الفصل السادس عشر16
بقلم نسمه عبدالله
قلت ليها معليش ي امي والله بس انتي جربي تتحكمي في نفسك و انتي مغيوظة من ابوي المتزوج عليك من سنين ، اتوقعت ردة فعل مختلفة تماما قلت احتمال تصرخ تنفعل بس ولاا ..قالت لي بهدوء عرفتي يعني ، قلت ليها بصدمة انتي عارفة و ساكتة ، قالت لي ي عويرة طلقها زمان ، قلت ليها طلقها ، قالت لي أااي سنة م تمت طلقها و انتو لا سمعتو لا جبتو خبر ،قلبي ارتاح وقلت مع نفسي امي قادرة وترت نفسي سااي عاينت للبت النايمة بهدوء و قلت اسي دي نعمل ليها شنو مسكت راسي و قلت بفكر في الموضوع دا بعدين ، قعدت و شوية نفسيتي ارتاحت بس لحظة اذا انا كنت م مولودة كيف ح يكون عندي خبر ب عرس ابوي ،عاينت لأمي بتردد و قلت ليها امي ، قالت لي نعم. قلت ليها متين ابوي عرس ، قالت لي قبل سنتين يمكن تتذكري ايام كدا كان ببيت برا البيت ، ... سنتين!!! بس دا قبل ٢٤ سنة ، عاينت لأمي و قلت ليها و اسمها منو قال ، قالت لي رضية ولا سعدية م متذكرة ، ضحكت و قلت ليها طيب و رزاز ، قالت لي رزاز منو ، قلت ليها ابوي متزوج قبل م انا اتولد ي يمة وحدة اسمها رزاز ، اتخلعت و وقفت على حيلها و قالت نعممممم رزاز ، قلت ليها اااي رزاز ، قالت لي رزاز فضيل، قلت ليها شي زي كدا ، وقفت و بقت تجوط و تتحسبن و تقول انا يتزوج علي الما نافعة دي ، انا زينب يعرس علي الما شبه النسوان رزاز الوسخة ، قلت ليها امي رزاز منو ، قالت لي ابوك الخاين كذب علي خلي يصبر لي بس انا ثانية م ح اقعد في البيت دا ، انا زينب الكل الحي كان واقف على كلمة منها يعرس فيني رزاز السجمانة ، اتخلعت من ردت فعلها و دي منو رزاز دي كمان شكلها عدوة لامي طلعت من تفكيري على صوت امي العالي و هي ماشة و جاية و تنقنق لحد م تعبت قعدت في السرير تضرب و تتحسر كنت بعاين ليها و م عايزة اقطع لحظة الندم دي بس جديا كدا ابوي دا عندو هدف و خطة نحن م عندنا بيها علم ، عاينت لأمي لقيتها لسه تندب حظها و فجاءة سكتت كأنها بتستوعب حاجة بعدين اتلفتت علي و قالت و انتي عرفتي من وين ، قلت ليها امي عايزة أسألك، قالت لي سألتك عرفتي من وين ،قلت ليها انتي بتعرفي شنو عن ابوي ، قالت لي انتي البتعرفي عنو شنو ، قلت ليها ابوي دا مستغلنا ل سبب نحن م بنعرفو ، قالت بوجع ياريتني لو سمعت كلام ابوي قال لي ي بتي الزول دا م زول كويس و حالتو تعبانة و انا الهبلة قلت ليه ي ابوي جاب البيت الباقي هين اتاري لا الجاي جا و لا الفي قعد ، قلت ليها امي ليه نحن قاعدين في الاجار ، قالت لي م ابوك ضيعنا بالقمار خلانا عكس الهوا و ضيعنا حسبي الله ونعم الوكيل فيهو هو السبب اني بشتغل كدا انا عشان م نبيت جعانين بعمل حاجات م بترضى الله و عاملة لي سمعة و في النهاية اكتشف اني عانيت و هو متزوج رزاز الكلبة ، قلت ليها رزاز دي منو ، قالت لي مش عمك عبدالإله كان عاقد و العقد اتفسخ، قلت ليها اي ، قالت لي كان عاقد على السجمانة رزاز ، قلت ليها امي بطلي تنبذي البت ، قالت لي ابطل؟؟تعرفي أطلقت من عمك لشنو عشان طلعت بتحب ابوكي و هو ب ولدو و ابوك كمان م قصر والله لو عبدالإله عرف بالكلام دا يقطع علاقتو بيه دنيا و آخرة تخيلي عليك الله عرسها الوسخة عمك زاتو لمن طلبت الطلاق قال الحمدلله و شوفي ابوك مشى يلملم كرور التانيين . الله يجيب ...سكتت م قدرت تتم كلامها ، كنت قادرة اشوف الحسرة جوا عيونها ل امي رغم كل شي و كل الغيوب الموجودة في ابوي بس لسه بتحبو ، بس عرسها من الاسمها رزاز دي القشة القسمت ضهر البعير ، قلت ليها ابوي دا لعب علينا لعبة وسخة شديد ، قالت لي قصدك شنو، قلت ليها قروش الغسيل البشيلها مني بوديها وين ، قالت لي القمار ، قلت ليها ي اما ابوي دا م بلعب قمار ...، قاطعتني و قالت م بلعب شنو و الدنيا كلها عارفة ، كملت و قلت ي اما بيلعب بس بالقليل ، قالت لي قصدك شنو، قلت ليها بيت الرياض موقعو وين من النحن فيهو دا ، قالت لي بيت الريااض؟ قلت ليها ابوي عندو بيت في الرياض ي يمة ، قالت لي بعدم تصديق هي هي هي هي ماف كلام زي دا ..هو نحن بسبب عدم القروش الناكلو م لاقين خلي لمن يشتري بيت ، قلت ليها امي انتي طلعتي م بتعرفي ابوي دا ، سكتت و م ردت يمكن عشان كلامي صح ، قلت ليها طلع عندو بيت و متزوج و عندو قروش كمان و لو صبرنا شوية حيشتري عربية، شايفة دمعتها نزلت بس مسحتها و عملت نفسها م مهتمة و انا عارفة انها بتقسى على نفسها عشان عمرها م اتعودت تكون ضعيفة ، قلت ليها لحظة، مشيت جبت الصندوق مع اني م كنت عايزة اقول ليها بس برضو الغش العشنا فيه دا الدهب و البيت كلو قليل قصاده ، ختيتو قدامها و فتحتو قلت ليها اتفرجي ابوي يعمل شنو السنين دي كلها انا اغسل و اشتغل عشرومية شغلة و هو يشيل و يودي القروش القمار ولا يحتفظ بيها؟؟ ، امي مدت يدها و هبشت الدهب و عاينت للفواتير بوجع عاينت لي و قالت يمكن عايز يريحنا بعد الشقى دا كلو ، قلت ليها يريحناااا؟؟ امي انتي جادة شوفي التواريخ البيت دا ليهو تلاتة شهور باسم ابوي و الدهب دا قرب يتم السنة منو يعرف عايز يعمل بيه شنو يمكن عندو بنات من الاسمها رزاز يمشي يعزها بهناك و نحن يكتلنا الشغل امي حي الرياض دي حي للناس الما شبهنا تخيلي بيت في حتة زي دي ح يكون سعرو كم دا يشتري تلاتة بيت في حي زي حينا دا ، سكتت للحظة بعدها قالت طيب نخلي البيت ، قلت ليها لا م نخلي نقعد و نشوف ح يعمل شنو بالحاجات دي و اول م تجينا فرصة نمشي ، قالت لي م بتحمل انا و هو نقعد في نفس البيت ، قلت ليها لا تتحملي عشان بعد الشفنا دا أقل من حقنا ، قالت لي و نعمل شنو يعني ، قلت ليها نخلي الشغل و الطباخة لا يأكل لا يشيل قروش ، قالت لي يمكن م يعمل لي انا شي لكن انتي يضبحك ، قلت ليها بشوف لي صرفة م تخافي