رواية الماسة المكسورة الجزء الثاني2(عناق الدم)الفصل الاربعون40بقلم ليله عادل

{"كنتُ أظنُّكَ وطنًا،فكنتَ منفى أعطيتُكَ قلبي ليحيا بك،فعدتَ بهِ رمادًا ظننتُكَ نجاةً،فكنتَ غَرَقي الأخير.

وظننتُكَ دفئًا،فكنتَ احتراقي وظننتُكَ حبًّا،فكنتَ جنازةَ قلبي دفعتُ ثمنَ حبّكَ من عمري،ودفنتُ ما كان بيننا في رمادِ الأمس وها أنا اليوم...أطوي صفحةَ الماضي،وأمضي لا لأعودَ إليك،بل لأعودَ إلى نفسي." }

ليلةعادل✍️🌹 

            الفصل الأربعون 🤫❤️

             [بعنوان: رماد الحب]

توقفت مي أمام فايزة، وعقدت حاجبيها وهي لا تفهم سبب مجيئها.

أما فايزة، فابتسمت ابتسامة جانبية، وقالت بهدوء يفيض بالهيمنة: أكيد بتسألي نفسك أنا جاية هنا ليه؟! وأكيد متخيلة إني جاية أترجاكي تسامحي رشدي، ومتسيبيهوش، والكلام ده...

صمتت لحظة، ثم هزت رأسها بثقة: لكن لأ، أنا مش جاية أترجاكي.

تدخل راشد، مشيرا إلى الأريكة: اتفضلي يا فايزة هانم، خلينا نتكلم وإحنا قاعدين أحسن.

التفتت إليه بابتسامة باردة: كويس إنك لسه فاكر إني فايزة هانم يا راشد، أنا مش جاية عشان أقعد..

ثم عادت بنظرها إلى مي: بصي يا مي، أنتِ عايزة تتطلقي؟ مفيش مشكلة، أنا هخلي رشدي يطلقك، ومش فارق معايا أعرف أسبابك..

تقدمت خطوة، وانخفض صوتها قليلا وهي تنظر مباشرة إلى عينيها بهيمنه: لكن مستحيل أتقبل إن خيالك يصورلك إنك ترفعي قضية خلع على رشدي الراوي..

ابتسمت باستخفاف: واضح إنك محتاجة ترجعي للمستشفى النفسي اللي كنتي فيها مرة تانية.

لم يلفت حديثها انتباه مي بقدر ما لفتها تلك المعلومة، كيف علمت؟ فلم يكن قد مر على زيارتها للمحامي سوى ساعتين فقط. انعقد حاجباها بدهشة، وسألتها: وإنتِ عرفتي منين؟؟

أومأت بابتسامة ثقة: مش مهم عرفت منين، المهم إن القضية دي لازم تتسحب وشغل العيال الصغير ده ينتهي، وإلا الحساب هيبقى تقيل، وأنا وقتها مش هرحم حد.

تدخل راشد بحدة: هو حضرتك جاية بيتنا تهددينا؟

حولت نظرها إليه: لا يا راشد أنا مش بهدد، أنا بنفذ.

أضافت بنبرة ذات معنى: واشكروا ربنا إن الموضوع وصلي أنا الأول، لأن لو كان وصل لعزت، كان الكلام دلوقتي هيبقى بشكل تاني خالص.

راشد بحزم: عموما يا فايزة هانم إحنا مبنتهددش، والأسلوب اللي حضرتك جاية تتكلمي بيه ده غير مقبول.

أجابته بحده: أمال إيه اللي مقبول؟ إنكم ترفعوا قضية خلع على رشدي الراوي؟ وتشهروا باسم العيلة؟

رفعت حاجبها بسخرية: أزاى خيالكم صورلكم إنكم تقدروا تدخلوا حرب مع عيلة الراوي وتطلعوا منها كسبانين؟ تبقوا بتحلموا.

راشد بحزم: بس دي مش اصوال.

أشارت بإصبعها نحوه بحدة: لو هنتكلم بالأصول، فالأصول بتقول إنكم تيجوا تتكلموا معانا الأول، مش تجروا على المحاكم! لكن واضح إنكم عايزين تعملوا شو إعلامي على اسمنا.

راشد بهدوء رغم غضبه: إحنا لا عايزين شو ولا غيره، إحنا اتكلمنا مع رشدي، وهو اللي رفض يطلق، فاضطرينا نمشي بالطرق القانونية..

نظر إليها بثبات: أما الأسلوب اللي حضرتك جاية تتكلمي بيه ده، فإحنا مش هنقبله، ولا حتى هيهزنا.

وأشار نحو الباب: وياريت تتفضلي من غير مطرود.

نظرت إليه من أعلى إلى أسفل للحظه، قبل أن تقول بتهديد مبطن: راشد أنا عارفة إنك أب، وبتتكلم بدافع إنك بتحمي بنتك..

توقفت لحظة، ثم أكملت: لكن صدقني، وقتها أنت حتى مش هتعرف تحمي نفسك!

ابتسمت ابتسامة باردة: إحنا عيلة الراوي، اسأل علينا قبل ما تدخل معانا في حرب إنت مش قدها.

صمتت لحظة قبل أن تضيف بحزم: إنتوا لحد دلوقتي مشفتوش الا وشنا الطيب بس، لكن لو اضطرتونا لغير كده..

زمت شفتيها بأسف مستفز: حتى الندم وقتها مش هينفعكم، أنا جاية أكلمكم بالذوق القضية دي تتسحب، ورشدي هيطلقها، وينتهي الموضوع.

كاد راشد أن يتحدث، لكن حازم سبقه وقال بغضب مكبوت: وإحنا سمعنا كلامك، واللي عندكم اعملوه، إحنا مبنخافش، البلد دي فيها قانون.

انفجرت ضاحكة بسخرية: قانون؟ 

تجمدت ملامحها، وهي تنظر اليه بثبات: القانون ده احنا اللى بنعمله علشان يطبق علي اللى زيكم مش العكس!

رد بحدة: اتفضلي بره.

تجاهلت كلماته وقالت بهيمنه: فكروا في كلامي كويس..

ثم نظرت إلى راشد: ولادك حلوين يا راشد، خليهم حواليك، أحسن مايحصلهم اللي حصل لمامتهم عشان حاجة متستاهلش.

اشتعل وجه حازم غضبا: لا أنتِ زودتيها أوي.

ثم أشار إلى الباب: اطلعي بره، إحنا متعودناش نرد على ستات، ليكي رجالة نعرف نرد عليهم.

أخذت نفسا عميقا، وكأنها لم تسمع شيئا، ثم قالت بثبات: أظن رسالتي وصلت!

واستدارت لتغادر، لكن اوقفتها مي التى كانت تحاول استيعاب تهديدها الصريح لأسرتها: استني عندك.

توقفت فايزة مكانها بجمود دون أن تستدير لها، فتقدمت مي ووقفت أمامها مباشرة وتساءلت: عرفتي منين موضوع القضية ده؟ احنا لسه راجعين من عند المحامي من كام ساعه؟

ابتسمت ابتسامة ساخرة: هو السؤال ده شاغلك للدرجة دي؟

صمتت لحظة، ثم قالت ببساطة: المحامي هو اللي بلغني!

أضافت بسخرية: عشان تعرفوا إن محدش يقدر يمشي في قضية ضدنا من غير ما ياخد الأذن الأول.

رفعت مي ذقنها بثبات: وأنا قبلت التحدي.

نظرت إليها مباشرة وقالت بغضب: وقولي لرشدي إني مش هسحب القضية، وإني بكرهه وبحتقره، وأكتر من الأول كمان.

هزت رأسها بلا مبالاة: ورقة طلاقك هتوصلك بكره، فمتتعبيش نفسك مع المحامين، علشان محدش هيمسكلك القضية، ولو لقيتي محامي وافق اعرفي إنه تبعنا.

ابتسمت ابتسامة باردة: دي نصيحة!

ثم استدارت وغادرت بنفس الهيبة التي دخلت بها.

ساد الصمت للحظات، قبل أن يقطعه حازم وهو يزفر بضيق: أنا مش عارف إزاي قدرت تدخل بيتنا وتهددنا بمنتهى البرود كده.

ضرب حاتم كفا بكف وقال بغضب:  والله لولا إنها ست كبيرة، كنت عرفتها يعني إيه تدخل بيتنا وتتكلم بالطريقة دي.

نظر إليه راشد، ثم قال بهدوء حاول أن يخفي به غضبه: سيبك منها دلوقتي هي اخرها كام كلمة وخلاص.

بينما ظلت عينا مي معلقتين بالباب، وكلمات فايزة الأخيرة تتردد داخل رأسها ثم قالت: بابا...

التفت إليها راشد فورا: ايوه يا حبيبتي؟

ابتلعت ريقها وقالت: فايزة مش بتهدد وخلاص.

اقترب منها خطوة بابتسامة دافئة: متخافيش يا حبيبتي، متقدرش تعملك حاجه وإحنا موجودين.

هزت رأسها بسرعة بخوف: أنا مش خايفة على نفسي..

نظرت إليه بعينين ممتلئتين بالقلق: أنا خايفة عليكم!

هتف حاتم باستهجان: وإحنا مبنخافش، البلد فيها قانون مهما كانت قوتهم، لو بيننالهم خوفنا وضعفنا هيركبونا، لكن طول ما احنا اقوياء وحاطين عنينا في عينيهم هيعملوا ألف حساب.

التفتت إليه مي وهي تهز راسها بتوتر: اسكت، أنت مش فاهم.

صمتت لحظة، ثم قالت بمرارة من بين دموع ترفض الاستسلام: أنا عشت وسط الناس دي، وشوفتهم بيعملوا إيه؟! فايزة مش من النوع اللي بيقول كلمة وخلاص.

راشد بهدوء يحاول احتوائها: حتى لو كانت زي مابتقولي، مش هتقدر تعمل حاجة من غير ما تتحاسب.

ابتسمت مي بمرارة هي تهز رأسها باعتراض: يا بابا هي اصلا مش شايفة نفسها محتاجة تتحاسب..

مسحت وجهها بيدها: أنا بس مش عايزة بسبب القضية دي يحصلكم حاجة.

اقترب منها حاتم، واحاط كتفها بمؤازرة: وإحنا مش هنسمح إن حد يقرب منك، طول ما إحنا عايشين.

رفعت عينيها إليه، وقالت بحسم: عشان كده لازم أدخل سليم.

ساد الصمت بينهم نظرو اليها بتعجب.

سألها حاتم بحذر: سليم اخوه؟

أومأت بتأكيد: أيوه، هو الوحيد اللي أقدر أثق إنه يحمينا منهم. 

تدخل راشد معترضا: لأ طبعا مش هينفع!

نظرت إليه باستغراب: لأ ليه؟

رد بعقلانية: لأن آخر حاجة ناقصانا إننا ندخل سليم في حرب مع عيلته!

مي بانفعال: دي مش حرب يا بابا، دي حماية.

قاطعها بحسم: أنا أقدر أحميكي.

اومات وهي تحاول إقناعهم: عارفة، بس في مجازفه وانا خايفه عليكم، يا بابا مهما تتخيل العيله دي تقدر تعمل ايه؟! مش هتوصل لقذارتهم..

اقتربت منه وأمسكت يده: لكن سليم، هو اللي يقدر يوقفهم عند حدهم.

تقى متعجبه سالتها: وإنتِ واثقة فيه للدرجة دي؟

أجابتها من غير تردد: أكتر من أي حد في العيلة دي.

تسال راشد بتعجب: عايزه تفهميني انه هيقبل يحارب عيلته عشانك!

ردت بثقه: اه هيحارب!

وضعت يدها على رقبتها، تحاول تخفيف ذلك الاختناق الذي يضغط على صدرها: أنا مش قادرة أتكلم، هدخل اوضتي ارتاح شويه ولو سمحتوا محدش يعمل حاجة، أرجوكم.

راشد بستهجان هادي: يعني عايزانا نسكت؟

هزت رأسها بسرعة مفسرة: هي قالت إنها هتخليه يطلقني، يبقي نستني ونشوف..

توقفت لحظة، ثم أضافت: لو مصدقتش في كلامها، ساعتها أنا هكلم سليم..

كاد راشد يعترض، لكنها قاطعته بحسم: وده آخر كلام عندي يا بابا، ده الحل الوحيد الصح ارجوك متتضغطش عليا..

ثم تنفست بصعوبة وهي تهم بتحرك: أنا مش قادرة أتكلم أكتر من كده ارجوكم بلاش ضغط.

استدارت وتحركت مبتعدة عنهم بخطوات سريعة، حتى دخلت غرفتها 

غرفة مي.

فور دخولها أغلقت الباب خلفها وأسندت ظهرها إليه للحظات، ثم أغمضت عينيها بقوة.

فكلمات فايزة لم تفارق رأسها؛ تهديدها الصريح لعائلتها وطريقتها المستفزة وهي تتحدث وكأنها تملك الجميع، أثار خوفها وتوترها.

تحركت بعصبية، ثم أمسكت هاتفها واتصلت برشدي.

انتظرت لحظات، لكن الهاتف كان مغلقا.

نظرت إلى الشاشة بضيق، ثم أعادت الاتصال مرة أخرى، وكأنها تتمنى أن يفتح في المرة الثانية.

ظل مغلقا 

تمتمت من بين اسنانها: جبان...

ثم أغلقت الهاتف بعنف ووضعته جانبا، لكن غضبها لم يهدأ.

التقطت وسادة من فوق الفراش ودفنت وجهها بها، ثم صرخت بكل ما بقي داخلها من قهر: بكرهك!

ضربت الوسادة بقبضتها مرة أخرى، ثم ألقتها جانبا وجلست على طرف الفراش، تحاول التقاط أنفاسها.

في الخارج...

نظر حازم إلى والده بقلق: هنعمل إيه دلوقتي يا بابا؟ هنسمع كلامها ونستنى؟

أجابته تقى: أيوه، نستنى.

التفت إليها باستهجان: إيه اللي بتقوليه ده يا تقى؟

ردت بعقلانية وهدوء: بقول كلام العقل، أحنا مش قدهم يا حاتم، والعصبية والغضب مش هيخلونا نكسب حاجة، بالعكس ممكن يكبروا الأزمة..

ثم نظرت إلى راشد أضافت: وإحنا عارفين كويس عيلة زي عيلة الراوي وراها إيه، مش هنخسر حاجه لو استنينا!

حاتم بضيق: ونستسلم لتهديدهم؟

أومأت باعترض موضحه: مسموش استسلام، اسمه صبر وعقل، والله نستني ونشوف، ولو ورقة الطلاق موصلتش زى ما قالت، ساعتها ندخل سليم في الموضوع طالما هو فعلا مختلف عنهم، وعاقل، ويقدر يتكلم معاهم، يبقى ليه لأ؟

حازم بضجر: وإنتم ضامنين منين إن سليم هيقف معانا اصلا؟

تقي بتنهيده: مش ضامنين، بس بنحاول نتعلق بأي أمل قدامنا.

نظر إليها راشد، ثم أومأ برأسه: تقى عندها حق، نستنى لبكرة.

ثم التفت إلى حاتم: ولو فعلا سليم زي ما مي بتقول، يبقى مش هنخسر حاجة لما نطلب مساعدته.

ظل حاتم صامتا للحظات، قبل أن يتسأل: طيب والمحامي؟

راشد بانفعال: المحامي ده سيبهولي اعرفه ازاي يخون ثقتي فيه.

♥️_______________بقلمي ليلةعادل 

قصر الراوي2م 

كان رشدي يجلس وحده داخل غرفته، معزولا عن العالم، غارقا في الظلام، ودخان السجائر يملأ المكان بعدما أشعل واحدة تلو الأخرى بشراهة، بينما تصدح موسيقى صاخبة، كأنه يحاول أن يهرب من صوت أفكاره.

فجأة فتح الباب دون استئذان دخلت منى، وما إن خطت إلى الداخل حتى مدت يدها وأضاءت الغرفة.

رفع رأسه إليها بضيق، وقد انزعج الضوء في عينيه قال بضجر: إيه إللي جابك هنا؟

لم تجبه، بل تقدمت بخطوات ثابتة حتى وصلت إلى جهاز الموسيقى، وأغلقته، ساد صمت ثقيل.

نظر إليها بحدة منزعجا: إنتِ بتعملي إيه؟

التفتت إليه، وقالت بسيطرة أربكه أكثر: ولا حاجة جاية أقولك، إني رجعت يا رشدي، رجعت آخد حقي منك.

زفر بضجر وهو يطفئ سيجارته بعنف: أنا مش ناقص وجع دماغ، أطلعي بره.

اقتربت منه أكثر، حتى أصبحت تقف أمامه مباشرة رفعت احد حاجبيها بتهديد: وجع دماغ؟ هو إنت لسه شوفت وجع دماغ

زفر بعصبية وهو يتوقف أمامها: قولتلك أطلعي بره.

لكنها لم تهتم بغضبه  تحدثت وهي تشير باحتقار مستفز: كنت فاكر إني هفضل مدمنة طول عمري وإنك كسرتني..

تابعت بعينين تملئها القوى: بس لا، أنا قدرت أقول لا، قدرت أقف على رجلي، أما إنت...

نظرت إليه نظرة امتزجت فيها الشماتة بلاحتقار تبسمت وهي تتابع: إنت عمرك ماعرفت تقول لا، إنت ضعيف يا رشدي، نيللي كانت مجرد طُعم؟ وإنت مش بس بلعته؟! ده إنت غرقت فيه، وأدمنته، وأنا ما ليش دعوة، كان ممكن تقول لا، كان ممكن توقف،  بس إنت كملت في طريقك، وبتدفعني ثمن اختيارك، وتكملتك في الطريق إللي ماحدش أجبرك عليه...

اقتربت منه خطوة، وابتسمت ابتسامة باردة وهي تنظر داخل عينه: وصدقني أنا هدفعك تمن كل سنتي غرسته في جسمي، وكل وجع عيشته بسببك، وهتشوف.

أطلق ضحكة ساخرة، ثم نظر إليها من أعلى إلى أسفل باستخفاف: ولا هتعرفي تعملي حاجة؟

ثم أكمل ببرود: وبعدين أنا لما عملت كده فيكي كدة، كنت باخد حقي، خلصنا، إنتِ زقيتي نِيللي عليا وخليتيها تعلمني الإدمان، وأنا حاولت أنتقم منك وأدوقك من نفس الكاس، دي قصاد دي.

هزت رأسها بعنف باعتراض: لا دي مش قصاد دي خالص، إنت إللي بدأت يا رشدي، إنت إللي غدرت، إنت إللي هددتني بولادي، بإنك هتقتلهم لو طه فتح بقه وقال لسليم الحقيقة عن الحادثة..

اقتربت أكثر، وعيناها تشتعلان وواصلت: ونسيت إن طه، حتى لو ضميره وجعه، مستحيل كان هيفضح نفسه، وهو عارف إن مراته إللي بيحبها، كانت مشاركة معاكم.

تسأل متعجبا ببرود: وهل أنا نفذت؟

صرخت في وجهه: مانفذتش لإن طه سكت! لكن لو كان اتكلم، أو حتى لمح لسليم كنت هاتنفذ، وأنا متأكدة من ده..

ثم أشارت إليه بإصبعها بتهكم ساخر: ماهو إللي يقدر يخطط لحادثة زي اللي عملتها في سليم وماسة! وكمان يعمل زي إللي عملته في ماسة بعد الحادث! وتخلي حياتها خراب، يقدر يعمل أي حاجة..

ثيتت عيناها بعينه بقوة أضافت: وأنا ولادي برقبتي

فاهم يعني إيه؟! أم تخاف على ولادها؟ كان لازم أعمل كده، كان لازم أحمي ولادي ورقبتي،ورقبة جوزي منك ومن شرك.

زفر بضيق، ثم مرر يده في شعره بعصبية قائلا بضجر: بصي يا منى، أنا مش ناقص رغي، كلنا زمان حطينا إيدينا في إيد بعض، وكلنا غرزنا في الدم، كلنا اتفقنا نخلص من سليم وماسة علشان الكرسي، وفي الآخر لا أخدنا الكرسي، ولا طلعنا بحاجة، وماسة وسليم علاقتهم بقت أحسن من زمان، وهما إللي كسبوا وآحنا خسرنا، فكفاية نبش في الماضي، أنا عندي إللي مكفيني..

تابع بصدق: وأنا مش عايز أاذيكي تاني، بس لو فضلتي تزني وتهددي...

رفع سبابته في وجهها، وصوته أصبح أكثر برودا وخطورة، بعينين لا تعرفان الرحمة: المرة دي تهديدي هايتنفذ، وهقتلك إنتِ وعيالك، أنا مابقاش عندي حاجة أخسرها...

رفعت حاجبيها بسخرية وكأنها لم تصدقه، فجأة  سحبها من شعرها و لفه حول يده ، وقربها منه، وقال من بين أسنانه: وقسماً بالله، لو عرفت إنك إنتِ السبب في إللي حصل بيني وبين مراتي، لهوريكي إنتِ وعيالك إللي عمرك ما شفتيه، إللي حصل لماسة وسليم زمان، هيبقى رحمة من إللي هعمله فيكِ انتي وعيالك.

ثم أمسكها من ذراعها بعنف، وسحبها نحو الباب:يلا غوري من وشي.

فتح الباب ودفعها إلى الخارج، ترنحت خطوة، لكنها سرعان ما تماسكت، ثم التفتت إليه قبل أن يغلق الباب، وقالت بنبرة حادة، ثابتة: أنا ما قولتش حاجة لمراتك، ومش فاهمة إنت بتتكلم عن إيه! بس كده حلو... عرفتني نقطة ضعفك من غير ما تاخد بالك.

ارتسمت على شفتيها ابتسامة ساخرة، ثم أردفت بتهديد صريح:وأنا أهو بقولك... أنا رجعت يا رشدي، ورجوعي المرة دي مش زي كل مرة. مش هسيب حقي... ولو كان آخر حاجة أعملها في حياتي.

استدارت وغادرت، بينما ظل هو واقفًا عند الباب، يتابعها بعينين تشتعلان غضبًا.

أغلق الباب بعنف، ثم اندفع إلى الداخل، يشعر بالغضب يشتعل في كل خلية من جسده، وضع كفيه على أذنيه، كأنه يحاول إسكات ذلك الطنين الذي يفتك برأسه، لكن كلماتها ظلت تتردد داخله، تخنقه أكثر فأكثر.

صرخ فجأة بأعلى صوته:كفااااية!

ثم أمسك أول ما وقعت عليه يده، وقذفه بعنف إلى الأرض، فتحطم بصوتٍ مدوٍّ.

ظل واقفا مكانه يلتقط أنفاسه بصعوبة، وصدره يعلو ويهبط بعنف، بينما كانت كلماتها الأخيرة لا تزال تتردد داخل رأسه: عرفتني نقطة ضعفك من غير ما تاخد بالك."

جزّ على أسنانه، وانقبض فكّه بقوة، ثم قبض على كفيه حتى ابيضّت مفاصلهما، محاولًا عبثًا أن يستعيد سيطرته على نفسه، بينما كانت عيناه تشتعلان بسواد الغضب.

♥️____________بقلمي_ليلةعادل 

فيلا سليم وماسة2عصرا

كان سليم وماسة غارقين في نوم عميق فوق الفراش، تتوسطهما حور، وقد وضعت يديها على ماسة، وأسندت رأسها الصغيرة علي كتف سليم، كان المشهد أمام العين أشبه بلوحة فنية شديدة الدفء والجمال، ثلاثة أجساد متقاربة في عناق عفوي، وكأنهم عائلة  واحدة  منذ سنوات طويلة، كانت تلك الغفوة الطويلة نتيجة طبيعية لليلة السابقة؛ ليلة امتلأت بالضحكات والمشاعر والانفعالات، ليلة عاد فيها إليهما الجزء الذي فقداه من حياتهما.

ولأول مرة منذ سنوات، عرف سليم وماسة معنى النوم الحقيقي نوما هادئا لا يقطعه خوف، ولا قلق، ولا انتظار.

وبعد دقائق، بدأت حور تتحرك في مكانها، تحرك عينيها ببطء، ثم فتحت جفنيها أخيرًا.

رفعت رأسها، ونظرت إلى ماسة النائمة، ثم التفتت إلى سليم، قبل أن تعود بنظرها إلى ماسة مرة أخرى.

ظلت تتأملها للحظات، ثم مدت يدها الصغيرة تهز كتفها برفق: ماما... يلا قومي.

لم تستجب ماسة.

هزتها مرة أخرى: مامااا... قومي بقى.

تحركت ماسة ببطء، وفتحت عينيها نصف فتحة، ثم تمتمت بنبرة ناعسة:إيه يا حبيبتي؟

ابتسمت حور: يلا قومي بقى الشمس صحيت من بدري.

ضحكت رغم نعاسها: الشمس صحيت من بدري؟

أومأت بثقة: أيوه، وإحنا لسة نايمين.

ثم التفتت إلى سليم، وبدأت تضرب على كتفه بيدها الصغيرة: بابا... يلا قوم.

فتح عينه بصعوبة: نعم يا روحي؟

ردت بحماس: يلا قوم عشان تجيبلي الحاجات بتاعتي وتعملي الأوضة وخلي ماما تقوم.

ابتسم وهو لا يزال نصف نائم: حاضر يا ستي.

ثم أغلق عينيه من جديد.

اتسعت عينا حور: لأ! ماتنمش تاني!

ضحكت ماسة، ومدت يدها تربت على شعرها:سيبيه يا حور

نظرت إليها الصغيرة بجدية:لا، ده لازم يقوم.

ثم أمسكت بطرف ملابس ماسة من كتفها، وبدأت تشدها: وإنتِ كمان قومي يلا بقى.

ضحكت ماسة وهي تجلس على الفراش: هقوم يا شقية، هقوم.

احتضنتها حور فورا، فضمتها ماسة إليها وقبلت رأسها.

في تلك اللحظة، نهض سليم ومد يده إلى ساعة موضوعة فوق الكومودينو، وما إن وقعت عيناه على الوقت حتى اتسعت عيناه بدهشة: إيه ده؟!

رفعت ماسة رأسها: فيه إيه؟

نظر إلى الساعة مرة أخرى وكأنه لا يصدق: الساعة ٢!

حدقت ماسة فيه للحظات، ثم نظرت إلى الساعة بنفسها: بجد؟!

أومأ وهو يمرر يده على وجهه:إحنا نمنا كتير أوي.

ضحكت حور وهي تقفز من فوق الفراش: ما أنا قولتلكم! الشمس صحيت من بدري!

ضحكت ماسة، بينما حملها سليم من تحت ذراعيها ورفعها في الهواء: طب وإنتِ يا ست حور، صحيتي من إمتى؟

قهقهت وهي تتلوى بين ذراعيه: من زمان!

اتسعت عينا سليم: من زمان يعني الساعة كام يعني؟

فكرت قليلا، ثم أجابت بكل ثقة: ما أعرفش بس من ساعة وساعة وساعة! والشمس خلاص هاتروح تنام تاتي، مش هنعرف نجيب الحاجات إللي وعدتني بيها.

انفجرت ماسة بالضحك، بينما هز سليم رأسه باستسلام: خلاص، اقتنعت.

ثم قبل خدها وقال:يلا يا حور، ننزل ناكل الأول، وبعدها نخرج نجيبلك كل حاجة نفسك فيها.

قفزت من بين ذراعيه، وأمسكت بيد ماسة:يلا يا ماما بسرعة!

ابتسمت ماسة وقالت وهي تمرر يدها على شعر حور:

طب أصبري يا حبيبتي، نغسل وشنا ونغير هدومنا الأول.

تأففت حور وهي تعقد ذراعيها أمام صدرها: يووووه... لسه؟

ضحك سليم، وفجأة انحنى وحملها بين ذراعيه: أسمعي كلام ماما يا شقية.

ضحكت حور وهي تتلوى بين ذراعيه:باباااا!

ضحك: مافيش بابا، يلا.

وبالفعل، دخل بها إلى الحمام، ولحقت بهما ماسة. غسل سليم وجه حور، بينما ساعدتها ماسة في تنظيف أسنانها، وبعدها ذهبوا جميعًا لتبديل ملابسهم.

وبعد دقائق، خرجوا إلى الصالون، فوجدوا جميع أفراد العائلة قد استيقظوا بالفعل.

كانت سلوى أول من وقعت عيناها عليهم، فحدقت في الساعة بدهشة:كل ده نوم؟!

ضحكت ماسة بإحراج: والله أنا نفسي مش عارفة إحنا نمنا إزاي للوقت ده.

اقتربت سعدية منها وربتت على كتفها بحنان:طبيعي يا بنتي، إنتوا امبارح فضلتوا سهرانين لوقت متأخر، وفوق ده كل إللي حصل... اليوم كان طويل على الكل

لكن حور لم تهتم بكل ذلك، وسارعت بالسؤال وهي تمسك يد سليم: بابا، إحنا هنروح إمتى نجيب حاجاتي ونعمل الأوضة؟

ضحك سليم: هنفطر الأول يا حور، وبعدها نعمل كل إللي نفسك فيه.

ضربته حور بكفها الصغير على ذراعه:لا، أنا عايزة نروح دلوقتي!

ضحكت ماسة وهي تمسح على اعلى راسها: حاضر يا ستي، بس لازم ناكل الأول.

سعدية بحنان: طب روحوا أقعدوا على السفرة لحد ما سحر تعملكم فطار.

وبالفعل جلسوا حول مائدة الطعام، وأحضرت سحر إفطارا خفيفًا لهم، بينما ظلت ماسة وسليم يتناوبان على إطعام حور، وكل واحد منهما يحاول أن يجعلها تأكل لقمة إضافية.

وبعد أن انتهوا، بدأ في الاستعداد للخروج، وبينما كانت ماسة تساعد حور على ارتداء حذائها،وبانتظار سلوى كي تبدل ملابسها، خرج سليم إلى السيارة، فوجد مكي يقف بجوارها يتابع بعض التفاصيل.

اقترب منه وسأله:بقولك يا مكي، أخبار الأوضة إيه؟

هز رأسه موضحا: بصراحة؟ ماعتقدش إنها هاتخلص النهاردة.

قطب سليم حاجبيه: لأ، لازم خلال يومين بالكتير تكون خلصانه،  وكل حاجة تكون جاهزة للبنت. والأوضة تتعمل زي ما أنا قولت بالظبط.

ابتسم مكي: ماتقلقش، انا متابعهم وأخليهم يشتغلوا خلال يومين، وبعدين عندي ليها أحلى مفاجأة.

رفع سليم حاجبه:مفاجأة إيه؟

ابتسم مكي بمكر: لما تخلص هتعرف.

ضحك سليم: المهم تطلع حلوة.

ربت مكي على كتفه:هتطلع أحلى مما تتخيل، دي اوضه بنت اخويا، وبعدين خليها كام يوم دول تنام معاكم لحد ما الأوضة تخلص اعتقد انت مشتاقلها

اوما بيقين  بإبتسامة مشرقه: ده أكيد، بس إنت عارف إنها نفسها في الأوضة، وأنا نفسي أعملها كل حاجة نفسها فيها...

وفي تلك اللحظة، ظهرت حور تتوقف من بعيد قليلا 

وهي تنادي بصوت عالٍ: باباااا! ما تخلص بقى وأتكلم مع عمو مكي وإحنا في الطريق! انا وماما وسوستا خلصنا.

التفت سليم إليها وضحك:حاضر يا ست حور.

ثم نظر إلى مكي:يلا أركب.

فتح مكي الباب وجلس مح السائق، وسليم  بجوارة بينما جلست ماسة في الخلف وبجوار سلوى، وأجلست حور بينهما.

وما إن أُغلقت الأبواب، حتى التفتت حور إلى مكي بجدية: عمو مكي؟

تبسم ونظر لها ف المرايا: نعم يا حور هانم؟

تساءلت بطفولة: إنت هاتروح معانا؟

ابتسم: أيوه عندك أعتراض.

هزت رأسها باقتناع: كويس، علشان إنت بتجيب حاجات حلوة زي مايو.

ضحكت سلوي: أهو بدأت تستغل مكانته عندها.

نظر إليها مكي من المرآة:وأنا تحت أمر حور هانم.

رفعت حور يدها بحماس: وأنا عايزة حاجات كتير أوي.

ضحك سليم: وإحنا جاهزين يا حبيبتي.

ثم أدار المحرك، وانطلقت السيارة، بينما كانت حور تلتصق بالنافذة تراقب الطريق بسعادة

قصر الراوي2م

دخلت منى الغرفة بهدوء، بينما كان طه ممددا على الفراش وما إن لمحها حتى عقد حاجبيه باستغراب، ثم اعتدل قليلا وهو يسألها: كنتِ فين؟

رفعت عينيها إليه، واقتربت بخطوات واثقة، وعلى شفتيها ابتسامة حملت شيئا من الشماتة: ولا حاجة كنت عند رشدي.

اعتدل من جلسته بالكامل، وحدق بها في دهشة: وإيه إللي وداكي هناك؟

أجابته بنبرة حاسمة:كان لازم يعرف إني مش هسيب حقي، وهعمل فيه زي ماعمل فيا.

تنهد بضيق، ثم قال بعقلانية مستهجنه: منى أنا من رأيي كفاية لحد كده، كفاية دم، كفاية مشاكل، كفاية مؤامرات، هو إنتي لسه ما اكتفتيش من إللي حصل؟

رمقته بنظرة حادة بعدم رضا، تابع برجاء: تعالى نمشي.

قطبت جبينها برفض: نمشي؟ لا طبعا.

توقف، واقترب منها خطوه حاول اقناعا: اسمعيني بعد إللي حصل، خلصت، مش هترجع تاني، الكل بقى داخل في مشاكل، وفيه طرف تالت بيلعب في الخفاء، لازم نلحق نفسنا يا منى أنا حاسس إن إللي جاي مش هيكون خير.

أطلقت ضحكة ساخرة، ثم قالت باستهجان: بطل بقى جبن يا أخي! أنا مش فاهمة إيه الخوف إللي إنت عايش فيه ده؟ هاتسيب حق مراتك كده عادي؟

نظر إليها بثبات، ثم رد بهدوء:مش هسيب حقك،  بس اللعب مع رشدي خطر.

هزت رأسها نافية: لأ، مش خطر، يمكن زمان، لكن دلوقتي لأ.

اقتربت منه أكثر، وقالت بثقة ممزوج بفحيح: رشدي دلوقتي عنده إللي يخاف عليه! عنده نقطة ضعف، مي، واضح إنها عرفت حاجة، وعشان كده سابته. عرفت حاجة من الماضي.، يا عرفت الحادثة، يا عرفت قذارته.

،اتسعت عيناه بصدمة واضحة: الحادثة؟! إنتِ متأكدة؟

اومأت بايجاب ببرود، ثم سألها بسرعة، وقد بدت نبرته مرتبكة: إزاي يعني ممكن تكون عرفت عن الحادثة؟!

توقفت لحظة، ثم ضيقت عينيها وهي تراقب ملامحه المرتبكة قالت بستنكار: إنت خايف كده ليه؟ هو إنت ليك علاقة بيها؟

هز رأسه نافيًا: لأ... ماليش أي علاقة، بس كنت عارف وسكت, وإنتي كمان اشتركتي معاهم، صدقيني الكل هايتحاسب لما الموضوع ده ينكشف..

أخرج نفسا عميقا ثم قال: عموما يا منى، إحنا لسه راجعين. خلينا نهدى ونفهم الدنيا ماشية إزاي، وإيه إللي حصل، وبعدها نبقى نفكر في رشدي.

نظرت إليه بعناد لا يتزحزح، وقالت بنبرة امتلأت بالغضب: أنا مش هاطسيب حقي يا طه، وكل سنتي دخل في  جسمي، هايترد.

هز رأسه بعدم رضا، ثم أطلق زفرة طويلة، وعاد ليجلس على الفراش مرة أخرى، بينما ألتقط هاتفه وبدأ يعبث به في صمت، في حين ظلت منى واقفة تراقبه بعينين مشتعلة بالغضب والإصرار.

في احد المولات3

وصلوا سيارة سليم إلى أحد أكبر المولات، حيث قضوا الساعات التالية في التسوق من أجل حور، منذ أن وطأت قدماها أحد متاجر الأطفال، لم يعرف سليم وماسة معنى كلمة «كفاية».

ماسة كانت بتجري على الفساتين الملونة، وسليم بيجيب لها لبس للبيت والخروج، وأحذية وشنط وإكسسوارات صغيرة، وكلما حاول أحدهما أن يقول: «كفاية كده»، كانت حور تلمح شيئًا جديدًا فتتسع عيناها، فينسى الاثنان ما قالاه.

اشتروا لها ألعابًا ودمى ودباديب وكراسات رسم وألوان، بل إن سليم أصر على شراء أشياء لم تطلبها، لمجرد أنه تخيل فرحتها وهي تفتحها.

وكانت سلوى ومكي يرافقانهما، وكانت حور لا تكف عن سؤال مكي عن رأيه.

أما سلوى، فكانت تحاول بين الحين والآخر أن تفتح معه أي حديث.

فتار تمسكت بأحد الفساتين وقالت بابتسامة خفيفة: إيه رأيك؟ هيبقى حلو على حور، صح؟

ألقى مكي نظرة سريعة على الفستان، ثم قال باقتضاب: حلو.

وبعد دقائق رفعت دبدوبًا أبيض كبيرًا أمامه.  بص ده. أكيد هيعجبها.

هز رأسه بهدوء: أيوه.

حاولت مرة أخرى وهي تشير إلى حذاء صغير: وده؟

أجاب دون أن يلتفت إليها: كويس.

كانت كل إجاباته مختصرة، باردة، وكأنه يتعمد ألا يطيل الحديث معها.

ولم يغب ذلك عن عيني سليم، ولا عن ماسة.

بعد وقت من التسوق، امتلأت السيارة بأكياس المشتريات، بينما كانت حور تنظر إليها بعينين تلمعان بسعادة طفلة حصلت أخيرا. على كل ما كانت تحلم به

مر الوقت وكأنه دقائق.

لكن المفاجأة الأكبر كانت في الطابق المخصص للألعاب، ركن واسع أشبه بمدينة ملاهٍ صغيرة وما إن وقعت عينا حور عليه حتى أطلقت شهقة فرح وركضت نحوه.

ركبت حور السيارات الكهربائية الصغيرة، وجلس سليم في سيارة مجاورة لها، يتعمد أن يصطدم بها برفق، فتتعالى ضحكاتها وهي تحاول الهرب منه.

وفي الجهة الأخرى، ركبت ماسة وسلوى سيارتين أخريين، وأخذتا تتصادمان وسط ضحكات الجميع.

بينما وقف مكي قليلا بعيدا، يلتقط لهم الصور ومقاطع الفيديو..

ثم انتقلت حور إلى الحصان الدوار، فأصرت أن تركب ماسة بجوارها، فجلستا معًا، وحور تضحك وتصفق كلما دارت اللعبة.

وبعدها اتجهوا إلى ركن البلايستيشن، حيث جلست حور إلى جوار ماسة، وأعلنتا التحدي في وجه سليم وسلوى، وسط اعتراضات وضحكات.

وتولى مكي مرة أخرى مهمة التصوير.

وقضى مع بعضهما لحظات عائلية خالصة، كانا يظنان يوما أنها لن تكون من نصيبهما أبدًا.

عند سلوى ومكي.

وقفت سلوى إلى جواره، تتابع حور وهي تضحك على الأرجوحة، ثم تحركت بخطوات مترددة نحو مكي الذي كان يبتعد بضع خطوات، توقفت بجواره وابتسمت ابتسامة واسعة تكاد تصل إلى عينيها وقالت بانبهار: والله أنا حاسة إني هتجنن، مش مصدقة إني بلعب مع بنت أختي، أنا نمت صحيت فجأة بقى عندي بنت أخت، حاجة ولا في الأحلام!

تبسم ابتسامة خفيفة وقال بنبرة هادئة وهو ينظر إليها: أمال هما بيعملوا إيه؟

ابتسمت ابتسامة صغيرة، تأملت ماسة وسليم وهما يقفان عند السور والابتسامة المشرقة تملأ ملامحهما، ثم قالت بتنهيدة راحة: والله أنا مبسوطة أوي، أخيرًا شوفنا سليم وماسة فرحانين، من يوم الحادثة تقريبًا، وهم ما شافوش يوم عدل، بصراحة، عمري ما توقعت إن علاقتهم ترجع بالشكل ده.

ظل صامتا للحظات، تنهد بعمق دون أن يرفع عينيه عن حور، وقال بهدوء يخفي وراءه الكثير:وأنا كمان، عمري ما توقعت، ساعات كتير كنت بقول لسليم ينساها، ويتخطاها، حتى بعد مارجعها من إسكندرية، وأحيانا كنت بشوف إنه ظلمها في حاجات كتير، لكن كنت متأكد من حاجة واحدة، إن اللي بينهم عمره ماكان حب عادي..

سكت لوهله، ثم أكمل وصوته أكثر انخفاضا: قصتهم غريبة، واللي مروا بيه أغرب، ما أفتكرش فيه اتنين اتحطوا في كل المصايب دي، ولسه بعقلهم، خصوصا بعد ماعرفنا إن عيلته هي اللي اتسببت في الحادثة.

تنهدت بألم وارتجفت شفتاها بابتسامة ضعيفة نظرت له، قالت بنبرة خافتة يملؤها التساؤل: وأنا ساعات بقعد أسأل نفسي، لو كنت مكان ماسة، كنت هقدر أستحمل كل ده؟ سبحان الله، ربنا فعلا بيحط كل واحد في الابتلاء اللي يقدر يشيله، لاني ما كنتش هقدر...

ابتسمت ابتسامة باهتة، وسرعان ما لمعت الدموع في عينيها وهي تضيف بوجع: أمي كانت دايما تقول لي زمان: "يا ريت كنتي انتي اللي اتجوزتي سليم كنتي هتعرفي تتعاملي أحسن من ماسة.

هزت رأسها بخفة بيقين: بس لا ماكنتش هقدر..

ساد الصمت بينهما، ثم  وجهت نظراتها نحو حور، تابعت  بابتسامة واسعة:الحمد لله إن ربنا عوضهم ببنت زي دي.

ابتسم أخيرا ابتسامة هادئة وقال: الحمد لله.

التفتت إليه، تتأمل ملامحه بقلق وتحاول أن تسحب منه أي كلمة: إنت كويس؟

أجاب باقتضاب، وهو لا يزال يشيح بوجهه عنها:كويس.

تأملته للحظة، ثم سألته بصوت منخفض متردد:مش عايز تقول أي حاجة؟

تنفس ببطء، وقال دون أن ينظر إليها، بنبرة حاسمة تخفي ألما فهو يعرف عن ماذا تلمح:صدقيني كده أحسن يا سلوى.

نظرت إليه بحزن، وعيناها امتلأتا الوجع وقالت:أول مرة أحس إنك قاسي.

ابتسم ابتسامة باهتة، نظر لها أخيرا، وقال بصوت متألم يحاول التماسك: أنا مش قاسي، أنا بحكم عقلي، عشان ما أفتحش جرح، بالعافية عرفت أتعايش مع وجعه، رغم إنه لسه موجود.

لم تجد ما تقوله، فاكتفت بالنظر إليه لثوانٍ بقلب منكسر، ثم ابتعدت بخطوات هادئة نحو حور، تشاركها اللعب، بينما بقي هو في مكانه يراقبهما بصمت.

وشعرت سلوى في تلك اللحظة بانقباض في قلبها، أن ما انكسر بينهما، قد لا يعود كما كان أبدًا مهما حاولت.

وبينما كانا على الجانب الآخر.

وقف سليم وماسة يستندان إلى السور، يتابعان حور وهي تتأرجح ضاحكة.

ارتسمت على وجه سليم ابتسامة مشرقة، مليئة بالراحة، أما ماسة فكانت فكانت  ابتسامتها يغلب عليها وجع السنين.

قالت بصوت خافت مقهور، بدمعة محبوسة في عينها: عمري ما توقعت إن بنتي تبقى جميلة كده...

ابتسم سليم، لكنه لم يقاطعها، تابعت وهي تراقب حور وعيناها تلمعان بفخر: كل حاجة فيها جميلة مش بس ملامحها، صوتها، طريقتها، كلامها، ضحكتها، كل حاجة..

سكتت لحظة، ثم ابتسمت وسط دموعها أضافت بتنهيدة راحة: أول مرة أحس إن الدنيا بتصالحنا على كل الوجع اللي عشناه.

نظر إليها بحنان ممزوج بوجع، فأكملت وهي تمسح دمعة سقطت على وجنتها رغما عنها:ادتنا حور، والبيبي اللي جاي مرة واحدة..

ثم تغيرت نبرتها، وانطفأت ابتسامتها قليلا، وقالت بخوف وهي تخفض بصرها:بس أنا خايفة يا سليم.

اقترب منها متعجبا:من إيه؟

رفعت عينيها وقالت بتوتر: خايفة يكون ده اختبار، وبعد كل الفرحة دي تيجي طعنة تانية توجعنا أوي.

مد يده ووضعها على كتفها، يحاول طمأنتها بحنان وقال: ماتخافيش يا قلبي..

ثم ابتسم بثقة: أنا عندي ثقة في ربنا، اننا مش هنرجع نتحرم من فرحتنا تاني، وإن دي بداية كل حاجة حلو

أومأت بتمنٍ وعيناها متعلقتان به: يارب.

نظرت إلى حور لثوانٍ، ثم عادت ببصرها اليه تسالت بتردد: سليم، هو لو كنت عملت تحليل DNAوطلع إن حور مش بنتنا، كنت هتعمل إيه؟

أجابها دون تردد ونظره ثابت عليها: كنت هتبناها.

اتسعت عيناها بدهشة: كنت هتتبناها؟

أومأ بثبات: أيوه يا ماسة.

ثم نظر إلى حور، التي كانت تضحك أمامهما، وقال بصوت أكثر هدوءا وعمقا: البنت من أول ما شافتني، نادت بابا، ماعرفتش أقول لها غير إني باباها، حاجة جوايا خلتني أقول لها كده من غير ما أفكر..

صمت لحظة، وابتسم بحزن: ما طعرفتش أحط كنترول على نفسي، ماعرفتش حتى أقول يمكن أو احتمال، أنا كنت عايز أصدق إنها بنتي وخلاص..

مد وجهه بحيرة وهو يركز النظر في حور: يمكن علشان فيها شبه منك كبير، يمكن صدقت أمل كذاب..

ثم نظر إلى ماسة مباشرة قائلا بيقين: بس اللي متأكد منه، إني مستحيل كنت هخذل البنت دي بعد اللي شوفته في عينيها في اللحظة اللي عرفت فيها إني باباها.

اغرورقت عينا ماسة بالدموع، وقالت بصوت مبحوح: أنا كمان كنت هقولك كده نتبناها بس الحمد لله طلعت بنتنا.

ثم ضحكت بخفوت وهي تهز رأسها بعدم تصديق: أنا لحد اللحظة دي مش مصدقة إن بنتي قدام عيني، بتلعب، وبتضحك، وبتنادي عليا ماما..

تنهدت بتعب واصلت: مش عارفة هفضل لحد إمتى مش مصدقة ومش مستوعبة.

صمت سليم قليلا، ثم قال بجدية: إحنا كده كده محتاجين نروح لياسر يا ماسة.

نظرت إليه متعجبة: ليه؟

مال بشفتيه بأسف: أنا كمان مش قادر أستوعب اللي حصل، بحاول أتعامل مع الموقف كأنه عادي، بس جوايا لخبطة وتشتت..

ثم أضاف بضيق ممزوج بقلق:  غير إن اللي حصل إمبارح لما حور قالت إنها عايزة البيبي يروح يعيش عند الحاجة إسعاد زيها...

توقفت ماسة عن الابتسام، فأكمل وهو يزم شفتيه بقلق: ده شيء يتخاف منه، هي تراجعت، بس ده هيفضل مؤشر خطر، لازم نفهم هي بتفكر إزاي؟! وإيه اللي ممكن يحصل لو بدأت تسأل أكتر عن الماضي.

أومأت بموافقة: عندك حق.

اقتربت خطوه وتساءلت بتوتر: سليم؟ هتعمل إيه مع العيلة؟

ظل صامتا للحظات متعجبا من سؤالها بينما تابعت بعقلانية وصوتها يرتجف: أنا شايفة إن الموضوع بقى أخطر من الأول، لو وصلهم إن حور عايشة مش عارفة ممكن يحصل إيه؟! أو لو كملت في انتقامك منهم...

صمتت قليلا ثم قالت بحكمة ودموعها تلمع: مش هيبقى صح إحنا ما بقيناش لوحدنا عندنا اللي يتخاف عليه.

نظر إليها بصمت لثواني، ثم قال بتنهيدة ثقيلة: مش عارف يا ماسة، كلامك منطقي أنا مش هنكر ده، بس....

زفر بضيق وهو يضيف وعيناه تائهتان: أنا مش قادر آخد قرار، بس في نفس الوقت، أنا لازم أدفعهم تمن اللي عملوه..

خفض عينيه وهو يهز رأسه: مش هعرف أرتاح بسهولة، إلا لما ادفعهم التمن، بس لازم أأمنك أنتِ، والبنت، واللي في بطنك الأول قبل اي خطوة.

أمسكت يده فورا بنبرة مهتزة وقلبها يخفق بقوة: أوعى تكون فاكر إني هبقى مبسوطة وإنت بتأذي نفسك عشان تجيب حقنا طظ قي كل حاجة انت أهم..

تابعت وهي تضغط على يده وتنظر داخل عينه بحب وخوف معا: أنا معايا حور والبيبي، هما نعمة كبيرة، وأقدر أعوض أي حاجة فاتتني معاهم، حتى هما أقدر أعوضهم..

تابعت بعشق يخرج من عينيها ممزوج بخوف ودموع: بس إنت؟ ما أقدرش أعوضك مهما حصل.. 

أضافت برجاء: عشان خاطري يا سليم بلاش تهور ولا كبرياء سليم الراوي، بلاش تخلي انتقامك يعميك وأخسرك، لأني استحالة أتحمل الفكرة دي.

تأثر سليم بكلماتها، فمد يده وضم وجهها بين كفيه،  بحنان ودقق النظر داخل عينيها ليطمئنها وقال بصوت دافئ: ماتخافيش، أنا اللي مش هخليكي تخسريني.

اقترب منها أكثر، ثم ضمها إليه وقال بهمس صادق:

طول ما إحنا مع بعض، هنعدي كل حاجة واستحالة أسمح بأي شيء يخلي حد فينا يخسر التاني..

احتضنته ماسة بقوة، بينما كانت حور تضحك أمامهما دون أن تعرف شيئًا عن المخاوف التي يحملها والداها.

♥️________________بقلمي_ليلةعادل 

قصر الراوي5م

جلس عزت خلف مكتبه، يتصفح بعض الملفات، بينما يتحدث عبر الهاتف بشأن أحد المشروعات الجديدة: : أيوة خلوا العقود تجهز النهاردة، وأنا هراجعها بنفسي تمام.

أنهى المكالمة، وأغلق الهاتف، ثم وضعه على المكتب، قبل أن يرفع رأسه إلى الباب الذي انفتح بهدوء.

دخلت فايزة، وقد ارتسم الضيق على ملامحها.

تأملها للحظات، ثم قال: كنتِ فين؟ ليه ماجتيش المجموعة النهاردة؟

وضعت حقيبتها جانبا، وأطلقت زفرة طويلة: كان عندي مشوار مهم.

عقد حاجبيه، وسألها بإهتمام: خير؟

هزت رأسها ببطء بضجر: ياريت كان خير، دي مصيبة.

اعتدل في جلسته، وأغلق الملف الذي أمامه متسائل بقلق: مصيبة إيه؟

جلست أمامه مباشرة: كنت عند مي.

تبدلت ملامحه قليلا: روحتي لها ليه؟

ردت باستهجان محتقر: الهانم نسيت نفسها وبقت بتتطاول على أسيادها..

ظل ينظر إليها بصمت، فأكملت وهي تقبض كفها بغيظ: رفعت قضية خلع على رشدي.

اتسعت عيناه: إيه؟

أومأت برأسها وهي تزفر في ضيق: ومش بس كده! دي هددتني كمان، بس طبعا ماسكتلهاش، وفهمتها هي إيه؛ وإحنا إيه..

ثم لوحت بيدها بإستنكار: وعلى العموم، رشدي لازم يطلق البنت دي، ونخلص من القصة السخيفة دي لازم تكلمه يا عزت.

ساد الصمت لثوانٍ ظل عزت يطرق بأصابعه فوق سطح المكتب، وعيناه شاردتان في نقطة بعيدة، قبل أن يقول بهدوء: هي أصلا عايزة تطلق ليه؟

مدت وجهها بلا مبالاة: مش فارق معايا.

رفع بصره إليها، وقال بنبرة يغلب عليها المنطق:: لا لازم يفرق معاكي.

صمت لحظة، ثم أردف بعقلانية: إنها تطلب الخلع بعد أقل من شهرين جواز! وبعد قصة الحب إللي كانت بينهم، ده يخلينا نسأل نفسنا سؤال.

ضيقت عينيها: سؤال إيه؟

أسند ظهره إلى المقعد، وشبك أصابعه أمامه:  ليه مي عملت كده؟ وليه رفعت قضية خلع على طول، من غير حتى ماتحاول تطلب الطلاق بشكل طبيعي؟

ثم أطرق مفكرا بشك: ده يخليني أفكر إنها عرفت حاجة.

قاطعته بحسم، وهي تلوح بيدها: أكيد رد فعل عاطفي،  يمكن عرفت إنه خانها. إنتي عارف رشدي.

اقتربت بجسدها من المكتب، وأسندت كفها فوقه بقناع: صدقني يا عزت، مش مهم نعرف السبب! المهم إننا ننهي القصة دي قبل ماتكبر.

أضافت تحاول اقناعه: بإللي يهمني دلوقتي إن الموضوع ده لو اتسرب، هايعمل دوشة كبيرة، وإحنا لسه ماصدقنا الدنيا بدأت تهدى.

أغلق الملف أمامه اوما بتأييد: المهم أعملي حسابك. بكرة عندنا اجتماع مهم بخصوص المقبرة الجديدة.

أومأت برأسها: حاضر.

أضافت بنبرة ذات معنى: وبعده عندي سفرية لإيطاليا محتاج أفهم شوية حاجات بنفسي.

اشار بايده نحوها، بنظرات تحمل شيئا من الغموض: ولما أرجع؟! هيكون ليا قعدة طويلة مع سليم.

تنهدت بضجر: مش عارفة سليم أختفى فين تاني؟! ومحتاجين كمان نطمن على صافيناز.

لوح بيده دون اهتمام: سيبيه دلوقتي، الشغل إللي في إيدي أهم بكتير ومش محتاج له، المقبرة اللي  وصلت ليها د هتفرق معانا.

صمت لحظة، ثم قال بنبرة غريبه: ولما أرجع من إيطاليا، أكيد هانلاقي إجابات لكل علامات الاستفهام دي. 

ساد الصمت بينهما، وتبادلا نظرة طويلة، قبل أن يعود كلٌ منهما يفكر فيما تخبئه الأيام القادمة.

♥️________________بقلمي ليلةعادل 

فيلا مصطفى5م

كان مصطفى يجلس أمام حمام السباحة في شرود، يدخن سيجارته بينما تتزاحم الأفكار داخل رأسه.

منذ حديثه مع آلاء في الصباح، وهو غير قادر على التخلص من ذلك الشعور الثقيل الذي يضغط على صدره، بطلبها الطلاق والأسوأ أنه وافق رغم أن كل خلية داخله كانت تصرخ بأنه لا يريدها أن ترحل

لكنه ما زال يظن أنها لم تحبه.

في تلك اللحظة، اقتربت عائشة منه، وجلست إلى جواره وهي تتأمله لثوانٍ قبل أن تسأله:إيه يا صاصا؟ عملت إيه مع لولو؟

رفع عينيه إليها، ثم زفر ببطء: طلبت الطلاق.

اتسعت عيناها بصدمه: طلبت الطلاق؟ وإنت عملت إيه؟

أجاب بهدوء: قولتلها تخلص الامتحانات، وأنا هعملها إللي هي عايزاه.

ردت متهكمه: يعني سيبتها تمشي كده عادي؟

زم شفتيه بضجر: هي إللي اختارت يا عائشة..

أخذ نفسا عميقا، ثم أطفأ سيجارته وقال بضيق: أنا أصلا مش عايز أفرض نفسي عليها، ولا عايز حب بالإكراه، هي مش مدّياني فرصة حتى أتكلم.

قالت باعتراض مستهجن: وإنت مابتحاولش معاها يا مصطفى! مابتحاولش تسكتها وتصرخ وتقول لها إنك بتحبها، بمجرد ما تقول لك أنا مش عايزة أتكلم بتسكت، إللي بيحب بيحارب، مش بيسكت من أول المعركة.

نظر إليها طويلا، ثم قال بسخرية مريرة: وساعتها لما أقول لها وأنا بصرخ إن أنا بحبها وأحارب، هي تقول لي لأ... ساعتها هعمل إيه؟

هزت رأسها بثقة :مش هتقول لك لأ هي بتحبك.

ابتسم ابتسامة باهتة بيقين: دي أوهام في دماغك يا عائشة، آلاء مابتحبنيش..

صمت لحظة، ثم تابع بهدوء: آلاء بتعاملني كدكتور، بتحبه وتحترمه وتثق فيه وبس، وشايلة لي جميلة اللي عملته معاها مش أكتر..

خفض عينيه للحظات، قبل أن يضيف باقتناع: وإذا كان على إللي حصل وإحنا هناك، فدي لحظة ضعف عادية بتحصل، وبعدين هي مابادلتنيش يعني بالشكل إللي إنتِ متخيلاه...

تابع دن توقف وكأنه يحاول قتل الأمل داخله قبل أن يقنعها: ومش معنى إنها ماضربتنيش وزعقتلي إنها كانت متقبلة إللي حصل! ماتحكميش على الناس من منظورك إنتِ، أو من رد فعلك إنتِ، وارد يكون ده رد فعلك في اللحظات دي، ووارد جدا يكون رد فعلها مختلف.

ردت بسرعة باعترض: وارد برضوا يا مصطفى إنها تكون بتحبك.

تغيرت ملامحه فورا بقرار: وأنا مشاعري مش هحطها تحت الاحتمال، أنا مشاعري غالية، ومستحيل قبل إني أهينها علشان احتمال.

تنهدت، قالت بحزن: أنا حقيقي زعلانة عليكم.

ابتسم لها ابتسامة هادئة، وقال: لا، ماتزعليش. كل شيء نصيب، وماحدش يعرف بكرة مخبي له إيه.

ثم نظر أمامه للحظات، قبل أن يقول بحسم: وأنا مش عايز أتكلم في الموضوع ده تاني، أرجوكي أقفليه علشان ما أزعلش منك، ركزي في امتحاناتك وبس.

نظرت إليه، وفهمت من نبرته أنه أغلق الباب تماما، فلم تجادله.

أومأت بصمت، بينما ظل هو يحدق أمامه، محاولا إقناع نفسه أن قرار آلاء لم يؤلمه، وأن رحيلها عنه لن يترك بداخله شيئا، لكن الحقيقة كانت أبعد ماتكون عن ذلك.

♥️____________بقلمي_ليلةعادل 

قصر الراوي6م

مازال رشدي جالسا في غرفته، يشعر بالضيق والاختناق، كان كل شيء يضغط عليه في وقت واحد، وكأن رأسه لم تعد تحتمل المزيد.

مد يده إلى هاتفه الموضوع فوق الكومودينو، الموضوع عالشاحن منذ فترة، ألتقطه، ثم فتحه وجلس على طرف الفراش، يتصفح الشاشة بشرود.

وبعد ثوانٍ قليلة، ظهرت أمامه عدة إشعارات متتالية.

توقفت عيناه فجأة كانت هناك مكالمات فائتة....

مي.

اتسعت عيناه في صدمة لم يستطع إخفاءها، ثم تبدلت ملامحه في لحظة، وكأن شعورًا بالفرحة تسلل إلى قلبه رغما عنه.

مي أتصلت به!

ظل يحدق في اسمها لثوانٍ، وكأنه يخشى أن يكون قد قرأه خطأ.

ثم ظهرت على وجهه ابتسامة صغيرة، لأول مرة منذ ساعات.

همس لنفسه: مي...

ضغط على الرقم بسرعة، واتصل بها دون أن يفكر كان قلبه يدق بعنف، وفي داخله عشرات الاحتمالات.

ربما تريد أن تتحدث معه، ربما غيرت رأيها، ربما تكون أخيرا تريد أن تسمعه.

ظل الهاتف يرن...

ينتظر ردها وكأن تلك المكالمة وحدها قادرة على تغيير كل شيء.

في إتجاه آخر...

كانت مي ماتزال تجلس داخل غرفتها، تشعر بالغضب بعد حديث فايزة جلست على طرف الفراش، وعيناها ممتلئتان بالدموع، بينما ظلت كلماتها وتهديداتها تتردد داخل رأسها.

كانت خائفة على والدها وإخوتها، وغاضبة من كل مايحدث حولها، والأكثر من ذلك أنها كانت تشعر بالعجز أمام نفوذ عائلة الراوي.

في تلك اللحظة، رن هاتفها.

نظرت إلى الشاشة بعينين متعبتين، وما إن ظهر اسم المتصل حتى اتسعت عيناها بدهشة.

أمسكت الهاتف بسرعة، وضغطت على زر الإجابة بعنف، وما إن وضعت الهاتف على أذنها حتى جاءها صوته: مي...

لكنها لم تمنحه فرصة ليكمل انفجرت فيه بغضب: إنت بتبعتلي أمك يا جبان؟!

ساد الصمت في الطرف الآخر أكملت وهي تبكي من شدة القهر  وتهتف بغضب: بدل ماتبقى راجل وتيجي تواجهني بنفسك، تبعتلي أمك تهددني وتهدد أهلي؟!

ظل صامتا، وقد اختفت الابتسامة التي ارتسمت على وجهه منذ لحظات غير قادر على استيعاب مايسمعه، قال أخيرا، بدهشة حقيقية: إيه إللي بتقوليه ده؟!

لكن مي لم تهدأ تابعت بعنف: كل مرة بتقرفني منك أكتر! وبكرهك أكتر من الأول! 

ثم أضافت بانفعال: أنا مش عايزة أشوف وشك ولا أسمع صوتك! بكرهك، وبحتقرك، ولو حصل لي حاجة أو لأي حد من أهلي والله لأقتلكم كلكم فاهم يا حقير..

كان يستمع لها بصدمة بعينين متسعتين، لا يفهم شيء وقبل أن يتمكن من الرد، أغلقت المكالمة في وجهه.

ظل رشدي يحدق في شاشة هاتفه للحظات.

كان قبل ثوانٍ يظن أن اتصالها قد يكون بداية لشيء جيد والآن لم يعد يفهم شيئا.

رفع عينيه ببطء، وقال بذهول: امك؟!

ضيق عينيه لثوانٍ يحاول ربط الحديث، لكنه لم يصل، لكن ما وصله جيدا أن فايزة قامت بفعل شيء معها جعل مي يجن جنونها هكذا.

جز على أسنانه الأمامية بغضب، وتحرك للخارج وهو يشعر بالدم يغلي في عروقه، هبط مسرعا إلى الأسفل، توجه أولا نحو غرفة عزت وفايزة، فتح الباب بعنف، فلم يجد أحدا.

هبط إلى الأسفل مرة أخرى، فور أن وقعت عينه على الخادمة صاح بنبرة حادة: الهانم فين؟

قالت له بارتباك:خرجت من بدري.

زم وجهه بختناق، ثم صعد مرة أخرى، بدل ملابسه بسرعة ثم هبط إلى الأسفل وأخذ سيارته وتوجه نحو مي ، بات على يقين أن هناك شيئًا كبيرًا قد حدث.

سيارة سليم7م

كانت ملامح حور لا تخفي سعادتها؛ فمنذ أن خرجوا من المول وهي لا تتوقف عن الحديث عن كل شيء اشترته.

نظر لها سليم بإبتسامة: ها مبسوطة يا حبيبتي.

نظرت إليه وقالت بحماس: أنا مبسوطة أوي أوي يا بابا! فرحت أوي فاضل الأوضة بس.

ابتسم: عمو مكي بيعملها لك مع المهندس، وأول ماتخلص هاتشوفيها.

رفعت حاجبيها: أنا عايزة أشوفها دلوقتي وهي بتتعمل!

ضحك مكي من المقعد القيادة: بس كده؟ عيني يا ست حور، طلباتك أوامر أول مانوصل

ضحكت، ثم عادت تنظر من النافذة وهي تتخيل شكل غرفتها الجديدة وبعد قليل، وصلت السيارة إلى الفيلا.

هبط الجميع منها، وتولى سليم ومكي والحراس حمل الحقائب الكثيرة، بينما كانت حور تقفز من مكانها بحماس.

وما إن دخلوا إلى الفيلا حتى أخذت حور تصرخ بسعادة:شوفوا بابا جاب لي إيه!

اقتربت سعدية وهي تنظر إلى الحقائب بدهشة:

إيه الحاجات الحلوة دي كلها؟! ده إنتم جبتوا المحل كله!

ضحك مجاهد: إنت جبتلها المول كله يا سليم؟

التفتت حور فجأة إلى سعدية وأمسكتها من يدها وقالت بحماس: تعالى بقى أوريكي الحاجات إللي بابا وماما، جبهالي يا تيتة، بس استني، عايزة أشوف أوضتي الأول! يلا يا عمو مكي.

اوما: ماشي يا حور.

وبالفعل صعد الجميع إلى الطابق العلوي، حيث كانت غرفة حور بجوار غرفة سليم وماسة.

فتح مكي الباب، فظهرت أمامهم مجموعة من المهندسين والعمال وهم يعملون داخل الغرفة كخلية النحل 

نظرت حور حولها، ثم عقدت حاجبيها بدهشة:

إيه ده؟! دي لسه ماتعملش منها ولا حاجة! صغننه حته.

تبسم بثبات: ما أنا لسة بادئ النهاردة.

تساءلت بطفولة: طب ليه مابدأتش من قبل مانيجي؟

تبادل مكي وسليم وماسة نظرة سريعة، وكأنهما لا يعرفان بماذا يجيبان.

لكن سليم تدارك الأمر بسرعة وقال بدهاء: أصل إحنا كنا محتارين نعملك بيت رابونزل ولا بيت باربي.

اتسعت عينا حور: وإنت هتعمل مين فيهم بقى؟

ابتسم مكي: خليها مفاجأة.

ردت بعند: لااا! قول لي!

ضحكت ماسة وهي تقترب منها: حور أصبري، كلها يومين وهاتنامي في أوضتك وهتعرفي كل حاجة، وسيبى عمو مكي يعملك المفاجأة.

ثم ضمتها إليها: وبعدين، مش احنا وحشناكي إنتِ مش عايزة تنامي معانا؟

أومأت بتوضيح: امم وحشتوني قد سما والبحر، بس أنا عايزة أعرف أوضتي هتخلص إمتى وهتبقى حلوة ولا لأ.

مال سليم في مستوها وقالو وهو يقرصها في أنفها بدلال: هتبقى حلوة أوي زيك.

قفزت حور بحماس:طب يلا ننزل! عايزة أوري الحاجات وتيتة وجدو ويوسف وعمار.

ضحك الجميع، وهبطوا إلى الطابق السفلي.

وبمجرد أن دخلوا، بدأت حور تستعرض مشترياتها أمام الجميع؛ فمرة ترتدي فستانا، ومرة تضع حذاء جديدًا، ومرة تخرج لعبة من إحدى الحقائب، بينما كان الجميع يضحك ويتابعها بسعادة.

وبعد قليل، اجتمعت العائلة في الحديقة، وتناولوا الكيك مع المشروبات، بينما ظلت حور في المنتصف تحكي بحماس عن كل شيء فعلته في المول.

كان المشهد عائليا ودافئا، إلا أن هناك شخصا واحدا لم يكن حاضرا معه تماما.

كانت سلوى تجلس وعيناها لا ترتفعان عن مكي، نظراتها تقول كل شيء من شوق وحب، بينما كان مكي يحاول قدر الإمكان ألا ينظر إليها.

لكن سليم كان يراقبه من وقت لآخر، وقد لاحظ نظرات سلوى، ولاحظ أيضا الطريقة التي يتجنب بها مكي النظر إليها.

وفجأة، تنحنح سليم وقال وكأنه تذكر شيئا عاديا:

صحيح، أنا كنت عايز أقول لكم على حاجة.

ألتفت الجميع إليه تابع: أنا جايب لسلوى عريس.

اتسعت عينا سلوى في صدمة، وسعلت فجأة، بينما توقف فنجان القهوة عند شفتي مكي وكأنه نسي تماما أنه يشرب.

سعدية بسرعة: عريس؟!

ابتسم سليم بتأكيد: أيوة أخو صديقي، شاب محترم جدا وطيار.

سأل مجاهد: وإنت تعرفه كويس يا سليم؟

أجابه بيقين: طبعا، اعرفه كويس، عنده تلاتين سنة، ومحترم وراجل يعتمد عليه.

هز مجاهد رأسه برضا: يا ابني المشكلة مش في السن، أهم حاجة يكون راجل محترم ويتقي ربنا فيها.

كانت سلوى تنظر إلى سليم بانزعاج ولا تفهم ماذا يفعل 

أما ماسة، فالتفتت إليه، ونظرت في عينيه نظرة طويلة فهم منها سليم أنها تقول له بوضوح:

إنت بتعمل إيه؟

اكتفى سليم بابتسامة صغيرة بنظر معينه، ففهمت منها ماسة نواياه فتبسمت بخبث ثم التفتت ماسة إلى سلوى وقالت: طيب مين بقى؟ اسمه إيه؟ يا سليم انا نفسي افرح بسوسكا.

أجاب سليم: اسمه محمد.

تجمد مكي للحظة، ثم أنزل الفنجان ببطء:محمد؟! محمد مين؟!

سليم ببساطه: محمد أخو على، علي الشحات أصحاب شركة التنقيب.

تغيرت ملامح مكي قليلا: آه... عرفتهم..

ثم أضاف بسرعة دون أن يشعر: بس ماله ده؟ وإيه إللي خلاه يتقدم لها أصلا؟ وشافها فين؟

اجابه ببرود وهو يحتسى القهوة: شافها كذا مرة.

مكي بغير ة: فين؟

رد بهدوء يعتمد استفزازة: في الجاليري، ومن وقتها وهو واجع دماغي بس انا كنت مشغول باللي بيحصل.

مكي بلهجة بدأت تحمل شيئا من التوتر: وإنت متأكد إنه مناسب لها؟

أومأ بإبتسامة مستفزة: طبعا..

ثم التفت إليها: إيه رأيك يا سلوى؟ أخليه ييجي تقابليه وتتكلموا مع بعض؟ من راي لازم توافقي شاب هايل.

كانت سلوى ما تزال تحدق فيه بعدم استيعاب.

نظرتها كانت تقول كل شيء: من إمتى وإنت بتجيب لي عريس؟ مش إنت كنت بتقول لي إنك هاتساعدني أنا ومكي؟! نرجع لبعض

لكنها لم تستطع أن تقول ذلك أمام الجميع.

قالت بتردد: أنا أنا... مش عارفة.

وقبل أن تكمل، تدخل مكي بسرعة: على فكرة الولد ده مش محترم.

ألتفت الجميع إليه.

سأله مجاهد: إنت متأكد؟

أجاب مكي بثقة مصطنعة: متأكد، بيشرب مخدرات.

اعترض سليم بتعديل: إللي بيعمل كده يحيى إخوة التؤام، أخوه محمد محترم.

أبتلع مكي ريقه: آه... يحيى.

ابتسم سليم: شكلك لخبطت بينهم.

نظرت ماسة إلى سلوى، ثم قالت بابتسامة:والله لو هو راجل محترم، أنا هفرح لك يا سلوى نفسي أبقى خالتو بقى.

كان مكي، يحاول إخفاء مشاعره، لكن فضحه فنجان القهوة الذي كاد يسقط من يده منذ لحظة سماعه كلمة «عريس» وطريقته ونظراته.

بينما سلوى ما زالت تنظر لسليم ولماسة بضجر تحاول ان تستوعب ماذا يفعلون 

سعدية بحماس:خلاص يا سليم، خليه ييجي.

نظرت إليها سلوى بسرعة قالت بتوتر ييجي فين يا ماما؟! أنا عندي امتحانات.

ردت بتعقل: يا بنتي هو هتيعمل لك إيه في الامتحانات؟ هاييجي يقعد معاكي ساعة، يشوفك وتشوفيه، نتعرف على بعض وان شاء الله خير.

مجاهد مؤيدا: أيوة يا سلوى. طالما راجل محترم وجوز أختك هو إللي جايبه، يبقى نشوفه، خلينا نفرح بيكي يا بنتي.

ابتسم سليم: وده رأيي برضو.

وأضاف عمار: أيوه يا سلوى، أقعدي معاه، إيه مشكلتك؟ كل ماحد ييجيلك تقولي لأ.

هنا لم يحتمل مكي أكثر نهض ووضع فنجان القهوة على الطاولة وقال: طب أنا ها أطلع بره يا جماعة... بعد إذنكم.

نظر إليه سليم وقال: ماتقعد يا ابني.

ابتسم مكي ابتسامة باهتة: لا، اقعدوا إنتوا، كلام عيلة أسيبكم براحتكم.

ثم خرج مسرعا دون أن ينتظر رد أحد تبادل الجميع النظرات، بينما ارتسمت ابتسامة صغيرة على وجه سليم.

سأل يوسف باستغراب: هو مكي ماله؟

سليم بكل هدوء وهو ينظر لإثاره:مافيش ضغط الشغل عليه الفترة دي كتير..

ثم نهض وقال: أنا كان عندي مكالمة كده، أروح أخلصها، وإنتوا شوفوا موضوع العريس ده.

تحرك سليم خلف مكي، الذي كان قد وصل إلى الحديقة ووقف أمام حمام السباحة، واضعا يديه في جيبيه، وعيناه معلقتان بالماء في توتر وضيق،

لم يكن يفهم نفسه، كل كلمة قالها بالداخل، وكل نظرة ظهرت على وجهه، خرجت منه تلقائيًا، وكأن قلبه هو الذي كان يتحدث، لا عقله.

اقترب سليم منه، ثم وقف إلى جواره وقال بنبرة ساخرة: يا عم، مالك؟ خرجت ليه؟

التفت إليه قايلا بحده: هو إنت من إمتى بتجيب عرسان للناس؟ بقيت بتشتغل خطابة دلوقتي؟

ضحك بخبث: وإيه المشكلة لما أجيب لأخت مراتي عريس؟

سأله بتهكم: وإنت قابلته إمتى أصلا؟

أجابه ببرود: هو كلمني في التليفون.

قال بضجر من بين أسنانه: ماقولتليش ليه؟!

رفع حاجبه، ثم ابتسم ابتسامة ذات معنى: مالك يا مكي؟ زعلان ليه؟

أومأ سريعا بتوتر: أنا مش زعلان، هزعل ليه؟

عقد سليم حاجبيه متصنعا البراءة: أمال إيه؟

سكت مكي، ظل سليم يراقبه لثوانٍ، ثم قال بهدوء مستفز: مش إنت خلاص شلت الموضوع من دماغك؟ وقولت إنك إنت وسلوى مش هاينفع تكونوا لبعض؟

رفع عينيه إليه متعجبًا: إنت عرفت منين؟

اجابه بتفسير: ماسة وسلوى قالولي، وكمان سلوى قالت لي إنك قولتلها إن الموضوع انتهى، وإن مستحيل تكونوا لبعض بعد مااترجيتك إنك تسامحها وتديها فرصة وانت رفضت..

صمت لحظة، ثم اقترب منه خطوة: فقلت خلاص، طالما الموضوع بالنسبالك انتهى، وطالما مافيش أمل، يبقى من حق سلوى تشوف حياتها.

لم يرد شاح بوجهه بعيدا بختناق، بينما ظل سليم يتامله للحظات يدرس اثر  الحديث عليه ثم قال بمكر: اضح إنك مش مرتاح للفكرة.

قذف مكي سيجارته بضيق: سيبني في حالي يا سليم، وخرج نفسك من الموضوع ده.

استدار سليم إليه بكامل جسده، ونظر في عينيه مباشرة: لأ... مش هخرج نفسي من الموضوع.

ثم تابع بحدة ممزوج بضجر: بص يا مكي، إللي إنت فيه ده ماينفعش، إنت عايزها تفضل جنبك مترهبة يعني؟! لا عايز ترجع لها، ولا عايز تسامح، ولا عايز تسيبها تشوف حياتها!

رد بنبرة مهتزة:أنا ماقلتش كده.

هتف وهو يهز رأسه بتهكم: مش لازم تقولها بلسانك، إنت بتقولها بعينك، وبكل تصرفاتك، وماتنكرش إنك غيرت واتضايقت، تصرفاتك جوه كانت واضحة جدا..

ثم اقترب منه أكثر: مادام بتحبها أرجعلها..

كاد مكي أن يتحدث، لكن سليم قاطعه بحزم: وماتقوليش بقى: «هي غلطت وجرحتنى» والكلام إللي إنت بتقوله ده. لإن غلطها مايقلش عن غلطك..

صمت لحظة، ثم قال بنبرة أكثر عقلانية: إللي إحنا كنا بنعمله زمان ماكنش لعب يا حبيبي، إحنا كنا بنشتغل في المافيا، وأيدينا متلوثه بدم وده كان الثمن..

ظل مكي صامتا وهو يتأمل حديثه، بينما تابع سليم على ذات الوتيرة: رد فعلها كان طبيعي جدا، طبيعي لما تعرف إن الراجل إللي بتحبه، وإللي خلاص كام يوم وهيبقى جوزها، شغال في المافيا، وأهلها مهددين بالقتل، طبيعي تاخد موقف وتسكت، طبيعي تزعل منك وتسيبك..

قاطعه: مش دي مشكلتي مع سلوى.

اوما بتفهم: مشكلتك، موضوع خطوبتها؟ كانت مش هنكر انها غلطة، بس غلطة، غلطة واحدة من بنت كانت موجوعة وعايزة تنسى واحد حبيته أوي..

صمت لحظة، ثم قال: زيك لما زمان سبتها، فضلت سنين ساكت، بعد ما عشمتها، ومافهمتهاش إنت مشيت ليه؟! ولما رجعت وفهمتها إنك مشيت علشان خاطر سنها، وإنك عايزها تختارك بعقلها قبل قلبها، هي احترمت ده ورجعت..

دقق النظر داخل عينه يحاول جعل صورة واضحه بنبرة اسفه: إللي حصل لسلوى وماسة ماكانش حاجة سهلة ولا بسيطة، كانوا مهددين بأهلهم وبشرفهم..

ثم ابتسم ابتسامة مريرة: إنت اتخذلت، آه... بس إللي عملته سلوى معاك ولا حاجة من إللي ماسة عملته معايا..

ابتلع مكي ريقه، بينما تابع سليم: ومع ذلك، أنا إللي كنت بدور على المغفرة عندها، البنت اعتذرت لك بدل المرة عشرة، وندمت، خلاص يا مكي بلاش تقسى وتبقى ظالم.

ظل مكي صامتا، لا يجد رد يعرف ان حديث سليم لكنه جرحه كبير، وبعد لحظات، اضاف سليم بهدوء: وعموما... إللي حصل جوه كان تمثيل.

رفع مكي رأسه فجأة بدهشه: تمثيل؟!

أومأ بتأكيد: أيوه. مافيش عرسان، ومافيش محمد..

اتسعت عينا مكي، لكن سليم لم يمنحه فرصة لإلتقاط أنفاسه اضاف: كنت بشوف رد فعلك الحقيقي..

صمت لحظة، ثم تغيرت نبرته وأصبحت أكثر حسما مبطنه بتهديد: بس صدقني، المرة الجاية هيكون بجد.

نظر إليه بقلق: يعني إيه؟

أجابه بحزم: يعني أنا هجيب لسلوى عريس بجد المرة دي..

ثم أضاف بصرامة ممزوج بعدم رضا: عشان إنت إللي فيه ده مش عاجبني، ومش هقبل إنك تفضل معلقلها حبل المشنقة على رد فعل طبيعي هي عملته وقتها.

حدق مكي فيه بضيق: إنت مالك داخل فيا حامي كده ليه؟

أجابه بلا تردد: قولتك مش عاجبني إللي إنت بتعمله. إنت مزودها.

ساد الصمت بينهما للحظه ثم  قال مكي بصوت خافت، وكأنه يعترف لنفسه قبل أن يعترف لسليم: أنا خايف منها، خايف تسيبني تاني.

اوما سليم دون اهتزاز: خلاص، طالما إنت لسه خايف منها، ومش عايز تديها أمان، سيبها تشوف حياتها مع واحد تاني.

جاء رد مكي فوريا، دون حتى أن يفكر بنبرة ضعيفه: مش هقدر أشوفها مع واحد تاني.

ظهرت ابتسامة صغيرة على وجه سليم، وكأنه كان ينتظر تلك الجملة تحديدا: يبقى إديها الفرصة دي.

صمت مكي بتردد، فتابع سليم بيقين: وأنا متأكد إنها قدها، كل إنسان من حقه فرصة، واتنين، وتلاتة، وربنا سبحانه وتعالى فتح باب مغفرته للإنسان لحد قبل مايموت..

ثم ضربه بخفة على كتفه: إنت بقى مش عايز تسامح..

رمش مكي بعينه، بينما تنهد سليم تنهيدة طويلة، ابتعد عنه خطوة، ثم قال بحسم:

زي ماقولت لك، إللي حصل جوه كان تمثيل، مافيش عرسان، ومافيش محمد..

رفع إصبعه محذرا: بس المرة الجاية هيكون فيه. قرارك يكون عندي بكره.

رفع مكي حاجبه: بكرة؟

اومأ بحسم لا يتقبل النقاش: أيوه بكرة تيجي تقول لي، وتقول لنا كلنا، إنك إنت وسلوى رجعتوا لبعض، وإنك جاهز تتجوزها في أقرب وقت.

اقترب منه، وقال بصرامة: لو ده ما حصلش اعتبر موضوعك إنت وسلوى انتهى.

ثم أضاف دون أن يترك له فرصة للاعتراض:

ووقتها سلوى هاتتجوز واحد فعلا بيحبها، وخليك انت عايش في الماضي، وفي جرح الماضي..

ضربه على كتفه مرة أخيرة، ثم تحرك مبتعد..

أما مكي، فظل واقفا مكانه، يحدق في الماء بصمت.

كانت كلمات سليم تدور في رأسه بلا رحمة:

«مش ها أقدر أشوفها مع واحد تاني.»

لأول مرة، لم يستطع مكي أن يكذب على نفسه، فهو لم يكن يريد سلوى بعيدة عنه، لكنه كان يخاف أن يقترب منها أكثر، الآن عليه أن يختار: إما أن يسامحها ويعطيها الأمان الذي حرمها منه طويلا،

أو يخسرها للأبد. 

على إتجاه آخر 

كان سليم يتحرك للداخل، بينما كانت سلوى في انتظاره امام الباب الزجاجي، وما إن لمحته حتى أسرعت نحوه والغضب واضح على ملامحها.

قالت بإنزعاج حاد: إيه إللي إنت عملته جوا ده؟

نظر إليها باستغراب مصطنع: عملت إيه يعني؟

حدقت فيه بعدم تصديق: عملت إيه؟! من كام يوم قولت لي: هساعدك، وهخلي مكي يرجعلك، وهعمل إللي عليا، وكل الكلام الجميل ده..

ثم أشارت بيدها ناحية الداخل، وأضافت بضيق: دلوقتي بتجيبلي عريس؟!

ضحك بخفة نظرت له بغيظ: إنتِ بتضحك يا سليم؟ إنت بجد مش عارف إنت عملت إيه جوا؟

ثم أكملت وهي تشير إلى الداخل بضجر: ده خلاص! هما تقريبا دلوقتي بيشوفوا هايجيبوا إيه للجهاز، وبيختاروا اسم البيبي كمان!

هز سليم رأسه بثقة: اهدي بس، دي كانت خطة.

قطبت حاجبيها: خطة إيه؟

اومأ بتوضيح: أنا عملت كل ده علشان أخليه ينطق، عشان أخليه ياخد رد الفعل، إللي إنتِ شوفتيه جوا ولا ماخدتيش بالك؟!

صمتت لحظة، ثم قالت: أخدت بالي بس.

رفع حاجبه: بس إيه؟ بقولك مافيش عريس..

نظرت إليه بشك: وإنت متأكد إن ده هايجيب نتيجة؟

رد بثقة: بكرة بالكتير هاتلاقيه بيكلمك.

تبسمت بتوسع وتمنى: يا ريت.

ثم نظرت ناحية الباب الزجاجي بقلق: وإللي جوا دول؟ هتعمل فيهم إيه؟

ابتسم يطمئنها: سيبيهم عليا أنا.

ترددت قليلا، ثم سألته: هو بجد قال لك إنه بيحبني؟ وإنه عايز يرجعلي؟

اومأ بيقين: مقالهاش بالسانه قلها  بعينه بردت فعله انا عارف مكي ثقي فيا..

ثم أضاف وهو يشير إليها بتنبيه: بس اسمعيني كويس لو كلمك وقالك هتوافقي، قولي له آها هافق..

اتسعت عيناها بخوف: لا يا سيدي، أخاف، ده مجنون وصعب، ده انت ملاك جنبه في زعلك.

ضحك: ماتخافيش، أسمعي كلامي..

تابع بعقلانية موضحاً:المرة دي لازم يحس إن المرة دي مختلفة، لازم يحس انك هتضيعي منه، صدقيني يا سلوى الانسان مابيتغيرش وياخد مواقف مختلفه الا لما يحس  بإن الحاجه اللي بيحبها هتضيع منها.

هزت رأسها بتردد: ماشي.

اومأ: تعالي ندخل جوه.