رواية الفراق هو نصيبنا الفصل الثالث عشر13 بقلم حبيبة الديب
_هتحكيلي صح؟!
_ايوه بس يلا نطلع الاول ماينفعش وقفتنا دي ..!
هز راسه و طلع هو الاول بعدها طلعت انا وراه و يادوب اول ما طلعنا كانوا اهل هنا فتحوا الباب و بدأنا ندخل جوا في جو من الترحيبات و السلام،
و بعد ما قعدنا و اتعرفنا على مامت هنا و ابوها و اخوها الكبير و مراته
اهلها كانوا طيبين اوي و مامتها شبها جداً و باين عليها طيبة.
يحيى عيونه كانت بتدور على هنا لدرجة ان بابا همس له في ودنه
معرفش قاله ايه بس اكيد قاله يتلم، و فعلاً يحيى بص ل ابوها و مبقاش يدور تاني و بدواءه يتفقوا سوا و يتعرفوا
و انا كنت مبتسمه عادي و بالصدفة ببص لكريم لقيته أصلاً كان باصص لي و لما عينه جت في عيني ابتسم لي اوي و غمز..!
يا الله كل لما يشوفني يفضل يغمزلي كده؟!
بصيت في اتجاه تاني و انا حساه برضوا مراقبني بعيونه ..!
كنت قاعده انا و ماما مع مامت هنا و كريمة مرات اخوها كنا بنتكلم سوا و نتعرف،
فجاء لقيت مامت هنا خدت ماما على جنب و قعدوا هما سوا و انا فضلت مع مرات اخوها...
و احنا قاعدين سوا لقيت كريمة بتمسك ايدي و اتكلمت بإبتسامة :
_الجدع اللى جنب العريس ده خطيبك صح؟!
بصيت لكريم بعدها بصيت لها و ابتسمت باستغراب :
_ايوه ليه؟!
_اصله ماشلش عينه من عليكي من ساعة ماجيه، بس صدقيني هى البدايات كده بس هيتغيروا مع الوقت، أنور كان كده برضوا بس دلوقتي اتغير و كل يوم بخناقة جديدة معاه، دي اسمها حلاوة البدايات بس مش أكتر ..!
يا حلاوه بجد!! هو انا كنت ناقصة كلامك عشان اقلق اكتر؟
انا قلقانه لوحدي كده كده، رغم كده ابتسمت و اتكلمت بثقة :
_ بس انا و كريم متافهمين اوي و مأذونش اننا هنتخانق كتير، بس مفيش علاقة بدون خناق اصلا ف احنا اه هنتخانق و نختلف في أرانا كتير، بس اكيد بعدها هنتفاهم و هو يصالحني مره او انا هصالحه، بس اللى انا واثقة فيه ان كريم مش هيسبني في يوم زعلانة كتير اكيد هيحاول يراضيني مثلا و انا برضوا هحاول مازعلهوش خالص ..!
كريمة ابتسمت و اتكلمت :
_ربنا يتمم لكوا على خير يارب و يهدي سركوا، بقولك ايه خدي ليان كده عبال ما اشوف هنا جوا عشان هى لوحدها..!
قالت كده و سابت لي بنتها عندها حوالي سنتين، بس كانت قمر اوي تبارك الله، و انا عشان بحب الاطفال اوي فضلت ابوس فيها و الاعبها كتير .
و بعد الاتفاق ام هنا و كريمة فضلوا يزغرطوا و برضوا ماما جنبهم بتحاول تزغرط زيها راحت ام هنا بدأت تعلمها تزغرط ازاي و نسيت بنتها جوا عادي.
و كريمة راحت تجيب هنا و هنا جت معاها و هى شايله صنية القهوة و بدأت تقدم القهوة عليهم و يحيى كان اخر واحد خد منها قهوته.
كريم قرب له و همس له :
_لو قهوتك حادقة معلش استحمل و اشربها كلها عشان تثبت حبك ليها!!
_حادقه ايه بس هى ناقصة وجع بطن؟!
_ماتقلقش معايا مسكن ليك، بس لو قهوتك مظبوطه عادي زي الخلق تعرف انك هتتجوز واحده عاقله..!!
_ياريت تطلع عاقلة و..... ايه ده انتَ قصدك ان زهرة مش. عاقلة؟!
كريم بصله :
_طب بذمتك انا قولت كده؟!
يحيى كان بيتكلم و هو بيبص لي ف رحتلهم و انا شايله ليان على ايدي السليمه و اتكلمت بشك :
_انتو بتقولوا ايه؟ بتتكلموا عني؟!
ابتسم يحيى و اتكلم بمناغشة :
_و هنتكلم عنك ليه ياختي؟
كريم بصله و ضربه على دراعه بخفه و اتكلم بهزار :
_روح شوف خطيبتك و مالكش دعوة بخطيبتي ياعم..!
_ماشي هسيبكوا بس عشان هنا وحشاني بس هرجع لكوا تاني..!
يحيى مشي و كريم بصلي و ابتسم و باس خد ليان :
_مين العسولة دي؟!
_ دي ليان بنت اخو هنا، بص عسولة ازاي عيونها حكاية..!
_عيونها جميلة جداً بس عيونك أنتِ احلى..!
قال كده و شالها مني:
_هتيها عشان دراعك كده هينمل.!
خدها و انا عملت عبيطة و ماتكلمتش بس هو يسكت؟ لا طبعاً مايبقاش كريم لو سكت
_لايق عليها اسم غزل اوي، انا نفسي نسمي بنتنا غزل...!
بصيت له:
_بنتنا مين؟! صباح الفل احنا قرينا فاتحة بس امبارح، فترة تعارف يعني..!
_في ايه بشاركك افكاري مش اكتر، بس حبيت اعرفك اني عايز اسمي غزل يعني..!
ابتسمله و اتكلمت بمهاودة :
_ماشي يا كريم عايز تسمي غزل سمي غزل عادي!
_و عايزها عيونها أخضر زيتوني زي عيونك كده..!
ضحكت و بصيت له:
_طب اعملها ازاي دي؟!
عيوني جت صدفة عادي
اتكلم و هو بيشاور على ماما بعيونه :
_يعني مش چينات أسبانية؟
_يعني من ده على ده، بص تعالى صورني مع ليان..!.
مدت له تليفوني بس هو طلع بتاعه و شاور لي بيه :
_لا هنتصور احنا التلاته، يلا..
صورني سيلفي و اتصورت معاه و مع ليان ، خدنا كام صورة سوا بعدها روحنا ناحية يحيى و هنا اللى كان بيلبساها الخاتم و الهدايا اللى جابها و برضوا لبسته دبلة، و كريمة شغلت أغنية "يا دبلة الخطوبة " و بدأت الاجواء تحلو و انا لهوله نسيت كل كلام سلمى و كل القلق و الخوف اتبخر و بقيت مبسوطه وسط الاجواء دي ..!
و بعد وقت كنا كلنا مشينا و رجعنا الفيلا، و كريم رجع معانا عشان عربيتة مركونه عندنا...
و قبل كا يمشي وقف بابا و استاذنه نخرج انا و هو شوية،
بابا بصلي بعدها رجع بصله تاني :
_طب ماتخليها بكرا يا كريم، الوقت اتاخر دلوقتي هتروحوا امتى و تيجوا امتى؟!
_الساعة لسه 10 يا عمي مش متاخر و مش هأخرها برا كمان، ماتقلقش..!
بابا بصله بتردد و ماما هى اللى اتكلمت :
_ماتخليها بكرا يابني و اخرجوا بدري براحتكوا...!
كريم سكت و بصلي و هو كان عايز يتكلم معايا عشان عارف ان في حاجة مضيقاني، ف كان عايز يعرف في ايه...
و قبل ما كريم يرد كان يحيى بص لبابا :
_خلاص يا عمي ايه رايك انا هروح معاهم و مش هناخر زهره، ماتخفش..!
بابا اتنهد و بصله:
_ماشي رابحتكم بس ادخلوا نتعشا الاول حتى
=لا يا عمي ماحنا هنتعشا برا و نتمشي شوية ، مش هنتاخر..!.
_ماشي يا كريم خلي بالك منها...
بصلي و كمل :
_وانتِ ماتتأخريش ماشي؟!
_حاضر يا بابا..!
ماما بصت لي :
_احنا هنفضل صاحين لحد ماتيجوا يا زهره ماتتاخريش..!
_حاضر..
دخلوا جوا و انا ركبت مع كريم في عربيته و يحيى ركب ورا و هو اللى طلب يركب ورا عشان يكلم هنا واتساب برحته...
اول ما ركبنا العربية خدت بالي ان كريم حاطط في العربية الدبدوب اللى انا كسبته في الملاهي و ادتهوله
ابتسمت و انا بمسك الدبدوب :
_انت لسه محتفظ بيه؟!
ابتسم و رد:
_طبعاً
_وانا كمان محتفظة ببتاعك..!
بصلي بعدها رجع بص للطريق تاني :
_بتشمي رحتي فيه؟!
بصيت له بعدها بصيت ليحيى ورا و لقيته مركز في تليفونه و مش معانا خالص
ابتسمت له بخجل و هزيت راسي :
_ايوة.... قصدي.. ساعات يعني..!
كريم تفهم خجلي و حب يغير الموضوع :
_طب تحبي نروح فين؟!
_عايزه اقعد على الكورنيش و اشم هوا شويه..
_ماشي نروح الكورنيش، بس تاكلي ايه الاول..!
هزيت كتفي و رديت:
_اي حاجة
_تاكلي كريب؟!
_ماشي
=وانا عايز اتنين برجر و بطاطس .
ده كان يحيى اللى اتكلم و هو ماسك فونه، كريم ابتسم له ورد بهزار :
_مش عايز حاجة تاني يا يحيى بيه؟!
يحيى ضحك و ساب الفون من ايده و قفله و رد بإبتسامة :
_لا تسلم يا كبير تعبناك معانا .!
كريم بصله من مراية العربية و ضحك بعدها بصلي و همس لي :
_فاكره لما قولتيلي على يحيى انه السواق بتاعك؟!
بصيتله و ضحكت و مارديتش بس يحيى اتكلم :
_بتضحكوا على ايه؟!
تعالي يابت جنبي هنا، قالك ايه ضحكك كده؟!
بصيتله و ضحكت اكتر و اتكلمت بمناغشة :
_مالكش دعوة أنت..!
قبل ما يرد عليا تليفونه عمل صوت ان رسالة وصلتله ف مسك الفون و نسي يرد عليا اصلا!
كريم وقف عند مطعم كبير الاول عشان يجيب الاكل، غاب دقايق بعدها جيه و معاه كذا شنطة و ريحة الاكل كانت تحفة ناولهوملي من الشباك و نزل راسه يكلمني :
_دقيقة و جاي ماشي؟!
_رايح فين تاني!
_هجيب حاجة و جاي..!
قال كده و مشي فعلاً و رجع تاني بعد لحظات و ركب العربية و معاه شنطة كبيرة فيها س
شيبس و تسالي
_ليه كلفت نفسك كده، ليه ده كلوا بس ..!
_فين التكلفة في كده، انا بس حبيت اجيب لك حاجة مع الكريب عشان تعرفي تحكيلي كويس و انتي بتاكلي..!
_انت لسه مُصر تعرف؟
ده انا نسيت..!
=يعرف ايه؟
و نسيتي ايه؟!
_خد يا يحيى كل شيبسي و اسكت..!
انا قولت له كده، مش عارفه ليه حاشر مناخيرة ف كل حاجة كده
كريم بصله من المرايا و اتكلم :
_عامل زي جودي اوي.!
يحيى ابتسم و هو بيرد :
_لا على فكرة جودي اختك شبه زهره في تصرفاتها، و مع الوقت هتلاحظ ده..!
وصلنا الكورنيش و نزلنا قعدنا في مكان هادي
احنا التلاته و احنا بناكل انا كنت باصة للنيل قدامي، شكله جميل بليل كده و الهوا و هو بيداعب الطرحه و ريحته ذرة
الاجواء ريحت بالي شوية
كريم كان قاعد بيتكلم مع يحيى بس عيونه عليا و انا كنت ببتسم له بهدوء
و بعد ما خلصنا اكل يحيى راح يجيب لنا حمص شام طول شويا بس سبنا عشان نتكلم براحتنا
_احكيلي بقا مالك؟!
اتنهدت و بصيت للنيل تاني و انا بتكلم :
_تعمل ايه لو صديقك المقرب اوي فجاء بدأ يأذيك، و بعد ماكنتوا بتحبوا بعض و تتمنوا الخير لبعض، بقا يحقد عليك و مش عايزلك الخير، و عايز اللى في ايدك حتى لو هو مش عايزه، بس عايز ياخده عشان يحرمك منه و خلاص...
فاهمني؟!
ماكنتش عارفه اعبر له كويس و في نفس الوقت مش عايزة اعرفه تفاصيل ولا اعرفة ان سلمى عملت معايا ايه و بتهددني بـ ايه حتى،
كنت عايزة افضفض له بس من غير تفاصيل..!
و هو هز راسه بتفهم و اتكلم :
_ايوه فاهمك يا زهره، كملي سامعك..!
_بس، أنا بعدت عنها رغم اني كنت بحبها و بعتبرها أخت ليا بس هى لسه بتأذيني حتى لو بكلام منها و خلاص، هى عايزة تثبت لي انها هى الوحيدة اللي بتحبني فعلاً وان محدش حبني قدها و اني خسرتها،
كل شوية تقولي ان كل اللى حواليا دول هيسيبوني و انا الخسرانه عشان سبتها،
و المشكلة انها فاكره نفسها صح و فاكره انها لما تأذيني و تعتذر خلاص فيها ايه انا مكبرة الحوار ليه،
بس هى أذتني عن قصد اصلاً..!
_أذتك ازاي طيب؟!
مكنتش عارفه اقوله ايه، لو عرف انها وقعتني من على السلم و كسرت ايدي بقصد هيعرف انها سلمى، عشان هو عارف اني وقعت من عندها في البيت..!
اتنهدت و بصيت للنيل تاني :
_حاجات كتير يا كريم، افعلها اصلاً بتدل على انها مريضة، مش عارفه بقت كده ازاي و امتى حتى
بس اللى اعرفه انها كرهتني فيها
ازاي حد كنت بحبه كده بافعاله كرهني فيه؟!
_ده طبيعي يا زهره ما انتي مش هتحبي حد شايفاه مؤذي و بقا وحش معاكي، المهم دلوقتي انك تبعدي عنها نهائي
و تعرفي ان كلامها ده مجرد كلام و خلاص، بتخوفك عشان تفضلي على طول قلقانه و خايفة من خسارة اللى حواليكي،
هى عايزاكي من غيرها تفضلي خايفة على طول، يعني لو شافتك مبسوطه لازم تعمل حاجة تعكنن عليكي و تزعلك ، و انتي المفروض ما تديهاش فرصه تعمل كده، و امحيها من حياتك تمامًا، و لو الموضوع كبر عند حده او ضايقتك تاني يبقى عرفيني انا و انا هتدخل في الموضوع ده و هوقفها عند حدها
ماشي؟!
سكت و هزيت راسي بالموافقة و انا باصة للنيل و لسواد الليل و هو بصلي بتركيز و اتكلم :
_هى مين صاحبتك دي..!؟
_دي.... دي واحدة كده أنت ماتعرفهاش!
_مانا معرفش حد من صحابك اصلاً.!
_ايوه دي واحده عرفتها في الجامعه من كام سنه كده و مش من هنا فـانت مش هتعرفها يعني..!
_امم، طب بصي يا زهره مش معنى إن قلبك نضيف ونيتك كويسة إن كل الناس اللي هتقابلهم هيبقوا شبهك، لكن اللي لازم تبقى متأكده منه إن ربنا عمره ما بيضيع تعب حد ولا بيسيب صاحب النية الطيبة، الخير اللى عملتيه معاها و كنتي بتتمنيه ليها هيتردلك، حتى لو مش منها هى بس بنتيتك الطيبة دي هتتراضي صدقيني .،
ربنا مش بينسى حد يا زهره..!
الكلام معاه ريحني اكتر، بصيت له و انا مبسوطه انه جانبي و سامعني و بينصحني كمان، كنت عايزه ارد عليه و اقوله ياريت ربنا يراضيني بيك و نكمل و نبقا مع بعض على طول، يكون لي السند و الامان و الحضن الحنين اللى بيطبطب عليا و يواسيني لما احكيله مشاكلي..!
بس ابتسمت بهدوء و رديت عليه :
_و نعم بالله..!
بصيت له تاني و اتنهدت :
_بس تعرف يا كريم؟!
الضربة اللى بتوجع بجد مش اللى بتيجي من عدوك،
دي اللى بتيجي من حد كنت بتعتبره السند، صحبتي دي كنت بحبها اوي كنت بير لاسرارها و كانت بير لاسراري، بس الحمدلله اني عرفت وشها الحقيقي ..!
_بصي يا زهره عايزك تعرفي حاجة و تخليها قاعده في حياتك ، انتي هتقابلي ناس كتير و تعرفي ناس كتير، بس مش كلهم هيبقوا بيحبوكي او يتمنولك الخير، فـعادي انك تخسري ناس في حياتك؛
بس مش العادي انك تخسري نفسك عشان خاطر حد، متخليهاش تأثر فيكِ و تطفي حاجة جواكي، خليكي زي ما انتي زهره، ماشي يا زهرتي..؟!
قال جملته الاخيره و هو بيبتسم و يمسك ايدي ف انا ابتسمت و هزيت راسي :
_حاضر..!
بصيت حواليا اشوف يحيى اللى اتاخر و رجعت بصيت لكريم :
_اومال يحيى اتاخر ليه كده؟!
_صراحة؟!
انا اللى سرحته بعيد، قولتله حابب نتكلم شوية و يسيبنا مع بعض شوية فـ مشي كتر خيره..!
_اه يعني هو فين؟
هو عشمني بحمص شام و ماجبش؟
ضحك و قام وقف و مد لي ايده ف مسكت أيده و مشينا سوا :
_تعالي هجيب لك حمص يا زهرتي..!
_و درة
_ماشي هجيب لك درة بس هتقدري تاكليها؟
_لا بس ريحتها خلتني اشتهيتها، ممكن ماكملهاش بس عايزه درة مليش دعوة..!
_خلاص تعالي نجيب...!
جيبنا الدره و الحمص الشام وانا ولا قدرت اكمل ده ولا ده ، و اتمشينا شويه بعدها روحنا ناحية العربية و لينا يحيى واقف جنبها و ساند عليها و بيتكلم في الفون، و اول ما شافنا جيه نحيتنا
_كنت لسه هرن عليك، يلا اتاخرنا كفايا كده..!
_يلا
ركبنا العربية و كريم رجعنا البيت، و أصر اني اخد الشنطة اللى فيها الشيبسيهات منه عشان لسه زي ماهى فـ قالي اخدها،
الكلام معاه ريحني كتير و خلاني نسيت سلمى و كلام سلمى او اي تهديد منها
و انا مع كريم حسيت ان مشاعره صادقه و مش حد بيتسلى و ناوي يسيبني زي ما سلمى بتقول كده ،
هى فعلاً عايزه تعكنن عليا بالكلام و خلاص لكن لا هى مش هتعمل لي حاجة اكيد..!
طمنت نفسي بالكلام ده نمت الليلة دي باطمأنان اكتر..!
ممكن عشان الكلام مع كريم ريحني فعلاً
و ممكن عشان معاه حسيت بالامان و انها مش ممكن تعمل لي حاجة و هو معايا..!
***
عدت الايام بسرعه و يحيى و هنا عملوا خطوبة ، و انا و كريم اتعرفنا على بعض اكتر، كريم كان قايل لي انه عنده مشاكل في شغله ف كان طول الوقت في الشغل، بس اخر اليوم كان لازم يتصل بيا حتى لو تعبان و مرهق ،
و يوم الاجازه كان بيجي عندنا الفيلا و احنا روحنا عندهم زيارة في مره قبل ما ريم تسافر
و كنا بنخرج سوا مره في الاسبوع و ساعات مرتين على حسب شغله بس على طول كنا مع بعض على التليفون،
و طول الوقت ده قربنا من بعض أكتر و عرفنا بعض اكتر، اتخنقنا حبتين كده بس كان بيصالحني في ساعتها بورده و اعتذار..!
الايام عدت بسرعه و انهارده فكيت الجبس أخيراً و كريم كان معايا ساعتها
اول ما طلعنا من المستشفى اتمشينا سوا بعدها روحنا مطعم نتغدى هناك و نقضي اليوم مع بعض.
طلبنا أكل و كنا قاعدين بنتكلم عن الخطوبة هنعملها فين و هلبس فستان لونه ايه و كده
بس لقيت مره واحده بنت صرخت بفرحه و هى بصالنا من بعيد :
_كيموووو مش معقول ..!
قالت كده و جت جري على كريم تحضنه بفرحه و هى بتقوله وحشتني.
هو مش معقول فعلاً اللى بيحصل ده
وحشك يا عنيا؟!
توحشك عقربة يا بعيدة، مين دي؟
_مين دي يا كريم؟!
طبعاً قولتها بكمية صدمه و غضب مش طبيعي..!