رواية وجع الماضي الفصل الثاني2بقلم امل بكر
-بس كده وانا بقي كنت عايزه امسكها من شعرها وفكرت سليم قاصد بس طبعاً انا عارفه استحاله يعمل كده يعني
ضحكت ،
-يلهوي عليكي ياهنا بس انا مش شاكه فيكي كان ممكن تجيبيها من شعرها فعلاً
-طب والله كنت متغاظه معرفش مسكت نفسي ازاي
سليم اتكلم وهو بياكل من المقرمشات،
-بعد سوء الظن ده وتقولي انا قولت سليم استحاله يعمل كده !!!!
-شايفه ابنك يعني عايز واحده تدخل عليا البيت وتقولي مستر سليم الي مديني المفتاح ومزعلش
-صح يابني هو اي ده الي واحده تدخل عليها البيت ومن غير اذن لا طبعاً وحشه
سليم،
-خلاص ياجماعه اروح اقتلها طيب؟!!!
-لا انا هاجي معاك واشوف وانت بتهزقعها وتقولها اعتذرلي لمراتي حبيبت قلبي وام عيالي
رفع حواجبه وهو بيقول ،
-تيجي معايا فين !!! انا هسجلها وهي بتعتذرك حاضر خليكي انتي مرتاحه
-ياسلام انت مش عايز تقول مراتي وام عيالي مش كده!!!!
-الحقي ياماما علقت عليا
يسرا ضحكت ،
-عندها حق والله
-شوفت شوفت اهو عندي حق
-طيب انتي مش واثقه فيا ياحبيبتي والله ماهعديها وانتي شوفتي كلمت الولا مازن وكنت مضايق والله
هزيت راسي بابتسامه،
-بصراحه هو اضايق حبيبي ياطنط ده
يسرا،
-والله انتو تعبتوني طالما هو حبيبك عايزه تتشاكلي وخلاص
-هي كده ياماما ادعيلي بالصبر
اتكلمت بتهديد وانا ببصله ،
-بقي كده ياحبيبي ده فيه كيكه لسه هعملها بليل
غير كلامه بسرعه وكأنه بيوضح ،
-والله ياماما هنا ده مفيش زيها في الاكل اقعدي ياماما معانا ودوقي الكيكه
قامت وقفت وهي بتعدل طرحه الاسدال بتاعتها،
-لا خلاص كده قعد كتير هنزل انا وانتو بطلو مناقره في بعض ربنا يهديكم يارب ويرزقكم الذريه الصالحه
وصلنها لغيت الباب ونزلت محمود مشا ورايا
-هنونه حبيبتي هتعملي الكيكه امتي
لفيتله بابتسامه،
-عايز تاكل كيكه ياحبيبي
-اه ياريت بقالك كتير مش بتعمليها
-طيب بس توافق علي طلبي الصغنون موت اوي
اتنفس وهو بيبصلي ومستني عايزه اي ،
-خير ياهانم عايزه اي
ابتسمت بحماس وانا بقوله وبترجي بعيوني يوافق،
-بكره نخرج كلنا واهلك وكده اي رائيك
-طب مانتجمع في البيت احسن
-علشان خاطري بقالنا كتير مش بنخرج عرف باباك ومامتك واختك واخوك ومراته كمان وحشتني اوي هتبقي حلوه والله وانا حاسه اني عايزه اخرج شويه
-طيب ماشي
ضحكت بفرحه ،
-طب انزلي شويه علشان احضنك
ضحك بخفه عليا ونزل لمستوايا وحاوط وسطي وهو بيرفعني من علي الارض وانا بوست خده
-شكراً ياسيلمووو
دخلت اعمل الكيكه بحماس وسمعته وهو بيكلم باباه واخوه بيعرفهم وساعه بالظبط وكانت الكيكه جهزت قطعتها وطلعت الصاله بس مكنش موجود
سمعت صوته من البلاكونه الي في اخر الصاله،
-انا هنا
دخلتله وانا بقعد جمبه وبقطع حته بالشوكه وبأكلهاله
-قولي بسرعه رائيك اوعك تفكر
ضحك علي طريقتي واتكلم بعد لما بلع ،
-احلا مره تعملي فيها كيكه
-قول والله
-والله حلوه اوي
-الف هنا يلا افتح بوقك تاني
اكلها وقال،
-خلاص كلي انتي وانا هاكل
-عادي بحب اكلك
بصلي وسألني بالطافه،
-اشمعنا
ابتسمت بهدوء وانا برفع عيني ليه ،
-معرفش بحسك ابني كده
ضحك واتكلم بغيره،
-طب ياريت طريقتك متتغريش بعد لما نخلف
ضحكت بصوت عالي علي طريقته،
-مش معقول هتغير من ابنك
نفي براسه واتكلم باستنكار مزيف،
-اكيد لا بس يعني متركنينيش علي الطرف
بوسته من خده ورجعت بصتله،
-ابداً مش هتتركن علي الطرف مهما يحصل
قرب مني وباسني وقالي ،
-انتي ازاي حلوه اوي كده
نزلت عيني بكسوف وانا خلاص محروجه واكلت من الكيكه
ضحك بصوت عالي وقال،
-انتي لسه بتتحرجي !!
بتوتر ،
-كل ياسليم الكيكه
-تقصدي كل ياسليم واسكت
ضحكت ،
-لا ياحبيبي متسكتش بس ي يعني انا بتكسف
نكشلي شعري وهو بيقول ،
-ماشي ياستي الحياء واجب برده
ضحكت عليه وكملنا قعدتنا وفضل يحكي مواقف طفولته الي بتموت ضحك وبعدين دخلنا نمنا الحمدلله اليوم عدي علي خير
<<وتاني يوم هو راح شغله وانا خلصت كل الي ورايا وجهزلته هدومه وهدومي كمان وشويه ووصل حطيت الاكل واكلنا
طلعت من المطبخ واتكلمت وانا راحه الاوضه،
-يلا ياسليم ادخل البس
اتكلم وهو بيقلب وبيجيب الكوره،
-مش قادر هكلمهم واقولهم مش هنيجي
روحت جريت معرفش كنت راحه احارب ولا اي وقفت قدامه واتكلمت بغيظ مكتوم
-يلا بقي والله هعيط وانكد عليك
بصلي وبيحاول يستعطفني ،
-مش قادر يابنتي تعبان
-احنا هنقعد وبعدين مانت اهو قاعد وبتتفرج علي الماتش الي بيحرق دمك وخلاص
-لا خلاص هنام اهو
قال كده وفرد جسمه علي الكنبه ضحكت غصب عني وانا بقول ،
-انت اصلاً مبتعرفش تنام علي الكنبه تمثيل فاشل ياحبيبي
بصلي واتنفس بغيظ مني ،
-ماهو المشكله انك حافظه فعلاً
-ايوا طبعاً يلا بقي قوم البس انا هدخل البس تعرف لو ملاقتكش قدامي اي الي هيحصل
بنبره عاليه حبيتين ،
-نعم ياحبيبتي اي الي هيحصل
-ولا حاجه طبعاً هشيلك ووصلك الاوضه الله انت فهمت اي
ضحك وهو بيبص جنبه،
-تشليني اي انتي بطولك ده
-الله يسامحك ياسليم ياجوزي ياابو عيالي انا مسامحه يارب علشان انا زوجه صالحه وكيوته
بصلي بدهشه وانفجر في الضحك ،
-ادخلي البسي ادخلي ستات زنانه فعلاً
اتكلمت وانا راحه الحمام اخد شاور،
-انتو الي رجاله متفهموش
قام وقف وهو جايلي،
-احنا اي!!!!
قفلت الباب بسرعه وقولت ،
-معادا انت ياروح قلبي
بعد شويه طلعت وانا لابسه نزلنا وسليم بيقولي تحذيراته العشره ..ان ضحكتي العاليه توطي ،وان لو هبلت في الكلام والعفويه اخدتني هيوقفني وهو بيقرصني في رجلي مش فاهمه لي القرص يعني!!!!،
وان لووو
حماتي قاطعته احمدك واشكرك يارب طلعت من الباب هي وحمايا وقفلو الباب وراهم
حمايا قال بابتسامه هاديه زي ملامحه بالظبط،
-ازيك ياهنونه ليكي وحشه والله
ضحكت وانا بقرب منه علشان احضنه ،
-حبيبي ياعمو وانت كمان والله
يسرا حماتي ،
-ياسلام ومفيش وحشتك انا كمان !!!!
ضحكنا عليها انا وعمو وقولت ،
-هو انا اقدر وحشتيني بردو ياسوسو
سليم قرب عليها وهو بيحاوطها بدراعه،
-امي انتي الحلو بتاعنا
خلص كلامه وباسها من راسها عمو مسك ايدي علشان ننزل من علي السلم ،
-خليكو بقي بتحضنو في بعض وانا وهما ماشين
"ضحكنا ونزلنا قدام العماره الكبيره بتاعتنا مكونه من تلت ادوار بس والشقه كبيره والدور كمان ولسه جذاً والمفروض ان الدور التالت بتاع فارس اخو سليم ولكنه فضل انه يعيش في شقه حلوه برده علي البحر وحماتي وحمايا سابو علي راحته "
حماتي وحمايا ركبو مع بعض في العربيه وانا وسليم ركبنا في عربيه بتاعته
وصلنا ولقينا فارس ومراته امنيه موجودين وحمايا وحماتي وصلو علطول ورانا بعد سلامات قعدنا مع بعض
فارس سأل ،
-فين أروي مجتش معاكم ليه؟!
يسرا ردت ،
-في الكورس هتخلص وهتيجي
سليم بضحكه،
-دي عماله تعيط علشان انت اتجوزت وسبتها
فارس بضحكه،
-اختي الوفيه
سليم رد عليه ،
-عمال اقولها مانا يابنتي اهو فوقك واعتبريني زي اخوكي يعني
كملت انا ،
-ترد عليه وتقوله انا بحب فارس علشان بيضحكني اما انت كئيب
ضحكنا كلنا وشويه وأجت اروي الي جرت علي فارس وهي بتحضنه
فارس باسها من خدها،
-حبيبتي عامله اي
أروي بابتسامه ،
-كويسه جداً
أروي سلمت علي امنيه كمان وسليم بصلها بقرف وهي كمان بنفس النظره هما الاتنين ناقر ونقير بفضل اضحك عليهم وعلي منظرهم وهما مش طايقين بعض
فضلنا نتكلم في مواضيع عشوائيه لغيت ماامنيه قالت بعفويه وهي بتبصلي في وسط كلامنا وهزارنا ،
-انا مش عارفه انتي مستحمله ازاي انك متخلفيش !!! رغم ان انا متجوزه لسه من خمس شهور وعايزة ابقي حامل
خلصت كلامها بهدوء وهي بتبتسم محدش اخد باله من الي قالته غير أروي لاننا كنا قاعدين جمب بعض
اتنفست بهدوء مميت ورديت عليها،
-ربنا يرزقك ياامنيه ان شاء الله
أروي كانت بتبصلي وكأنها بتتأكد انا اضايقت ولا اي متكلمتش ولا قالت حاجه بس بصت لأمنيه باستغراب من طريقتها في الكلام بالطريقه دي ولأول مره تتكلم بيها
امنيه قالت،
-هنا انتي زعلتي ؟!! انا بكلمك كأنك اختي مقصدش حاجه
ابتسمت ابتسامه مزيفه وانا بصالها،
-لا مزعلتش الكلام ده اكيد مش عاقلا قبل لما تقولي
أروي ابتسمت بهدوء وهي بتلف وشها الناحيه التانيه وامنيه بصتلها وبصتلي وسكتت باحراج
مسكت العصير الي قدامها وبدأت تشرب وفضلت تتكلم مع فارس جوزها وانا بصيت قدامي بشرود معقول في انسان بيخرج الكلام ده بكل سهوله طب محستش بتأنيب الضمير من انها تزعل قلبي مثلاً؟!!
احنا مش قريبين من بعض انا داخله علي السنه متجوزه وفارس اخو سليم خمس شهور يعني فيه فتره خطوبتهم كنا بينتقابل وعمري ماحسيت منها انها مثلا مش حباني وانا كذلك مش بكرها لاني حاسها لطيفه وهاديه
قطع شرودي سليم ،
-مالك .. سرحانه في اي ؟!!!