رواية في قلب القريه الفصل الرابع عشر 14 بقلم نوسه حمد
بعد عرفت انو مهاد هي البت الحملت بالحرام وخبرها هزا الجامعه هز وسمعت ابشع الكلام انو نحنا بنات القري نكون مساكين في حلتنا من نطلع الخرطوم ونشم الهواء نبقا اخطر من بنات الخرطوم حاولت ادافع عننا كتير بس مخ مجتمعنا اتجاه واحد انا كنت اقرب مثال ليهم ومن قريه زيي زيها وما كده وبس مطلقه ممكن اعمل اكعب من العملتو مهاد بس الحمدلله انا بت طالعه من اسره وتربيه امي للان لي م وقفت ما قاعده تعاملني اني كبرت وواعيه لسه بتعاملني بخوف وتحزير مرات بقول ليها يمه انا م شافعه فاهمه اي شي قاعده تقول لي انا عارفه انك كبيره وواعيه بس لمن اكرر عليك الكلام نفسيا بحس براحه لو طلعتي بكون مطمنه انو اخر كلام سمعتي مني وصايا ما بقيف علي اني مفهماك من بدري لا انا يوميا حتي لو بتتخنقي مني لازم اجدد خوفي ليك وتحزيري ليك فعلا امي كلامها صاح لمن تنصحني اول م اطلع بختها قدامي وبمشي ماحصل يوم فكرت اغلط
استحملت كلام ناس الجامعه عننا اتصلت علي صهيب قلت ليهو خلي احمد يجي الجامعه ضروري في كلام لازم يعرفو لو انا قلتو ليهو ح يفتكر اني عاوزه امنعو من الزواج من مهاد صهيب بقا يسال فيني م رديت عليهو قلت الكلام دا خطير احتمال احمد ما يصحا من الهو فيهو ويتزوج مهاد قلت ليهو مافي شي بس عليك الله يا صهيب اقنعو انو يجي الجامعه قال لي عارفه اخوك بس ح احاول معاهو ان شاء الله
قفلت الخط وبقيت سرحانه هل الكلام المنتشر دا صاح ومهاد معقول بعد غلطتها دي ما تبعد من احمد اخوي ولا ياربي البحصل شنو تاني يوم مشيت الجامعه ولاقتني مهاد في وشي ومن غير م اشعر انخلعت لمن شهقتا وهي قادره قالت لي شفتي شيطان ولا شفتي شيطان قلت ليها انتي تاني قالت لي تاني وتالت ورابع انتو مفتكرين ح تشوهو سمعتي وتلبسوني قضيه قلت ليها نحنا نحنا منو وقضيه شنو قالت لي القضيه الخلتك تشهقي لمن تشوفيني قلت ليها وانا دخلي شنو مالي ومالك بعرفك من وين زاتو عاينت لي بي طرف عينا وفاتت صاحبتي جات قالت لي اوعك تقيفي معاها البت دي بقت مشبوهه قلت ليها موش امس قالو الشرطه ساقتا ولا كلام ساي قالت لي زاتو ما تفهمي الصاح وين والغلط وين قلت ليها فكرك البت دي مظلومه قعدت تضحك قالت لي مظلومه انتي البت دي قادره وقويه وقالو ليك ابسط شي عندها القروش وكل يوم هديه وولد جديد وما فارق معاها والسمعتو هسي عرسها الاسبوع الجاي غايتو العرستو دا الا طرطور قلبي قعد ادق بي قلبي قلت ليها الا دا انتو ما عارفين حاجه ساي كلام صحبتي طمم بطني يعني احمد مصر علي الزواج رجعت لي صهيب قلت ليهو اديني احمد قال لي دقيقه قاعد ف الصالون بهناك طبعا بدا يجهز فيهو وفصلو وح يتزوج فيهو قلت ليهو اديني ليهو صهيب اظنو قال ليهو نسيبه عاوزاك قال ليهو قول ليها لو دايره تتكلمي معاي في موضوع العرس انا م عندي نقاش لو عاوزه تسلمي علي م عندي مانع قلت ليهو عاوزه اسلم اداني ليهو قلت ليهو احمد اسمع كلامي واجدعو وراك البت دي ما مرتك البت دي كعبه عديل انا م كنت عايزه اقول ليك قال لي دي اتهام من اتهاماتك الخربت حياتك ولا شنو وانا واعي بعرف البت الكعبه من السمحه ونقاش م عاوز العرس الجمعه كلمي امي واداني صهيب بقيت ابكي لي صهيب بكا قلت ليهو انا م قادره اتكلم بس صدقني البت دي ما بتستاهل احمد اخوي قال لي نوسه نعمل شنو قلت ليهو اتصرف دخل خالي عمي اي كبير لينا قال لي انتي عارفه احمد كبيرو الله وممكن كلهم اخسرهم نوسه خليك بعيده بس خلاص دي قسمتو نعمل شنو انا جاتني نفسيات عديل مشيت كلمت امي قلت ليها نمش قالت لي تنقطع كراعي من حدها كان وصلتهم يابت انتي جنيتي انا زول ما سمع كلامي انا ما بلزمني واحمد عامل فيها هو حر في قراراتو خلي قوه راسو دي تنفعو وانتي لو عتبتي ليهم انا مالي قعاد معاك تاني ولا ح تلمي فيني ولا ح يلمو فيني قلت ليها يمه انا من دونك ما ح امشي مكان انا بس نفسي لاخر لحظه نمنع احمد قالت لي منعناهو الف مره احرجنا وكسر كلامي يابت انتي دي عباطه ولا دي هباله انا اعمل شنو اكسر رقبتي اريحكم وارتاح انا زمان كنت بتحكم فيكم لمن كنتو صغار بس كبار كده اتحكم فيكم كيف انا قلبي دا جوه مقطوع وبقت تبكي بكا الليل كلو تبكي وتقول لي انا حشاي محروق انا اريتني م طلعت من اولادي وخليتهم هدا اخوك ادمر قلت ليها يمه والله لخير يمه لو كنتي قاعده واحمد ربنا قاسم ليهو يرتبط بالبت دي ح يتزوجا ويجيبا ليك في البيت وياعالم يا امي حالتك ح تكون كيف الحمد لله نحنا بعدنا منهم عشان لا قدر الله اي مشكله ولا اي شي ما يختونا شماعه وانا متاكده صفات البت دي ح تجيب ليك جلطه يمه انتي م ح توقفي القدر حتي لو احمد بسمع كلامك بتحصل حاجه وبتزوجها عشان كده م تشغلي بالك وخلاص البقا بقا قالت لي كل منك ساكه الموضوع دا شديد تاني م تجيبي سيرتو العليك عملتي وانا كمان تاني هو حر في تصرفاتو قلت ليها يمه خلاص نومي وما تشيلي هم ربنا معاهو قالت لي تمام وطبعا مستحيل تنوم الليل كلو تتقلب انا متاكده انها تفكر اتندمتا اني وريتا كانت كويسه الصبح اذن قامت تصلي وتدعي وتبكي
مرت الايام واحمد اظنو اتزوج مهاد لانو صهيب كلمني ورسل لي صور العرس نهاي ما وريتن لي امي لانها من تسمع عنهم خبر حالها بتبدل وبتبكي صهيب قال لي احمد جا الخرطوم لشهر العسل وكلمتو انو يجيكم ما عارف ح يجي ولا لا قلت ليهو لا لا ما يجينا قال لي جاي لي امي ما جاي ليك قلت ليهو امي بتتعب لمن تسمع الموضوع دا قال لي تمام انا مالي وهو ياريتو اجي قفلت منو وكنت مضايقه اتصل علي وليد رديت عليهو وكنت زهجانه قال لي نوسه مالك عيانه ولا حاجه قلت ليهو لا م عيانه كيفك ووين مشيت قال لي اتحولت جامعه ام درمان الاسلاميه انتي كيفك قلت ليهو كويسه الحمد لله
قال لي مالو صوتك تعبان كده وكانك مخنوقه او عيانه م رديت عليهو بقيت ساكته واتنفس بضلعي قلت ليهو ماف شي وسكت قال لي نوسه سمعتي الحادثه الحصلت قبل شهر في الجامعه صاح قلت ليهو ياتو حادثه قال لي مهاد وماتعملي فيها نفسك ما فاهماني قلت ليهو جد كنت ما فاهمه قلت ليهو وقالو كذب دي ما هي قال لي القال ليك منو دي ما هي دي هي ولمن ودوها الشرطه انا حضرت معاهم اتصلت علي امها تبكي وبعد التقرير الشرعي اتاكدنا انو دي هي وكانت ح تتحول للنيابه بس عارفه البلد دي واسطه بتطلعك قلت ليهو كيف وبقيت اتمتم قال لي ما عارف امها كانت بتبكي ومسكت تلفونا ما خلت واسطه ما دخلتا الشي الحيرني مني دي عرفت الناس ديل من وين وكلهم رتب كبيره شويه كده جا اتصال للماسك قضيتا فجاه شطب البلاغ وطلعها وانا للان راسي شاطب والشاطب راسي اكتر وما مصدقو هل صحيح اخوك اتزوج مهاد انا غلبني ارد سكتا واتبكمتا قال لي نوسه صحي قلت ليهو للاسف اي قال لي حرام عليك حق اخوك في رقبتك من غير م اشعر قعدتا اكورك فيهو قلت ليهو كيف تقول لي حق اخوك في رقبتك اخوي انا وريتو عديل قلت ليهو قليله ادب بس هو اتهمني اني بتهجم عليها بالكلام واتزوج من غير رضانا وما كان بيدي شي قال لي لا بي يدك كان تمسكي سماعه التلفون وتتصلي علي وخلي الباقي علي قلت ليهو م ح تقدر تعمل حاجه اخوي راسو قوي قال لي لا كان ح اعمل بس خلاص قسمتو كده نسال الله انو هدايتها تكون علي يدو ويسترها قلت ليهو فكرك ح تخلي البتعمل فيهو دا قال لي لو تابت ح تخلي اي شي بس ان شاء الله اخوك اكون كارب قاشو قلت ليهو من الناحيه دي اخوي نار وح يولع فيها قال لي بس خلاص نسال الله ليها الهدايه والموضوع دا انسيهو قلت ليهو اصلا لاني عملت العلي وبي زياده بس قسمتو كده قال لي م مشكله لخير ياعالم البحصل شنو وانتي كيفك كويسه قلت ليهو الحمد لله كويسه قال لي تمام ابقي ع روحك عشره وسلام قفلت منو دخل علي اتصال مكالمه رديت لقيتو احمد قال لي وصفي لي محل ساكنين كلمت امي قالت لي ولا دقيقه م بنتظرو وطلعت قالت لي اوعا تناديني وصفت ليهو البيت وجا طبعا فرحان فرح لدرجه انو بقيت بعاين ليهو بدهشه وطبعا مهاد ما شافتني من دون نقاب م عرفتني انا المعاها في الجامعه وطول ماهم قاعدين تتنايص فيهو وتدلع ولا خجلو منو واحمد ما ياهو احمد اخوي الصعب كانو في عالم تاني اخدو قعدتهم وقال لي المره الجايه بنجي وامي قاعده وفاتو امي خلتهم طلعو وجات تتنفس بي ضلعها قالت لي م تحكي لي ولا حرف اسكتي هوووس سكتا ما قلت ولا شي وكتمتو في قلبي وامي تترشرش بالمويه والدنيا تلج وهي قالت مسخنه وانا بس قاعده في ركن وبعاين بعيوني
لف يا زمن ودور واشوف ليك في الجامعه منو مهاد لابسه لبس خليع والرسم والدخان وريحه العروس اصلا حالها ما حال طالبه لمن راسي صدع وقفت براقب فيها من بعيد و عيني ما تشوف الا الولد البجيها كل مره بي عربيتو نزل فتح ليها باب العربيه زي الملكه مسافه يمشي يركب انا وقفت جنب باب العربيه وقلت ليها انزلي سريع وجريتا من شعرا بقت تكورك وبتقول لي انتي منو عشان تتهجمي علي ومالك ومالي ودا زوجي طوالي رفعت ليها النقاب بقت تتمتم قالت لي نوسه …………يتبع
لقراءة باقي الفصول اضغط هنا