابوسك بداله..!
كريم برق و نغزها في ايدها :
_انا قولت كده يابت ..
ريم جت و سلمت عليا و حضنتي هى كمان و كريم عرفني عليها و على صحابه و على جوزها
دخلنا كلنا جوا و قعدنا
كنا مبسوطين بس انا لاحظت ان جد كريم مجاش بصيت حواليا و كريم خد باله و همس لي
_مالك محتاجة حاجة..؟!
_هو جدك مجاش ليه؟
هو مش موافق يا كريم؟!
بصلي بتوتر و ماكنش عارف يقول ايه و مره واحده الجرز رن و فادية فتحت الباب
و انا باصه لكريم مستنياه يجاوب بس قبل مايتكلم لقيت جده دخل و في ايده علبة حلويات و جاتوه كبيره و هو مبتسم
_انا اسف على التاخير بس الطريق كان زحمه...!