رواية عودة عاشق الجزء الثاني2الفصل الثالث3 بقلم منة الله الجزار
كايا أخد فونه واتصل على بلال... بلال عاوزك تحجز ليا تذكرة لازم أسافر النهاردة.
بلال باستغراب.. مسافر رايح على فين؟
كايا بشرود قدامه.. نازل الصعيد.
بلال كان بيشرب شرق وقعد يكح.. بغضب.. إنت مجنون يا كمال نازل الصعيد تعمل إيه؟
كايا.. اسمع اللي قولتلك عليه ونفذه بالحرف الواحد إنت فاهم.
بلال بتنهيدة حزن.. كمال أنا خايف عليك هتروح هناك هتنهار اسمع كلامي يا كمال هناك خطر عليك وبعدين ما تنساش إنهم عارفين صوتك.
كايا بسخرية.. هما أصلاً هيبقوا فاكرين صوتي اللي عدى عليه سنتين من غير ما يسمعوا وبعدين هما نسوا صاحب الصوت هيبقى يفتكروا صوته.. وختم كلامه بحزن.
بلال..بحزن على كمال... بلاش يا كمال الله يهديك.
كايا.. أنا أخدت قراري يا بلال هنزل الصعيد وهكون قوي وأفرح فيهم وأشمت فيهم زي أي حد هيشمت إن خلاص خلص من مراد للأبد وبكدا هاخد حقي.
بلال.. طيب بص إحنا رجالتنا هناك هنخليهم يصوروا لينا المشهد وبلاش روحتك قلبي مش مطمن يا كمال.
كايا.. لا عاوز أدفنه بإيدي عاوز أتأكد بإيدي إنه خلاص مراد خلصت منه وأخدت حقي.. صح مش أنا اللي كنت السبب في موته بس العدالة الإلهية خدت حقي منه من غير ما أوسخ إيدي بدمه.
بلال بتنهيدة.. خلاص هنزل معاك مش هسيبك لوحدك يا كمال وطنط سكر هنزود الحراسة عليها أوي عشان لو حد يقرب منها تمام رجلي على رجلك يا كمال إنت فاهم مش هسيبك لوحدك وخلص الموضوع.
كايا.. تمام
قفل مع بلال وطلع عشان يجهز نفسه قبل السفر وهو مخنوق كان لازم يكون فرحان هو خلاص خلص من عدوه الوحيد زي ما هو بيقول بس ليه كان مخنوق أوي كدا ما كانش حاسس إنه بيعمل حاجة صح لبس وخلص وقال للخدّامة تجهز ليه هدومه في الشنطة وتجيب كل الهدوم السودة اللي عنده راح الأوضة اللي معلق فيها صور مايا ومراد ومازن وحسناء وإنجي جاب قلم وعمل علامة إكس على صورة مراد وفضل باصص ليه وبعدين بدأ يضحك ضحك كتير بهستيرية..
كايا.. مراد أخي العزيز بجد إنت كنت أبويا التاني بالعكس إنت كنت بتقف قدام الكل عشاني وأنا كنت بحبك حب أبوي مش أخوي شوفت بقيت فين روحك طلعت للرفيق الأعلى جنب حبيبتك إنجي والدور الجاي على ولد عمي الحبيب مازن وحسناء هدمركم سوا ولما مايا تكون لوحدها هكون أنا جنبها وهتحبني أنا هنسيها مراد واللي جابوا مراد كمان بس إنت اصبر بس دلوقتي أكيد مايا منهارة وعاوزة إيد تطبطب عليها والإيد دي هتكون إيدي يا أخوي أنا طلبتها منك قبل كدا وإنت ما وافقتش عادي جداً دلوقتي أنا اللي هاخدها وإنت مش هتبقى موجود وقتها تمنعني هه هه.
وقعد في الأرض وكور على نفسه وقعد يعيط بهستيرية.
... مراد بكرهك يا مراد.
ـــــ
عند مراد
مراد.. بزهق.. مازن بطل تفاهة ويلا عشان نمشي من هنا أنا مش طايق المستشفى دي.
مازن.. يالهوي على قلبتك يكون في عونها بت يا مايا طنط جميلة كانت بتدعي عليكي ليل نهار.
مايا.. ليه؟
مازن.. عشان هنجوزك مراد.
حسناء.. بخبث.. بس أنا مش موافقة.
مراد بغيظ.. بت إنتِ حد طلب إذنك مازن خد مراتك وغور من هنا.
مايا.. بس مين قالك إني هتجوز مراد.
الصدمة وقعت على الكل وأولهم مراد.
حسناء بصدمة.. أمال مين اللي كانت واقعة من شوية وسلامتك يا روحي يا بت.
مازن.. بهدوء.. اهدي يا حسناء.
مراد..بصدمة.. ليه؟
مايا والدموع في عيونها.. عشان مراد جوز أختي.
ومايا سابتهم وخرجت على بره وقعدت تعيط حسناء خرجت وراها وأخدتها في حضنها.. اهدي إحنا هنعمل اللي إنتِ عاوزاه.
مايا بدموع.. بحبه أوي يا حسناء بس مش قادرة أسامحه.
حسناء.. اهدي بس منه لله اللي كان السبب.
مايا بوجع.. قلبي بيوجعني أوي يا حسناء بس كرامتي برضو فوق كل حاجة.
حسناء.. بحزن وبصت على مازن اللي خرج بعدهم بدقايق مازن بص لمايا بحزن وسابهم ومشي.
جوه لما مايا خرجت.
مراد فضل باصص عليها بقهر وبص لمازن اللي بصله بحزن وهناك كانت عيون شماتة فيهم وبالأخص في مراد وكانت هند في سرها..
.. والله ولقيت حد بيعرف يكسرك يا ابن العزايزي بقى دي مايا وأنا أقول البت المسهوكه دي شوفتها فين قبل كدا أتاريها دي سبب العداوة بين الأخين والله هتجيبي ليا حقي من المفتري ده وأشوفه بتنكسر شوكته قدامي.
جليلة بحزن.. مازن يا ولدي قوم شوف الدكتور يشوف أخوك عشان نخرج من المخروبة دي.
مازن.. حاضر يا مرات عمي.. إني هخلي الرجالة يجيبوا عربية تركبوا فيها إنتِ ومرات عمي التانية وحسناء وأنا هاخد مراد ومايا معايا.
جليلة.. ماشي يا ولدي.
مازن خرج.. وراح خلص الإجراءات وخلص كل حاجة وبعدين جه أخد مراد وغير ليه هدومه وأخدوه ومشيوا.
في الطريق كان مراد راكب قدام جنب مازن ومايا ورا وكل شوية مراد يبص عليها من المراية ومايا متجاهلة أو بتحاول تتجاهل زي ما هي مفهمة نفسها بس عيونها كانت بتدمع.
مراد لف وشه ناحية الطريق وبيتمنى الزمن يرجع دقيقة واحدة يصلح بيها اللي عمله زمان بس خلاص ما بقاش ينفع.
مازن كان زعلان عليهم وحب يفك الجو شغل أغنية بس ما كانش يعرف أنهي اللي هتشتغل أهو شغل أول واحدة جات في طريقه.
كانت أغنية تيري ميري.
اشتغلت الأغنية مازن كان هيطفيها بس مايا منعته.. سبيها يا مازن.
مازن.. تمام.
مراد رجع راسه على الكرسي ورا وغمض عيونه بألم وكأن الأغنية بتوجعه أكتر وأكتر.. ولعن مازن والأغنية ونفسه مع بعض في نفس الثانية.
مازن.. بعد دقايق معدودة وصلوا.
مازن نزل ونزل فتح الباب لمراد ونزله سنده ونزلوا دخلوا على جوه كانت حسناء ساندة جليلة وهي داخلة لأنها ما بتشوفش.
دخلوا جوه وقعدوا مراد في الصالة بهدوء.
هند حابت تبين نفسها إنها خايفة على مراد.. حمد لله على السلامة يا ولدي نورت بيتك.. وبصت لمايا على إنها ما تعرفهاش.. مين العثل دي يا حسناء شايفها جاي معاكم من مصر والله يا بتي فيكي الخير إنك تيجي تتطمني عليه هترجعي معاهم ولا لوحدك.
مايا حست بالإحراج وإنها بتتطرد بطريقة غير مباشرة.. لا يا طنط أنا هبات في أوتيل هنا وأمشي الصبح إن شاء الله.
مراد بغضب.. ومازن برضو بانت على وشه علامات الغضب لا الكل بقوا كدا.
مراد.. مايا هتفضل هنا ده بيتها ومحدش يقدر يقول عكس كدا يا مرات أبوي وبعدين لو مش عاجبك وجودها ممكن تتفضلي إنتِ من هنا أما مايا مش هتتحرك من جنبي مكان مايا مكاني.. ياريت تفهمي الحديث ده صح يا مرات أبوي.
هند بغيظ وخبث.. افتكرتك مايا مش إنتِ اللي كان مكتوب كتابك على مراد وإنتِ برضو اللي رميتيه الرمية السودة في الحبس.
مازن بغضب.. مرات عمي ما تفتحيش في مواضيع هتفتح عليكي نار مش هتقدري تسديها عدي الدنيا النهاردة.
هند بخبث... أنا قولت إيه يعني أنا افتكرت البنية بس وعمالة أقول شوفت السحنة دي فين قبل كدا.
جليلة بغضب