رواية اختفاء عروسه في شهر العسل الفصل الثاني2بقلم ياسر عوده
وزي ما اتوقعت جالي اتصالات كتير بتستعجل القبض على الجناه، وانا اصلا ماعنديش تأكيد ان الجثه اللى لقناها في العربيه هي نفسها جثه ساره، رغم ان الاحتمال الاكبر طبعا انها تطلع هي، والسبب ان عامر زوج ساره لما شاف الملابس المتبقيه عليها واللى كانت قليله اوي قال انها فعلا ملابس مراته ساره.
طلبت من عامر انه يجيلي قسم الشرطه، ووضحتله المشكله اللى احنا فيها، واننا محتاجين نتأكد ان الجثه اللى في العربيه هي فعلا جثه ساره مراته ولا جثه تانيه، والغريبه ان عمار اكدلي وقتها انها جثه ساره، كان عنده احساس انها مراته فعلا، بس انا فهمته اننا مابنمشيش بموضوع الاحساس دا ولازم دليل مادي، وفهمته اني عاوز شخص من اهل ساره من الدرجه الاولي، وقتها هو قالي حاجه غريبه جدا، قالي انه مابلغش اهل ساره باي حاجه من اللى حصلت، لانه مش عارف هيواجههم ازاي ويقولهم ان بنتهم ماتت بالطريقه البشعه دي.
رغم ان تصرفه كان غريب بس انا طلبت منه انه يبلغهم ويطلب واحد منهم يحضر علشان نقدر نعمل تحليل الحمض النووي، بس لما لقيته متردد في الموضوع ده وطلب مني يومين علشان يشوف ازاي هيبلغهم، وقتها انا قررت اتصرف لوحدي، واتواصلت مع شخص من سفاره البلد اللى منها ساره، وطلبت منهم يبلغوا اهلها وفعلا دا اللى حصل، وخلال 24 ساعه بس حضر ابو ساره، واللى كان في حاله انهيار شديد من الخبر اللى سمعه، وكان اسمه الحسيني.
بس الحسيني كان متعاون جدا، وكان على استعداد يعمل أي حاجه في مقابل انه يعرف مين المجرمين اللى عملوا كده في بنته وكمان يتقدموا للمحاكمه العادله.
وقبل ما انسى لما عرضنا الجثه اللى لقناها في العربيه الاجره على الحسيني لقيته بيقولي:
-لا يا فندم، دي مش بنتي.
-وانت عرفت منين انها مش بنتك؟
-احساس داخلي بيقولي انها مش بنتي.
وقتها كنت مستغرب من الناس دي، جوزها بيقول هي والسبب ان عنده احساس داخلي بيقوله انها هي ساره، وابوها بيقول مش هي وبردوا بسبب احساسه، على العموم التحليل هو اللى هيثبت ويعرفنا مين فيهم احساسه صح ومين احساسه غلط.
كلنا كنا مستنين نتيجه الطب الشرعي، واخيرا طلعت النتيجه واللى كانت مفاجأه ليا انا شخصيا، الجثه اللى كانت في العربيه مش جثه الدكتوره الجامعيه ساره، ووقتها اتأكدنا ان احساس الحسيني كان صحيح، ورغم اني كنت مبسوط ان في احتمال ان ساره لسه عايشه، بس انا بقيت قدام قضيتين مش قضيه واحده، الاولى قضيه خطف ساره واللى الدنيا كلها مقلوبه عليها، والقضيه التانيه وهي جريمه القتل، مهو الجثه اللى لقناها في العربيه واللى مش بتاعت ساره اكيد مرتبطه بجريمه قتل وليها حكاي هتانيه خالص، ولازم احقق فيها، ويمكن لو حققت فيها اعرف الرابط اللى بنها وبين ساره.
انا ابتديت شغلي على طول، بعتنا كل المواصفات اللى قدرنا نوصلها عن الجثه المجهوله لكل اقسام الشرطه الموجوده في جميع المحافظات، والرد جالنا بسرعه جدا اسرع مما نتخيل، وكان الرد ان في محضر تغيب معمول في قسم شرطه، والمحضر دا ماكنش تغيب وبس، لا كان مرتبط بمحضر تاني بالسرقه، والغريبه ان المواصفات الموجوده في المحضرين متطابقين تماما مع مواصفات الجثه المجهوله اللى لقناها، واللى موجود في المحضرين ونبداء بمحضر السرقه لانه كان الاقدم:
المتهمه بالسرقه وحده اسمها سماح، ودي تبقى الشغاله اللى بتشتغل في بيت المهندس احمد ومراته الست منال، وكانوا بيتهموا سماح الشغاله بانها اختفت وسرقت معاها كل الفلوس والدهب اللى كانوا في البيت، والفلوس كان حوالي 20 الف جنيه، والدهب اللى كان موجود كان يعدي ال 250 الف جنيه، وكانت الاقوال اللى موجوده في المحضر طبقا لـ اقوال الست منال:
-في البدايه لما سماح جت تشتغل عندنا كنت بلاحظ عليها تصرفات مش مريحه، هي تقريبا ماكنتش راضيه عن نفسها وعن عيشتها، ودا انا انتبهتله من نظرتها في البيت، كانت عينها بتتعلق في الحاجات اللى هي مش متعوده تشوفها، كنت شايفه نظره الانبهار على عنيها، ولما نبهت جوزي احمد على الموضوع ده، كان بيرد عليا وبيقولي انها بنت غلبانه ومن الارياف، واكيد مش متعوده تشوف الحاجات اللى هي شيفاها هنا، وانها مع الوقت هتتعود واحنا صعب نجيب شغاله غيرها ابدا.
كنت مضطره اسمع كلامه واعمل نفسي مش واخده بالي من اللى بيحصل، بس الحقيقه ان اللى حصل بعد كده ماكنش كويس خالص، انا ابتديت الاحظ ان في حاجات غريبه بتحصل في الشقه، الاول لاحظت ان في حد بيخرج هدومي من مكانها، وبردوا احمد ماكنش مصدق، بس انا كنت متأكده وطبعا كنت شاكه فيها هي، ولما راقبتها اتأكدت انها بتخرج هدومي وبتلبسها وبعدين بتحاول ترجعها مكانها، ولما اتكلمت مع احمد كان بيقولي انها بنت غلبان وقالي بلاش اواجهها واحرجها، والافضل اننا نشترلها هدوم جديده يمكن وقتها تبطل تعمل الحاجات الغريبه اللى هي بتعملها، ووافقته على كلامه وانا مش مقطنعه خالص بكلامه، وقبل ما تختفي سماح بكام يوم كنت بلاحظ ان في فلوس بتختفي من البيت، بس في البدايه مبالغ بسيطه وكنت مفكره اني صرفتها وانا مش فاكره، بس من جوايا كان عندي احساس ان سماح هي اللى كانت بتاخد الفلوس دي، وفضل الشك دا عندي لغايه لما كان عندي انا وجوزي مناسبه مهمه لازم نحضرها، فرح اخت جوزي وكلنا روحنا الفرح وسبنا سماح في الشقه لوحدها، ولما خلصنا الفرح ورجعنا كنا هلكانين جدا، وكلنا دخلنا ننام مع اني ماشوفتش سماح بس انا كنت متوقعه انها نايمه في الاوضه بتاعتها، مع اني كنت منبه عليها تستنانا علشان لو احتاجنا حاجه، بس التعب خلاني مابوصش عليها ودخلنا ننام، وتاني يوم الصبح لما صحيت انتبهت ان سماح ماصحيتش لغايه دلوقتي، وعلشان كده روحت للاوضه اللى بتنام فيها ولما خبطت عليها ومفتحتش فتحت عليها الباب، ولما عملت كده مالقتهاش موجوده في الاوضه، استغربت طبعا، وفضلت اتصل على رقمها بس رقمها كان مقفول، وبعدها مش عارفه ليه روحت اطمأن على الدهب بتاعي، انا كنت لابسه جزء منه وسايبه معظم الدهب في الدولاب، وكمان جوزي كان سايب مبلغ 20 الف جنيه في الدولاب.
دا اللى كان مكتوب في المحضر اللى كان معمول من حوالي ست شهور، وبعد المحضر دا بكام يوم اتعمل محضر تاني، بس المرادي اللى عملت المحضر تبقى الست حمديه، ودي تبقى ام سماح، وكان مكتوب في المحضر:
-انا وبنتي سماح مالناش غير بعض، دي اللى طلعت بيها من الدنيا كلها، حياتي كلها كانت عباره سماح بنتي، بس الحقيقه سماح طول عمرها مش عاجبها العيشه اللى احنا عيشنها، ابوها لما مات سبهالي وعندها اربع سنين، كانت صغيره ومش فاهمه حاجه وقتها، وسبنا من غير لا فلوس ولا ارض ولا حتى معاش نعيش بيه ويساعدنا على الظروف الصعبه، جوزي كان على باب الله وشغال باليوميه، وكنت لازم اصرف على بنتي من الحلال، وانا لا بعرف اقراء او اكتب ولا حتي اهلي يقدروا يسعدوني، انا ماكنش ليا غير اخت وحده وحالها مايفرقش عني كتير، المهم اني بعد تفكير طويل لقيت حاجه اعملها تساعدنا على المعيشه، انا كنت بخبز عيش وببيعه لكل سكان القريه، والموضوع دا ماكنش في مكسب كبير لاننا فلاحين، بس الناس كانت بتساعدني وبتشتري مني، وكنت عايشه انا وبنتي سماح على الفلوس اللى كانت بتطلعلي من بيع العيش اللى بخبزه، وسماح لما كانت صغيره كانت بتساعدني، واوقات كنا بنفطر ونتغدي ونتعشا العيش الحاف، وكنت حمده ربنا وشكرا فضله.
بس لما ابتدت سماح تكبر وتنتبه للعيشه اللى احنا كنا عيشنها ومابقتش عجباها خالص، وكانت بتقعد تتكلم وتقول ان احنا عايشين عيشه صعبه اوي، وان المفروض نعيش عيشه تانيه خالص، وفهمت وقتها ان سماح كبرت، وكنت بقول عادي من حقها تشوف غيرها عايش ازاي وتحلم انها تعيش زيهم، بس مع الوقت لما كانت بتكبر كانت ديما بتتعصب من عيشتنا ومن البيت المتواضع اللى احنا عايشين فيه، واول حاجه عملتها طلبت انها تخرج مع البنات اللى بتطلع تجمع القطن، بيبقى ليهم يوميه اكبر من الفلوس اللى انا بكسبها من خبيز العيش، انا ماعترضتش عليها مع اني كنت خايفه عليها، اصل الشغل في جمع القطن دا مش سهل وصعب وكله تعب ومفهوش راحه خالص، بس انا بردوا كنت فرحانه بنتي كبرت وعاوزه تشيل المسئوليه، ولما طلعت واشتغلت وكسبت اول يوميه ليها جتلي وهي فرحانه اوي، وادتني كل يوميتها وهي فرحانه بس قالتلي وقتها كلمه عمري ما هنساها، قلتلي شيفه الفلوس بجد مش اللى انتي بتكسبيه؟، وقتها حسيت قد ايه بنتي شيفاني صصغيره وقليله، بس انا ماحبتش اكبر الموضوع، وقولت مهما كان هي لسه صغيره، ولسه ماتعلمتش حاجه من الدنيا لسه، ولما هتكبر هتفهم انا تعبت علشنها قد ايه، بس واضح اني كنت غلطانه ومش فاهمه سماح كل يوم بتتحول وبتبقى شخص مختلف ازاي.
مع مرور الايام سماح مابقاش عاجبها يوميه جمع القطن، وابتدت تدور على شغلانات تانيه، وفعلا اتنقلت من شغلانه لـ شغلان هتانيه خالص، وكانت بتدور على أي شغل يكسبها فلوس اكتر، وكبرت سماح ولقتها في يوم من الايام جيالي وبتقولي انها خلاص قررت انها هتسافر على القاهره، انا اتصدمت لما قالت كده، وسألتها ليه هتنزل على القاهره واحنا مالناش حد هناك، وقتها قالت ان القريه بتاعتنا فقيره ومفيهاش شغل، ومحتاجه تنزل على القاهره تشتغل، وقتها ولـ اول مره انا اقف قدمها وارفض انها تعمل اللى هي عاوزاه، وكمان كانت اول مره اضربها وامنعها كمان، ووقتها هي دخلت على اوضتها وقفلت على نفسها، انا سبتها وقولت يومين وتعقل وتبطل تفكر في السفر، بس ماكنتش عارفه ان بنتي خلاص مابقتش تسمع كلامي ولا حتي مقدراني، انا كنت بشوف في عنيها نظره استكبار ليا، كانت شايفه انها تستحق ام احسن مني، والنتيجه لكل دا اني صحيت في اليوم التاني مالقتش سماح في اوضتها، لقتها مشيت لمت هدومها وسافرت، وقتها ماكنش بايدي حاجه اعملها وماعرفش هي راحت عند مين وحصل معاها ايه، لغايه لما الشرطه بلغتني ان بنتي متهمه بالسرقه ومش لقينها، فجيت اقدم محضر اختفاء علشان انا كمان عاوزه اعرف بنتي فين وحصلها ايه.
السؤال الطبيعي اللى سأله الضابط للست ام سماح:
-وليه استنيتي كل ده، ليه ماقدمتيش محضر اختفاء من ساعه لما بنتك اختفت؟
-علشان انا ماكنتش اعرف يعني ايه محضر اختفاء، الشرطه لما وصلتلي وسألتني عن سماح علشان الحاجات اللى اتسرقت من بيت المهندس احمد، واحد من افراد الشرطه هو اللى نصحني اني اعمل محضر اسمه محضر اختفاء، وعلشان كده انا هنا دلوقتي علشان المحضر ده.