رواية بواقي روح
الفصل الاول1
بقلم نسمه عبدالله
خاتة يدي على خدي و متكيه على الكاونتر و بعاين لللساعة ب ملل فاضل خمسة دقايق و دوامي ينتهي و بعدها لازم الحق المواصلات ..سمعت صوت خطوات طوالي نزلت يدي و قلت ...اهلا و سهلا فيكم في البرنسيس هوتيل ...قطعت كلامي لمن لقيتهم كلهم خواجات ...قلت ..
Welcome to Princess hotel for hospitality tresiom and shopping
" اهلا و سهلا فيكم في البرنسيس هوتيل للضيافة و السياحة و التسوق"
رد علي ب ابتسامة
Thanks
"شكرا"
قلت ليهو how I can help you
"كيف اقدر اساعدك"
قال
Taha will come and take care of that
" طه ح يجي و يهتم بالموضوع دا "
هزيت راسي و أشرت ليهم علي مجلس الاستقبال على بال طه دا م يجي ...عاينت للساعة و فضل دقيقتين ...قلت مع نفسي...الزمن ماشي براحة لشنو ...سمعت صوت بقول ..يمكن عشان انتي مستنية يعدي ...رفعت راسي لقيت شاب طويل القامة و عريض المنكبين حليق الرأس و عامل دقن محددة ... انتبهت لنفسي سرعه ونضفت حلقي و قلت تحية الفندق ..اهلا و سهلا فيك في البرنسيس هوتيل ...قال لي ..متشكر ..قلت ليهو ..كيف اقدر اخدمك...قال لي ...عايز افخم شقتين في الهوتيل ..قلت ليهو لحظة ..اتناقشنا في التفاصيل قلت ليهو ...ل كم يوم ...قال لي ..اسبوع...قلت ليهو...مليون و أربعمئة للشقة الواحدة...عاين لي و قال قصدك مليار ...هزيت راسي وقلت مع نفسي اكيد ح يتراجع مع السعر دا ...قال لي طيب ...قلت ليهو ...كاش ولا بنكك ...قال لي ..بنكك ..و حول المبلغ ...ابتسمت و انا بمد ليهو يدي ب المفاتيح و قلت ...الشقق ملكية شاملة ل جميع خدمات الاكل و النضافة...إقامة سعيدة..قام و مشى على الخواجات الجو قبل شوية .. قلت مع نفسي اسم طه جاي معاه شركة بس ، طلعو مع مسعد " الدليل حق الفندق " عشان يدلهم على الشقق ...عاينت للساعة لقيتها الساعة ٣ و عشرة دقايق..بديت الملم عفشي عشان اطلع سرعة بس رميساء م جات عشان تستلم ورديتها اتلفت لما سمعت صوت كعب عالي شبكت يدي وانا بقول ...اهلا و سهلا في...قطعت كلامي لمن شفت البنطلون الجينز اللبني و القميص الأبيض عليهم جاكت بني بعد الركبة و بوت بني عامل الصوت دا ...عاينت ل وشها..و قلت ياربي دي سودانية ...هي زاتها اتخلعت لمن لقتني بعاين ليها ب الطريقة المصدومة دي...كسرت عيني و قلت التحية بتاعت الفندق و قلت ...كيف اقدر اساعدك...قالت لي ...عايزة غرفة ..قلت مع نفسي شكلها مرطبة ف طوالي عرضت عليها ..وقلت ..عندنا الجناح الملكي..قالت لي. ..لا لا حاجة سعرها معقول قلت ليها..غرف الأميرة في الطابق التالت قالت لي ...و دا بكم يعني ...قلت ليها اليوم ب ١٠٠الف، عاينت لي بضيق و قالت ارخص ..قلت ليها عفوا .. قالت لي بصوت عالي ارخص من كدا عايزة ارخص شي عندكم ، اتخلعت من نبرة صوتها و قلت ليها احم الشعب المرجانية ٥٠ الف اليوم خالي خدمات الضيافة و النضافة ، بقت تتمتم بضيق و قالت دا ارخص شي عندكم ، ضبطت اعصابي و ابتسمت غصب وقلت ليها بطاقتك و بطاقة محرمك لو سمحتي ، عاينت لي برفعة حاجب و قالت نعم محرمك!!!، قلت ليها يعني الشخص المعاك ، قالت لي لا انا جاية براي ، هزيت راسي برفض وانا بقول لا سياسة الفندق م بتقبل تستقبل أنثى بدون محرم ، قالت لي دي سياسة شنو ، قلت ليها ب استفزاز الفندق ، رزعت شنطتها بزهج و شالت تلفونها مشت بعيد و شايفاها بتجوط ، قلت مع نفسي عليك شوف الأشكال دي ، حسيت بخبطة على كتفي و صوت رميساء بقول الف مرة ي إسراء بقول ليك لمي لسانك لانو لو العميل سمعك و اضايق و وصل الشكوى ل استاذ فيصل ح يفصلك و يطبق معنى اسمو فيك ، ختيت يدي على خشمي و قلت معليش لساني م اتعود لسه ، قالت لي انتي لسه جديدة و م شفتي شي والله يجوك أشكال حسبي الله بس ، قلت ليها وووب علي انا اقعد ارغي معاك و المواصلات تفوتني و ابوي يفوت يحفر قبري ، ضحكت و هي بتعدل حجابها قالت لي طيب اديني تفاصيل الزبونة و الحقي المواصلات ، اديتها التفاصيل و طلعت غيرت البدلة و لبست عبايتي و مرقت سرعة و انا بخفف رجلي لانو مواصلاتنا صعبة و الفندق من الموقف مسافة عشرة دقايق مشي ، في مواصلات بس بوفر على نفسي ...في طريقي كل يوم بعدي ب مركز الشرطة و منها بالمحكمة الجنائية و دايما بتكون فاضية بس الليلة كانت ملانة ، ناس كتيرة خارج أسوار المحكمة نظرا ل انو م مسموح للعدد دا بالدخول ، مررت نظري على الناس بملل ياربي القضية شنو متلمين للدرجة دي ، يلا م شغلتي رميت نظرة اخيرة على جدران المبنى و واصلت طريقي ...كان حلمي ابقى شرطية و احل قضايا و الحركات دي بس ليس كل م يتمناه المرء يناله .. درست كورس لغة انجليزية و كورس للفندق و السياحة مجان ، و بواسطة دخلوني قبل تلاتة اسابيع فندق البرنسيس مرتبهم بسيط بس احسن من العدم ..
قصاد المحكمة كان في شاب فاتح طبلية فيها شوكولاتات و لبان جرابات و حاجات يترزق بيها ، دايما بشتري شكولاتة ماندولين لنفسي ، فتحت شنطتي طلعت الف جنيه مديتها ليه و قبل اقول ليه طلبي لقيته اداني الشكولاتة ابتسمت و انا بشيلها و هو بدورو ابتسم و قال معليش ي دوب فتحت و فكة ماف استني على بال م اجيب فكة ..
هزيت راسي أشر لي على مقعد البلاستيك قدام الطبلية و مشى ، قعدت وانا بعاين للناس قدام المحكمة و ريحة الند المختوت في الطبلية بتدغدغ حواسي و رشة الموية قدامها عاملة جو لطيف ، شلت نفس عميق و انا بريح ضهري على ضهر الكرسي و اتمني الزمن يقيف عشان استمتع باللحظة دي