رواية الفراق هو نصيبنا الفصل السابع7 بقلم حبيبة الديب
_الو، كريم معايا؟!
_مين؟!
_انا.... انا زهره.!
سكت لحظات بعدها اتكلم :
_زهره؟!
الصوت جالي هادي بس في نبرة فرحة ، كأنه مش مصدق.
بلعت ريقي و عيني تلقائي كانت بتدور في الاوضه بتوتر
لحد ما عيني جت على الساعة، لقيتها ١١ و نص بليل يا نهاري، أنا اتجننت؟ بكلمه في الوقت ده؟
_أيوه... أنا آسفة إني برن متأخر، بس... بس الموضوع مهم.
سكت ثانيتين و بعدين ضحك ضحكة خفيفة:
_متأخر؟ ولو الساعة ٣ الفجر يا زهرة، مكالمتك عندي مش متأخرة أبداً
في حاجة حصلت؟
اتوترت أكتر، حسيت وشي بيحمر :
_لا لا مفيش حاجة... أنا... أنا
سكتت لحظه و مره واحده قفلت في وشه
رميت الفون على السرير و حطيت إيدي على وشي.
_يا غبية يا زهرة، هو انتِ كل ما تاخدي قرار تبوظيه؟ مش قولتي مش هتكلميه تاني؟
لسه بشتم نفسي لقيت الفون نور رسالة واتساب منه :
_"خير يا زهرة؟
قلقتيني لو في مشكلة قوليلي"
عضيت شفايفي و كتبت بسرعة قبل ما أرجع في كلامي :
_"لا مفيش مشكلة
أنا كنت هكلمك بخصوص سلمى. باباها مصر إنها تقابلك تاني، و هي مش عايزة... فكنت عايزة أطلب منك ترفض انت من طرفك عشان نخلص
او ممكن تكلم ابوها نفسه و خلاص خليه يفهم ان الموضع خلص وانتَ مش مستريح
عشان قالها انها هى اللى بوظت الجوازه قصد..! "
شافها فوراً
و علامة "بيكتب..." ظهرت و اختفت بعدها بعت:
_"تمام، نتقابل بكرة نتكلم في الموضوع ده و أخلصهولك
نفس الكافيه الساعة ٥ كويس؟"
كتبت بسرعة:
_"نتقابل ليه؟ ما تخلصه في الفون و خلاص
وبعدين مفيش كلام تاني يتقال..! "
شافها و مابعتش و بعد كام ثانيه كان بيكتب بعدها بعت:
_ "طب انا عايزك في حوار مهم و صدقيني مش هزعجك تاني..! "
_"خلاص بكرا الصبح رن عليا فون و احكيلي.! "
كتب في ساعتها :
_"لا مش هينفع فون عايز اقابلك لو سمحتي..! "
كنت متوتره و متردده جداً و مش عارفه اوافق ولا لأ
كنت عامله اكتب و امسح كل شويا
شويا اوافق و شويا ارفض
بس مابعتش حاجه
لحد ما اتنهدت و بعتله :
_"تمام"
في نفس اللحظه شافها بعدها بعت لي :
_نتقابل في الكافيه اللى شوفتك فيه اول مره
اللى خبطت عربيتك قصاده
الساعه ٥ مناسب؟
ابتسمت تلقائي بس اتوترت برضوا
و افتكرت اول مره شوفته فيها
ابتسمت وسعت و انا بكتب له :
_بتفكرني ليه بس..!
حاضر هكون هناك على الموعد.!
بعتت الرساله و قفلت الفون و رميته، و دفنت وشي في المخدة
_يارب سامحني، أنا بدخل نفسي في دوامة مش هعرف أطلع منها.
𓌔𓌔ׅ𓌔ׄ ֶָࠝ 𓇼 ֶָࠝ𓌔ׄ𓌔ׅ𓌔ׄ
تاني يوم محاضراتي كانت الضهر ف تقلت في النوم و صحيت على خبطت الباب و صوت فاديه
_يا فاديه دي عاشر مره تيجي سبيني انام شويا لسه بدري
_يا زهره الست عائشه بتقولك هتتأخري كده على الكليه..!
اتكلمت بنوم فظيع و انا عايزه اكمل الحلم:
_خمسه دقايق و تعالى صحيني سيبيني اكمل الحلم بقا...!
صوتها اختفى و انا رجعت ل حلمى تاني
بس لحظه
الحلم وقف و انا صحيت خلاص و مش هعرف اكمله
طب اكمله تأليف مني؟؟!
قومت بتأفف و انا بدعك وشي بكسل :
_حرام عليكِ يا فاديه بجد ده انا ماصدقت كريم اتقدم لي قومتيني ليه..؟!
لحظات عدت عليا و تداركت اللى قولته
اي اللى بيحصل ده؟
ايه ده ايه ده؟!
ايه الحلم الهباب ده انا ازاي حلمت بكده اكيد ده عقلي الباطل
حطيت ايدي على وشي و صحت مع نفسي :
_حراام عليكِ يا فاديه معرفتيش تصحيني من بدري..!
و في اللحظه دي الباب اتفتح و دخلت ماما و هى متعصبه نوعاً ما :
_هى كانت ناقص تكسر الباب فوق نفوخك عشان تصحي
ايه كل ده نوم؟!
_نفوخك؟!
انتِ بتاخدي عربي عند مين يا ماما اتغيرتي على فكره لا لا لا انتِ اتغيرتي اوي اوي
فين صوفيا بتاعت زمان يا صفصف بس
فين صوفيا الإسبانية ال........
قاطعتني بغضب:
_اللى هتديكي بالشبشب على نفوخك يا عنزه..!
قومت من مكاني و انا بضحك و هى بتجري ورايا باللكلوك بتاعها :
_يا ماما عنزة ايه بس
اسمها معزه اشتميني و هزقيني صح لو سمحتِ و ماتمشيش ورا يحيي تاني
هو اللى طلع عليا الاسم ده و انتِ ما صدقتي حفظتيه..!
بصت لي و اتكلمت بجديه :
_انتِ عارفه احنا بنصحيكِ من امتى يا زهره؟
باباكي كان عايزك الصبح قبل مايمشي و انتِ كنتِ في عاشر نومه
_سابع نومه
قولتها و انا بصحح لها بس و هى سكتت لحظه بعدها اتكلمت بعند :
_لا اسمها عاشر انتِ ايه عرفك انتِ.؟
_صح انتِ صح ايه عرفني انا
انا عيله عبيطه اصلا..!
حطيت ايدي على كتفها و انا بطلع معاها برا الاوضه :
_الا انتو عاملين فطار ايه انهارده؟
عايزه مربى فراولة و توست محمص..!
_جهزي نفسك هكون جهزتهم بنفسي..!
_ حاضر يا عيوشه
جهزت نفسي و نزلت تحت لقيت فاديه و ماما بيحطوا الفطار على السفره سوا
_اساعدكوا
_لا يا حبيبتي خلصنا خلاص افطري بسرعه عشان تلحقي محاضراتك.!
_حاضر يا ماما
قعدت اكل و ماما قعدت قصادي بس مش بتاكل
كان باين عليها عايزه تقولي حاجه بس ساكته
بتبص لي و تبتسم بس
_خير يا ماما شكلك عايزه تقوليلي حاجة بس مش عارفه تبدئي
صح؟!
_لا انا عايزه اقولك حاجة فعلاً
بس بابا منعني قالي لما يرجع من شغله هو يقولك
حطيت قطعة مربى فراولةعلى التوست و كلت و انا بتكلم :
_حاجة ايه دي؟!
_موضوع كده،
هو هيتكلم معاكِ بس لما يجيي، هو كان هيفتحك في الموضوع الصبح بس حضرتك صحيتي متأخر...!
اتكلمت بلامبالاه و انا باكل :
_تمام لما يجيي بقا هعرف منه...... يلا سلام بقا عشان هتاخر
_افطري كويس يابنت..!
_كلت كويس اهو يلا باي
قومت من مكاني و بوستها من خدها و انا باخد شنطتي بسرعه عشان امشي بس هى وقفتني كالعاده :
_لا استني....، هاتي البخور يا فادي بسرعه
_ياااختييييي انا زقت يا ماما هو كل يوم؟!
_اه كل يوم ملكيش دعوه انتِ.!
_حاضر انا مليش دعوة انا مالي انا اصلا انا مالي..!
_بطلي برطمه
قالت كده بعدها خدت البخور من فاديه و بدأت تبخرني و تقرأ قران و انا كنت بشرب عصير عبال ماتخلض ما كده تاخير و كده تاخير..!
بعد كام دقيقة طلعت برا و بصيت ل عربيتي كده من بعيد
اهي عربية أحلامي اللى شهدت لقائي الاول بكريم
ابتسمت و ركبت العربيه بعدها افتكرت الحلم اللى حلمت بيه الصبح
حلمت بيه ازاي و امتى وايه اللى حصل ولا اعرف حتى
كل اللى فكراه انه اتقدم لي
هل دي اشاره طيب؟!
وصلت الجامعه و كالعاده سلمى بتغيب معرفش ليه
خلصت محاضراتي اللى فرهدتني و كانت الساعه تلاته و نص
هل اروح البيت ولا اروح من دلوقتي الكافيه
بس هبان مدلوقه لو روحت بدري
و كمان لو روحت البيت اصلا هلاقي ميعادي معاه جيه و هرجع تاني
ف الحل اني دخلت مكتبة الجامعه و قرأت كتاب عن التاريخ
بحب كتب التاريخ اوي
و بعد وقت طلعت من الجامعه على ٤ و نص كده
و اول ما ركبت العربيه لقيت يحيي باعت لي رساله
_"زهره احنا لازم نتكلم"
الاه؟! هو في ايه انا بقيت مهمه كده من امتى
الكل عايز يكلمني مره واحده كده
طب استنوا اشوف جدول اعمالي طيب
مسكت الفون و بعتله
_"خير في ايه؟! "
_"عمي كلمك؟ "
_ "لا بس ماما قالت لي انه هيكلمني في حوار كده لما يجيي
هو في ايه؟ "
شافها على طول و كتب بعدها مسح بعدها بعت لي
_ "معرفش في ايه
بس لما يكلمك يبقى كلميني "
_ "حاضر
سلملي على هنا بقا
البسكوته بتاعتك "
بعتها و بعت جنبها ايموچي قلب و وش بيضحك كده
بس هو شافها و مردش عليا
ايه ده ماله ده؟
قفلت الفون و روحت على الكافيه
و اول ما دخلت لقيت كريم في وشي
شاور لي و روحت قعدت قدامه
بس اول ما شفته اتوترت تلقائي و افتكرت الحلم المنيل
فوقي يا زهره ده مجرد حلم
حلم وبس
_احم.، مساء الخير ازيك
_انا تمام
انتِ عامله ايه
_كويسه كويسه
هاا؟ ايه الكلام الخطير اللى مش هينفع تقوله فون
ابتسم و اتكلم و هو بيمسك المنيو :
_تاكلي ايه الاول؟!
_لا سوري بقا مافيش اكل
قولي الكلمتين عشان امشي.!
_انتِ قفوشه ليه يا زهره؟
ماتصبري شويا
اطلب لك قهوه طيب؟
مردتش عليه و هو شاول للنادل
_لو سمحت اتنين قهوه
_لا مش عايزه قهوه
بصيت للنادل
_واحد اتشيز كيك فراولة لو سمحت..!
انا كده كده بحب اجي اجيبه من هنا مخصوص ف كان نفسي فيه
كريم ابتسم و بص للنادل :
_خلاص خليها اتنين اتشيز كيك فراولة و الغي القهوه..!
النادل مشي و كريم بص لي:
_شكلك بتحبي الفراولة اوي
اي حاجة بتطلبيها بتبقى بالفراولة.!
_هو احنا جايين نتكلم عن اللى بحبه و اللى مش بحبه؟!
سند على الترابيزه بايده الاتنين و اتكلم بجديه :
_لا جايين نتكلم عننا.!
اتوترت من كلمة "عننا" دي بس مابينتش
_قصدك عنك انتَ و سلمى؟
نفي كلامي و اتكلم بتأكيد :
_لا قصدي عننا احنا انا و انتِ
_بقولك ايه انتَ عايز ايه من الاخر كده
_من الاخر كده انا معجب بيكي و سبق و قولتها قبل كده
انتِ عجباني
شخصيتك عجبتني
اسلوبك الطفولي
بحسك متفائلة بكل حاجة حتى لو مضيقه مش بتبيني ضيقك
يعني مش نكديه و كده، فاكره اول مره شوفتك فيها؟
كنتِ زعلانه على العربيه بتاعتك كانت لسه جديده و انا خبطتها،
و مع ذلك ولا عيطتي ولا اشتكيتي حتى
حتى زعلك كان بشكل كوميدي
بحسك رفاهيه
بحسك شبهي يعني و كده
_اه و بعدين؟!
يعني حلو الكلام ده وصفتني كويس بس مستني مني ايه مثلا؟!
بص لي و اتكلم ببساطه :
_ولا حاجة
انا اتشديت لك من اول مره شوفتك فيها
و لقيتني بسال عنك و اجيب معلوماتك
انا نفسي استغربت تصرفي ده
بس كنت بفكر فيكي كتير
لحد ما شوفتك تاني و فرحت اوي و الصراحه استغليت موضوع سلمى ده عشان نخرج سوا
بس حسيت ان ده ضغط عليكِ و انك مش حابه تخرجي معايا بالشكل ده
_طب كويس انك عارف كده
ابتسم و كمل :
_بس برضوا عايز اعرفك اكتر
الصراحه انا شعوري ليكي مش حب
ممكن مالحقتش احبك
بس شعوري عدى الاعجاب و واخد الموضوع جدي على فكره عشان كده خدت ميعاد مع والدك علي الدسوقي..!
عيوني وسعت و بصيت له بدهشه :
_ميعاد مع بابا؟
امتى ده؟
_من كام يوم كده
خدته مع السكرتيره في الشركه و المفروض هكلمه انهارده
شويا كده يعني
بس حسيت انك لازم تعرفي الاول ..!
كنت متلخبطه بس شئ جوايا مبسوط
حاجة جوايا بتقولي شعورك كان صح
بس حاجة تانيه بتقولي ان ده غلط
_طب و سلمى؟
النادل جيه حط الطلبات قدمنا و مشي و كريم اتكلم
_سلمى مين معلش؟!
دي واحده ولا عمري شوفتها ولا اعرفها حتى
طب اقولك على حاجة؟
انا طلبت اشوفك انهارده في المكان ده عشان افكرك ان احنا اول مره شوفنا بعض فيها ماكنتش ليها علاقه بسلمى خالص
يعني سلمى ملهاش دعوه
انا من قبلها و انا كنت بفكر فيكي و جايب معلوماتك و انا و انتي عارفين انى ولا اعرفها و لا تعرفني عشان تكون هى عائق في خطوبتنا..!
قلبي دق جامد
و حسيت اني فرحت معرفش ليه
_خطوبتنا؟
ابتسم و بص في عيوني اوي و اتكلم و هو باين عليه الفرحه فعلاً:
_اه، انا هفاتح باباكي ان شاء الله انهارده في الموضوع ده
و هاخد ميعاد معاه و هاجيلكم البيت مع اخواتي و جدي اطلبك رسمي..!
ابتسمت و انا مش عارفه اقول ايه
و بدأت اكل من الاتشيز كيك و اتكلمت و انا باصه في طبقي :
_انتَ عندك اخوات؟!
ابتسم و بدأ ياكل هو كمان و هو بيتكلم:
_اه، ريم و جودي
ريم متجوزه من حوالي شهرين و عايشه مع جوزها في تركيا
و جودي في تالته ثانوي لسه..!
هزيت راسي وأنا بحاول أبان طبيعية وأنا باكل، بس قلبي كان بيدق جامد و كنت متوتره .
_ربنا يخليكم لبعض.!
_يارب.. وأنتي معندكيش اخوات صح؟
ابتسمت و اتكلمت :
_لا عندي يحيي..!
ابتسم و اتكلم :
_طب كويس انك معتبراه اخ اوي كده
اصلي بغير الصراحه.
ابتسمتي اختفت و اتوترت تاني
قومت وقفت و خدت شنطي
_انا لازم امشي بقا
قام وقف و اتكلم بجديه
_زهره معرفتش رأيك..!
_انا... انا متوتره و متلخبطه دلوقتي.!
_انا متفهم موقفك دلوقتي و مش هضغط عليكي بس محتاج اعرف رأيك برضوا..!
_ معرفش انا متلخبطه بجد
بص... أنا مش عايزة أظلمك، ولا أظلم نفسي ولا أظلم سلمى
حتى لو أنت شايفها مش موجودة الموضوع معقد.
_مفيش تعقيد يا زهرة سلمى صفحة واتقفلت قبل ما تتفتح أصلاً أبوها ضغط عليها وهي رفضت، حوارها خلصان
أنا بقى بفتح صفحة جديدة.. معاكي أنتي.
بصيت في عينه كان ثابت، واثق، بس في حنية تخوف.
_طب افرض بابا رفض؟
ابتسم نص ابتسامة:
_ساعتها هحاول تاني وتالت لحد ما يقتنع إني شاريكي بس الأول خليني أحاول، ماشي؟
صراحته غريبه
بس جميله
معرفتش أرد هزيت راسي بهزة خفيفة
جداً، لا هي موافقة ولا هي رفض بس هو فهمها موافقة.
_انا عايزه امشي دلوقتي ممكن؟
و ياريت ولا يبقى في كلام ولا مقابلات تاني لحد مايبقى الموضوع رسمي ممكن؟!
ابتسم :
_ممكن يا زهرتي ولا تقلقي..!
_لا لا شكلك فهمت غلط
ايه زهرتي دي
بس خلاص مش موافقه
ملامحه اتغيرت و اتكلم بسرعه:
_لا لا خلاص حقك عليا مش هقولها تاني..!
ابتسمت على لهفته و مشيت من الكافيه و انا مش مصدقه نفسي بجد
حاسه بفرحه معرفش ليه
بس كنت مبسوطه
اه كنت قلقانه سيكا و مش عارفه اجيب الموضوع لسلمى ازاي اصلاً
فكرت اروح لسلمى الفيلا و اعرف رأيها من البدايه خالص
اه هزعل الصراحه لو رفضته
يعني حسيته فاهمني و حسيت معاه براحه
اللى كان مانعني ان الموضوع غلط بس طلاما ناوي انه يبقى رسمي
ف ليه لا..؟!
روحت الفيلا عند سلمى و واحده من الخدم فتحت لي
كان باين عليها التوتر و القلق
_السلام عليكم
سلمى موجوده؟
_ايوه هى فوق بس متعصبه و بتكسر في أوضتها فوق
و عدلي بيه مش هنا و مش عارفين نوقفها..!
طلعت بسرعه لسلمى و انا مش فاهمه في ايه بس قلقلت عليها..!
♡•♡•♡•♡•♡
ماكنتش شايفه قدامي من العصبيه و الخوف في نفس الوقت
كنت بكسر في كل حاجة حواليا بجنون ماكنتش حاسه بحاجه جوايا غير نار بتاكل في قلبي
من ساعة ما مامت زهره كلمتني و عرفتني ان زهره و يحيي هيتخطبوا
و كانت عايزاني اجي البيت اجهزه معاها عشان نعمل مفأجاه ل زهره..!
عايزاني اعمل مفاجأة لزهره عشان هتتخطب ل يحيي حبيبي
يعني اعرفها بليل اني بحبه و اصحى على خبر خطوبتهم؟!
كنت حاسه بنار بتنهش في قلبي
بكسر كل حاجة حواليا و انا بصرخ
لحد ماسمعت صوتها و هى بتخبط على باب اوضتي
فتحته بسرعه و بصيت لها كان باين عليها القلق
انا عارفه انها الوحيده اللى بتحبني بس ممكن في يوم تبطل حبها ليا؟!
اكيد بما انها هتتخطب ل يحيي يبقا هى مش بتحبني
بصيت لها و اتكلمت بوهن :
_انتِ ليه عملتي فيا كده.؟!
_سلمى انتِ كويسه؟ ايه اللى حصل و وصلك للحاله دي؟
كانت حضناني بخوف
ازاي خايفه عليا و تعمل فيا كده؟ زقيتها و صرخت فيها فجأه :
_اوعي انتِ كدابه
غوري من وشي ازاي تعملي معايا كده
ازاي هتتخطبي له بعد كل اللى قولتهولك ده..!
كنت مستنياها تكدب الخبر
بس لقيتها اتوترت و رجعت خطوه لورا و كأن الكلام هرب منها
يعني الكلام ده صح؟
_انتِ بتحبيه يا زهره؟
اتكلمت بسرعه:
_لا مش حب
مش بحبه والله، هو بس طلب يقابل بابا
مفيش حاجة رسمي خالص
و والله لو اعرف انك هتزعلي كده ماكنتش وافقت..!
بصيت لها و انا مش مستوعبة
هى بتستعبط عليا؟
هى عارفه اني بحبه ازاي يعني متعرفش اني هزعل؟
محستش بنفسي غير وانا بمسكها من دراعها و بجرها جامد لبرا وسط كلامها و اعتراضها
و كنت متجها بيها لحد تحت بس هى وقفتني قدام السلم و بعدتني عنها و اتكلمت بسرعه :
_يا سلمى استنى اسمعيني
انا والله ماكنتش عارفه ان انتي هتزعلي لما كريم يتقدم لي معرفش انه يفرق معاكِ اصلاً
_كريم مين اللى اتقدم لك؟
انتي بتصيعي عليا انا اقصد يحيي؟!
ردت بعدم فهم:
_ماله يحيي مش فاهمه؟
_يحيي يا زهره اللى هتتخطبوا سوا قريب
و انا لسه معرفاكي امبارح اني بحبه.!
عيونها وسعت و اتكلمت بعدم استعياب :
_انتِ اتجننتي يا سلمى
يحيي مين ده اللى هتخطب له
ده اخويا قبل مايكون ابن عمي حتى
بصيت لها و انا مش طيقاها
ولا حابه اسمع حوارات حتى و زقتها بخفه عشان تمشي :
_انتي لسه هتكدبي كمان غوري من وشي يا زهره.!
شالت ايدها و اتكلمت بعند :
_لا مش همشي قبل ماتسمعيني و تفهمي
حطيت ايدي الاتين على ودني و انا مش عايزه اسمعها فعلاً و صرخت فيها بعلو صوتي:
_بقولك امشي من وشي غوووري..!
اتكلمت باصرار:
_وانا قولتلك مش همشي غير لما تسمعي......
قاطعتها المرادي بغضب حقيقي و انا بزقها بعنف :
_بقولك غوري من وشي مش عايزه اعرفك تاني.!
خلصت كلامي وانا بزقها جامد بس اندفعت هى و وقعت من على السلم لحد تحت