رواية غدر وقدر الفصل السادس عشر16 بقلم دانيا
صلوا على النبي.....
اثناء ما الزول سايق تلفونو اتصل عاين للرقم ورد طوالي وفتح الإسبيكر وقال ايوه معاك حصل شنو ؟ المتصل رد عليهو بصوت مرتجف وقال ليهو ياباشا سمعت لي صوت ضرب جاي من جوا البيت دا عشان كدا اتصلت ليك عشان تقول لي اعمل شنو انا خايف يكون قتلوهو ... مرام من سمعت الكلام دا قلبها خفق وجسمها رجف ختت يدها على خشمها من شدة الخلعه وبقت تعاين للتلفون بصدمه ،، الزول اتلفت عاين ليها وطوالي قال للمتصل لالا إن شاء الله م يكون قتلوهو كدي انت شوف ليك شباك او اي شيء تقدر تشوف منو الحاصل جوا شنو لمن انا قريب عليك ولو لزم الأمر اتدخل .
قفل الخط على كدا ورجع عاين لمرام اللسه من شدة الصدمه م قادره تتكلم وما قالت ولاا كلمه كانت شارده بطريقه غريبه وهو كنوع من التهدئه خت يدو في كتفها وقال ليها م تخافي هم محتاجين ليهو م بقتلوهو .... فجأة مرام اتغير حالها من حالة سكون وصمت بقت تفرفر وتصرخ بصوت عالي وتضارب في العربيه بطريقه هستيريه الزول لمن اتخلع بقى مركز معاها فجأة جات عربيه قدامو وجرت ليهو بوري طويل كبس فرمله بصعوبه ونزل من الظلط ووقف وهو لسه مستغرب شديد من حالة مرام الجنونيه .
مرام اتزكرت موتت امها اتزكرت كيف امها كانت واقعه قدامها وقارقه في دمها وتاني بقت تتزكر اليوم الإستشهد فيهو ابوها وجابو جسمانو على البيت ... للحظه جاها شعور إنها لو فقدت جولص ح تكون عايشه في الدنيا دي براها وم بفضل ليها زول وكدا هي خشت في حاله نفسيه الزول نسى موضوع الضرب الحصل في البيت المحجوز فيهو إبراهيم وبقى محتار في حال مرام لا عرف يكمل ولا عرف يرجع بدربو ايوه كل الناس كانت عارفه إنو سبب عصبية وسيطرة مرام هي حالتها النفسيه بس م كانو متوقعنها للدرجه دي .
الزول بقى يحاول يمسك ليها يدينها ويهديها بس لسه بتزيد وبتحاول تضاربو شال طرحتها من راسها وربط ليها يدينها ودور العربيه بسرعه اكتر من الكان ماشي بيها قبيل خمسه دقائق ووصل قريب للبيت داك وقف العربيه بعيد وعاين لمرام الفجأة غطت في نوم عميق هز راسو بأسف وقال دي شنو البلوة دي الجاتني دي المسكين دا كان متحمل كيف ؟! نزل من العربيه وقفل عليها ومشى قبل يصل البيت اتصل لزولو قال ليه اها الوضع كيف انا وصلت الزول قال ليهو م عارف م قدرت اشوف حاجه .
وصل كان شايل شالات في يدو ادى صاحبو واحد ولف التاني في راسو وغطى وشو وبقوا يتسللو للبيت فجأة طلع زول من جوا بتكلم بتلفون وخلى الباب فاتح اول ما هو طلع هم دخلو وراهو وقفلو الباب الزول انتبه إنو الباب قفل قال للمتصل دقيقه بس ورجع دفر الباب ابا يفتح .
الزول الجاء مع مرام وزولو المعاهو اول ما دخلو البيت كان باين فاضي عاين لصاحبو وقال ليهو في اي غرفه اشر ليهو على واحد من الأبواب وقبل يصلو الباب فتح طلع ليهم زول قبل يستعدو ضرب طلقتين واصابن الزول المعاهو وقبل يقبل عليهو لحق ضربو فجأة البيت كله اتملى صوت ضرب .... جاء دعم للزول دا من برا لأنو كان طالب جماعتو قبل يصل ولمن الأصوات هدت وقدر يدخل الغرفه الفيها إبراهيم إتفاجأ لمن لقاهو مربط في الكرسي وواقع وجسمو كله دم ،، جرى عليهو فك منو الحبل اكتشف إنو مضروب في راسو الزول بقى يرجف خت في راسو إنو خلاص مات مات بقى ماسكو وبعاين ليهو بصدمه جوا داخلين اتنين من جماعتو وبرضو اتخلعو واحد جاء مسك يدو قال ليهم لا لا شكله لسه م مات رفعوهو طلعو برا والمكان كان مليان ناس واقفه تتفرج مستغربين من منظر الناس الجايه تضارب بالسلاح في وسط الحله ديل وكمان شايلين ليهم جثه في واحد من الواقفين قال خلونا نوقفهم واحد تاني قال ليهو انت جنيت هم مسلحين نحن ضربنا للشرطه بكونو قراب ،، وقت سمعوا كدا ختو إبراهيم في البوكسي حقهم وركبوا بسرعه ودورو وقالوا لزعيمهم إسمو مالك قالوا ليهو اركب قال ليهم لالا بمش بعربيتي .
هم دورو وهو جرى على عربيتو دور ومشى وراهم طلعوا من المكان دا وبدلو العربات في الطريق بعربات تانيه وخلو منهم إتنين في العربات على إنو يخفوها ،، وصلوا بيت مالك ودا كله مرام ما واعيه دخلوهم جوا في واحد قال ليهم ياجماعه الزول دا بموت محتاج مستشفى مالك عاين ليهو بغضب وقال ليهو مستشفى في عينك دا وقت مستشفى ؟! واثناء ما بتناقشو تلفون مالك إتصل عاين لواحد من الشباب وقال ليهو اطلع جيب الزول الواقف برا دا سريع ،، هز راسو وطلع برا سريع وقال للباقيين شيلوهو وتعالوا وراي ومشى منهم عاينو لبعض وشالو إبراهيم ومشوا وراهو