رواية غدر وقدر الفصل الرابع عشر14 بقلم دانيا
صلوا على النبي.......
مرام اول ماسمعت بإسم فرعون في الخطه للحظه راسها شطب وافكارها جاطت لأنو فرعون دا م بس مجرد عامل عند ابوها دا كان اقرب زول لأبوها وهي من قامت لقتو شغال مع ابوها اتصدمت من الموضوع بس ابداً م بانت عليها ملامح الزعل عليهو بالعكس للحظه اتحولت لمرام العصبيه والكل بعمل ليها الف حساب جسمها بقى يرجف من الغضب وعيونها اتغيرو وقبل تسأل اي سؤال الزول واصل في كلامو وقال ليها بعد ما حجزو جولص نقلو كل البضائع عبر الحدود الليبيه بمساعدة بعض كبار الدوله وبعدين ساقوا العربيه حقتو وركنوها على الحدود الشرقيه عشان يخلوكم تفكرو إنو الحبشي هو الخاطف .
قامت على حيلها وهي بتنتفض من الغضب ووجهت المسدس عليهو وبنبرة غضب قالت ليهو دا كله حصل وجاي توريني هسي معناها انت زاتك معاهم لو م معاهم ساكت الوقت دا كله ليه ؟ سريع قول فرعون الكلب قاعد وين حالياً ؟ قام على حيلو وقال ليها روقي انتي م نصيحه قايله الحكايه وقفت على فرعون بس ... هو معاهو ناس اكبر منو ومنك وغير كدا حتى عمك عبد الصمد معاهم الناس ديل مجموعه كبيرة انتي ح تقدري تعملي شنو فكري بي منطق اتحكمي بنفسك وانا هنا بحاول اساعدك ،، عاينت ليهو بنظره حاده وقالت ليهو جولص حالياً في المخزن يعني ؟ سكت مسافه وقعد في الكنبه واشر ليها بيدو نظام اقعدي بعد قعدت قال ليها شوفي الزول دا نقلوهو من المخزن قبل شهرين لمكان تاني والحاجه العرفتها انا إنو هم محتفظين بيهو لحد الآن عشان يحصلوا على الحسابات الموجوده في البنوك والدولارات الهو داسيها واول ما يحصلو على طلبهم ح يصفوا طوالي ... سكتت وهي بتفكر وبعدها رفعت راسها عاينت ليهو وقالت ليهو لو كدا ليه م جو سألوني انا ؟ الزول سند ضهرو على الكنبه وقال ليها لأنو هو مفهمهم إنو انتي م ليك علم بحاجه وكل شيء في يدو هو والحاجه الساعدتو على إنو يصدقوهو هي إنو كل الإصالات بإسمو هو وكل الصادر والوارد بإسمو انتي مافي شيء بإسمك ابوكي عمل كدا عشان لو جاء يوم وحصل اي غلط يطلع إنتي إسكورك نضيف .
في البلد :
معتذ مشى السوق يجيب حاجات للبيت جاء ماري بجنب دكان التحويلا سمع صوت زول بناديهو وقف واتلفت وراهو كان في راجل واقف قدام الدكان رفع ليهو يدو وقال ليهو تعال ... عاين ليهو وقال ليهو انا؟ الزول قال ليهو ااي معتذ مشى عليهو والراجل خشى جوا قعد في الكرسي وفتح الدرج وطلع ظرف منو ومداهو لمعتذ