رواية في قلب القريه الفصل العشرون 20 بقلم نوسه
اشتريت شريحه واتصلت لي وليد عشان يعرف رقمي وكنت سامعه جوطه جنبو وبكا قلبي بقا يدق قلت ليهو وليد فشنو قال لي نوسه انا م سامعك لو سامعاني انا في البلد وفي مصيبه حاصله بقيت اقول ليهو الحاصل شنو وهو يقول لي م سامع برجع ليك وقفل الخط انا بقيت ارجف وحيلي كلو مات قلت وليد في البلد معناتا دي مهاد عملت مصيبه ياربي عملت شنو ولا ياربي الحاصل شنو وقلبي ادق لمن برجف مشيت البيت لقيت اشتياق مخلوعه وخايفه لمن دايره تبكي قلت ليها مالك قالت لي انتي مشيتي وين قلت ليها انا مشيت اشتري شريحه وكنت سرحانه قالت لي شريحه شنو البتخليك مخلوعه كده قلت ليها والله العظيم مشيت اشتري شريحه والخالعني اتصلت علي وليد عشان اعرف رقمي قال لي انا في البلد وفي مصيبه حاصله وبلدهم دي بلد مهاد مرت اخوي وبلد طليقي اكيد دي مهاد عملت مصيبه قالت لي الاكيد شنو ما تأكدي شي الا يقولو ليك عشان راسك ما يودي ويجيب قلت ليها والله حيلي كلو مات قالت لي قلنا ليك الفارغه دي خليها قلت ليها انا والله اتصلت علي وليد عشان اقول ليهو لقيت ورقي عشان يحولني بس كلامو هو خوفني قالت لي احتمال الحاصل ما بخصكم وما تختي في بالك حاجه الا تتاكدي منها قلت ليها تمام اها انتي اصبحتي كيف موش مفترض تنزلي الشغل قالت لي مفترض بس م عندي حاجه البسها قلت ليها انا ملابسي موجوده ما ح تكون قدر المقام بس حاجه تعدي ليك بعدين لو جيتي بدري من القروش الادوك ليهن اشتري فساتين قالت لي لا م يحتاج القروش نحنا محتاجين ليهم في الاكل والشراب وناس الشركه ح يدوني لبس لانو لبسهم موحد قلت ليها كده كويس قالت لي ح امشي منك لغايه م استلم لبسي قلت ليها اخدي راحتك امشي معاك الشغل ولا بتعرفي قالت لي لا لا بتعلم قلت ليها بوصلك وبجي راجعه قالت لي يعني ح توصليني كل يوم انا لازم اتعلم قلت ليها اول يوم عشان انتي ما بتعرفي لمنطقتنا دي قالت لي تمام دخلت لبست وعملت لي شاي شربنا وطلعنا وصلتها لغايه شغلها وجيت راجعه البيت مسكت تلفوني واليوم كلو اتصل ووليد ما برد علي اخدت لي نومه كده صحيت بي صوت اشتياق جات من الشغل وشكلها مبسوطه قالت لي عارفه ي داب انا حسيت اني زول كنت حاسه انو الحياه وقفت قلت ليها الحمد لله عقبال ما افرح بيك عروس قالت لي افرح بي تخريجك انتي اول قلت ليها ان شاءالله فكرك يا اشتياق ح نقدر نعيش من دون اهلنا قالت لي لا طبعا ماف زول بعيش من دون اهلو انا اهلي اتعاملو معاي ببرود واحد فيهم نصحني ماف عشان كده م ح امشي ليهم هسي الا اذا لقيت ولد الحلال بس م اكون خازوق زي الفات قلت ليها ان شاء الله ربنا بعوضك واسمعيني راجلك القديم وين قالت لي فتح ليهو شركه صغيره بقروشي قلت ليها غبيه انتي وين الشركه بتاعتو دي لازم تشيلي حقك قالت لي م ح يديني ليهو قلت ليها انا ما موجعني عرسك منو لانو دا نصيب بس موجعني حقك العندو قالت لي اعمل شنو الله انتقم منو قلت ليها اصبري ح نعرف طريقه نخلص بيها حقك قالت لي ما عايزه منو حاجه قلت ليها اول درس تتعلمي تبقي حقانيه م تشيلي من زول حقو وما تخلي حقك لي زول بالقوه تقلعي منو وخليني اروق وافكر معاك كيف نرجع حقك قالت لي تمام اها عرفتي حاجه قلت ليها وليد ماا داير يرد عشان اعرف حاسه نفسي مربطه عديل غالبني اتصل لي اي زول قالت لي اوعك انتظري بس برجع ليك هو وانتي يا نوسه ما تخليك عندك فضول للدرجه دي قلت ليها تمام قالت لي عاوزه استحما جبت لي اكل جاهز عشان عارفه بتكوني م عملتي شي قلت ليها م قدرت اعمل اي شي والبيت مافيهو حاجه بنتكلم كده خالتو سعاد جات شايله لينا الاكل قالت لي دخلت عليك قبيل لقيت تلفونك في الارض ونايمه نومه دخلت وقفت جنب راسك م حسيتي بي طلعت وقفلت عليك الباب قلت ليها صحيت بدري مشيت اشتري لي شريحه وكنت تعبانه نومتا عشان كده قالت لي حسيت بيك وقبيل بعتزر م جيت فقدتكم كنت تعبانه شويه قلت ليها سلامتك كان تجيني كان جيت ساعدتك انا اصلا قاعده ساي قالت لي كتر خيرك ي بتي م بتقصري واصلا انا بعمل اكلي بالاسبوع ما عملتو هسي شكرناها وصلينا واكلنا ومشينا ليها بهناك نظفنا ليها بيتا وغسلنا العده ولدها جا من الشغل طلعنا وفعلا كانت عيانه اول مره اشوف خالتو سعاد بالحاله دي وقررت اني اساعدها يوميا لانها الوحيده المدت لينا يدها في عز حوجتنا ولسه بتمد لينا في يدها اشتياق قالت لي نوسه انتي بت حلال والله عشان كده ربنا بوقع في طريقكم ناس طيبه قلت ليها كلنا اولاد حلال بس يا اشتياق م اكذب عليك لمن طلعنا من حلتنا انا كنت خايفه خوف م اوصف ليك خايفه قدر شنو اول م ختينا رجلنا في عتبه العاصمه الخوف زاد قلت لي امي ارح نرجع امي قالت لي نرجع ليه قلت ليها يمه نحنا م بنعرف اي زول هنا نمش وين قالت لي والمخوفك كده شنو انا اي نعم م بعرف زول هنا بس اول م طلعت من عتبه بيتنا اتوكلتا علي ربنا وما وقفنا سمح العربيه شالتنا من حلتنا لي مكان نزلنا ومجان وتاني وقفنا في دكان سالناهو ودلانا علي ولد خالتو سعاد وجينا البيت دا والحمد لله من لحظه طلعنا من بيتنا للان م احتجنا لي زول دا اول درس اتعلمتو من امي اني اتوكل علي ربنا واخلي الامور لله قالت لي عارفه ي نوسه نحنا مسلمين اي نعم وبنصلي واي شي بس ايمانا ضعيف قلت ليها شديد بس الدنيا دي مدرسه بنتعلم من المواقف بتزكر لمن طلعنا قلت ليك نمشي وين حسيتك م خايفه بالعكس حسيتك شجاعه وقلتي لي نتوكل علي ربنا والله كريم فعلا اتوكلنا ومشينا وامورنا كلها اتسهلت وجاتني قناعه انو بعد اتوكل علي ربنا واترك امري لله ما اخاف اكون كلي ثقه انو ربنا ح يسخر لي الخير ودا تاني درس اتعلمو منك انا مبسوطه انو الدنيا جمعتني بيك قلت ليها وانا كمان
مشيت شيلتا التلفون ولقيت وليد متصل علي كتير رجعت ليهو بلهفه نفسي اعرف المصيبه شنو ردا علي وصوتو كان حزين قلت ليهو وليد فشنو انا والله ما قادره استحمل من قلت لي في مصيبه انا عقلي يودي ويجيب قال لي م تخافي حاجه م بتخصك بس بتخصني انا قلت ليهو بتخصك كيف قال لي قصه طويله ي نوسه خجلان زاتو احكيها ليك ولو م حكيتا ليك ح تسمعي بيها قلت ليهو فشنو بسم الله قال لي عارفه انو محمد ولدو ليهو بت صاح قلت ليهو اي وبتكون كبيره هسي قال لي م كبيره شديد سنه ونص كده قلت ليهو اي مالا خير ان شاءالله قال لي اتوفت قلبي بقا ادق قلت ليهو هيا ربنا يصبر محمد اكيد قلبو مقطوع قال لي المصيبه م هنا قلت ليهو واي م تقول لي ماتت مقتوله قال لي يا ريتا لو مقتوله قلت ليهو مالا ي وليد انا خلاص روحي دي طلعت قال لي بتعرفي عبدو اخوي قلت ليهو كيف ما بعرفو وبكرهو موت كنت م بحبو لانو نظرتو كانت م حلوه قال لي ليك حق ي نوسه عبدو اخوي دا اصغر واحد فينا ما كمل تعليمو وامي دلعتو زياده عن اللزوم وبقا عاطل وحارس الحله اي بيت فيهو قهوه هو يدخل يشرب واخر ونسه واخر ضحك اتكلمت معاهو كتير بس ما اشتغل بي والفتره الاخيره اتلما ليهو مع سكاره بقا يشرب ودا كلو وامي نتكلم معاهو تلبس توبا وتطلع تخلي لينا البيت تعبنا معاهو شديد قلت ليهو انا والله كنت كل مره بشكي لمحمد منو بقول لي انتي خاينه وانتي شكاكه وولد خالتي دا محترم ونهاي م بصدقني هسي هو مالو فشنو قال لي الحقيقه م معروفه بس بت محمد ماتت اثر اغتصاب انا قلبي طار من محلو وجاتني لحظه اتزكرت حياتي مع محمد واتزكرت بتي الماتت في بطني وقلت لخير لانو الحصل لي بت محمد دا كان ح يحصل لبتي قلت ليهو وليد انت جادي قال لي نوسه دا كلام داير هظار قلت ليهو طيب الشافو منو وامها كانت وين قال لي امها فاضيه من الفارغه واللف في القهوات والشمارات قال لي خلت البت مع حبوبتا وحبوبتا اظنها نامت وخلتا تلعب مع الشفع واظنهم الشفع فاتو اهلم واخوي عمل عملتو قلت ليهو طيب الشافهم منو قال لي حبوبتا زاتا صحت وبقت تفتش ليها ومشت الديوان لمحت اخوي طالع من الديوان ولقت البت ميته بقيت اتعوذ وقلبي ادق قلت ليهو ماقادره اصدق دا كلام شنو قال لي دي الحقيقه ي نوسه واخوي هسي مرمي في السجن وامي بي اي طريقه عاوزانا نطلعو والمشاكل ماليها اول ولا اخر والحله مقلوبه وانا حلفت قسم اخوي الشرطه ما تعدمو انا براي اعدمو وامي عرضتنا عدم العفو بس في دي انا ما بطاوعها اخوي نطلعو عشان اسكر ويا عالم تاني اعمل شنو نوسه انا الموجعني انها طفله قلبو كيف طاوعو يعمل فيها كده عارفه يا نوسه انتي كنتي صاح وحلتنا كلها غلط في غلط دي نتيجه البيوت المفتوحه ساي وتدي الامان للقريب قلت ليهو دا نقاشي الكان يومي مع محمد اذا كان ربنا قال في عمر معين الاخوان يفصلو بينهم ناس حلتكم منو هم عشان يحللو دخول الغريب ويقولو اخونا ويدو الامان لي اي زول قال لي للاسف دا الكان حاصل والله اعلم تاني زول يفتح بيتو حتي لو لي اخوهو الحدث هزا الحله كلها وطبعا محمد دخل في حاله نفسيه وطلق مرتو وانا والله يومي كلو بطبطب عليهو وبصبر فيهو بس حاسي بالذنب شديد وفي عز حسرتو قال لي نوسه كانت صاح وانا المتعلم الاكبر منها غلط في غلط ذنب بتي في رقبتي ومتحسر شديد والله اعلم يطلع منها بالسلامه قلت ليهو والله اتوجعت شديد ليهو محمد طيب وبثق في الناس شديد دي مشكلتو وزواجو من مرتو دي غلط بس م عارفه اقنعتو كيف قال لي دي شيطان ولا فارق معاها موت بتها قالو والناس كلهم متأثرين قلت ليهو وليد م عارفه بس انا بتزكر لقيتا حامل وادعيت ليها دعوه من قلبي لانها قتلت لي بتي في بطني قلت ليهم في وشهم ان شاءالله زي م قتلتو بتي ما تتهنو بالولاده حسيت بالذنب قال لي لا ما تقولي كده دا قدرها ودا اهمال امها بت ما تمت السنتين بي اعتبارها لسه بترضع تجدعها جدعه زي دي عشان تباري بالونسات والقهوات واريتا تتعظ قلت ليهو قصه مؤثره والله واخوك يستاهل الموت قال لي اصلا هو زاتو م نافع وانا هسي جاي الخرطوم بكره وجاي نهاي لا فرح لا حزن ما بوديني الحله لانو امي من عرفت اني ضد اخوي قالت لي ماعافيه ليك وسمعتني فارغ قلت ليهو طيب خليها تعفي ليك قال لي ح تعفي لي في حاله انو اطلع اخوي واخوي غلطان نها حياه طفله بريئه بسبب مرضو الجواهو ومعزور لقاها هامله وعمل عملتو قلت ليهو ربنا يهون قال لي انا تعبان ح انوم بكره طالع بدري قلت ليهو تمام ربنا يهون ليك سفرك قال لي امين قفل الخط انا بقيت مصدومه اشتياق قالت لي نوسه فشنو لمن حكيت ليها بالحاصل لمن بقت تتعوذ قالت لي معقوله في ناس كده قلت ليها اتوقعي منهم اي شي قالت لي ليك حق تطفشي منهم عارفه يا نوسه انتي بريئه ربنا ح يعوضك كل خير انا حاسه كده قلت ليها ان شاءالله حاولت انوم بس غلبني التفكير عاوز يدمرني من ناحيه الحدث الحاصل ومن ناحيه تانيه احمد اخوي وامي وبيتنا بقت م بنوم الا اشغل رقيه ولا قران
تاني يوم اشتياق طلعت الشغل وانا مشيت لقيت خالتو سعاد لسه راقده نظفت ليها البيت ورتبتو واديتا فطرت واديتا علاجاتا ولدها جا لقاني قاعده معاها دخل هو انا استاذنت وطلعت كل م هو يجي بتزكر كلام امي قالت لي م تقللي من قيمتك وتخاففي وتقعدي معاهم وهي عندها ولد لمن طلعت لحقني قال لي نوسه عاوزك في موضوع قلت ليهو خير ان شاءالله قال لي ممكن تدخلي عشان شينه وقفتنا في الشارع قلت ليهو تمام هو زول محترم شديد عندهم مظله جنب الباب قعدنا فيها قال لي نوسه انتي شايفه امي محتاجه بت معاها واخواتي من سابع المستحيلات يقدرن يستقرن في السودان وانا والله مأجل فكره الارتباط شويه ما عاوز اجيب لي امي بت تعزبها ومن ناحيه تانيه امي محتاجه للبتقعد معاها وانتي بتحبي امي وهي كمان بتحبك شديد والايام الفاتت دي كل مره بتقول لي انا كان موتا عرس نسيبه قلت ليهو بعد الشر عليها ان شاءالله عمرها طويل قال لي ان شاءالله وانا م اكذب عليك كنت متزوج بت عمي انانيه وبتحب نفسها وبتكره امي ورغم امي معاها طيبه والحمد لله ربنا م رزقني بولد منها طلبت الطلاق وطلقتها وهسي عاوز اقول ليك انا طالبك بالحلال رايك شنو ……يتبع اها انتو رايكم شنو اوافق ولا لا ا