رواية الفراق هو نصيبنا الفصل الثاني عشر12 بقلم حبيبة الديب
(12)
_انا اسف على التاخير بس الطريق كان زحمه ..!
جد كريم قال كده و هو داخل و عرف عن نفسه و بابا و يحيى استقبلوه
كريم بانت عليه الفرحه هو و ريم
بس جودي ماكنتش مطمنه لجدها..!
بابا و جد كريم كانوا بيتعرفوا على بعض و يتكلموا
و انا و ماما كنا بنتكلم مع ريم و جودي و انسجمنا سوا ، و كريم و صحابه و يحيى كانوا قاعدين مع بعض برضوا
فضلنا كده لحد ما جد كريم بدأ كلام و كانوا بيتفقوا سوا، و ماما خدتني على المطبخ اجهز قهوه،
برا و هما بيتفقوا و يتكلموا في تفاصيل الخطوبه جودي همست لريم :
_بقولك ايه انا هدخل لزهره جوا ماشي؟
ريم عيونها وسعت بدهشه و همست لها :
_تروحي فين اتهدي بقا، انتِ عايزه تدخليلها المطبخ؟!
جودي اتكلمت ببساطه:
_اه فيها ايه يعني ماحنا بقينا اهل.!
_اهل ايه يابنتي دول لسه بتفقوا و اسكتي بقا..!
جودي بصت لها بدون اهتمام و قامت و اتكلمت و هى بتبص ل علي :
_لو سمحت يا أونكل ممكن ادخل لزهره جوا..؟!
كريم برق لها و اتكلمو هو بيجز على سنانه :
_تدخلي فين يا جودي اقعدي هى جايه دلوقتي..!
على ابتسم :
_لا سيبها براحتها يا كريم،
ادخلي لها جوا عادي..!
جودي ابتسمت و دخلت بحماس، و عزت بص لكريم بعدم رضا و كأنه بيقوله "شوفت تصرف اختك؟ "
جودي دخلت المطبخ لقت زهره بتحضر القهوه و عائشه بتساعدها
_يارب يا ساتر ممكن ادخل..؟
عائشه ابتسمت و بصت لها :
_تعالي يا حبيبتي ادخلي..!
جودي دخلت و بصت لزهره بإبتسامة :
_اساعدك؟!
زهره ابتسمت و ردت عليها و هى بتحط القهوه على النار :
_لا انا خلصت خلاص
تسلميلي..!
_طب عملتي قهوة كريم؟!
_ما دي ليهم كلهم مظبوط زي ماهما عايزين..
_لا مانتِ لازم تعرفي ان قهوة العريس بتبقا مميزه..!
زهره ضحكت و بصت لمامتها بعدها بصت لها :
_مميزه ازاي مش فاهمه؟!
_يعني المفروض تحطيله ملح في القهوة
مش بتتفرجي على تركي ولا ايه..!
_اااه صح ده انا نسيت خالص، كويس انك فكرتيني بجد
هعمل واحده مخصوصه لكريم..!
جودي سقفت و اتكلمت بحماس :
_ايوه هو ده الكلام...!!
عائشه بصت لهم بدهشه و اتكلمت بسرعه و هى بتشد من زهره الملح :
_خدي هنا هتعملي ايه يا منيله انتِ؟!
جودي اتكلمت بدفاع :
_سيبها يا طنط دي عادات و تقاليد مهمه جدا..!
_عادات مين بس انا اول مره اسمع العادات دي!
_عادات التركيين يا طنط..!
_و احنا مش تركيين بقا، نحط للراجل ملح في قهوته ليه؟
توجعيله بطنه هو مش اخوكي يا بنتي بتعملي فيه كده ليه..!
جودي ابتسمت و اتكلمت بدهشه :
_في ايه يا طنط انتِ حسستيني اني بوصيها تنيمه جعان او تطرده مثلا
و بعدين ده ملح مش سم يعني..!
زهره استغلت انشال امها مع جودي و حطت ملح لكريم و هى بتصب له فنجانه ، بعدين غمزت لجودي و اتكلمت :
_خلاص يا جودي انا عملتها يلا نخرج يلا..!
خرجنا برا و جودي اللى كانت ماسكه الصنية و ماشية جنبي و انا بقدم القهوة
الاول اديت لجد كريم و هو بص لي بتفحص و باصص لي كده من مناخيره ، بصيت لجودي اللى همست لي في ودني و احنا ماشيين
:
_ عارفه يا زهره أنتِ كنتِ حطيتي لجدي ده ملح في قهوته، ملح ايه لا ده تحطيله فلفل اسود و شطة والله..!
بصيت لها بأستغراب بس ضحكت من رد فعلها ده، باين لها مش بتحب جدها
قدمت لهم كلهم القهوة و جيت عند كريم و اتكسفت من نظراته
قدمت له قهوته ام ملح بتردد و مش عارفه رد فعله هيكون ايه، خد القهوة و همس لي بسرعه :
_الفستان حلو فيكِ اوي..!
ابتسمت بحياء و مشيت بسرعه قعدت جنب ماما و هو لسه بيبص لي بابتسامه حلوه اوي حركت مشاعري حرفيًا
اتفقوا على حاجات كتيره زي اننا هنعيش في بيت كريم الخاص مش في الفيلا و دي حاجة ريحتني
و اننا هنوضب البيت على زوقي و حددتنا الخطوبة بعد ما افك الجبس و هنجيب الشبكة بعد بكرا..!
بعد الاتفاق قرينا الفاتحه بعدها سمعنا صوت فادية وهى بتزغرط بفرحه و ماما جنبها بتحاول تعمل زيها
كريم بدأ يشرب قهوته و هو باصص لي بابتسامه ، لحظه و ابتسامته اختفت و ملامحه كرمشت و انا بصيت لجودي اللى كانت مركزه و ضحكنا سوا
ماما بصت لنا بشك :
_مالك بتضحكي على ايه..؟!
_احم، لا مفيش ..!
جودي بصت لكريم و اتكلمت :
_بص يا كيمو لو بتحب عروستنا بجد لازم تخلص القهوة عشان تثبت لنا..!
كريم ابتسم و بص لها:
_فكرتك دي صح؟!
_ اومال..!
بص لي و هو محافظ على هدوءه و ابتسامته و اتكلم :
_لو ده هيثبت لها هى فـ ماشي..!
قال كده و بدأ يشرب، المشكلة انه اتكلم عادي قصاد بابا و يحيى و ماما و قصاد الكل عمتًا و ده احرجني بس انبسطت و انا شايفاه بيشرب القهوة رغم طعمها اللى اكيد هتوجع له بطنه..!
ماما كانت بصالي بصة تخوف و حساها هترميني باي حاجة ف وشها دلوقتي بس ماسكه نفسها...
كريم شرب القهوة و ماما جت نحيتي بكوباية مايه اديهاله
_طب ما في مايه قصاده مايشرب هو
_يابت خدي اديهاله و اسمعي الكلام..!
خدتها و روحت نحيته نولتهاله و هو لما صدق شرب مايه
هى القهوة وحشة اوي كده؟!
شرب و اداني الكوباية تاني و اتكلم و هو حاطط ايده على بطنه :
_ماتشوفيلي مسكن كده
اتكلمت بتأثر :
_بطنك وجعتك!؟
_لا مش اوي بس عايز مسكن و هبقى كويس..!
جبتله مسكن و وقفت جنبه وسط الاغاني و الزغاريط دي و جودي و ريم وقفوا جنبي يتصورا،
بعد شوية كنا طلعنا برا كلنا في الجنينة
كريم بص ل ريم و اتكلم :
_فين الحاجة يا ريم.!
_اه، دقيقة هجيبها و جاية.
راحت الصالون تاني و جت بشنطتها و طلعت منها علبة و ناولتها لكريم،
فتحها و كان فيها طقم خاتم و انسيال سوا، كان شكلهم شيك اوي قرب مني و لبسهوملي و انا لبسته دبلة برضوا
و انا بلبسهاله في ايده ابتسمت بخجل و همست له:
_ماكنش له لزوم لده كله يا كريم..!
تجاهل كلامي و اتكلم بجدية و الفرحه باينه في عيونه :
_وفيت بوعدي اهو يا زهرتي.!
ابتسمت له و انا بفتكر اول مره قالي يا زهرتي و انا كنت بقف له ، و لما رفضت اخرج معاه برضوا و هو قالي هيتقدم رسمي ساعتها ماكنتش مصدقاه
كنت فكراه بيهاودني بالكلام وخلاص و مش ناوي فعلاً على افعال
بس طلع قد كلامه فعلاً
_هو انتَ بتعمل كل ده ليه يا كريم.؟!
قولت له كده و انا كنت مستغرية فعلاً ، يعنى معقول لحق يعجب بيا او يحبني حتى؟!
ابتسم و اتكلم ببساطه :
_طب انا اثبت لك اعمل اي اكتر من كده عشان تعرفي اني بحبك يعني.؟!
يانهار أبيض!!
ده قالها بجد، ازاي يقولها كده قدامي
طب اروح فين اجري دلوقتي
=بتهمسوا لبعض بتقولوا ايه يا حلوين..!
جودي منقذتي جت، الحمدلله..!
_جيتي في وقت غلط وبعدين وانتِ مالك انتِ؟!
_مش كده يا كريم طيب ماتكسفنيش قدام مزتك كده ..!
برقت لها بدهشه من كلامها، ايه العيلة دي بس
ماهو مش اي كلام يتقال في الوش كده انا بتكسف بسرعة اصلاً ..!
اتكلمت عشان اتوه في الموضوع ده :
_بطنك لسه وجعاك يا كريم؟!
_لا بقيت احسن دلوقتي.!
بص لجودي و اتكلم :
_تعالي صورينا صور حلوة كده سوا نعلن بيها قراية فتحتنا ..!
عدلت الفستان و الطرحه و قلعت "حامل الذراع" عشان مايبنش شكل ايدي و تنيتها انا و وقفت جنب كريم نتصور
اتصورنا كذا صورة و احنا رافعين ايدينا ب الخاتم و الدبلة عشان يبانوا و صورة و هو بيقدم لي بوكيه ورد
و كذا صوره تاني و يحيى و بابا اتصوره معانا، بعدها خدنا صور كتير للعيلة كلها سوا و مع ان جد كريم كان مكشر و حساه جاي غصب عنه بس لقيته ابتسم في الصور عادي و بدأ يفك شوية و خد على بابا اوي كمان..!
بعد ما اتصورنا دخلنا جوا اتغدينا بعدها قضينا اليوم كله سوا..!
كريم و اهله مشيوه و اليوم كان حلو اوي و الكل انبسط و المفروض بكرا كلنا رايحين نخطب ليحيى، و كريم جاي معانا كمان..!
طلعت اوضتي بعد يوم طويل و أخيراً قعدت على سريري و هنام،
بس قبل ما انام مسكت الفون و بدأت اتفرج على الصور اللى كانت روعه
جيه في بالي اغير خلفية الفون دلوقتي معرفش ليه بس حطيت صورتي مع كريم خلفية للفون، و بروفايل لأكونتاتي كلها كمان و جيت اغير الحالة الاجتماعية بتاعتي و اعمل مخطوبة بس لقيت كريم سابقني هو و عمل كده ..!
بصيت للصور و ابتسمت و قفلت الفون حطيته جنبي و طفيت النور و كنت لسه هنام بس سمعت صوت ماسدج جت لي
ده اكيد كريم...
مسكت الفون تاني بحماس بس طلع مش كريم
كانت رسالة من رقم غريب
"افرحي مؤقتًا و انشري صوركم يا زهرة بس خليكي فاكره انها فرحه مش دايما"
استغربت بس قبل ما ارد اتبعت رسالة تاني
"كريم بيضحك عليكي اصلا و هو ناوي يسيبك قريب و هتشوفي
هو مصيره يبقا معايا انا "
مع ان الرقم كان غريب بس كنت متاكده ان دي سلمى، انا عملت بلوك لكل ارقمها و رقم باباها كمان، فـ دخلت لي من رقم غريب......
و بكل هدوء عملت بلوك تاني و مسحت الشات
من غير ما ارد عليها بس غصب عني دموعي نزلت، صعب لما صاحبتي الوحيده تبقى عدوتي كده في يوم و ليلة
صعب عليا اشوفها بتأذيني بلا اي سبب كده، كل ده عشان سيبتها؟!
بس ماكنش ينفع افضل معاها، ماينفعش تأذيني بقصد و تطلع مريضة كده و عايزاني اسامحها و تفضل جنبي
ولما ارفض اننا نرجع صحاب تخليني اكرها اكتر بتصرفتها..،
كريم اللي كانت بتيجي تعيط لي عشان اساعدها اطفشه و ماكنتش عايزة تشوفه حتى، دلوقتي بتعافر عشان تاخده بعد ماعرفت اني اتعلقت بيه
بعد ما عرفت انه خلاص اتقدم لي و بقينا سوا بقت عايزاه طب ليه من الاول تدخلني في حواراتها..؟!
ماكنش فيه اجابه لسؤالي ده، بس كل اللى اعرفه ان فعلاً سلمى مريضة و انا عملت اللى عليا معاها و كفاية اوي اني مابلغتش عنها لما وقعتني من على السلم و كان ممكن اموت فيها
بس اخر محاولة مني تجاها هى اني هعرف ابوها بمرضها و تصرفتها دي
لازم يتصرف و يعرضها على دكتور امراض نفسية، مأذنش ان تصرفتها دي طبيعية ، اكيد ده مرض..!
الليلة دي بعد ماكنت مبسوطه و طايرة من فرحتي، نمت بالعافية من كتر التفكير و القلق
بس بصبر نفسي اني واثقة اني كريم عمره ماهيسيبني و اكيد سلمى بتهدد و خلاص
عايزه تقلقني و بس، بس انا متاكده ان كريم ممكن يعمل اي حاجة عشان نبقى لبعض
انا خلاص بقيت واثقة فيه ...
***
في فيلة كريم اول ما وصلوا دخلوا كلهم الصالون
جودي كانت قاعده بتتفرج على الصور و جنبها ريم قاعده بتتكلم مع جوزها،
و جد كريم سابهم و طلع فوق على طول و كريم تابعه بنظراته
جودي خدت بالها و قفلت الفون، بصت له و اتكلمت بجدية :
_بس مش غريبة انه جيه يا كريم؟!
احنا اتحايلنا عليه كتير مجاش ليه من الاول؟
انا مش مطمناله على فكره..!
ردت ريم :
_بلاش تظلميه يا جودي هو اكيد جيه عشان مش حابب يزعل كريم ..!
اتكلم جوزها و رد :
_انا رأيي كده برضوا..!
كريم سكت لحظه و اتنهد قبل ما يتكلم :
_ اتمنى يكون نيته خير لما جيه
و مايكونش ناوي على حاجة، عشان بجد انا ساعتها مش هسكت و هو ينسى انه ليه حفيد...!
كريم قال كده و طلع أوضته و هو طالع شاف جد كان واقف على السلم لسه، و عرف انه سمع كلامه، تبادله النظرات بصمت لحد ما كريم عدى من جنبه و مشي بهدوء و هو بيتمنى ان جده مايكونش بيخطط لحاجة ..!
***
نمت قرب الفجر وللاسف كان صعب عليا اصلي الفجر عشان فاتني و مسمعتهوش، صحيت متاخر بعد الضهر كده
و هما سابوني انام برحتي و هما بيجهزوا نفسهم و الهدايا اللى هيروحوا بيها لبيت هنا ..!
يحيى كان باين عليه مبسوط اوي و متحمس و بابا و ماما كمان فرحانين ليه جداً
و انا على قد ما اقدر بحاول انسى كلام سلمى و ابقى مبسوطه برضوا .
خلصنا كلنا و كمان كريم جيه بعدها اتحركنا كلنا سوا
ماما و بابا في عربية و انا و يحيى و كريم في عربية،
كريم كان قاعد جنب يحيى قدام بس نظراته كانت عليا طول الوقت، كان بيص لي من المرايا و انا كنت سرحانه و انا بتفرج من الشباك ..!
و بعد ما وصلنا كلو طلع بس هو مسك ايدي بسرعه :
_استني يا زهره عايزك
بصيت لماما و بابا و يحيى لقيتهم طلعوا و مش واخدين بالهم بصيت اه تاني :
_في ايه؟!
_مالك
حاولت ابتسم :
_ماليش، هيكون مالي يعني
_في حاجة حصلت معاكِ؟!
قبل ما ارد اتكلم هو :
_ياريت ماتخبيش عني، في حاجة حصلت لك؟!
حد ضايقك؟!
اتنهدت و بصيت له :
_طب مش دلوقتي طيب... نتكلم بعدين لازم نطلع دلوقتي.
جيت اطلع وقفني تاني :
_هتحكيلي صح؟!
_ايوه بس يلا نطلع الاول ماينفعش وقفتنا دي ..!